P
Pal o Jesus Kristo pal ko tsiro, kai o Jesus Kristo boldo was.
Pale-tchiddo Pash i Israelitarja wan kolla pale-tchiddo, kai rikran pen gar ap kowa, hoi penas o Dewel lenge, te rikrenn le dren.
Kau koowa kras len pale-tchiddo:
Te chan le sawe tchirklen un viechen, hoi hunte chan le gar (dik 3. Mose 11).
Te tapran le ap i mulo mensheste oder viecheste (dik 4. Mose 19:11-22).
I djuwjengro koowa un i djungelo nasslepen (dik 3. Mose 12 - 15).
Sawo koowa kras len pale-tchiddo. Pal i tsiro nai wan le pale erligo. Jon hunte maran i vieches o Debleske un hunte thowan pen. An o Moseskre lila hi tardo, hoi un har jon hunte krenn kowa (dik 3. Mose 4 - 5, ninna 4. Mose 19). Te djiwan i menshe gar pal o Debleskro tchatchepen (dik: o Debleskre deesh laba), un mangan wawar deblen an, kras koi doosh len ninna pale-tchiddo glan o Debleste. Kanna hi jaake, kai djiwell nai kek mensho hako tsiro jaake har o Dewel lestar kamella. Doleske hi hakenes doosh ap peste un hi pale-tchiddo glan o Debleste. Doleske bitchras o Dewel peskro tchawes ap i phub, te merell lo i menshengri dooshake, jaake har an o phuro tsiro i viecho hunte meras i mensheskri dooshake. Koon kanna patsell, kai meras o Jesus leske, koles tchiwell o Dewel an o tchatchepen glan peste.
Kowa, hoi i menshes an o phuro tsiro pale-tchiddo kras, krell les kanna buder gar pale-tchiddo: O Jesus penella (dik: Marko 7:15):
Tchi, hoi an o mensheskro mui dren wella, krell les pale-tchiddo.
Kowa, hoi dran leskro dji win wella, kowa krell les pale-tchiddo.
Palstuno diwes Kowa hi ko tsiro, kai o Dewel i mulen pre djangrella, un o tchatchepen pral lende wi-rakedo wella.
Passa Pash ko baro diwes Passa was i biboldenge an o shero, kai o Dewel len glan i rah tsiro dran o them Egiptia win anas (dik: 2. Mose 12:17-21). An i rati, glan ko diwes, kai djan le dran o them Egiptia win, mukas o Dewel i phureder mursh tchawen i Egiptarendar merell. I Israelengre mursh tchawe atchan djido. Ap lengre wudja his o rat i bakrestar maklo, hoi hunte maran le. Har o Dewel mank o them Egiptia djas, un ko rat ap o wudar dikas, djas lo dureder un maras kekes, kai an sawo kheer his. Ko lab Passa kharella “djal dureder.” Hako bersh rikran i Israelitarja ko baro diwes Passa. Kau diwes penell lenge, te hi le buder gar pandle budepangre. Ap kau diwes hunte maran le i tikno bakro, hoi jon chan. Pash ko baro chapen chan le ninna shutlo senlepen, un pijan star tchare mool. Pal ko baro diwes Passa wan kol efta diwessa, kai jon kek shutlo maro chan.
Pontio Pilato Kowa his i Remarjengro baro rai an o them Israel an kol bersha 26 bis 36 pal o Jesus Kristo.