H
Hebrearja An o them Egiptia (1.350 bersha glan o Jesus Kristo) dan le i Israelitarjen o lab Hebrearja. Har i Israelitarja dran o them Babilonia pale an o them Israel wan (500 bersha glan o Jesus Kristo), his ko lab Hebrearja lenge i kutch lab. Ap ko tsiro penan le ap pengro tchinepen un rakepen: hebretikro tchinepen un hebretikro rakepen.
Hebretikro rakepen Gadjkenes: Hebräisch.
Henoch Kowa his i mursh, kai patsas soreles ap o Debleste un djiwas jaake, har o Dewel kowa kamas. Doleske las les o Dewel pash peste, jaake te meras lo gar (dik: 1. Mose 5:21).
Hermes I grichtikre menshe patsan, kai lengro dewel, hoi kharell Zois, bitchras o Hermes kate te kote ap i phub, te krell lo kowa, hoi job leske penas.
Herodes Ap o tsiro, kai o Jesus djiwas, djiwan bud mursha an o them Israel, kai kharan Herodes:
Herodes I. (Herodes, o ersto) his i baro rai an o them Israel an i bersha 37 bis 4 glan o Jesus Kristo. O Herodes I. djiwas, har o Jesus boldo was (dik: Mateo 2:1).
Herodes Antipas. Kowa his o tchawo o Herodestar I. Job his o baro rai pral i themma Galilea un Perea an i bersha 4 glan o Jesus Kristo bis 39 pal o Jesus Kristo. Kowa mukas o Johanneskro shero tele te dell (dik: Mateo 14:1-10).
Herodes Archelao. Kowa his i wawar tchawo o Herodestar I. O Herodes Archelao his o baro rai pral i themma Judea, Samaria un Idumea an i bersha 4 glan o Jesus Kristo bis 6 pal o Jesus Kristo.
Agrippa I. (Agrippa, o ersto). Leskro lab his ninna Herodes. Job his i tchakro tchawo o Herodestar I. Job his o baro rai an o them Israel an i bersha 41 bis 44 pal o Jesus Kristo. Kowa mukas o Jakobeskro shero tele te dell.
Herodia Koja his i romni o Herodestar Antipas (dik: Mateo 14:3).