ⵎⵉⵅⴰ 3

ⵍⵃⵓⴽⴽⴰⵎ ⴷ ⵉⵏⴰⴱⵉⵢⵢⴻⵏ ⵏ ⵉⵙⵔⴰⵉⵍ ⵜⵜⴼⴻⵛⵍⴻⵏ

1 “ⵅⴻⵏⵏⵉ ⵏⵏⵉⵖ ⵏⴻⵛⵛ:

‘ⵙⵍⴻⵎ, ⴰ ⴽⴻⵏⵏⵉⵡ, ⵉⵣⴻⴵⵉⴼⴻⵏ ⵏ ⵢⴰⵄⵇⵓⴱ,

ⵓ ⴽⴻⵏⵏⵉⵡ, ⵍⵃⵓⴽⴽⴰⵎ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ!

ⵎⴰ ⵡⴰⵔ ⵉⵜⵜⵅⴻⵚⵚⵉ ⵉ ⴽⴻⵏⵏⵉⵡ

ⴰⴷ ⵜⴻⵙⵙⵏⴻⵎ ⵜⴰⵙⵖⴰⵔⵜ?

2 ⵏⵉⵜⵏⵉ ⵛⴰⵔⵔⵀⴻⵏ ⵎⵉⵏ ⵉⵛⵏⴰⵏ

ⵓ ⵜⵜⴻⵅⵙⴻⵏ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ!

ⵏⵉⵜⵏⵉ ⴽⴽⵙⴻⵏ ⴰⵙⴻⵏ ⵜⵉⵍⵎⴻⵛⵜ

ⵓⵍⴰ ⴷ ⴰⵢⵙⵓⵎ ⵅ ⵉⵖⵙⴰⵏ ⵏⵙⴻⵏ.

3 ⵡⴰⵀ, ⴰⵇⴰ ⴰⵜⴻⵏ ⴷ ⵢⵉⵏⵏⵉ ⵉⵜⵜⴻⵜⵜⴻⵏ

ⴰⵢⵙⵓⵎ ⵏ ⵍⴳⴻⵏⵙ ⵉⵏⵓ

ⵓⵛⴰ ⴽⴽⵙⴻⵏ ⴰⵙⴻⵏ ⵜⵉⵍⵎⴻⵛⵜ

ⵓⵛⴰ ⵜⵜⴰⵔⴻⵥⵥⴰⵏ ⵉⵖⵙⴰⵏ ⵏⵙⴻⵏ.

ⵏⵉⵜⵏⵉ ⵜⵜⴱⴻⵣⵣⴰⵄⴻⵏ ⵜⴻⵏ ⴰⵎ ⴷⵉ ⵎⴰⵔⵎⵉⵜⴰ,

ⴰⵎ ⵡⴻⵢⵙⵓⵎ ⴷⴻⴳ ⵓⵟⴻⵏⵊⵉⵔ.”

4 “ⵍⴻⵅⴷⴻⵏⵏⵉ ⴰⴷ ⵙⵖⵓⵢⴻⵏ ⵖⴰⵔ ⵙⵉⴷⵉ,

ⵎⴰⵛⴰ ⵡⴰⵔ ⵅⴰⵙⴻⵏ ⴷⴷ-ⵉⵜⵜⴰⵔⵔⵉ.

ⴰⴷ ⵅⴰⵙⴻⵏ ⵉⴼⴼⴰⵔ ⵓⴷⴻⵎ ⵏⵏⴻⵙ ⴷⵉ ⵍⵡⴻⵇⵜ ⵏⵏⵉ,

ⵣⵉ ⵙⵙⵉⴱⴱⴻⵜ ⵏ ⵍⵖⴰⵔ ⵉ ⵉⴳⴳⵉⵏ.”

5 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉ ⵉⵏⴰⴱⵉⵢⵢⴻⵏ

ⵉⵏⵏⵉ ⵉⵜⵜⵖⴰⵔⵔⴰⵏ ⵍⴳⴻⵏⵙ ⵉⵏⵓ,

ⵉⵏⵏⵉ ⵓⵎⵉ ⵖⴰⵔⵙⴻⵏ ⵄⴰⴷ ⵎⵉⵏ ⴷⵉ

ⵉ ⵖⴰ ⵉⵣⴻⵄⴼⴻⵏ ⵙ ⵜⴻⵖⵎⴰⵙ ⵏⵙⴻⵏ,

ⴰⴷ ⵍⴰⵖⴰⵏ ‘ⵍⴻⵀⵏⴰ!’,

ⵎⴰⵛⴰ ⴹⵉⴷⴷ ⵏ ⵡⴻⵏⵏⵉ ⵡⴰⵔ ⴷ ⴰⵙⴻⵏ ⵉⵜⵜⴻⴳⴳ

ⵡⴰⵍⵓ ⴷⴻⴳ ⵓⵇⴻⵎⵎⵓⵎ ⵏⵙⴻⵏ,

ⴰⴷ ⵅⴰⵙ ⵇⴻⴷⴷⵙⴻⵏ ⵉⵊⵊ ⵏ ⵓⵎⴻⵏⵖⵉ.   

6 ⵙ ⵓⵢⴰ ⴰⴷ ⵅⴰⵡⴻⵎ ⴷⴷ-ⵜⴻⵡⴹⴰ ⴵⵉⵍⴻⵜ,

ⴱⵍⴰ ⵍⴻⵡⵃⵉⵢ,

ⵓ ⴰⴷ ⵅⴰⵡⴻⵎ ⴷⴷ-ⵉⵡⴹⴰ ⵜⴰⴵⴻⵙⵜ

ⴱⵍⴰ ⵜⴰⴳⴻⵣⵣⴰⵏⵜ.

ⴰⴷ ⵜⴻⵖⵍⵉ ⵜⴼⵓⵛⵜ ⵅ ⵉⵏⴰⴱⵉⵢⵢⴻⵏ

ⵓ ⴰⴷ ⵉⴱⴱⴰⵔⵛⴻⵏ ⵡⴰⵙⵙ ⵜⵉⵡⴰ ⵏⵙⴻⵏ.   

7 ⵉⵎⵡⴰⵍⴰⵡⴻⵏ ⴰⴷ ⵙⴻⴹⵃⴰⵏ,

ⵓ ⵉⴳⴻⵣⵣⴰⵏⴻⵏ ⴰⴷ ⴷⴻⵡⵍⴻⵏ

ⵣⴻⵡⵖⵡⴻⵏ ⵙ ⵍⴻⵃⵢⴰ,

ⵓ ⵏⵉⵜⵏⵉ ⵎⴰⵔⵔⴰ ⴰⴷ ⵍⴻⵃⵃⴼⴻⵏ ⴰⵛⵍⴰⵖⴻⵎ

ⵖⴰⵔ ⵓⵢⴻⵏⵛⵉⵛ,

ⵎⵉⵏⵣⵉ ⵜⵡⴰⵔⵔⵉⵜ ⵏ ⴰⵔⴻⴱⴱⵉ

ⵡⴰⵔ ⴷⴷ-ⵜᵉⵜⵜⵉⵙ ⵛⴰ.

8 ⵎⴰⵛⴰ ⵏⴻⵛⵛ ⵛⵛⵓⵔⴻⵖ ⵙ ⵊⵊⴻⵀⴷ

ⵏ ⴰⵔⵔⵓⵃ ⵏ ⵙⵉⴷⵉ,

ⵓ ⵙ ⵍⵃⴻⵇⵇ ⴷ ⵜⴻⵔⵢⴰⵙⵜ,

ⵃⵉⵎⴰ ⴰⴷ ⴱⴰⵔⵔⵃⴻⵖ ⵉ ⵢⴰⵄⵇⵓⴱ

ⵅ ⵓⵅⴻⵟⵟⵓ ⵏⵏⴻⵙ

ⵓ ⵉ ⵉⵙⵔⴰⵉⵍ ⵅ ⴷⴷⴻⵏⴱ ⵏⵏⴻⵙ.”

9 “ⵙⵍⴻⵎ ⵅⴻⵏⵏⵉ ⵖⴰⵔ ⵎⴰⵏ ⴰⵢⴰ,

ⴰ ⵉⵣⴻⴵⵉⴼⴻⵏ ⵏ ⵜⴰⴷⴷⴰⵔⵜ ⵏ ⵢⴰⵄⵇⵓⴱ

ⵓ ⴽⴻⵏⵏⵉⵡ ⵉⵎⴻⵇⵇⵔⴰⵏⴻⵏ

ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ,

ⵉⵏⵏⵉ ⵉⵛⴰⵔⵔⵀⴻⵏ ⵍⵃⴻⵇⵇ,

ⵓ ⵙⵙⴼⴰⵔⵔⴰⵖⴻⵏ ⵎⴰⵔⵔⴰ ⵎⵉⵏ ⵉⴵⴰⵏ ⵉⵙⴻⴳⴳⴻⵎ,   

10 ⵉⵏⵏⵉ ⵉⴱⴻⵏⵏⴰⵏ ⵚⵉⵀⵢⵓⵏ ⵙ ⵉⴷⴰⵎⵎⴻⵏ,

ⵓ ⵓⵔⵛⴰⵍⵉⵎ ⵙ ⵍⵖⴻⵛⵛ.   

11 ⵉⵣⴻⴵⵉⴼⴻⵏ ⵏⵏⴻⵙ ⵜⵜⴹⴻⴱⴱⴰⵔⴰⵏ

ⴷⴷⵄⴰⵡⵉ ⵉ ⴰⵔⵔⴻⵛⵡⴻⵜ,

ⵉⴽⴻⵀⵀⴰⵏⴻⵏ ⵏⵏⴻⵙ ⵙⵙⴻⵍⵎⴰⴷⴻⵏ ⵙ ⵍⵎⵓⵏⴻⵜ,

ⵓ ⵉⴽⴻⵀⵀⴰⵏⴻⵏ ⵏⵏⴻⵙ

ⵜⵜⴳⴻⵣⵣⴰⵏⴻⵏ ⵙ ⵜⵎⴻⵏⵢⴰⵜ.

ⴰⵇⴰ ⵏⵉⵜⵏⵉ ⵜⵜⵛⴰⵍⴻⵏ ⵅ ⵙⵉⴷⵉ ⵅⵎⵉ ⵇⵇⴰⵔⴻⵏ:

‘ⵎⴰ ⵡⴰⵔ ⵉⴵⵉ ⵙⵉⴷⵉ ⴷⵉ ⵍⵡⴻⵙⵜ ⵏⵏⴻⵖ?

ⵡⴰⵔ ⴷ ⴰⵏⴻⵖ ⵉⵍⴻⵇⵇⴻⴼ ⵍⵖⴰⵔ.’

12 ⵙ ⵓⵢⴰ, ⴰⵇⴰ-ⵜⵜ ⵣⵣⴰⵢⵡⴻⵎ,

ⴰⵇⴰ ⴰⴷ ⵛⴰⵔⵣⴻⵏ ⵚⵉⵀⵢⵓⵏ ⴰⵎ ⵢⵉⵊⵊ ⵏ ⵢⴻⵢⵢⴰⵔ,

ⴰⴷ ⵜⴻⴷⵡⴻⵍ ⵜⴻⵏⴷⵉⵏⵜ ⵏ ⵓⵔⵛⴰⵍⵉⵎ

ⴷ ⵉⵛⵜ ⵏ ⵍⵅⴰⵔⴱⴻⵜ,

ⵓ ⴰⴷⵔⴰⵔ ⵏ ⵜⴰⴷⴷⴰⵔⵜ ⴷ ⵍⴻⴳⵄⵓⴷⵉ ⵏ ⵡⴻⵣⵖⴰⵔ.”