ⴰⵀⵊⴰⵎ ⵏ ⵀⴰⵊⵓⵊ
38
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵔⵔ ⵓⴷⴻⵎ ⵏⵏⴻⵛ ⵖⴰⵔ ⵀⴰⵊⵓⵊ ⵣⵉ ⵜⴻⵎⵎⵓⵔⵜ ⵏ ⵎⴰⵊⵓⵊ, ⵍⵃⴰⴽⴻⵎ ⵏ ⵔⵓⵛ, ⵎⴰⵛⵉⴽ ⴷ ⵜⵓⴱⴰⵍ, ⵓⵛⴰ ⵏⴰⴱⴱ ⴹⵉⴷⴷ ⵏⵏⴻⵙ, □ ■ 3 ⵉⵏⵉ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⵏⴻⵛⵛ ⴰⵇⴰ ⴰⵢⵉ ⴹⵉⴷⴷ ⵏⵏⴻⵛ, ⴰ ⵀⴰⵊⵓⵊ, ⵍⵃⴰⴽⴻⵎ ⵏ ⵔⵓⵛ, ⵎⴰⵛⵉⴽ ⴷ ⵜⵓⴱⴰⵍ. 4 ⵏⴻⵛⵛ ⴰⴷ ⵛⴻⴽ ⵇⴻⵎⵎⵄⴻⵖ ⵓ ⴰⴷ ⴳⴳⴻⵖ ⵜⵉⵙⴻⵏⵏⴰⵔⵉⵏ ⴷⴻⴳ ⵉⵇⴰⴱⵙⵉⵡⴻⵏ ⵏⵏⴻⵛ ⵓⵛⴰ ⴰⴷ ⵛⴻⴽ ⵙⵙⵓⴼⴼⵖⴻⵖ, ⵛⴻⴽ ⴷ ⵎⴰⵔⵔⴰ ⵍⵄⴻⵙⴽⴰⵔ ⵏⵏⴻⵛ, ⵉⵢⵙⴰⵏ ⴷ ⵉⵎⵏⴰⵢⴻⵏ, ⵎⴰⵔⵔⴰ ⴰⵔⴹⴻⵏ ⴰⵔⵔⵓⴹ ⵎⵍⵉⵃ ⴰⵟⵟⴰⵙ, ⵉⵊⵊ ⵏ ⵡⴻⴳⵔⴰⵡ ⴷ ⴰⵎⴻⵇⵇⵔⴰⵏ ⴰⵟⵟⴰⵙ, ⵙ ⵜⵙⴻⴷⴷⴰⵔⵜ ⵜⴰⵎⴻⵇⵇⵔⴰⵏⵜ ⴷ ⵜⵙⴻⴷⴷⴰⵔⵜ ⵜⴰⵎⴻⵥⵢⴰⵏⵜ ⵏ ⵓⵄⴻⵙⴽⴰⵔⵉ, ⵎⴰⵔⵔⴰ ⵏⵉⵜⵏⵉ ⵖⴰⵔⵙⴻⵏ ⵜⵉⵣⴻⵎⵎⴰⵔ ⴷⴻⴳ ⵓⵎⴻⵏⵖⵉ ⵙ ⵙⵙⵉⴼ. ■ 5 ⴰⵢⵜ ⵏ ⵍⴼⵓⵔⵙ, ⵏ ⴽⵓⵛ ⵓ ⵏ ⴼⵓⵟ ⴰⴽⵉⴷⵙⴻⵏ, ⵎⴰⵔⵔⴰ ⵉⴷⵙⴻⵏ ⵙ ⵜⵙⴻⴷⴷⴰⵔⵜ ⵏ ⵓⵄⴻⵙⴽⴰⵔⵉ ⴷ ⵍⴽⴰⵙⴽ ⵏ ⵓⵄⴻⵙⴽⴰⵔⵉ, 6 ⵊⵓⵎⴰⵔ ⴰⴽ-ⴷ ⵎⴰⵔⵔⴰ ⵍⵄⴻⵙⴽⴰⵔ ⵏⵏⴻⵙ, ⴷ ⵜⴰⴷⴷⴰⵔⵜ ⵏ ⵜⵓⵊⴰⵔⵎⴰ ⵣⵉ ⵟⵟⵔⵓⴼⴰ ⵏ ⵛⵛⴰⵎⴰⵍ ⵇⴰⵄ ⴰⴽ-ⴷ ⵎⴰⵔⵔⴰ ⵍⵄⴻⵙⴽⴰⵔ ⵏⵏⴻⵙ, ⵡⴰⵀ, ⴰⵟⵟⴰⵙ ⵏ ⵍⴻⴳⵏⵓⵙ ⴰⴷ ⴷⴷ-ⴰⵙⴻⵏ ⴰⴽⵉⴷⴻⴽ. 7 ⵉⵍⵉ ⵜⵡⴻⵊⴷⴻⴷ ⵓ ⵙⴻⵡⵊⴻⴷ ⵉⵅⴻⴼ ⵏⵏⴻⵛ, ⵛⴻⴽ ⴷ ⵎⴰⵔⵔⴰ ⴰⴳⵔⴰⵡ ⵏⵏⴻⵛ ⵏⵏⵉ ⵜⴻⵙⵙⵎⵓⵏⴻⴷ ⵖⴰⵔⴻⴽ, ⵓ ⵉⵍⵉ ⴷ ⴰⵎⴻⵃⴹⴰⵢ ⵏⵙⴻⵏ. 8 ⴰⵡⴰⵔⵏⵉ ⵡⴰⵟⵟⴰⵙ ⵏ ⵡⵓⵙⵙⴰⵏ ⴰⴷ ⵜᵉⵜⵜⵡⴰⵍⴰⵖⵉⴷ, ⴰⵡⴰⵔⵏⵉ ⵍⴰⵎⵉ ⵄⴷⵓⵏ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ ⴰⴷ ⴷⴷ-ⵜⴰⵙⴻⴷ ⵖⴰⵔ ⵜⴻⵎⵎⵓⵔⵜ ⵏⵏⵉ ⵉⵜⵜⵡⴰⵄⴻⴷⵍⴻⵏ ⵣⵉ ⵙⵙⵉⴼ, ⵖⴰⵔ ⵉⵊⵊ ⵏ ⵍⴳⴻⵏⵙ ⵉ ⵉⵜⵜⵡⴰⵙⵙⵎⵓⵏⴻⵏ ⵣⵉ ⵍⴻⴳⵏⵓⵙ ⵅ ⵉⴷⵓⵔⴰⵔ ⵏ ⵉⵙⵔⴰⵉⵍ ⵏⵏⵉ ⵜⵓⵖⴰ ⴷ ⵍⵅⵉⵔⴱⴻⵜ ⵉ ⵢⵉⵊⵊ ⵏ ⵍⵡⴻⵇⵜ ⴷ ⴰⵣⵉⵔⴰⵔ, ⵖⴰⵔ ⵉⵊⵊ ⵏ ⵍⴳⴻⵏⵙ ⵏⵏⵉ ⵉⵜⵜⵡⴰⵙⵙⵓⴼⴼⵖⴻⵏ ⵣⵉ ⵍⴻⴳⵏⵓⵙ, ⵓ ⵎⴰⵔⵔⴰ ⵏⵉⵜⵏⵉ ⵣⴻⴷⴷⵖⴻⵏ ⴷⵉⵏⵏⵉ ⴷⵉ ⵍⴰⵎⴰⵏ. 9 ⵅⴻⵏⵏⵉ ⴰⴷ ⵜⴳⴻⵄⵄⴷⴻⴷ ⴰⵎ ⵜⵃⴰⵔⵢⴰⴹⵜ, ⴰⵎ ⵓⵙⴻⵢⵏⵓ ⵎⴰⵃⴻⵏⴷ ⴰⴷ ⵜⴻⴷⵍⴻⴷ ⵜⴰⵎⵎⵓⵔⵜ, ⵛⴻⴽ ⴷ ⵎⴰⵔⵔⴰ ⵍⵄⴻⵙⴽⴰⵔ ⵏⵏⴻⵛ ⵓⵍⴰ ⴷ ⴰⵟⵟⴰⵙ ⵏ ⵍⴻⴳⵏⵓⵙ ⵏⵏⵉ ⴽⵉⴽ ⵉⴵⴰⵏ.’ ”■ 10 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⴰⵇⴰ ⴰⴷ ⴰⴷⴼⴻⵏ ⵉⵅⴰⵔⵔⵉⵚⴻⵏ ⴷⴻⴳ ⵡⵓⵍ ⵏⵏⴻⵛ ⵓ ⵛⴻⴽ ⴰⴷ ⵜⵅⴰⵔⵔⵚⴻⴷ ⴷⵉ ⵜⵎⴻⵄⵎⵓⵍⵜ ⵜⴰⵄⴻⴼⴼⴰⵏⵜ. 11 ⴰⴷ ⵜⵉⵏⵉⴷ: ⴰⴷ ⴳⴻⵄⵄⴷⴻⵖ ⵖⴰⵔ ⵉⵛⵜ ⵏ ⵜⴻⵎⵎⵓⵔⵜ ⵙ ⵜⵏⴻⴷⴷⴰⵎ ⴱⵍⴰ ⵍⴻⵃⵢⵓⴹ, ⴰⴷ ⴷⴷ-ⴰⵙⴻⵖ ⵖⴰⵔ ⵢⴻⵏⵏⵉ ⴷⵉⵏ ⵉⴷⴷⴰⵔⴻⵏ ⴷⵉ ⵍⴻⵀⵏⴰ ⵓ ⵖⴰⵔ ⵢⵉⵏⵏⵉ ⴷⵉⵏ ⵉⵣⴻⴷⴷⵖⴻⵏ ⴷⵉ ⵍⴰⵎⴰⵏ, ⵉⵏⵏⵉ ⴷⵉⵏ ⵉⵣⴻⴷⴷⵖⴻⵏ ⵎⴰⵔⵔⴰ ⴱⵍⴰ ⵍⵃⵉⴹ ⵓ ⴱⵍⴰ ⵣⵣⴻⴽⵔⵓⵏⴰⵜ ⵏⵉⵖ ⵜⵉⵡⵡⵓⵔⴰ, 12 ⵎⴰⵃⴻⵏⴷ ⴰⴷ ⴽⴻⵛⵛⴹⴻⵖ ⵓ ⴰⴷ ⴰⵛⴰⵔⴻⵖ ⴰⴳⵍⴰ! ⵡⴰⵀ, ⵎⴰⵃⴻⵏⴷ ⴰⴷ ⵜⴰⵔⵔⴻⴷ ⴰⴼⵓⵙ ⵏⵏⴻⵛ ⵅ ⵍⵅⵉⵔⴱⴰⵜ ⵏⵏⵉ ⴷⵉ ⵣⴻⴷⴷⵖⴻⵏ ⵄⴰⵡⴻⴷ ⵉⵡⴷⴰⵏ, ⵅ ⵢⵉⵊⵊ ⵏ ⵍⴳⴻⵏⵙ ⵏⵏⵉ ⵉⵜⵜⵡⴰⵙⵙⵎⵓⵏⴻⵏ ⵣⵉ ⵍⴻⴳⵏⵓⵙ, ⵡⴻⵏⵏⵉ ⵉⴽⴻⵙⴱⴻⵏ ⵍⵎⴰⵍ ⴷ ⵡⴰⴳⵍⴰ, ⵡⴻⵏⵏⵉ ⵉⵣⴻⴷⴷⵖⴻⵏ ⵅ ⵜⵄⴻⴱⴱⵓⴹⵜ ⵏ ⵜⴻⵎⵎⵓⵔⵜ. 13 ⵛⴰⴱⴰ ⴷ ⴷⴰⴷⴰⵏ ⴷ ⵜⵜⵓⵊⴰⵔ ⵏ ⵜⴰⵔⵛⵉⵛ ⴷ ⵎⴰⵔⵔⴰ ⴰⵢⵔⴰⴷⴻⵏ ⵉⵎⴻⵥⵢⴰⵏⵉⵏ ⵏⵙⴻⵏ ⴰⴷ ⴰⵛ ⵉⵏⵉⵏ: ⵎⴰ ⴷⴷ-ⵜⵓⵙⵉⴷ ⵎⴰⵃⴻⵏⴷ ⴰⴷ ⵜᵉⵟⵟⴼⴻⴷ ⵜⴰⴽⴻⵛⵛⴰⴹⵜ? ⵎⴰ ⵜⴻⵙⵙⵎⵓⵏⴻⴷ ⴰⴳⵔⴰⵡ ⵏⵏⴻⵛ ⵎⴰⵃⴻⵏⴷ ⴰⴷ ⵜⴽⴻⵛⵛⴹⴻⴷ, ⵃⵉⵎⴰ ⴰⴷ ⵜⴻⴽⵙⵉⴷ ⵏⵏⵓⵇⴰⵔⵜ ⴷ ⵡⵓⵔⴻⵖ, ⵃⵉⵎⴰ ⴰⴷ ⵜᵉⵟⵟⴼⴻⴷ ⵍⵎⴰⵍ ⴷ ⵡⴰⴳⵍⴰ, ⵃⵉⵎⴰ ⴰⴷ ⵜⴰⵛⴰⵔⴻⴷ ⵜⴰⴽⴻⵛⵛⴰⴹⵜ ⵜⴰⵎⴻⵇⵇⵔⴰⵏⵜ?’ ”
14 “ⵙ ⵓⵢⴰ, ⵏⴰⴱⴱ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵓⵛⴰ ⵉⵏⵉ ⵉ ⵀⴰⵊⵓⵊ ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⴷⴻⴳ ⵡⴰⵙⵙ ⵏⵏⵉ, ⵅⵎⵉ ⵖⴰ ⵉⵣⴷⴻⵖ ⵍⴳⴻⵏⵙ ⵉⵏⵓ ⵉⵙⵔⴰⵉⵍ ⴷⵉ ⵍⴰⵎⴰⵏ, ⵎⴰ ⵛⴻⴽ ⵡⴰⵔ ⵜⴻⵙⵙⵉⵏⴻⴷ ⵎⵉⵏ ⵉⵜⵜⵅⴻⵚⵚⴰ ⴰⴷ ⵜ ⵜⴻⴳⴳⴻⴷ? 15 ⴰⴷ ⴷⴷ-ⵜⴰⵙⴻⴷ ⵣⴻⴳ ⵡⴻⵎⵛⴰⵏ ⵏⵏⴻⵛ, ⵣⵉ ⵟⵟⵔⵓⴼⴰ ⵏ ⵛⵛⴰⵎⴰⵍ ⵇⴰⵄ, ⵛⴻⴽ ⴷ ⵡⴰⵟⵟⴰⵙ ⵏ ⵍⴻⴳⵏⵓⵙ ⴰⴽⵉⴷⴻⴽ. ⵎⴰⵔⵔⴰ ⵏⵉⵜⵏⵉ ⴷ ⵉⵎⵏⴰⵢⴻⵏ ⵙ ⵉⵢⵙⴰⵏ, ⵉⵊⵊ ⵏ ⵡⴻⴳⵔⴰⵡ ⴷ ⴰⵎⴻⵇⵇⵔⴰⵏ ⴷ ⵢⵉⵊⵊ ⵏ ⵍⵄⴻⵙⴽⴰⵔ ⵉⵊⴻⵀⴷⴻⵏ. 16 ⴰⴷ ⵜⴳⴻⵄⵄⴷⴻⴷ ⴹⵉⴷⴷ ⵉ ⵍⴳⴻⵏⵙ ⵉⵏⵓ ⵉⵙⵔⴰⵉⵍ, ⴰⵎ ⵢⵉⵊⵊ ⵏ ⵓⵙⴻⵢⵏⵓ, ⵎⴰⵃⴻⵏⴷ ⴰⴷ ⵜⴻⴷⵍⴻⴷ ⵜⴰⵎⵎⵓⵔⵜ. ⴰⴷ ⵢⵉⵍⵉ ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ. ⵏⴻⵛⵛ ⴰⴷ ⵛⴻⴽ ⵙⵙⵉⵡⴹⴻⵖ ⵅ ⵜⴻⵎⵎⵓⵔⵜ ⵉⵏⵓ, ⵃⵉⵎⴰ ⵍⴻⴳⵏⵓⵙ ⴰⴷ ⴰⵢⵉ ⵙⵙⵏⴻⵏ, ⵅⵎⵉ ⵣⵣⴰⵢⴻⴽ ⵉ ⵖⴰ ⵜⵜⵡⴰⵇⴻⴷⴷⵙⴻⵖ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ, ⴰ ⵀⴰⵊⵓⵊ!’ 17 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵎⴰ ⴰⵇⴰ ⵛⴻⴽ ⴷ ⵡⴻⵏⵏⵉ ⵅ ⵙⵙⵉⵡⵍⴻⵖ ⴷⴻⴳ ⵡⵓⵙⵙⴰⵏ ⵏ ⵣⵉⵛ, ⵙ ⵓⴼⵓⵙ ⵏ ⵉⵎⵙⴻⵅⵅⴰⵔⴻⵏ ⵉⵏⵓ, ⵉⵏⴰⴱⵉⵢⵢⴻⵏ ⵏ ⵉⵙⵔⴰⵉⵍ ⵏⵏⵉ ⵜⵓⵖⴰ ⵉⵜⵜⵏⴰⴱⴱⴻⵏ ⴷⴻⴳ ⵡⵓⵙⵙⴰⵏ ⵏⵏⵉ, ⵍⵎⵉⵊⴰⵍ ⵏ ⵡⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ, ⴱⴻⵍⵍⵉ ⵏⴻⵛⵛ ⴰⴷ ⵛⴻⴽ ⵙⵙⵉⵡⴹⴻⵖ ⴹⵉⴷⴷ ⵏⵙⴻⵏ? 18 ⴷⴻⴳ ⵡⴰⵙⵙ ⵏⵏⵉ, ⴷⴻⴳ ⵡⴰⵙⵙ ⵉ ⴷⵉ ⴷⴷ ⵖⴰ ⵢⴰⵙ ⵀⴰⵊⵓⵊ ⴹⵉⴷⴷ ⵉ ⵜⴻⵎⵎⵓⵔⵜ ⵏ ⵉⵙⵔⴰⵉⵍ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⴰⵇⴰ ⴰⴷ ⵢⴰⵍⵉ ⵡⴻⵙⵄⴰⵔ ⵉⵏⵓ ⴷⴻⴳ ⵡⴻⵏⵣⴰⵔⴻⵏ ⵉⵏⵓ. 19 ⴷⵉ ⵜⵓⵙⵎⵉ ⵉⵏⵓ ⵉⵇⴻⴷⴷⵙⴻⵏ, ⴷⵉ ⵜⵎⴻⵙⵙⵉ ⵏ ⵓⴷⵓⵇⵇⴻⵣ ⵉⵏⵓ ⵏ ⵓⴼⵓⴳⴻⵎ ⵏⵏⵉⵖ: ⵙ ⵜⵉⴷⴻⵜⵜ, ⴰⵎ ⴷⴷⴰⵔⴻⵖ ⵏⴻⵛⵛ, ⵎⴰⵍⴰ ⴷⴻⴳ ⵡⴰⵙⵙ ⵏⵏⵉ ⵡⴰⵔ ⵉⵜⵜⵉⵍⵉ ⵉⵊⵊ ⵏ ⵡⴻⵏⵀⴻⵣⵣⵉ ⵏ ⵜⴻⵎⵎⵓⵔⵜ ⴰⵎⴻⵇⵇⵔⴰⵏ ⴷⵉ ⵜⴻⵎⵎⵓⵔⵜ ⵏ ⵉⵙⵔⴰⵉⵍ, ■ 20 ⴰⵍⴰⵎⵉ ⵉⵙⴻⵍⵎⴰⵏ ⵏ ⵍⴻⴱⵃⴰⵔ ⴷ ⵉⵊⴹⴰⴹ ⵏ ⵓⵊⴻⵏⵏⴰ ⴷ ⵍⵎⴰⵍ ⵏ ⵢⴻⵢⵢⴰⵔ ⴷ ⵎⴰⵔⵔⴰ ⵍⵎⴰⵍ ⵏⵏⵉ ⵉⵜⵜⴱⵓⵄⴻⵏ ⵅ ⵜⴻⵎⵎⵓⵔⵜ ⴷ ⵎⴰⵔⵔⴰ ⵉⵡⴷⴰⵏ ⵏⵏⵉ ⵉⴵⴰⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⴰⴷ ⴰⵔⵊⵉⵊⴻⵏ, ⵓ ⵉⴷⵓⵔⴰⵔ ⴰⴷ ⵜⵜⵡⴰⵎⴻⵏⴹⴰⵔⴻⵏ ⵓ ⵍⴻⵊⵔⵓⴼ ⵉⵄⵓⴵⴻⵏ ⴰⴷ ⵀⵔⵓⵔⴰⵏ ⴷ ⵎⴰⵔⵔⴰ ⵍⴻⵃⵢⵓⴹ ⴰⴷ ⵡⴹⴰⵏ. □ 21 ⵏⴻⵛⵛ ⴰⴷ ⴷⴷ-ⵍⴰⵖⵉⵖ ⵅ ⵙⵙⵉⴼ ⴹⵉⴷⴷ ⵏⵏⴻⵙ ⵅ ⵎⴰⵔⵔⴰ ⵉⴷⵓⵔⴰⵔ ⵉⵏⵓ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ. ⵙⵙⵉⴼ ⵏ ⴽⵓⵍ ⵉⵊⵊ ⴰⴷ ⵢⵉⵍⵉ ⵅ ⵓⵎⴰⵙ. 22 ⵏⴻⵛⵛ ⴰⴷ ⵅⴰⵙ ⵃⴻⴽⵎⴻⵖ ⵙ ⵟⵟⴰⵄⵓⵏ ⵓ ⵙ ⵉⴷⴰⵎⵎⴻⵏ ⵓⵛⴰ ⴰⴷ ⵅⴰⵙ ⴳⴳⴻⵖ ⵓ ⵅ ⵍⵄⴻⵙⴽⴰⵔ ⵏⵏⴻⵙ ⵓ ⵅ ⵡⴰⵟⵟⴰⵙ ⵏ ⵍⴻⴳⵏⵓⵙ ⵏⵏⵉ ⴽⵉⴷⴻⵙ ⵉ ⵖⴰ ⵢⵉⵍⵉⵏ, ⴰⵏⵥⴰⵔ ⵉⵊⴻⵀⴷⴻⵏ ⴷ ⵉⴱⵇⵓⵇⴻⵏ ⵉⵎⴻⵇⵇⵔⴰⵏⴻⵏ ⵏ ⵜⴻⴱⵔⵓⵔⵉ ⴷ ⵜⵎⴻⵙⵙⵉ ⴷ ⵍⴻⵛⴱⴰⵔⵉⵢⵢⴻⵜ. ■ 23 ⵏⴻⵛⵛ ⴰⴷ ⵙⵙⴻⵛⵏⴻⵖ ⵉⵅⴻⴼ ⵉⵏⵓ ⴷ ⴰⵎⴻⵇⵇⵔⴰⵏ ⴷ ⴰⵎⵇⴻⴷⴷⴰⵙ ⵓ ⴰⴷ ⵜⵜⵡⴰⵙⵙⵏⴻⵖ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵍⴻⴳⵏⵓⵙ. ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’ ”