ⵍⵃⵓⴽⵎ ⵅ ⵍⵄⴻⴷⵢⴰⵏ ⵏ ⵢⴰⵀⵓⴷⴰ
2
1 ⵙⴷⴻⵡⵍⴻⵎ-ⴷⴷ ⵉⵅⴻⴼ ⵏⵡⴻⵎ ⵖⴰⵔ ⵍⴻⵄⵇⴻⵍ, ⴷⴻⵡⵍⴻⵎ-ⴷⴷ ⵖⴰⵔ ⵍⴻⵄⵇⴻⵍ, ⴰ ⵍⴳⴻⵏⵙ ⴱⵍⴰ ⵓⵙⴻⴹⵃⵉ,
2 ⵇⴱⴻⵍ ⵉ ⵖⴰ ⵉⴼⴼⴻⵖ ⵍⵃⵓⴽⵎ,
- ⴰⵙⵙ ⴰⵎ ⵓⵍⵓⵎ ⵉⵄⴻⴷⴷⵓ - ,
ⵇⴱⴻⵍ ⵉ ⵅⴰⵡⴻⵎ ⴷⴷ ⵖⴰ ⵢⴰⵙ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏ ⵙⵉⴷⵉ,
ⵇⴱⴻⵍ ⵉ ⵅⴰⵡⴻⵎ ⴷⴷ ⵖⴰ ⵢⴰⵙ ⵡⴰⵙⵙ ⵏ ⵡⴻⵖⴹⴰⴱ ⵏ ⵙⵉⴷⵉ.
3 ⴰⵔⵥⵓⵎ ⵅ ⵙⵉⴷⵉ, ⵎⴰⵔⵔⴰ ⵉⵎⵡⴰⴹⵄⴻⵏ ⵏ ⵜⴻⵎⵎⵓⵔⵜ,
ⵉⵏⵏⵉ ⵉⵜⵜⴻⴳⴳⴻⵏ ⵍⵃⴻⵇⵇ ⵏⵏⴻⵙ!
ⴰⵔⵥⵓⵎ ⵜⴰⵙⴻⴳⴷⴰ, ⴰⵔⵥⵓⵎ ⴰⵡⴰⴹⴻⵄ,
ⴰⴷ ⵜⴰⵖ ⴰⴷ ⵜⴻⵏⵏⵓⴼⴼⴰⵔⴻⵎ ⴽⴻⵏⵏⵉⵡ
ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏ ⵙⵉⴷⵉ. ■
4 ⵎⴰⵖⴰⵔ ⵖⴰⵥⵥⴰ ⴰⴷ ⵜᵉⵜⵜⵡⴰⵊⵊ,
ⴰⵛⵇⴰⵍⵓⵏ ⴰⴷ ⵜⴻⴷⵡⴻⵍ ⴷ ⵍⵅⴰⵔⴱⴻⵜ,
ⴰⵛⴷⵓⴷ ⴰⴷ ⵅⴰⵙ ⴰⵥⵥⵍⴻⵏ ⵖⴰⵔ ⵡⴻⵥⵢⴻⵏ ⵏ ⵡⴰⵙⵙ,
ⵓⵛⴰ ⵄⴰⵇⵔⵓⵏ ⴰⴷ ⵜᵉⵜⵜⵡⴰⵇⵍⴻⵄ.
5 ⵓⵛⵜ ⵅ ⵉⵎⴻⵥⴷⴰⵖ ⵏ ⵜⵎⴰ ⵏ ⵍⴻⴱⵃⴰⵔ,
ⵍⴳⴻⵏⵙ ⵏ ⵉⴽⵔⵉⵜⵉⵢⵢⴻⵏ.
ⴰⵡⴰⵍ ⵏ ⵙⵉⴷⵉ ⴰⴷ ⵅⴰⵡⴻⵎ ⵢⵉⵍⵉ,
ⴰ ⴽⴻⵏⵄⴰⵏ, ⵜⴰⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ!
ⵏⴻⵛⵛ ⴰⴷ ⴽⴻⵏⵏⵉⵡ ⵀⴻⵍⵍⴽⴻⵖ, ⵡⴰⵔ ⵉⵜⵜⵉⵍⵉ ⵓⵎⴻⵥⴷⵓⵖ ⵄⴰⴷ.
6 ⵜⴰⵎⵎⵓⵔⵜ ⵏⵏⵉ ⵅ ⵜⵎⴰ ⵏ ⵍⴻⴱⵃⴰⵔ ⴰⴷ ⵜⵉⵍⵉ ⴷ ⴷⴷⵎⴰⵏⵉ ⵏ ⵜⴰⵔⴻⵡⵙⴰ,
ⵓⵍⴰ ⴷ ⵡⴰⵏⵓⵜⴻⵏ ⵉ ⵉⵎⴻⴽⵙⴰⵡⴻⵏ ⴷ ⵍⴽⵓⵔⵉⵜ ⵉ ⵡⵓⴵⵉ.
7 ⴰⴷ ⵜⵉⵍⵉ ⵜⴻⵎⵎⵓⵔⵜ ⵉ ⵎⵉⵏ ⵉⵇⵇⵉⵎⴻⵏ ⵏ ⵜⴰⴷⴷⴰⵔⵜ ⵏ ⵢⴰⵀⵓⴷⴰ,
ⵃⵉⵎⴰ ⴰⴷ ⴷⴰⵢⴻⵙ ⴰⵔⴻⵡⵙⴻⵏ ⵜⵉⵃⵉⵎⵔⵉⵡⵉⵏ ⵏⵙⴻⵏ.
ⴷⵉ ⵜⵓⴷⵔⵉⵏ ⵏ ⴰⵛⵇⴰⵍⵓⵏ ⴰⴷ ⴷⵉⵏ ⴰⵔⵙⴻⵏ ⵖⴰⵔ ⵜⵎⴻⴷⴷⵉⵜ,
ⵎⴰⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⴰⴷ ⵖⴰⵔⵙⴻⵏ ⵢⴰⵔⵥⴻⴼ,
ⵓ ⵏⴻⵜⵜⴰ ⵉⵙⵙⵏⴻⵇⵍⴻⴱ ⵜⴰⵎⴻⵃⴱⴰⵙⵜ ⵏⵙⴻⵏ.
8 ⵏⴻⵛⵛ ⵙⵍⵉⵖ ⵉ ⵓⵙⴻⵃⵇⴰⵔ ⵏ ⵎⵓ’ⴰⴱ
ⴷ ⵓⵛⴻⵇⵇⴻⴼ ⵏ ⴰⵢⵜ ⵏ ⵄⴰⵎⵎⵓⵏ,
ⵉ ⵥⵉ ⵙⵙⵃⴻⵇⴰⵔⴻⵏ ⵏⵉⵜⵏⵉ ⵍⴳⴻⵏⵙ ⵉⵏⵓ,
ⵓ ⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ ⴰⵟⵟⴰⵙ ⴹⵉⴷⴷ ⵉ ⵜⴻⵎⵎⵓⵔⵜ ⵏⵙⴻⵏ.
9 ⵅ ⵓⵢⴰ, ⵙ ⵜⵉⴷⴻⵜⵜ ⴰⵎ ⴷⴷⴰⵔⴻⵖ ⵏⴻⵛⵛ,
ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ:
ⵎⵓ’ⴰⴱ ⴰⴷ ⵜⴻⴷⵡⴻⵍ ⴰⵎ ⵙⴰⴷⵓⵎ,
ⵓ ⴰⵢⵜ ⵏ ⵎⵓ’ⴰⴱ ⴰⵎ ⵄⴰⵎⵓⵔⵔⴰ,
ⵥⵉ ⵙⵙⵉⴱⴱⴻⵜ ⵏ ⵜⵥⴻⴳⴳⵯⴰⵔⵜ ⴷ ⵡⴰⵏⵓⵜⴻⵏ ⵏ ⵜⵎⴻⴵⴰⵃⵜ,
ⵉⵛⵜ ⵏ ⵍⵅⴰⵔⴱⴻⵜ ⵉ ⵍⴻⴱⴷⴰ.
ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ ⵉⵏⵓ ⴳⴳⵓⵔ ⴰⴷ ⵜⴻⵏ ⵉⴽⴻⵛⵛⴻⴹ
ⵓ ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ ⵉⵏⵓ ⴳⴳⵓⵔ ⴰⴷ ⵉⵟⵟⴻⴼ ⵜⴰⵙⵖⴰⵔⵜ ⵏⵙⴻⵏ ⴷ ⵍⵡⴰⵔⵜ.
10 ⴰⵢⴰ ⴰⴷ ⵜⴻⵏ ⵉⵍⵇⴻⴼ ⵥⵉ ⵙⵙⵉⴱⴱⴻⵜ ⵏ ⵏⵏⴼⴰⵅⴻⵜ ⵏⵙⴻⵏ,
ⵎⴰⵖⴰⵔ ⵏⵉⵜⵏⵉ ⵜⵓⵖⴰ ⵙⵙⴻⵃⵇⴰⵔⴻⵏ ⵓ ⴰⵔⵥⵎⴻⵏ ⴰⵇⴻⵎⵎⵓⵎ ⵏⵙⴻⵏ
ⵅ ⵍⴳⴻⵏⵙ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.
11 ⵉⵙⵙⴰⴳⴳⵯⴰⴷ ⴰⴷ ⵖⴰⵔⵙⴻⵏ ⵉⴼⴼⴻⵖ ⵙⵉⴷⵉ,
ⵎⴰⵖⴰⵔ ⵏⴻⵜⵜⴰ ⴰⴷ ⵉⵇⴹⴰ ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ ⵥⵉ ⵜⴻⵎⵎⵓⵔⵜ,
ⵓ ⵏⵉⵜⵏⵉ ⴰⴷ ⴰⵙ ⵙⴻⵊⴷⴻⵏ,
ⴽⵓⵍ ⵉⵊⵊ ⵥⴻⴳ ⵡⴻⵎⵛⴰⵏ ⵏⵏⴻⵙ,
ⵎⴰⵔⵔⴰ ⵜⵉⴳⵥⵉⵔⵉⵏ ⵏ ⵍⴻⴳⵏⵓⵙ.
12 ⴽⴻⵏⵏⵉⵡ ⵄⴰⵡⴻⴷ, ⴰ ⴰⵢⵜ ⵏ ⴽⵓⵛ,
ⵜⵜⵡⴰⵙⵏⵓⵇⵇⴱⴻⵏ ⵏⵉⵜⵏⵉ ⵥⵉ ⵙⵙⵉⴼ ⵉⵏⵓ.
13 ⵏⴻⵜⵜⴰ ⴰⴷ ⵉⵙⵙⵡⵉⵥⵥⴻⴹ ⵙ ⵓⴼⵓⵙ ⵏⵏⴻⵙ ⵖⴰⵔ ⵛⵛⴰⵎⴰⵍ,
ⵏⴻⵜⵜⴰ ⴰⴷ ⵢⴰⵔⴻⴷⴷⴻⴵ ⴰⵛⵛⵓⵔ,
ⵓ ⴰⴷ ⵢⴰⵔⵔ ⵏⵉⵏⵡⴰ ⴷ ⵉⵛⵜ ⵏ ⵍⵅⴰⵔⴱⴻⵜ,
ⵜⵓⵥⴻⵖ ⴰⵎ ⵍⴻⵅⵍⴰ.
14 ⴷⵉ ⵍⵡⴻⵙⵜ ⵏⵏⴻⵙ ⴰⴷ ⴳⴻⵢⵢⵔⴻⵏⵜ ⵜⵃⵉⵎⵔⵉⵡⵉⵏ,
ⵎⴰⵔⵔⴰ ⵍⵎⴰⵍ ⵏⵏⴻⵙ, ⴰⵇⴰ ⵜⵜⴻⴳⴳⴻⵏ ⴷⴻⴳ ⵉⵊⵊ ⵓⴱⴰⵔⵔⵓ ⵏ ⵏ ⵍⴳⴻⵏⵙ.
ⵓⵍⴰ ⴷ ⴱⵓ-ⵉⵄⵓⵇⵇⴰⵏ, ⵡⴰⵀ ⵓⵍⴰ ⴷ ⵜⵡⵓⵛⵜ ⵏ ⴵⵉⵍⴻⵜ
ⴰⴷ ⵙⵙⴻⵏⵙⴻⵏ ⵅ ⵉⵥⴻⴵⵉⴼⴻⵏ ⵏ ⵉⴱⵉⵍⴰⵔⴻⵏ ⵏⵏⴻⵙ.
ⵜⵎⵉⵊⵊⴰ ⵏⵙⴻⵏ ⴰⴷ ⵜⵜ ⵜⵖⴻⵏⵏⴻⵊ ⵥⵉ ⵍⴽⴰⵥⵉ,
ⴰⵔⴻⴷⴷⴻⴵ ⴰⴷ ⵢⵉⵍⵉ ⵅ ⵜⵏⴻⴱⴷⴰⵜ ⵏⵏⴻⵙ,
ⵎⴰⵖⴰⵔ ⵜⴰⴼⵔⴻⵡⵜ ⵏ ⵜⴻⵏⴳⴻⵍⵜ ⵜᵉⵜⵜⵡⴰⵄⴰⵔⵔⴰ.
15 ⴷ ⵜⴰ ⴷ ⵜⴰⵏⴷⵉⵏⵜ ⵉⵙⵍⵉⵡⵍⵉⵡⴻⵏ,
ⵜⴻⵏⵏⵉ ⵉⵇⵇⵉⵎⴻⵏ ⴷⵉ ⵍⴰⵎⴰⵏ,
ⵜⴻⵏⵏⵉ ⵉⵏⵏⴰⵏ ⴷⴻⴳ ⵡⵓⵍ ⵏⵏⴻⵙ:
‘ⵏⴻⵛⵛ ⴷ ⵜⴻⵏⵏⵉ, ⵡⴰⵔ ⵜⴻⴵⵉ ⴷ ⵜⴻⵏⵏⴻⵖⵏⵉ!’
ⵎⴰⵎⵎⴻⵛ ⵜⴻⴷⵡⴻⵍ ⴷ ⵍⵅⴰⵔⴱⴻⵜ,
ⵉⵛⵜ ⵏ ⵡⴻⵎⵛⴰⵏ ⵏ ⴰⵔⵔⴰⵃⴻⵜ ⵉ ⵍⵎⴰⵍ ⵏ ⵍⴻⵅⵍⴰ!
ⵎⴰⵔⵔⴰ ⵉⵏⵏⵉ ⵅⴰⵙ ⵖⴰ ⵉⴽⴽⴻⵏ,
ⴰⴷ ⵅⴰⵙⴻⵏ ⵉⵚⴻⴼⴼⴰⵔⵓ ⵙ ⵓⵙⴻⵃⵇⴰⵔ ⴰⴷ ⵉⵙⵙⴻⵏⵀⴻⵥⵥ ⴰⴼⵓⵙ ⵏⵏⴻⵙ.