ⵜⴰⵏⵓⴽⵔⴰ ⵏ ⵉⵙⵔⴰⵉⵍ
37
1 ⵜⵓⵖⴰ ⵓⴼⵓⵙ ⵏ ⵙⵉⴷⵉ ⵅⴰⴼⵉ ⵓⵛⴰ ⵙⵉⴷⵉ ⵉⵙⵙⵓⴼⴼⴻⵖ ⴰⵢⵉ-ⴷⴷ ⴷⵉ ⴰⵔⵔⵓⵃ ⵓⵛⴰ ⵉⵙⵙⴰⵔⵙ ⴰⵢⵉ ⴷⵉ ⵍⵡⴻⵙⵟ ⵏ ⵍⴻⵡⴹⴰ ⵏⵏⵉ ⵜⵓⵖⴰ ⵢⴻⵛⵛⵓⵔⴻⵏ ⵙ ⵉⵖⵙⴰⵏ. 2 ⵏⴻⵜⵜⴰ ⵉⵏⴷⴻⵀ ⴰⵢⵉ ⴷⴻⴳ ⵡⴻⵏⵏⴻⴹ ⵏⵏⴻⵙ, ⵓ ⵅⵣⴰⵔ, ⴰⵇⴰ ⴷⵉⵏ ⴰⵟⵟⴰⵙ ⵙ ⵡⴰⵟⵟⴰⵙ ⵏ ⵉⵖⵙⴰⵏ ⵅ ⵡⵓⴷⴻⵎ ⵏ ⵍⴻⵡⴹⴰ, ⵓ ⵅⵣⴰⵔ, ⴰⵇⴰ ⴰⵜⴻⵏ ⵓⵥⵖⴻⵏ ⴰⵟⵟⴰⵙ. 3 ⵏⴻⵜⵜⴰ ⵉⵏⵏⴰ ⴰⵢⵉ: “ⴰ ⵎⵎⵉⵙ ⵏ ⴱⵏⴰⴷⴻⵎ, ⵎⴰ ⴰⴷ ⴷⴷⴰⵔⴻⵏ ⵉⵖⵙⴰⵏ-ⴰ ⵄⴰⵡⴻⴷ?” ⵏⵏⵉⵖ ⵏⴻⵛⵛ: “ⴰ ⵙⵉⴷⵉ ⵉⵏⵓ, ⵙⵉⴷⵉ, ⵛⴻⴽ ⵜⴻⵙⵙⵏⴻⴷ ⵜ!” 4 ⵅⴻⵏⵏⵉ ⵉⵏⵏⴰ ⴰⵢⵉ: “ⵏⴰⴱⴱ ⵅ ⵢⴻⵖⵙⴰⵏ-ⴰ, ⵉⵏⵉ ⴰⵙⴻⵏ: ‘ⴰ ⵉⵖⵙⴰⵏ ⵓⵥⵖⴻⵏ, ⵙⵍⴻⵎ ⵉ ⵡⴰⵡⴰⵍ ⵏ ⵙⵉⴷⵉ. 5 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵉ ⵉⵖⵙⴰⵏ-ⴰ: ⵅⵣⴰⵔ, ⵏⴻⵛⵛ ⴰⴷ ⴷⴰⵢⵡⴻⵎ ⵙⵙⵉⴷⴼⴻⵖ ⴱⵓⵃⴱⴻⵍ ⵓⵛⴰ ⴰⴷ ⵜⴻⴷⴷⴰⵔⴻⵎ ⵄⴰⵡⴻⴷ. 6 ⴰⴷ ⵅⴰⵡⴻⵎ ⴳⴳⴻⵖ ⵉⵥⴻⵡⵔⴰⵏ ⵓ ⴰⴷ ⵅⴰⵡⴻⵎ ⵙⵙⴳⴻⵄⵄⴷⴻⵖ ⴰⵢⵙⵓⵎ ⵓⵛⴰ ⴰⴷ ⴽⴻⵏⵏⵉⵡ ⴷⵍⴻⵖ ⵙ ⵉⵍⴻⵎ ⵓⵛⴰ ⴰⴷ ⴷⴰⵢⵡⴻⵎ ⴳⴳⴻⵖ ⴱⵓⵃⴱⴻⵍ, ⴰⴷ ⵜⴻⴷⴷⴰⵔⴻⵎ ⵄⴰⵡⴻⴷ. ⵅⴻⵏⵏⵉ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’ ” 7 ⵍⴰⵎⵉ ⵜⵓⵖⴰ ⵜⵜⵏⴰⴱⴱⴻⵖ ⴰⵎ ⵎⴰⵎⵎⴻⵛ ⴷ ⴰⵢⵉ ⵉⵜⵜⵡⴰⵡⴻⵚⵚⴰ, ⵓⵛⴰ ⵜⵓⵖⴰ ⴷⵉⵏ ⵉⵊⵊ ⵏ ⵍⵃⴻⵙⵙ ⵍⴰⵎⵉ ⵜⵓⵖⴰ ⵜⵜⵏⴰⴱⴱⴻⵖ, ⵓ ⵅⵣⴰⵔ, ⴰⵇⴰ ⴷⴰ ⵉⵛⵜ ⵏ ⵜⴰⵔⵊⵉⵊⵉⵜ ⵓⵛⴰ ⵉⵖⵙⴰⵏ ⵎⵓⵏⴻⵏ, ⴽⵓⵍ ⵉⵖⴻⵙ ⴰⴽ-ⴷ ⵉⵖⴻⵙ ⵏⵏⴻⵙ. 8 ⵥⵍⵉⵖ, ⵓ ⵅⵣⴰⵔ, ⴰⵇⴰ ⴷⴻⵡⵍⴻⵏ ⵅⴰⵙⴻⵏ-ⴷⴷ ⵉⵥⴻⵡⵔⴰⵏ ⵓ ⵢⵓⵍⵉ ⵅⴰⵙⴻⵏ ⵡⴻⵢⵙⵓⵎ ⵓ ⵏⴻⵜⵜⴰ ⵉⴷⵍⴰ ⵉ-ⵜⴻⵏ ⵙ ⵢⵉⵍⴻⵎ ⵙⴻⵏⵏⴻⵊ ⵏⵙⴻⵏ, ⵎⴰⵛⴰ ⵡⴰⵔ ⴷⴰⵢⵙⴻⵏ ⵜⵓⵖⵉ ⵄⴰⴷ ⴱⵓⵃⴱⴻⵍ. 9 ⵏⴻⵜⵜⴰ ⵉⵏⵏⴰ ⴰⵢⵉ: “ⵏⴰⴱⴱ ⵉ ⴰⵔⵔⵓⵃ, ⵏⴰⴱⴱ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵓⵛⴰ ⵉⵏⵉ ⵉ ⴰⵔⵔⵓⵃ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⴰⵙ-ⴷⴷ ⵣⵉ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵓⵙⴻⵎⵎⵉⴹ, ⴰ ⴰⵔⵔⵓⵃ, ⵓ ⵙⵓⴹ ⴷⴻⴳ ⵉⵏⴰ ⵉⵏⵏⵉ ⵉⵜⵜⵡⴰⵏⵖⴻⵏ, ⵃⵉⵎⴰ ⴰⴷ ⴷⴷⴰⵔⴻⵏ.’ ” 10 ⵅⴻⵏⵏⵉ ⵏⴰⴱⴱⴻⵖ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵉⵜⵜⵡⴰⵡⴻⵚⵚⴰ. ⵓⵛⴰ ⵢⵓⴷⴻⴼ ⴰⵔⵔⵓⵃ ⴷⴰⵢⵙⴻⵏ ⵓⵛⴰ ⴷⴷⴰⵔⴻⵏ ⵄⴰⵡⴻⴷ ⵓⵛⴰ ⴽⴽⴰⵔⴻⵏ ⴱⴻⴷⴷⴻⵏ ⵅ ⵉⴹⴰⵔⴻⵏ ⵏⵙⴻⵏ, ⴰⵇⴰ ⴷ ⵉⵊⵊ ⵏ ⵍⵄⴻⵙⴽⴰⵔ ⴷ ⴰⵎⴻⵇⵇⵔⴰⵏ ⴰⵟⵟⴰⵙ ⵙ ⵡⴰⵟⵟⴰⵙ.
11 ⵅⴻⵏⵏⵉ ⵉⵏⵏⴰ ⴰⵢⵉ: “ⴰ ⵎⵎⵉⵙ ⵏ ⴱⵏⴰⴷⴻⵎ, ⵉⵖⵙⴰⵏ-ⴰ ⴰⵇⴰ ⴰⵜⴻⵏ ⵎⴰⵔⵔⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. ⵅⵣⴰⵔ, ⵏⵉⵜⵏⵉ ⵇⵇⴰⵔⴻⵏ: ‘ⵉⵖⵙⴰⵏ ⵏⵏⴻⵖ ⵓⵥⵖⴻⵏ ⵓⵛⴰ ⵍⴰⵢⴰⵙ ⵏⵏⴻⵖ ⵉⵡⴻⴷⴷⴰⵔ ⵓ ⵏⴻⵛⵛⵉⵏ ⵏⴻⵜⵜⵡⴰⵇⴹⴻⵄ!’ 12 ⵙ ⵓⵢⴰ, ⵏⴰⴱⴱ, ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⵏⴻⵛⵛ ⴰⴷ ⴰⵔⵣⵎⴻⵖ ⵉⵎⴻⴹⵍⴰⵏ ⵏⵡⴻⵎ, ⴰⴷ ⴽⴻⵏⵏⵉⵡ ⵙⵙⴳⴻⵄⵄⴷⴻⵖ ⵣⴻⴳ ⵉⵎⴻⴹⵍⴰⵏ ⵏⵡⴻⵎ, ⴰ ⵍⴳⴻⵏⵙ ⵉⵏⵓ, ⵓ ⵏⴻⵛⵛ ⴰⴷ ⴽⴻⵏⵏⵉⵡ ⴰⵡⵢⴻⵖ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏ ⵉⵙⵔⴰⵉⵍ. 13 ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ, ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⵓⵎⵉ ⴰⵔⵣⵎⴻⵖ ⵉⵎⴻⴹⵍⴰⵏ ⵏⵡⴻⵎ ⵓⵛⴰ ⵙⵙⵓⴼⴼⵖⴻⵖ-ⴷⴷ ⴽⴻⵏⵏⵉⵡ ⵣⴻⴳ ⵉⵎⴻⴹⵍⴰⵏ ⵏⵡⴻⵎ, ⴰ ⵍⴳⴻⵏⵙ ⵉⵏⵓ. 14 ⵏⴻⵛⵛ ⴰⴷ ⴳⴳⴻⵖ ⴰⵔⵔⵓⵃ ⵉⵏⵓ ⴷⴰⵢⵡⴻⵎ ⴷⵉ ⴷⴰⵅⴻⵍ ⵏⵡⴻⵎ ⵓ ⴽⴻⵏⵏⵉⵡ ⴰⴷ ⵜⴻⴷⴷⴰⵔⴻⵎ ⵄⴰⵡⴻⴷ ⵓ ⵏⴻⵛⵛ ⴰⴷ ⴽⴻⵏⵏⵉⵡ ⵙⵙⴰⵔⵙⴻⵖ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏⵡⴻⵎ ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ, ⵙⵉⴷⵉ, ⵙⵙⵉⵡⵍⴻⵖ ⵓⵛⴰ ⴳⴳⵉⵖ ⵜ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.’ ”
ⴰⵙⵎⵓⵏⵉ ⵏ ⵉⵙⵔⴰⵉⵍ ⴷ ⵢⴰⵀⵓⴷⴰ
15 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 16 “ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⴽⵙⵉ ⵉⵊⵊ ⵏ ⵓⵣⴻⴵⴰⴹ ⵏ ⵓⴽⴻⵛⵛⵓⴹ ⵓⵛⴰ ⴰⵔⵉ ⴷⴰⵢⴻⵙ: ‘ⵉ ⵢⴰⵀⵓⴷⴰ ⵓ ⵉ ⴰⵔⵔⴰⵡ ⵏ ⵉⵙⵔⴰⵉⵍ, ⵉⵎⵄⴰⵛⴰⵔⴻⵏ ⵏⵏⴻⵙ!’ ⴽⵙⵉ ⴰⵡⴰⵔⵏⵉ ⴰⵙ ⴰⵣⴻⴵⴰⴹ ⵏⵏⴻⵖⵏⵉ ⵓⵛⴰ ⴰⵔⵉ ⴷⴰⵢⴻⵙ: ‘ⵉ ⵢⵓⵙⵓⴼ, ⴰⵣⴻⴵⴰⴷ ⵏ ⵉⴼⵔⴰⵢⵉⵎ, ⵓ ⵉ ⵎⴰⵔⵔⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵉⵎⴻⴷⴷⵓⴽⴽⴰⵍ ⵏⵏⴻⵙ!’ 17 ⵙⵎⵓⵏ ⵜⴻⵏ ⵅⴻⵏⵏⵉ ⵉⵊⵊ ⴰⴽ-ⴷ ⵡⴻⵏⵏⴻⵖⵏⵉ, ⴻⴳⴳ ⵣⵣⴰⵢⵙⴻⵏ ⵉⵊⵊ ⵏ ⵓⵣⴻⴵⴰⴹ ⵉ ⵛⴻⴽ. ⴰⴷ ⴷⴻⵡⵍⴻⵏ ⴷ ⵉⵊⵊ ⴷⴻⴳ ⵓⴼⵓⵙ ⵏⵏⴻⵛ.
18 ⵅⵎⵉ ⴽⵉⴽ ⵉ ⵖⴰ ⵉⵙⵙⵉⵡⵍⴻⵏ ⵜⴰⵔⵡⴰ ⵏ ⵍⴳⴻⵏⵙ ⵏⵏⴻⵛ, ⴰⴷ ⵉⵏⵉⵏ: ‘ⵎⴰ ⵡⴰⵔ ⵜⴻⵅⵙⴻⴷ ⴰⴷ ⴰⵏⴻⵖ ⵜⴻⵙⵙⴻⵛⵏⴻⴷ ⵎⵉⵏ ⵉⵅⵙ ⴰⴷ ⵉⵏⵉⵏⵜ ⵜⵎⴻⵙⵍⴰⵢⵉⵏ-ⴰ ⵉ ⵛⴻⴽ?’, 19 ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⵏⴻⵛⵛ ⴰⴷ ⴽⵙⵉⵖ ⴰⵣⴻⴵⴰⴹ ⵏ ⵢⵓⵙⵓⴼ, ⵡⴻⵏⵏⵉ ⵉⴵⴰⵏ ⴷⴻⴳ ⵓⴼⵓⵙ ⵏ ⵉⴼⵔⴰⵢⵉⵎ, ⴰⵣⴻⴵⴰⴹ ⵏ ⵜⵇⴻⴱⴱⴰⵍ ⵏ ⵉⵙⵔⴰⵉⵍ, ⵉⵎⵄⴰⵛⴰⵔⴻⵏ ⵏⵏⴻⵙ, ⵓⵛⴰ ⴰⴷ ⵜⴻⵏ ⵙⵙⵎⵓⵏⴻⵖ ⴰⴽ-ⴷ ⵓⵣⴻⴵⴰⴹ ⵏ ⵢⴰⵀⵓⴷⴰ ⵓⵛⴰ ⴰⴷ ⵜⴻⵏ ⴳⴳⴻⵖ ⴷ ⵉⵊⵊ ⵏ ⵓⵣⴻⴵⴰⴹ ⵓⵛⴰ ⴰⴷ ⴷⴻⵡⵍⴻⵏ ⴷ ⵉⵊⵊ ⴷⴻⴳ ⵓⴼⵓⵙ ⵉⵏⵓ.’ 20 ⵉⵣⴻⴵⴰⴹⴻⵏ ⵣⴻⴳ ⵓⴽⴻⵛⵛⵓⴹ ⵉ ⵅ ⵜⵓⵔⵉⴷ, ⴰⴷ ⵉⵍⵉⵏ ⴷⴻⴳ ⵓⴼⵓⵙ ⵏⵏⴻⵛ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ. 21 ⵅⴻⵏⵏⵉ ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⵏⴻⵛⵛ ⴰⴷ ⵟⵟⴼⴻⵖ ⴰⵢⵜ ⵏ ⵉⵙⵔⴰⵉⵍ ⵣⵉ ⵍⵡⴻⵙⵜ ⵏ ⵍⴻⴳⵏⵓⵙ ⵎⴰⵏⵉ ⵖⴰⵔ ⵓⵢⵓⵔⴻⵏ ⵓⵛⴰ ⴰⴷ ⵜⴻⵏ ⵙⵙⵎⵓⵏⴻⵖ ⵣⴻⴳ ⵡⴻⵏⵏⴻⴹ ⵓⵛⴰ ⴰⴷ ⵜⴻⵏ ⴰⵡⵢⴻⵖ ⵖⴰⵔ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏⵙⴻⵏ. 22 ⵏⴻⵛⵛ ⴰⴷ ⵜⴻⵏ ⴳⴳⴻⵖ ⴷ ⵉⵊⵊ ⵏ ⵍⴳⴻⵏⵙ ⴷⵉ ⵜⴻⵎⵎⵓⵔⵜ, ⵅ ⵉⴷⵓⵔⴰⵔ ⵏ ⵉⵙⵔⴰⵉⵍ, ⴷ ⵉⵊⵊ ⵏ ⵓⵊⴻⴵⵉⴷ ⴰⴷ ⵢⵉⵍⵉ ⵉ ⵎⴰⵔⵔⴰ ⵉⴷⵙⴻⵏ ⴷ ⴰⵊⴻⴵⵉⴷ ⵓⵛⴰ ⵄⴻⵎⵎⴰⵔⵚ ⵄⴰⴷ ⴰⴷ ⵉⵍⵉⵏ ⵉ ⵜⵏⴰⵢⴻⵏ ⵏ ⵍⴻⴳⵏⵓⵙ ⵓ ⵄⴻⵎⵎⴰⵔⵚ ⵄⴰⴷ ⴰⴷ ⵜⵜⵡⴰⴱⴹⴰⵏ ⴷⵉ ⵜⵏⴰⵢⴻⵏ ⵏ ⵜⴳⴻⵍⴷⵉⵡⵉⵏ. ■ 23 ⵡⴰⵔ ⵙⵙⵅⴻⵎⵎⴰⵊⴻⵏ ⵄⴰⴷ ⵉⵅⴻⴼ ⵏⵙⴻⵏ ⵙ ⵉⵎⴻⵢⴹⴰ ⵏⵙⴻⵏ ⵏ ⵍ’ⴰⵚⵏⴰⵎ, ⵙ ⵏⵏⵄⴰⵡⴰⵜ ⵏⵙⴻⵏ ⵏ ⵍ’ⴰⵚⵏⴰⵎ ⵓ ⵙ ⵍⵎⵓⵄⵚⵉⵢⵢⴰⵜ ⵏⵙⴻⵏ. ⵏⴻⵛⵛ ⴰⴷ ⵜⴻⵏ ⵙⵙⵏⴻⵊⵎⴻⵖ ⵣⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵏⵙⴻⵏ ⵉ ⴷⵉ ⵅⴹⵉⵏ ⵏⵉⵜⵏⵉ ⵓ ⵏⴻⵛⵛ ⴰⴷ ⵜⴻⵏ ⵙⵙⵉⵣⴻⴷⴳⴻⵖ. ⵅⴻⵏⵏⵉ ⵏⵉⵜⵏⵉ ⴰⴷ ⴰⵢⵉ ⵉⵍⵉⵏ ⴷ ⵍⴳⴻⵏⵙ ⵓ ⵏⴻⵛⵛ ⴰⴷ ⴰⵙⴻⵏ ⵉⵍⵉⵖ ⴷ ⴰⵔⴻⴱⴱⵉ. 24 ⴰⵎⵙⴻⵅⵅⴰⵔ ⵉⵏⵓ ⴷⴰⵡⵓⴷ ⴰⴷ ⵅⴰⵙⴻⵏ ⵢⵉⵍⵉ ⴷ ⴰⵊⴻⴵⵉⴷ ⵓⵛⴰ ⴰⴷ ⴷⵉⵏ ⵢⵉⵍⵉ ⵉⵊⵊ ⵏ ⵓⵎⴻⴽⵙⴰⵡ ⵉ ⵎⴰⵔⵔⴰ ⵏⵉⵜⵏⵉ. ⵏⵉⵜⵏⵉ ⴰⴷ ⴹⴼⴰⵔⴻⵏ ⵍⴼⴰⵔⴰⵢⵉⴹ ⵉⵏⵓ ⵓⵛⴰ ⴰⴷ ⵃⴹⴰⵏ ⵜⵉⵡⴻⵚⵚⴰ ⵉⵏⵓ, ⴰⴷ ⵣⵣⴰⵢⵙⴻⵏⵜ ⴳⴳⴻⵏ. □ ■ 25 ⴰⴷ ⵣⴻⴷⵖⴻⵏ ⴷⵉ ⵜⴻⵎⵎⵓⵔⵜ ⵏⵏⵉ ⵡⵛⵉⵖ ⵉ ⵓⵎⵙⴻⵅⵅⴰⵔ ⵉⵏⵓ ⵢⴰⵄⵇⵓⴱ, ⵉ ⴷⵉ ⵜⵓⵖⴰ ⵣⴻⴷⴷⵖⴻⵏ ⵍⴻⵊⴷⵓⴷ ⵏⵡⴻⵎ, ⵡⴰⵀ, ⵏⵉⵜⵏⵉ ⴰⴷ ⴷⴰⵢⴻⵙ ⵣⴻⴷⵖⴻⵏ ⵉ ⵍⴻⴱⴷⴰ, ⵏⵉⵜⵏⵉ ⴷ ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⵉⵃⴻⵏⵊⵉⵔⴻⵏ ⵏ ⵉⵃⴻⵏⵊⵉⵔⴻⵏ ⵏⵙⴻⵏ, ⵓⵛⴰ ⴰⵎⵙⴻⵅⵅⴰⵔ ⵉⵏⵓ ⴷⴰⵡⵓⴷ ⴰⴷ ⵢⵉⵍⵉ ⴷ ⵍⵃⴰⴽⴻⵎ ⵏⵙⴻⵏ ⵉ ⵍⴻⴱⴷⴰ. 26 ⵏⴻⵛⵛ ⴰⴷ ⴽⵉⴷⵙⴻⵏ ⵇⴻⴹⵄⴻⵖ ⵉⵊⵊ ⵏ ⵍⵄⴰⵀⴷ ⵏ ⵍⴻⵀⵏⴰ, ⴰⴷ ⵢⵉⵍⵉ ⴷ ⵍⵄⴰⵀⴷ ⵉ ⵍⴻⴱⴷⴰ. ⵏⴻⵛⵛ ⴰⴷ ⵜⴻⵏ ⴱⴰⵔⴽⴻⵖ ⵓ ⴰⴷ ⴷⴰⵢⵙⴻⵏ ⴰⵔⵏⵉⵖ ⴰⵟⵟⴰⵙ ⵓ ⵏⴻⵛⵛ ⴰⴷ ⴳⴳⴻⵖ ⵣⵣⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ ⴷⵉ ⵍⵡⴻⵙⵟ ⵏⵙⴻⵏ ⵉ ⵍⴻⴱⴷⴰ. ■ 27 ⴰⴷ ⵖⴰⵔⵙⴻⵏ ⵜⵉⵍⵉ ⵜⵣⴻⴷⴷⵉⵖⵜ ⵉⵏⵓ ⵓ ⵏⴻⵛⵛ ⴰⴷ ⵉⵍⵉⵖ ⴷ ⴰⵔⴻⴱⴱⵉ ⵏⵙⴻⵏ ⵓ ⵏⵉⵜⵏⵉ ⴰⴷ ⵉⵍⵉⵏ ⴷ ⵍⴳⴻⵏⵙ ⵉⵏⵓ, ■ 28 ⵓⵛⴰ ⴰⴷ ⵙⵙⵏⴻⵏ ⵍⴻⴳⵏⵓⵙ, ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ ⵏⵏⵉ ⵉⵙⵙⵇⴻⴷⴷⵙⴻⵏ ⵉⵙⵔⴰⵉⵍ ⵅⵎⵉ ⵖⴰ ⵜⵉⵍⵉ ⵣⵣⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ ⴷⵉ ⵍⵡⴻⵙⵟ ⵏⵙⴻⵏ ⵉ ⵍⴻⴱⴷⴰ.’ ”