23
Paul yawt tawz tawz cumz ihz mawh Yio tuhz rumz keui daz, “Kuanz mai Israel keui aez, an ohz moh aacz ngaai Phraz Pen Caoh taw seu ni ohz mas boh phawmz daehz nam maang ti nae.”
2 Ceu beunz Ananias kaw cao ihz ceng rim Paul keu diz aez tiz mony Paul.
3 Paul kaw daz, “Mih naeh ceun khaehz sraakz utz thukz thunz keun ra, Phraz Pen Caoh ngaz tiz mih. Mih yeung keu dez tatz traz kaai ohz tawiz traz Moses, an mih cao ihz tiz ohz ne pleung traz.”
4 Ihz an ceng rim Paul keui maanyz, “Mih nal ceu beunz Phraz Pen Caoh haz?”
5 Paul kaw daz, “Kuanz mai Israel keui aez, ohz nam mas hnhz naeh ceu beunz, tuhz kyaamz lik daz, ‘Mih yak daz raai khunz an upz peung daehz.’”
6 Paul mas ihz mawh rumz teur ka naeh Saduse, teur ka naeh Pharise rae, hnhz raak sawz tuhz rumz mawh ne daz, “Kuanz mai Israel keui aez, ohz naeh Pharise, naeh kuanz Pharise. Ohz mang ihz yam meu rae imz rae talz ihz caetz ceun ni.”
7 Meuz phangz hnhz daz boh ceun diz, Pharise boh Saduse keui teur thiangz daehz, teur praasz penz aarz cumz.
8 Saduse keui daz nam maang meu rae imz, nam maang teu maan kaang raaoz, nam maang khuanz. Keuiz daz Pharise keui daz maang tang waiz meoz.
9 Meuz diz keuh teur thiangz usz baaiz, ihz mawz kyaamz, an naeh Pharise teur ka kaw ceng thiangz usz baaiz lak an diz daz, “Ehz nam awlz reung dengz kawi naehz kaai hnhz. Khuanz hiuz nam anz kaw teu maan kaang raaoz hiuz a wa lao hnhz nahz, an hnhz daz ne anz mawn eu.”
10 Keuh teur thiangz krang baaiz, ihz mawh siukz kawcz phawmz doz ihz keui laak Paul penz pitz penz patz rae hnhz cao siukz lan leh Paul tawz keuh kaw phuhz hnhz lan tuhz hawz siukz.
11 Meuz borz an diz Caoh Phraz ceng rim Paul daz, “Yak doz, ceun mih krai plaez lawng Ohz tuhz weng Yerusalem ne mih ngaz bawnz krai thaengz tuhz weng Rom boh.”
Ihz Yio keui kyaam piamz Paul
12 Teuk ngup kap siz ne ihz Yio teur ka keui teur cuhz daehz, teur lao mok keu tih daz beuk ehz maat bawnz piamz Paul kaw ehz maat suamz maat tiangz naehz.
13 Ihz an kyaam piamz ne naeh ihz ponz kawlz leuz.
14 Keuh lan cu beunz caangz boh ihz mawh Yio tuhz rumz keui daz, “Ehz a wa teur mok daehz nahz keu tih beuk ehz maat bawnz piamz Paul kaw ehz maat suamz maat tiangz naehz.
15 Kawp ceun diz aez ihz mawh Yio tuhz rumz keui seuk cih daehz ngaz caetz Paul rak rak ne pehz cao ihz mawh siukz raak Paul truz cu tawz pehz raez. Keuiz daz meuz hnhz maat phraeoz ne ehz pao piamz tawiz reung dengz.”
16 Meuz keuh kyaam ceun diz ne laanz Paul samz ngarz rae kut teuk loz Paul tuhz hawz siukz.
17 Paul raak leh po hawkz daz, “Raak ihz plung an ni lan cu ihz mawh siukz raez, hnhz lo lao ihz mawh siukz nahz nyaenz awh.”
18 Ihz mawh siukz an upz seu peur ya an diz kaw raak laanz Paul lan cu ihz mawh siukz an upz seu rengz daz, “Paul cao ihz plung an ni truz cu mih, hnhz lo lao mih nahz seu meoz meoz.”
19 Ihz mawh siukz an upz seu rengz raak hnhz lan ti seun tapz maanyz hnhz nahz, “Mih lo upz naehz?”
20 Ihz plung an diz daz, “Ihz mawh Yio keui seuk cih daehz ngaz caetz rak rak Paul, kap siz ne keuh ngaz cao tahz ehz nap Paul lan cu a rumz tui.
21 Yak prawm keuh eunz. Tawiz reung dengz ne ihz ponz kawlz leuz ngaz biapz pao piamz Paul, keuh teur mok daehz nahz keu tih beuk maat bawnz piamz Paul kaw maat suamz maat tiangz naehz. Seu ni keuh ngaz cih ceun diz rae keuh ngawm boh mony reu ma tahz ehz prawm.”
22 Ihz mawh siukz an upz seu rengz kaw lao ihz plung an diz nahz, “An mih teuk loz ohz ne yak lao ihz naz,” A wa daz ceun diz kaw cao hnhz weng.
Leh Paul phuhz tawz khunz Phelis
23 Ihz mawh siukz an upz seu rengz cao ihz mawh siukz an upz seu peur ya daehz keu aarz daz, “Timz na ri teuk bimz siz ngaz lan weng Kaesare, raenz peun tan mok siukz aarz peur ya, siukz tumz meu rang pulz kawlz boh siukz tawnz plas aarz peur ya raez.
24 Raenz aez tang meu rang ta Paul tumz, ehz leh lan phuhz hnhz tawz khunz Phelis aez hnhz lawt phez.”
25 Ihz mawh siukz taemz aez lan tawiz keuh nahz lik seu phiunz. Tuhz lik an diz daz,
26 “Ohz naeh Klaudius Lisias nap suamz boh khunz myaat Phelis rae lao teuk loz eu.
27 Ihz Yio keui cawpz ihz an ni, kyaam piamz hnhz. Ohz ngarz daz hnhz naeh ihz prih Rom, ohz nap siukz lan khraez leh hnhz.
28 Ohz sunz mas ihz Yio keui maap kawp naehz rae leh lan hnhz cu tawz rumz keuh.
29 Keuh cih sapz nahz reung dengz kawi kawp teur thiangz traz keuh. Ohz awlz hnhz nam taan yam boh, nam taan klaez thang.
30 Ohz ngarz ihz Yio keui kyaam piamz hnhz rae ohz phuhz luat hnhz lan cu tahz ehz. Ohz a wa lao tang ihz an sunz maap hnhz keui nahz aez keuh lan maap aacz ngaai tahz ehz.”
31 Siukz keui kaw cih tawiz mony lao ihz mawh siukz, thaz meuz borz an diz keuh leh Paul lan phuhz luat weng Antipatris.
32 Ceun kap siz ne siukz nuar cawng keui weng truz cu mial hawz siukz daehz, siukz tumz meu rang samz lan tawiz Paul.
33 Meuz siukz tumz meu rang keui phraeoz weng Kaesare ne aez khunz nahz lik an ihz mawh siukz aez truz, aapz aez tang khunz nahz Paul.
34 Meuz khunz a wa rawz lik ne maanyz Paul naeh ihz prih naehz. Meuz khunz an diz mas hnhz naeh ihz prih Silisia,
35 ne daz hnhz nahz “Meuz ihz an maap mih keui phraeoz truz a niz kaw ohz ngaz caetz mih eunz.” Khunz cao ihz pao yawt Paul tuhz hawz khunz Herot.