Labengro Liil D

Debla (Gadjkenes: Götter) An o phuro tsiro mangan i menshe an wawar themma bud deblen an. Kolla his figure dran bar, kasht, sonakai un rup.

Debleskre deesh laba (Gadjkenes: Zehn Gebote) Kowa hi kolla deesh laba, hoi o Dewel ap dui buchle barra tchinas un o Moseste ap i berga Sinai das, te dell job len i Israelitarja.

Debleskre gilja Gadjkenes: Psalmen.

Debleskre menshe (Gadjkenes: Gottes Volk) An o phuro tsiro his i bibolde o Debleskre menshe. Kau diwes hi lauter kolla o Debleskre menshe, kai ap o Jesuseste patsenna.

Debleskri chatchepaskri (Gadjkenes: Altar)

I Debleskri chatchepaskri his kerdo dran barra (dik: 1. Mose 12:7) ninna dran kasht, kai saster pral his (dik: 2. Mose 27:1-8). Sawi sasterni chatchepaskri his tardo ap koi platsa glan o Debleskro kheer. An o phuro tsiro chatchran i menshe marede viechen ap o Debleskri chatchepaskri o Debleske. Har o Jesus i menshenge meras, was job har i maredo bakro, hoi las i menshengri doosh ap peste.

Debleskri harmenatsjona Kote, kai o Dewel peskre menshentsa khetne djiwella, djiwenn le har an i bari shukar harmenatsjona. Kote hi o Dewel o baro rai pral i menshende (dik: Mateo 25:34).

Debleskri glanstuni isema

O Debleskri glanstuni isema hi koi glanstuni isema an o Debleskro kheer. An i glanstuni isema his o sonakaskri momelengri, o sonakaskri chapaskri un o sonakaskro bob tardo. Glan i glanstuni isema his i bari platsa. Kote his o Debleskri sasterni chatchepaskri tardo, kai chatchran i rashaja kol viechen, hoi anan i Israelitarja o Debleske, te lell job lengri doosh lendar.

Debleskri kutch isema (oder: Debleskri palstuni isema) O Debleskri kutch isema hi koi palstuni isema an o Debleskro kheer. Kote his o sonakaskro mochton tardo (dik: sonakaskro mochton). An koleste his kol dui buchle barra tchiddo, ap koleste o deesh Debleskre laba tchinlo hi.

Debleskri shukar baar (Gadjkenes: Paradies) Ap ko tsiro, kai o Jesus djiwas, patsan bud bibolde, kai hi o Debleskri shukar baar an o triinto bolepen, kai jon pal pengro merepen djana un kote jaake rah atchenna, bis te krell o Dewel len pale djido.

Debleskro baro kheer

O baro rai Salomo kras o Debleskro baro kheer an o foro Jerusalem. Har i Babilonarja an o them Israel wan an i bersha 586 glan o Jesus Kristo, kran le o Debleskro baro kheer paash. Efta-deesh bersha pal kowa was o Debleskro baro kheer pale newes kerdo.

Debleskro diwes (Hebretikes: Sabbat) O eftato diwes. Kowa hi an maro tsiro o shobto diwes shobenge ap i rati (18 h) bis ap o eftato diwes shobenge ap i rati.

Debleskro djipen Kowa dell o Dewel lauteren, hoi ap o Jesuseste patsenna. O Debleskro djipen hi o djipen, hoi buder gar pre-herella (dik: Johanni 3:16).

Debleskro Ducho O hebretikro lab Ruach kharella ‘Ducho’. Har i phub kerdo was, his ko Ducho pral i bare panja. Un kowa kharas Ruach Elohim ‘Debleskro Ducho’. Har o Jesus ap o trushel meras, kras lo i drom, kai nai wenn i menshe pash o Debleste. Un har djas job an o bolepen, bitchras o Dewel peskro Ducho ap i phub (dik: Bitchepangre 2:1-13). Kanna dell o Dewel peskro Ducho hakeneste, kai ap o Jesuseste patsella (dik: Efesarja 1:13-14).

Debleskro lab I tseli Bibla: O phuro Testamento, ninna o newo Testamento.

Debleskro mochton (Gadjkenes: Bundeslade) Kowa his i kashteno mochton, kai sonakai pral maklo hi. Kote dren his i dui buchle barra tchiddo, an kolende o Debleskre deesh laba dren tchinlo hi. Ninna o Aroneskro kasht un o bolepaskro maro, hoi kharella Manna, his kote dren tchiddo. Pral pre ap o sonakaskro mochton his dui raile bolepangre dran sonakai tardo (dik: Hebrearja 9:4-5).

Debleskro plachteno kheer

Kau kheer his kerdo dran viechengre balla. I Israelitarja kran les o Debleske, har jon an o mulo them trujel djan, un hidjran kau kheer lentsa. An kau kheer his dui iseme: I glanstuni isema (dik: Debleskri glanstuni isema) un i palstuni isema (dik: Debleskri kutch isema). Mank kol dui iseme his i wudar. Kowa his kerdo dran kutch pesso than.

Debleskro rakepaskro (Gadjkenes: Prophet) Kau diwes patsah mer, kai i Debleskro rakepaskro i mursh hi, kai haiwas te penell glan-wi, hoi wella. Ap ko tsiro, kai i Israelitarja djiwan, his o Debleskre rakepangre kol menshe, ap kolende o Debleskro Ducho was, te penenn le i menshenge o Debleskre laba. Kol Debleskre laba sikran i menshende, hoi jon tchilatches kran, un hawi phagi ap lende well. Kol Debleskre laba sikran len ninna, kai o Dewel kamas len o djijestar, un kamas len dran o tchilatchepen un i bibacht win te lell. Kate te kote rodas o Dewel i djuwjat win un kras latar i Debleskri rakepaskretsa.

Debleskro thopen (Gadjkenes: Taufe) Ap ko tsiro har o Jesus djiwas, penas o Johanni i menshenge, te mukenn le pengro tchilatcho drom un djan ap o Debleskro drom, un te mukenn le pen te taufrell. Kowa hi o Debleskro thopen. Un his i sikepen, te mukan le pengro phuro djipen. Har o Jesus i mulendar pre stas, bitchras job peskre malen an hake themma, te penenn le i menshenge leskre laba, un te taufrenn le kolen, kai patsenn ap leste. I patslo, kai mukell pes te taufrell, sikrell jaake, kai leskri doosh tele thodo hi, un job kamell o Jesuseha te djiwell.

Djobeskro

Kowa hi i mensho, kai dell ap o djob, te well o djob dran o phuss win.

Doosh (Gadjkenes: Schuld, Sünde) I mensho, kai krell gar, hoi o Dewel kamella, kowa anell doosh ap peste. Dik o Debleskre deesh laba, te djiness, hoi doosh glan o Debleste hi! An o Debleskre jaka hi ko mensho pale-tchiddo, kai gar lauter krella, hoi o Dewel lestar kamella. O Dewel nashte djiwell gar leha khetne.

Drake

Budeder kope rakras o Jesus pral i drakengro them. Te rakras lo jaake, his an leskre laba i khatedo tchatchepen: O Dewel kharas peskre menshen, i bibolden, peskro drakengro them.