ⵄⴰⵎⵓⵙ 8

ⵜⴰⵎⴻⵥⵔⵉⵡⵜ ⵡⵉⵙⵙ ⴰⵔⴻⴱⵄⴰ: ⵜⴰⵙⵓⴵⴻⵜ ⵙ ⵍⵖⵉⴵⴻⵜ

1 “ⵎⴰⵏ ⴰⵢⴰ ⵉⵙⵙⵛⴻⵏ ⴰⵢⵉ ⵜⵜ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⵉⵛⵜ ⵏ ⵜⵙⵓⴵⴻⵜ ⴷⴰⵢⴻⵙ ⵜⵉⵏⵉ ⵏ ⵓⵏⴻⴱⴷⵓ! 2 ⵏⴻⵜⵜⴰ ⵉⵏⵏⴰ: ‘ⵎⵉⵏ ⵜᵉⵜⵜⵡⴰⵍⵉⴷ ⵛⴻⴽ ⴰ ⵄⴰⵎⵓⵙ?’ ⵏⴻⵛⵛ ⵏⵏⵉⵖ: ‘ⵉⵛⵜ ⵏ ⵜⵙⵓⴵⴻⵜ ⴷⴰⵢⴻⵙ ⵜⵉⵏⵉ ⵏ ⵓⵏⴻⴱⴷⵓ!’ ⵅⴻⵏⵏⵉ ⵉⵏⵏⴰ ⴰⵢⵉ ⵙⵉⴷⵉ: ‘ⴰⵇⴰ ⵢⵓⵙⴰ-ⴷⴷ ⵇⴻⵟⵟⵓ ⵅ ⵍⴳⴻⵏⵙ ⵉⵏⵓ ⵉⵙⵔⴰⵉⵍ. ⵏⴻⵛⵛ ⵡⴰⵔ ⵅⴰⵙ ⵄⴻⴷⴷⵓⵖ ⵄⴰⴷ! 3 ⴷⴻⴳ ⵡⴰⵙⵙ ⵏⵏⵉ ⴰⴷ ⴷⴻⵡⵍⴻⵏ ⵉⵣⵍⴰⵏ ⵏ ⵍⴻⵇⵚⴰⵔ ⴷ ⵉⵎⴻⵟⵟⴰⵡⴻⵏ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ. ⴰⴷ ⵉⵍⵉⵏⵜ ⴰⵟⵟⴰⵙ ⵏ ⵍⵅⴻⵛⴱⴰⵜ ⴷⵉ ⴽⵓⵍ ⴰⵎⵛⴰⵏ, ⵜⵉⵏⵏⵉ ⵉⵏⴹⴰⵔ ⵏⴻⵜⵜⴰ. ⵙⴻⵖⴷ!’ ”

ⵉⵄⵍⴰⵎⴻⵏ ⵉⵎⴻⵇⵇⵔⴰⵏⴻⵏ ⵏ ⵙⵉⴷⵉ

4 “ⵙⵍⴻⵎ ⴰⵢⴰ, ⴽⴻⵏⵏⵉⵡ ⵉⵏⵏⵉ ⵉⵚⴰⵔⵔⴹⴻⵏ ⴰⵎⴻⵣⵍⵓⴹ ⵓ ⵜⴻⵇⴹⴰⵎ ⵅ ⵍⵎⵓⵙⴰⴽⵉⵏ ⵏ ⵜⴻⵎⵎⵓⵔⵜ, 5 ⴰⵎ ⵜⴻⵇⵇⴰⵔⴻⵎ: ‘ⵎⴻⵍⵎⵉ ⵖⴰ ⵉⵄⴷⵓ ⵓⵢⵓⵔ ⵏ ⵊⴷⵉⴷ ⴰⵍⴰⵎⵉ ⵏⵣⴻⵎⵎⴰⵔ ⴰⴷ ⵏⴻⵣⵣⴻⵏⵣ ⵍⵃⴻⴱⴱ ⵏ ⵢⵉⵔⴷⴻⵏ. ⵓ ⵎⴻⵍⵎⵉ ⵖⴰ ⵉⵄⴷⵓ ⵡⴰⵙⵙ ⵏ ⵙⵙⴻⴱⵜ ⴰⵍⴰⵎⵉ ⵏⵣⴻⵎⵎⴰⵔ ⴰⴷ ⵏⴰⵔⵣⴻⵎ ⵜⵉⵙⵔⴰⴼⵉⵏ ⵏ ⵢⵉⵔⴷⴻⵏ, ⵃⵉⵎⴰ ⴰⴷ ⵏⴻⵙⵙⴻⵎⵥⵉ ⵍⴻⵄⴱⴰⵔ ⵏ ⵉⴼⴰ ⵓ ⴰⴷ ⵏⴻⵙⵙⴻⵎⵖⴰⵔ ⵛⵉⵇⵍⵓ ⵓ ⴰⴷ ⵏⴻⵛⵎⴻⵜ ⵙ ⵍⵎⵉⵣⴰⵏⴰⵜ ⵏ ⵍⵖⴻⵛⵛ,    6 ⴰⵍⴰⵎⵉ ⵏⵣⴻⵎⵎⴰⵔ ⴰⴷ ⵏⵙⴻⵖ ⵉⵎⵓⵇⵍⵉⵍⴻⵏ ⵙ ⵜⴻⵏⵄⴰⵛⵉⵏ ⵏ ⵏⵏⵓⵇⴰⵔⵜ ⵓⵍⴰ ⴷ ⴰⵎⴻⵣⵍⵓⴹ ⵉ ⵜⵢⵓⵢⴰ ⵏ ⵙⴰⵏⴷⴰⵍⵉⵢⴰⵜ!’, ⵓ ⴰⵎ ⵜⴻⵇⵇⴰⵔⴻⵎ: ‘ⴰⴷ ⵏⴻⵣⵣⴻⵏⵣ ⵉⵛⴰⵔⴼⴰ ⴷⴻⴳ ⵡⴻⵎⵛⴰⵏ ⵏ ⵉⵎⴻⵏⴷⵉ!’ ”  

7 “ⵙⵉⴷⵉ ⵉⵊⵊⵓⴵ ⵖⴰⵔ ⵏⵏⴼⴰⵅⴻⵜ ⵏ ⵢⴰⵄⵇⵓⴱ: ‘ⵄⴻⵎⵎⴰⵔⵚ ⴰⴷ ⵜⵜⵓⵖ ⵜⵉⵎⴻⴳⴳⴰ ⵏⵙⴻⵏ! 8 ⵎⴰ ⵡⴰⵔ ⵜⵜⴻⵏⵀⴻⵣⵣⵉ ⵜⴻⵎⵎⵓⵔⵜ ⵙ ⵎⴰⵏ ⴰⵢⴰ ⵓ ⵎⴰ ⵡⴰⵔ ⵜⵜⵉⵍⵉⵏ ⵎⴰⵔⵔⴰ ⵉⵎⴻⵣⴷⴰⵖ ⵏⵏⴻⵙ ⵛⴻⴹⵏⴻⵏ? ⵎⴰ ⵡⴰⵔ ⵜᵉⵜⵜⴳⴻⵄⵄⵉⴷ ⵜⴻⵎⵎⵓⵔⵜ ⵜⵎⵓⵏ ⴰⵎ ⵢⴻⵖⵣⴰⵔ, ⴰⴷ ⵜⴰⵍⵉ ⵓ ⴰⴷ ⴷⴷ-ⵜⴻⵀⵡⴰ ⴰⵎ ⵢⴻⵖⵣⴰⵔ ⵏ ⵎⵉⵚⵔⴰ?”

9 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⴰⴷ ⴰⵔⵔⴻⵖ ⵜⴼⵓⵛⵜ ⴰⴷ ⵜⴻⵖⵍⵉ ⴷⴻⴳ ⵡⴻⵣⵢⴻⵏ ⵏ ⵡⴰⵙⵙ ⵓ ⴰⴷ ⵙⵙⴱⴰⵔⴻⵛⵏⴻⵖ ⵜⴰⵎⵎⵓⵔⵜ ⵖⴰⵔ ⵟⵃⴰ ⵏ ⵡⴰⵙⵙ. 10 ⵏⴻⵛⵛ ⴰⴷ ⴰⵔⵔⴻⵖ ⴼⵉⵛⵜⴰⵜ ⵏⵡⴻⵎ ⴷ ⴰⵛⴹⴰⵏ ⴷ ⵎⴰⵔⵔⴰ ⵉⵣⵍⴰⵏ ⵏⵡⴻⵎ ⴷ ⵉⵣⵍⴰⵏ ⵏ ⵡⴻⵛⴹⴰⵏ ⵓ ⵏⴻⵛⵛ ⴰⴷ ⴳⴳⴻⵖ ⵉⵛⵜ ⵏ ⵜⵅⴰⵏⵛⴻⵜ ⵏ ⵡⴻⵛⴹⴰⵏ ⵅ ⵎⴰⵔⵔⴰ ⵜⴱⴻⵢⵙⴰ ⵓ ⵅ ⴽⵓⵍ ⴰⵣⴻⴵⵉⴼ ⴰⴷ ⴳⴳⴻⵖ ⵜⵓⵇⴻⵛⵛⴰⵔⵜ. ⴰⴷ ⴰⵡⵢⴻⵖ ⴰⵛⴹⴰⵏ ⵅ ⵜⴻⵎⵎⵓⵔⵜ ⴰⵎ ⵡⴻⵛⴹⴰⵏ ⵅ ⵓⵢⴻⵏⵏⵉ ⵏ ⵎⵎⵉⵙ, ⵓ ⴰⵇⴻⵟⵟⵓ ⵏⵏⴻⵙ ⴰⴷ ⵜ ⴳⴳⴻⵖ ⴰⵎ ⵢⵉⵊⵊ ⵏ ⵡⴰⵙⵙ ⴷ ⴰⵎⴰⵔⵣⴰⴳ.”

11 “ⵅⵣⴰⵔ, ⴰⴷ ⴷⴷ-ⴰⵙⴻⵏ ⵡⵓⵙⵙⴰⵏ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⴰⵇⴰ ⵏⴻⵛⵛ ⴰⴷ ⵙⵙⴻⴽⴽⴻⵖ ⵍⴰⵥ ⵅ ⵜⴻⵎⵎⵓⵔⵜ, ⵡⴰⵔ ⵉⴵⵉ ⵍⴰⵥ ⵏ ⵡⴻⵖⵔⵓⵎ, ⵡⴰⵔ ⵉⴵⵉ ⴼⴰⴷ ⵏ ⵡⴰⵎⴰⵏ, ⵎⴰⵛⴰ ⵉⵊⵊ ⵏ ⵓⴼⴰⴷⵉ ⵎⴰⵃⴻⵏⴷ ⴰⴷ ⵙⵍⴻⵏ ⵉ ⵡⴰⵡⴰⵍⴻⵏ ⵏ ⵙⵉⴷⵉ. 12 ⵅⴻⵏⵏⵉ ⴰⴷ ⵜⵜⴻⵍⵄⴻⵏ ⵣⵉ ⵍⴻⴱⵃⴰⵔ ⵖⴰⵔ ⵍⴻⴱⵃⴰⵔ ⵓ ⵣⵉ ⵛⵛⴰⵎⴰⵍ ⵖⴰⵔ ⵛⵛⴰⵔⵇ, ⴰⴷ ⵓⵢⵓⵔⴻⵏ ⵣⵉ ⵙⵙⴰ ⵖⴰⵔ ⴷⴰ ⵎⴰⵃⴻⵏⴷ ⴰⴷ ⴰⵔⵣⵓⵏ ⵅ ⵡⴰⵡⴰⵍ ⵏ ⵙⵉⴷⵉ, ⵎⴰⵛⴰ ⵡⴰⵔ ⵜ ⵜⵜⵉⴼⴻⵏ. 13 ⴷⴻⴳ ⵡⴰⵙⵙ ⵏⵏⵉ ⴰⴷ ⵖⴰⵛⴰⵏⵜ ⵜⴻⵄⵣⴰⵔⵉⵢⵢⵉⵏ ⵏⵏⵉ ⵉⵛⵏⴰⵏ ⵇⴰⵄ ⵓⵍⴰ ⴷ ⵉⵃⵓⴷⵔⵉⵢⵢⴻⵏ ⵙ ⵓⴼⴰⴷⵉ, 14 ⵉⵏⵏⵉ ⵉⵜⵜⵊⵊⴰⴵⴰⵏ ⵖⴰⵔ ⵓⵎⴰⵔⵡⴰⵙ ⵏ ⵙⴰⵎⴰⵔⵢⴰ, ⵇⵇⴰⵔⴻⵏ: ‘ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⴰⵔⴻⴱⴱⵉ ⵏⵏⴻⵛ, ⴰ ⴷⴰⵏ, ⵓ ⴰⵎ ⵉⴷⴷⴰⵔ ⵡⴻⴱⵔⵉⴷ ⵖⴰⵔ ⴱⵉ’ⵔ-ⵙⴻⴱⵄⴰ!’, ⴰⴷ ⵡⴹⴰⵏ, ⵡⴰⵔ ⵜⵜⴻⴽⴽⴰⵔⴻⵏ ⵄⴰⴷ!”