ⵍⵃⵓⴽⵎ ⵅ ⵓⵔⵛⴰⵍⵉⵎ ⴷ ⵍⴻⴳⵏⵓⵙ
3
1 ⵓⵛⵜ ⵅⴰⵎ, ⵜⴻⵏⵏⵉ ⵉⵖⴻⵡⵡⵖⴻⵏ ⵓ ⵜᵉⵜⵜⵡⴰⴼⵙⴻⴷ, ⵜⴰⵏⴷⵉⵏⵜ ⵏ ⴷⴷⴻⴵ!
2 ⵏⴻⵜⵜⴰⵜ ⵡⴰⵔ ⵜᵉⵜⵜⴻⵙⵍⵉ ⵖⴰⵔ ⵜⵎⵉⵊⵊⴰ,
ⵡⴰⵔ ⵜⵇⴻⴱⴱⴻⵍ ⴰⵡⴻⴷⴷⴻⴱ,
ⵏⴻⵜⵜⴰⵜ ⵡⴰⵔ ⵜᵉⵜⵜⵛⵉⵍ ⵅ ⵙⵉⴷⵉ,
ⵏⴻⵜⵜⴰⵜ ⵡⴰⵔ ⵜᵉⵜⵜⵇⴰⵔⵔⴰⴱ ⵛⴰ ⵖⴰⵔ ⴰⵔⴻⴱⴱⵉ ⵏⵏⴻⵙ.
3 ⵍⵃⵓⴽⴽⴰⵎ ⵏⵏⴻⵙ ⴷⵉ ⵍⵡⴻⵙⵜ ⵏⵏⴻⵙ
ⴷ ⴰⵢⵔⴰⴷⴻⵏ ⵉⵜⵜⴰⵔⵔⵓⵊⴷⵓⴷⴻⵏ,
ⵍⵇⵓⴹⴰⵜ ⵏⵏⴻⵙ ⴷ ⵓⵛⵛⴰⵏⴻⵏ ⵏ ⴵⵉⵍⴻⵜ,
ⵉⵏⵏⵉ ⵡⴰⵔ ⵉⵜⵜⴻⵊⵊⵉⵏ ⵡⴰⵍⵓ ⴰⵍ ⵜⵓⴼⴼⵓⵜ. ■
4 ⵉⵏⴰⴱⵉⵢⵢⴻⵏ ⵏⵏⴻⵙ ⴷⴰⵢⵙⴻⵏ ⵍⴻⴼⵛⵓⵛ,
ⵏⵉⵜⵏⵉ ⴷ ⵉⵔⵢⴰⵥⴻⵏ ⵉⵅⴻⴷⴷⴰⵄⴻⵏ!
ⵉⴽⴻⵀⵀⴰⵏⴻⵏ ⵏⵏⴻⵙ ⵙⵙⴼⴻⵙⴷⴻⵏ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ,
ⵏⵉⵜⵏⵉ ⵅⴰⵍⴼⴻⵏ ⵛⵛⴰⵔⵉⵄⴰ. ■
5 ⵙⵉⴷⵉ ⴰⵎⵙⴻⴳⴳⴻⴷ ⴰⵇⴰ-ⵜ ⴷⵉ ⵍⵡⴻⵙⵜ ⵏⵏⴻⵙ.
ⵏⴻⵜⵜⴰ ⵡⴰⵔ ⵉⵜⵜⴻⴳⴳ ⵛⴰ ⵎⵉⵏ ⵡⴰⵔ ⵉⵙⴻⴳⴳⴷⴻⵏ.
ⴽⵓⵍ ⵜⵓⴼⴼⵓⵜ ⵉⵜⵜⴰⵔⵔⴰ ⵍⵃⴻⵇⵇ ⵏⵏⴻⵙ ⵖⴰⵔ ⵜⴼⴰⵡⵜ,
ⵄⴻⵎⵎⴰⵔⵚ ⵡⴰⵔ ⵜⵏⴻⵇⵇⴻⵙ!
ⵡⴻⵏⵏⵉ ⵉⵜⵜⴻⴳⴳⴻⵏ ⵎⵉⵏ ⵡⴰⵔ ⵉⵙⴻⴳⴳⴷⴻⵏ, ⵡⴰⵔ ⵉⵙⵙⵉⵏ ⵛⴰ ⴰⵙⴻⴹⵃⵉ. ■
6 ⵏⴻⵛⵛ ⵇⴹⵉⵖ ⵍⴻⴳⵏⵓⵙ,
ⴰⵔⴻⴷⴷⴵⴻⵖ ⵚⵚⵓⵎⵄⴰⵜ ⵏⵙⴻⵏ ⵏ ⵜⵖⴻⵎⵎⵓⵔⴰ.
ⵏⴻⵛⵛ ⵅⵍⵉⵖ ⵉ ⵜⴱⵔⵉⴷⵉⵏ ⵏⵏⴻⵙ,
ⴰⵍⴰⵎⵉ ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵇⵇⵉⵎ ⵄⴰⴷ ⵉⵜⵜⵙⴰⵔⴰ ⴷⵉⵏⵏⵉ.
ⵜⵉⵏⴻⴷⴷⴰⵎ ⵏⵙⴻⵏ ⵜⵜⵡⴰⵔⴻⴷⴷⴵⴻⵏⵜ,
ⵡⴰⵔ ⵉⵇⵇⵉⵎ ⵃⴻⴷ,
ⵓⵍⴰ ⴷ ⵉⵊⵊ ⵏ ⵓⵎⴻⵥⴷⵓⵖ.
7 ⵏⴻⵛⵛ ⵏⵏⵉⵖ: ⵉⵜⵜⵅⴻⵚⵚⴰ ⵛⴻⵎ ⴰⴷ ⴰⵢⵉ ⵜⴻⴳⴳⵯⴻⴷⴻⴷ, ⴰⴷ ⵜⴻⴽⵙⵉⴷ ⴰⵡⴻⴷⴷⴻⴱ!,
ⵃⵉⵎⴰ ⵡⴰⵔ ⵜᵉⵜⵜⵡⴰⴽⴽⴻⵙ ⵜⵥⴻⴷⴷⵉⵖⵜ ⵏⵏⴻⵙ,
ⵙ ⵎⴰⵔⵔⴰ ⵎⵉⵏ ⴷ ⴰⵙ ⵖⴰ ⴳⴳⴻⵖ.
ⵙ ⵜⵉⴷⴻⵜⵜ, ⵏⵉⵜⵏⵉ ⵖⴻⵡⵡⵖⴻⵏ ⵥⵉⵛ
ⵎⴰⵃⴻⵏⴷ ⴰⴷ ⵙⵙⴼⴻⴹⵃⴻⵏ ⵜⵉⵎⴻⴳⴳⴰ ⵏⵙⴻⵏ.
8 ⵙ ⵓⵢⴰ, ⵔⴰⵊⴰⵎ ⴰⵢⵉ, ⵉⵙⵙⴰⵡⴰⵍ ⵙⵉⴷⵉ,
ⴰⵙⵙ ⵉ ⴷⵉ ⴷⴷ ⵖⴰ ⴽⴽⴰⵔⴻⵖ ⵉ ⵜⴽⴻⵛⵛⴰⴹⵜ.
ⵎⵉⵏⵥⵉ ⴰⵢⴰ ⴷ ⵍⵃⵓⴽⵎ ⵉⵏⵓ ⵉⵙⴻⴳⴳⴷⴻⵏ ⴰⵇⴰ ⴰⴷ ⵊⴰⵔⵡⴻⵖ ⵍⴻⴳⵏⵓⵙ,
ⴰⴷ ⵙⵙⵎⵓⵏⴻⵖ ⵜⵉⴳⴻⵍⴷⵉⵏ,
ⵃⵉⵎⴰ ⴰⴷ ⵅⴰⵙⴻⵏ ⵙⵙⴼⴻⵙⵢⴻⵖ ⴰⵙⵅⴻⴹ ⵉⵏⵓ,
ⵎⴰⵔⵔⴰ ⵍⵃⴰⴷⵓⵇ ⵏ ⵡⴻⵖⴹⴰⴱ ⵉⵏⵓ,
ⵎⴰⵖⴰⵔ ⵙ ⵜⵎⴻⵙⵙⵉ ⵏ ⵡⴰⵙⵙⴰⵎ ⵉⵏⵓ
ⴰⴷ ⵜᵉⵜⵜⵡⴰⵛⵛ ⵎⴰⵔⵔⴰ ⵜⴰⵎⵎⵓⵔⵜ.
ⵜⵜⵓⴱⴻⵜ ⵏ ⵍⴻⴳⵏⵓⵙ
9 ⵎⵉⵏⵥⵉ ⵅⴻⵏⵏⵉ ⵏⴻⵛⵛ ⴰⴷ ⴱⴻⴷⴷⵍⴻⵖ ⵍⵃⴰⵔⴷ ⵏ ⵍⴻⴳⵏⵓⵙ
ⵉⵢⴻⵏⵛⵉⵛⴻⵏ ⵉⵎⴻⵥⴷⴰⴳⴻⵏ ⴰⴷ ⵜⴻⵏ ⵡⵛⴻⵖ,
ⴰⵍⴰⵎⵉ ⵉ ⵖⴰ ⵍⴰⵖⴰⵏ ⵅ ⵢⵉⵙⴻⵎ ⵏ ⵙⵉⴷⵉ,
ⵃⵉⵎⴰ ⴰⴷ ⵜ ⵄⴻⴱⴱⴷⴻⵏ ⴰⵎ ⵙ ⵢⵉⵛⵜ ⵏ ⵜⴻⵖⵔⵓⴹⵜ.
10 ⵣⴻⴳ ⵓⵊⴻⵎⵎⴰⴹ ⵏ ⵉⵖⴻⵥⵔⴰⵏ ⵏ ⴽⵓⵛ,
ⵉⵏⵏⵉ ⵅⴰⴼⵉ ⵉⵜⵜⵥⴰⴵⴰⵏ ⵙ ⵡⵓⵍ,
ⵢⴻⴵⵉⵙ ⵏ ⵉⵎⵎⵟⴰⵔⵔⵛⴻⵏ ⵉⵏⵓ,
ⴰⴷ ⴰⵡⵢⴻⵏ ⵜⴰⵡⵀⵉⴱⵜ ⵉⵏⵓ.
11 ⴷⴻⴳ ⵡⴰⵙⵙ ⵏⵏⵉ ⵡⴰⵔ ⵜⴻⵙⵙⴻⴹⵃⵉⴷ ⵛⴰ ⵄⴰⴷ,
ⵅ ⵎⴰⵔⵔⴰ ⵜⵉⵎⴻⴳⴳⴰ ⵉ ⵥⵉ ⵅⴰⴼⵉ ⵜⵖⴻⵡⵡⵖⴻⴷ,
ⵎⵉⵏⵥⵉ ⴰⴷ ⴽⴽⵙⴻⵖ ⵥⵉ ⵍⵡⴻⵙⵜ ⵏⵏⴻⵎ
ⵉⵏⵏⵉ ⵉⵜⵜⴼⴻⵢⵢⵛⴻⵏ ⴷⵉ ⵏⵏⴼⴰⵅⴻⵜ,
ⵓ ⴽⴻⵏⵏⵉⵡ ⵡⴰⵔ ⵜⴻⵙⵙⴳⴻⵄⵄⴰⴷⴻⵎ ⵄⴰⴷ ⵉⵅⴻⴼ ⵏⵡⴻⵎ
ⵅ ⵡⴻⴷⵔⴰⵔ ⵏ ⵣⵥⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ.
12 ⵏⴻⵛⵛ ⴰⴷ ⵊⵊⴻⵖ ⴷⵉ ⵍⵡⴻⵙⵜ ⵏⵏⴻⵎ ⵉⵊⵊ ⵏ ⵍⴳⴻⵏⵙ ⵉⵜⵜⵡⴰⵃⵚⴰⵔ, ⵉⵥⴻⵍⴹ.
ⵏⵉⵜⵏⵉ ⴰⴷ ⵜⵜⴻⵛⵍⴻⵏ ⵅ ⵢⵉⵙⴻⵎ ⵏ ⵙⵉⴷⵉ.
13 ⵎⵉⵏ ⵉⵇⵇⵉⵎⴻⵏ ⵏ ⵉⵙⵔⴰⵉⵍ ⵡⴰⵔ ⵉⵜⵜⴻⴳⴳ ⵎⵉⵏ ⵡⴰⵔ ⵉⵙⴻⴳⴳⴷⴻⵏ,
ⵏⵉⵜⵏⵉ ⵡⴰⵔ ⵙⵙⵅⴰⵔⵔⵉⵇⴻⵏ ⵛⴰ,
ⵓ ⴷⴻⴳ ⵓⵇⴻⵎⵎⵓⵎ ⵏⵙⴻⵏ ⵡⴰⵔ ⵉⵜⵜᵉⵜⵜⵡⵉⴼⵉ ⵢⵉⵍⴻⵙ ⵉⵙⵙⵅⴰⵔⵔⵉⵇⴻⵏ,
ⵎⴰⵛⴰ ⵏⵉⵜⵏⵉ ⴰⴷ ⵀⴻⴷⴷⴰⵏ ⴰⴷ ⵥⵥⵍⴻⵏ,
ⵓ ⵓⵍⴰ ⴷ ⵉⵊⵊⴻⵏ ⴰⴷ ⵜⴻⵏ ⵉⵙⵙⵏⴻⵅⵍⵉⵄ.
ⵍⴻⴼⵔⴰⵃⴻⵜ ⵏ ⵉⵙⵔⴰⵉⵍ ⴷ ⵓⵄⴻⴷⴷⴻⵍ ⵏⵏⴻⵙ
14 ⵖⴻⵏⵏⴻⵊ, ⴰ ⵜⴰⵢⴻⴵⵉⵜ ⵚⵉⵀⵢⵓⵏ,
ⵙⵍⵉⵡⵍⴻⵡ, ⴰ ⵉⵙⵔⴰⵉⵍ.
ⴼⴰⵔⵃ ⵓ ⵜⴼⴰⴵⵉⴷ ⵙ ⵎⴰⵔⵔⴰ ⵓⵍ ⵏⵏⴻⵎ,
ⴰ, ⵜⴰⵢⴻⴵⵉⵜ ⵓⵔⵛⴰⵍⵉⵎ! ■
15 ⵙⵉⴷⵉ ⵉⴽⴽⴻⵙ ⵍⴻⵃⴽⴰⵎⴰⵜ ⵏⵏⴻⵎ,
ⵏⴻⵜⵜⴰ ⴰⵇⴰ ⵉⵎⵃⴰ ⵍⴻⵄⴷⵓ ⵏⵏⴻⵎ.
ⴰⵊⴻⴵⵉⴷ ⵏ ⵉⵙⵔⴰⵉⵍ, ⵙⵉⴷⵉ, ⴰⵇⴰ-ⵜ ⴷⵉ ⵍⵡⴻⵙⵜ ⵏⵏⴻⵎ!
ⵡⴰⵔ ⵜⵥⴰⵔⵔⴻⴷ ⵄⴰⴷ ⵍⵖⴰⵔ.
16 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵏⵉⵏ ⵉ ⵓⵔⵛⴰⵍⵉⵎ:
ⵡⴰⵔ ⵜⵜⴻⴳⴳⵯⴻⴷ ⵛⴰ, ⵚⵉⵀⵢⵓⵏ!
ⵡⴰⵔ ⵜⵜⴻⵊⵊⵉ ⵉⴼⴰⵙⵙⴻⵏ ⵏⵏⴻⵎ ⴰⴷ ⴰⵔⵅⵓⵏ ⵄⴻⵎⵎⴰⵔⵚ ⵄⴰⴷ!
17 ⵙⵉⴷⵉ, ⴰⵔⴻⴱⴱⵉ ⵏⵏⴻⵎ, ⴰⵇⴰ-ⵜ ⴷⵉ ⵍⵡⴻⵙⵜ ⵏⵏⴻⵎ,
ⵉⵊⵊ ⵏ ⴱⵓ-ⵜⴻⵖⵔⵓⴹⵜ ⵏⵏⵉ ⵉ ⴷⴷ ⵖⴰ ⵢⴰⵡⵢⴻⵏ ⴰⵙⴻⵏⵊⴻⵎ
ⵏⴻⵜⵜⴰ ⴰⴷ ⵥⵥⴰⵢⴻⵎ ⵉⴼⴰⵔⵃ ⵙ ⵡⴰⵟⵟⴰⵙ,
ⵏⴻⵜⵜⴰ ⴰⴷ ⵉⵙⴻⵖⴹ ⴷⵉ ⵜⴰⵢⵔⵉ ⵏⵏⴻⵙ,
ⵏⴻⵜⵜⴰ ⴰⴷ ⵅⴰⵎ ⵉⵙⵍⵉⵡⵍⴻⵡ ⵙ ⵓⵖⴻⵏⵏⴻⵊ.’
18 ⵏⴻⵛⵛ ⴰⴷ ⵙⵙⵎⵓⵏⴻⵖ ⵉⵏⵏⵉ ⵉⵛⴻⵟⵟⵏⴻⵏ
ⵓⵎⵉ ⵡⴰⵔ ⵥⴻⵎⵎⴰⵔⴻⵏ ⴰⴷ ⵛⴰⵔⵛⴻⵏ ⴷⵉ ⵜⵎⴻⵙⵎⵓⵏⵜ ⵉⵜⵜⵡⴰⴳⴳⴻⵏ ⵉ ⵍⵄⵉⴷ.
ⴰⵇⴰ ⵏⵉⵜⵏⵉ ⵥⵥⴰⵢⴻⵎ!
ⴷⴷⵇⴻⵍ ⵏ ⵍⵃⴻⴳⵔⴰ ⴰⵇⴰ-ⵜ ⵅⴰⵙ.
19 ⵅⵥⴰⵔ, ⵏⴻⵛⵛ ⴰⴷ ⵛⴻⵖⵍⴻⵖ ⵉⵅⴻⴼ ⵉⵏⵓ ⴰⴽ-ⴷ ⵢⴻⵏⵏⵉ ⵛⴻⵎ ⵉⵃⵚⴰⵔⴻⵏ.
ⵏⴻⵛⵛ ⴰⴷ ⵙⵙⵏⴻⵊⵎⴻⵖ ⵉⵇⴻⵊⴷⴰⵃⴻⵏ
ⵓ ⵢⵉⵏⵏⵉ ⵉⵜⵜⵡⴰⵙⵙⵓⴼⴼⵖⴻⵏ ⴰⴷ ⵜⴻⵏ ⵙⵙⵎⵓⵏⴻⵖ.
ⵏⴻⵛⵛ ⴰⴷ ⴰⵙⴻⵏ ⵡⵛⴻⵖ ⵍⵄⴻⵥⵥ ⴷ ⵢⵉⵊⵊ ⵏ ⵉⵙⴻⵎ ⵉⵛⴻⵏⵄⴻⵏ,
ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏⵏⵉ ⵜⴻⵏ ⵜⵓⵖⴰ ⵉⵙⵙⴼⴻⵟⵟⵃⴻⵏ.
20 ⴷⵉ ⵍⵡⴻⵇⵜ ⵏⵏⵉ ⴰⴷ ⴽⴻⵏⵏⵉⵡ ⴷⴷ-ⴰⵔⵔⴻⵖ,
ⵓ ⴷⵉ ⵍⵡⴻⵇⵜ ⵏⵏⵉ ⴰⴷ ⴽⴻⵏⵏⵉⵡ ⵙⵙⵎⵓⵏⴻⵖ,
ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ ⵉⵊⵊ ⵏ ⵢⵉⵙⴻⵎ ⵉⵛⴻⵏⵏⵄⴻⵏ ⴷ ⵍⵄⴻⵥⵥ
ⵊⴰⵔ ⵎⴰⵔⵔⴰ ⵍⴻⴳⵏⵓⵙ ⵏ ⴷⴷⵓⵏⴻⵛⵜ,
ⵅⵎⵉ ⵉ ⵥⵥⴰⵢⵡⴻⵎ ⵖⴰ ⵙⵙⴻⵏⵇⴻⵍⴱⴻⵖ ⵜⴰⵎⴻⵃⴱⴰⵙⵜ ⵏⵡⴻⵎ
ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵡⴻⵎ,
ⵉⵏⵏⴰ ⵙⵉⴷⵉ.