Paul lan weng Yerusalem
21
Waaiz ehz praasz keuh, tumz ceun luang lae lan cu klunz Kos tawz tawz. Ceun kap siz ne ehz phraeoz klunz Rodes, tae a diz lan phraeoz thaengz weng Patara.
2 Ehz awlz ceun luang an lan prih Phoenisia, ehz tumz ceun luang an diz siupz lan.
3 Meuz ehz lan teuk soz awlz klunz Siprus ne datz lan thaz plaakz seun daalz klunz, lan cu prih Siria, peuk deukz ceun luang tawz weng Taia, keuh leh teuk klaez phrihz phrahz a diz.
4 Ehz khahz awlz teu paez teur ka a diz rae ehz moh kawmz keuh pulz seu ngihz. Tawiz taanz khoz Khuanz Seu Ngamz, teu paez keu diz lao Paul yak aez hnhz siupz lan cu weng Yerusalem.
5 Keuiz daz meuz a wa neuk pulz seu ngihz ne ehz kaw meu rae lan. Teu paez keu diz tang kuanz yah keuh phuhz ehz phraeoz waar paang laai. Ehz seuk deumz kingz sangz suz tawngz a diz.
6 Ehz teur aacz daehz teur tak teur seumz keuh a wa kaw ehz kut tuhz ceun luang, keuh kaw weng kaang daehz.
7 Tae weng Taia siupz lan phraeoz weng Tolemais ne ehz bawnz teur tak tang kuanz mai a diz, a diz ehz moh seu seu ngihz.
8 Ceun kap siz ehz lae lan phraeoz weng Kaesare. Ehz thangz kaang Philip, sra rawz traz an cumz caoh weng Yerusalem keui ras mok tuhz keuh teu pulz ne.
9 Hnhz maang kuanz trawsz keu ponz an mawz rawz taangz phraz.
10 Meuz ehz moh a diz ceu nawhz taan taan ne maang ihz taangz phraz hawkz mus hnhz daz Akabus, phraeoz truz thaz prih Yio.
11 Hnhz truz kut cu ehz, leh seum mat Paul ne mat mial tihz cawng daehz daz, “Khuanz Seu Ngamz lao tahz seum mat an ni, ihz Yio keui ngaz mat tihz cawng hnhz ceun ni, aapz aez ihz an nam anz kheuz Yio keui nahz.”
12 Meuz ehz boh ihz an naeh aarz diz keui ngarz ceun diz ne lao Paul, yak aez hnhz lan weng Yerusalem.
13 Keuiz daz Paul mial daz, “Cih naehz lah, pehz yaam teuk luh phawmz ohz a? Nam kaz taw ihz leh ohz sapz tuhz thang tuhz weng Yerusalem, ihz piamz ohz Kawp mus Tahz Yesuhz kaw ohz tan mok se se.”
14 Ehz a wa mas ehz siz hnhz nam bawnz rae ehz daz, “Aez naeh ceun Phraz Pen Caoh dawhz lah.”
15 Waaiz keu diz ehz raenz kreung lan weng Yerusalem.
16 Teu paez ihz weng Kaesare teur ka keui phuhz ehz lan kaang Mnason, an naeh teu paez thaz meuz cao, an naeh ihz klunz Siprus ne ngaz saanyz rap aez ehz cih khaekz daehz.
Paul lan cu Yakop
17 Meuz ehz phraeoz weng Yerusalem ne kuanz mai keui saanyz seuz rap ehz.
18 Ceun kap siz ne Paul boh ehz lan cu Yakop, ihz mawh cumz caoh keui kaw a wa truz naeh hacz a diz.
19 Paul tak aacz keuh lao plaez keuh nahz lawng Phraz Pen Caoh cih klawhz meoz kaai ihz an nam anz kheuz Yio kawp daehz cih kaanz Phraz.
20 Meuz keuh ngarz ne teur aacz daehz lupz phrawz bunz Phraz Pen Caoh. Keuh daz Paul nahz, “Mih mas boh kuanz mai Yio an yum Phraz Pen Caoh naeh seu naeh rengz leui, keuh hacz aamz phawmz pa thaz plaakz kam sinz baaiz.”
21 Keuh daz naeh mih khahz sawnz ihz Yio an moh peur lah ihz an nam anz kheuz Yio keui nahz, yak aez kuanz pehz nahz saetz cawkz hurz, yak cih tawiz thungz Yio, aez keuh thengz traz Moses.
22 Keuh te ngarz mawn boh mih a wa truz naeh a niz. Ehz ngaz cih seu naez?
23 Cih ceun ehz lao mih nahz raez. A ehz ne maang ihz teung saet ca keu ponz.
24 Lan kam sinz tawiz keuh aez teuk seu ngamz toz daehz raez. Mih tahz aez langz kreung lu, aez keuh caang waat hukz kingz daehz. Beuk cih ceun diz aez ihz klawhz ihz mas reu oiz an keuh ngarz ne nam anz, toz mih kaw yeung kam tawiz boh traz Moses.
25 Ta ihz yum yam an nam anz kheuz Yio keui samz ehz a wa taemz aez lik aez keuh kaerz taw seum suamz taangz pung raang saangz thuhz, naamz, maai piatz kokz boh kamesuhz pan.
26 Ceun kap siz ne Paul boh ihz keu ponz leh sinz aez daehz seu ngamz. Paul kut tuhz wat ne lao saangz longz nahz seu ngihz an leh kam sinz seu ngamz ne ngaz peun meu naeh boh kraao an keuh pukz caw kreung lu ta keuh klawhz ihz nahz.
Ihz mat Paul tuhz wat
27 Meuz ngaz neuk pulz seu ngihz ne Kheuz Yio teur ka an truz thaz prih Asia keui awlz Paul tuhz wat, srawz srawz wungz ihz keui rae keuh mat leh Paul.
28 Keuh raak daz, “Kheuz Israel keui, kawr raez! Hnhz an ni khahz lan paw sirz, sawnz aez ihz keui saehz kheuz ehz, saehz traz Moses boh saehz wat. Hnhz nap ihz an nam anz kheuz Yio kut tuhz wat rae cih aez ti seu ngamz ne woi.”
29 Kawp daz keuh tomz awlz Paul boh Trophimus an naeh ihz weng Ephesus naeh teur kawmz tuhz weng, keuh thaang Paul nap hnhz kut tuhz wat.
30 Ihz keui ronyz tang weng, keuh wang truz mat Paul botz lae thaz nawk wat kaw dapz luat keur wah wat.
31 Meuz keuh kyaam piamz Paul ne po siukz Rom upz seu rengz, ngarz reu oiz ihz weng Yerusalem keui ronyz rae,
32 nap po upz seu peur ya keui boh siukz daehz keui wang lan cu tawz wungz ihz. Meuz keuh awlz po boh siukz ne keuh nam tiz Paul.
33 Meuz po siukz upz seu rengz phraeoz a Paul ne hnhz cao ihz leh nuarz hirz aarz senz mat Paul. Ihz mawh siukz an diz kaw maanyz keuh, Paul naeh yaeh? Hnhz a wa cih pleung naehz?
34 Ihz keui kaw tawpz ihz teur meoz, teur ka samz lao nahz seu lawng, meuz ihz mawh siukz ngarz reus ronyz ne nam mas ihz daz naehz rae cao siukz daehz leh Paul lan cu hawz siukz.
35 Meuz phraeoz reung duangz hawz siukz ne ihz keui kyaamz baaiz rae siukz keui bawnz pumz lan Paul.
36 Ihz an truz tawiz keui teur aacz daehz raak usz usz daz, “Piamz hnhz raez.”
Paul lao khraez toz daehz
37 Meuz siukz keui leh tang Paul ngaz kut tuhz hawz siukz ne Paul maanyz ihz mawh siukz daz, “Anz ohz caang upz mih?”
Ihz mawh siukz kaw daz, “Mih mawz boh mony Krik haz?
38 Mih nam anz ihz Ekip an aacz seuk weur tiukz prih omz rae peur aacz ihz raai ponz rengz lan tuhz ruk ruk ne haz?”
39 Paul kaw daz, “Ohz naeh ihz Yio, naeh ihz prih Silisia, keut tuhz weng mawh Tarsus. Aez ohz reu ma taw wungz ihz keui naz.”
40 Ihz mawh siukz aez hnhz upz. Paul kaw ceng tawz kingz reung duangz plaez keuh nahz tihz daehz. Meuz ihz keui pras ne hnhz upz nahz mony Hebre daz,