10
1 ⴰⵡⴰⵔⵏⵉ ⴰⵢⴰ ⵥⵔⵉⵖ, ⵅⵣⴰⵔ, ⵙⴻⵏⵏⴻⵊ ⵉ ⵍⵇⵓⴱⴱⴻⵜ, ⵙⴻⵏⵏⴻⵊ ⵉ ⵓⵣⴻⴵⵉⴼ ⵏ ⵉⴽⵉⵔⵓⴱⴻⵏ, ⵜⵓⵖⴰ ⴷⵉⵏ ⵛⴰ ⴰⵎ ⵡⴻⵥⵔⵓ ⵏ ⵚⴰⴼⴼⵉⵔ, ⵎⵉⵏ ⴷⴷ-ⵉⵜⵜⴱⴰⵏⴻⵏ ⴰⵎ ⵡⵓⴷⴻⵎ ⵏ ⵎⵉⵏ ⵢⴰⵔⵡⴻⵙⴻⵏ ⴷⴻⴳ ⵉⵊⵊ ⵏ ⵍⵄⴰⵔⵛ, ⵓ ⵙⴻⵏⵏⴻⵊ ⵉ ⵏⵉⵜⵏⵉ ⵉⴹⵀⴰⵔ-ⴷⴷ ⵏⴻⵜⵜⴰ. 2 ⵓⵛⴰ ⵉⵙⵙⵉⵡⴻⵍ ⴰⴽ-ⴷ ⵡⴻⵔⵢⴰⵣ ⵏⵏⵉ ⵢⴰⵔⴹⴻⵏ ⴰⵔⵔⵓⴷ ⵏ ⵍⴻⵇⵟⴻⵏ, ⵉⵏⵏⴰ: “ⴰⴷⴻⴼ-ⴷⴷ ⵖⴰⵔ ⴷⴰⵅⴻⵍ ⵊⴰⵔ ⵜⵊⴰⵔⵔⴰⵔⵉⵏ ⵉⵜⵜⴻⵏⵏⴹⴻⵏ, ⴰⵍ ⵙⴰⴷⵓ ⵉ ⵉⴽⵉⵔⵓⴱⴻⵏ, ⵓⵛⴰ ⵛⵛⵓⵔ ⵉⴼⴰⵙⵙⴻⵏ ⵏⵏⴻⵛ ⵙ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⵣⵉ ⵊⴰⵔ ⵉⴽⵉⵔⵓⴱⴻⵏ ⵓⵛⴰ ⵣⴻⴵⴻⵄ ⵉ-ⵜ ⵅ ⵜⴻⵏⴷⵉⵏⵜ!” ⵓⵛⴰ ⵢⵓⴷⴻⴼ-ⴷⴷ ⵊⴰⵔ ⴰⵙⴻⵏⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ. □ ■ 3 ⵉⴽⵉⵔⵓⴱⴻⵏ ⵜⵓⵖⴰ ⴱⴻⴷⴷⴻⵏ ⵖⴰⵔ ⵓⵖⴻⵣⴷⵉⵙ ⴰⴼⵓⵙⵉ ⵏ ⵜⴰⴷⴷⴰⵔⵜ ⵓⵎⵉ ⴷⴷ-ⵢⴰⴷⴻⴼ ⵡⴻⵔⵢⴰⵣ ⵖⴰⵔ ⴷⴰⵅⴻⵍ ⵓⵛⴰ ⴰⵙⴻⵢⵏⵓ ⵉⵛⵛⵓⵔ ⵍⴻⵎⵔⴰⵃ ⵏ ⴷⴰⵅⴻⵍ. 4 ⴰⵄⵓⴵⵉ ⵏ ⵙⵉⴷⵉ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⵣⵉ ⵙⴻⵏⵏⴻⵊ ⵏ ⵓⵅⵉⵔⵓⴱ, ⵉⵄⴷⵓ ⵅ ⵜⵏⴻⴱⴷⴰⵜ ⵏ ⵜⴻⵡⵡⴰⵔⵜ ⵏ ⵜⴰⴷⴷⴰⵔⵜ ⵓⵛⴰ ⵜᵉⵜⵜⵡⴰⵛⵛⵓⵔ ⵜⴰⴷⴷⴰⵔⵜ ⵙ ⵓⵙⴻⵢⵏⵓ ⵓ ⵍⴻⵎⵔⴰⵃ ⵏ ⵣⵣⴰⵜ ⵜⵓⵖⴰ ⵉⵛⵛⵓⵔ ⵙ ⵜⴻⵙⵙⵉⵇⵜ ⵏ ⵓⵄⵓⴵⵉ ⵏ ⵙⵉⴷⵉ. 5 ⴷⵔⵉⵣⵣ ⵏ ⵡⴰⴼⵔⵉⵡⴻⵏ ⵉⵜⵜⵡⴰⵙⴻⵍ-ⴷⴷ ⴰⵍ ⴷⴰⵅⴻⵍ ⴷⵉ ⵍⴻⵎⵔⴰⵃ ⵏ ⴱⴰⵔⵔⴰ, ⴰⵎ ⵜⵎⵉⵊⵊⴰ ⵏ ⴰⵔⴻⴱⴱⵉ, ⴰⵎⵣⴻⵎⵎⴰⵔ ⵅ ⴽⵓⵍⵛⵉ, ⵅⵎⵉ ⵉⵙⵙⴰⵡⴰⵍ.
6 ⵉⵎⵙⴰⵔ ⴰⵡⴰⵔⵏⵉ ⵍⴰⵎⵉ ⵢⵓⵎⵓⵔ ⵏⴻⵜⵜⴰ ⵉ ⵡⴻⵔⵢⴰⵣ ⵏⵏⵉ ⵢⴰⵔⴹⴻⵏ ⵍⴻⵇⵟⴻⵏ, ⵉⵏⵏⴰ: “ⴽⵙⵉ ⵜⵉⵎⴻⵙⵙⵉ ⵣⵉ ⵊⴰⵔ ⵜⵊⴰⵔⵔⴰⵔⵉⵏ ⵉⵜⵜⴻⵏⴹⴻⵏ, ⵣⵉ ⵊⴰⵔ ⵉⴽⵉⵔⵓⴱⴻⵏ!”, ⴰⵇⴰ ⵡⴰⵏⵉⵜⴰ ⵢⵓⴷⴻⴼ-ⴷⴷ ⵓⵛⴰ ⵉⴱⴻⴷⴷ ⵣⵣⴰⵜ ⵉ ⵜⵊⴰⵔⵔⴰⵔⵜ ⵉⵜⵜⴻⵏⴹⴻⵏ. 7 ⵅⴻⵏⵏⵉ ⵉⵙⵙⵡⵉⵥⵥⴻⴹ ⵉⵊⵊ ⵏ ⵓⴽⵉⵔⵓⴱ ⴰⴼⵓⵙ ⵏⵏⴻⵙ ⵣⵉ ⵊⴰⵔ ⵉⴽⵉⵔⵓⴱⴻⵏ ⵖⴰⵔ ⵜⵎⴻⵙⵙⵉ ⵏⵏⵉ ⵜⵓⵖⴰ ⵊⴰⵔ ⴰⵙⴻⵏ, ⵉⴽⵙⵉ ⵣⵣⴰⵢⴻⵙ ⵓⵛⴰ ⵉⵙⵙⴰⵔⵙ ⵉ-ⵜⵜ ⴷⴻⴳ ⵉⴼⴰⵙⵙⴻⵏ ⵏ ⵡⴻⵏⵏⵉ ⵢⴰⵔⴹⴻⵏ ⵍⴻⵇⵟⴻⵏ. ⵡⴰⵏⵉⵜⴰ ⵉⴽⵙⵉ ⵜⵜ ⵓⵛⴰ ⵉⴼⴼⴻⵖ. 8 ⵙⴰⴷⵓ ⵡⴰⴼⵔⵉⵡⴻⵏ ⵏ ⵉⴽⵉⵔⵓⴱⴻⵏ ⵉⵜⵜⵡⴰⵥⴰⵔ ⵛⴰ ⴰⵎ ⵚⵚⵉⴼⴻⵜ ⵏ ⵓⴼⵓⵙ ⵏ ⴱⵏⴰⴷⴻⵎ.
9 ⵅⴻⵏⵏⵉ ⵥⵔⵉⵖ, ⵅⵣⴰⵔ, ⴰⵇⴰ ⴷⵉⵏ ⴰⵔⴻⴱⵄⴰ ⵏ ⵜⵊⴰⵔⵔⴰⵔⵉⵏ ⵖⴰⵔ ⵓⵖⴻⵣⴷⵉⵙ ⵏ ⵉⴽⵉⵔⵓⴱⴻⵏ, ⵉⵛⵜ ⵏ ⵜⵊⴰⵔⵔⴰⵔⵜ ⵖⴰⵔ ⵓⵖⴻⵣⴷⵉⵙ ⵏ ⵉⵊⵊ ⵏ ⵓⴽⵉⵔⵓⴱ. ⵓⴷⴻⵎ ⵏ ⵜⵊⴰⵔⵔⴰⵔⵉⵏ ⴰⵎ ⵡⵓⴷⴻⵎ ⵏ ⵡⴻⵥⵔⵓ ⵏ ⵜⴻⵅⵔⵉⵙⵓⵍⵉⵜ. ■ 10 ⵅ ⵎⴰⵎⵎⴻⵛ ⴷⴷ-ⴹⵀⴰⵔⴻⵏ, ⴰⵇⴰ ⴰⵔⴻⴱⵄⴰ ⵖⴰⵔⵙⴻⵏ ⵚⵚⵉⴼⴻⵜ ⴷ ⵉⵛⵜⴻⵏ, ⴰⵅⵎⵉ ⵉⵛⵜ ⵏ ⵜⵊⴰⵔⵔⴰⵔⵜ ⵜᵉⵜⵜⵍⵉⵇ ⵏⵉⵛⴰⵏ ⴷⵉ ⵍⵡⴻⵙⵟ ⵏ ⵜⵊⴰⵔⵔⴰⵔⵜ ⵏⵏⴻⵖⵏⵉ. 11 ⵅⵎⵉ ⴳⴳⵓⵔⴻⵏ, ⴳⴳⵓⵔⴻⵏ ⵖⴰⵔ ⴰⵔⴻⴱⵄⴰ ⵏ ⵉⵖⴻⵣⴷⵉⵙⴻⵏ ⵏⵙⴻⵏ. ⵏⵉⵜⵏⵉ ⵡⴰⵔ ⵜⵜⵏⴻⵇⵍⵉⴱⴻⵏ ⵛⴰ ⵅⵎⵉ ⴳⴳⵓⵔⴻⵏ, ⵎⵉⵏⵣⵉ ⴰⵎⵛⴰⵏ ⵎⴰⵏⵉ ⵜⴰⵔⵔⴰ ⵜⵊⴰⵔⵔⴰⵔⵜ ⵏ ⵣⵣⴰⵜ ⴰⵣⴻⴵⵉⴼ ⵏⵏⴻⵙ, ⴰⵇⴰ ⴹⴼⴰⵔⴻⵏ ⵜⵜ-ⵉ-ⴷⴷ. ⵏⵉⵜⵏⵉ ⵡⴰⵔ ⵏⵏⵇⴻⵍⴱⴻⵏ ⵛⴰ ⵅⵎⵉ ⴳⴳⵓⵔⴻⵏ. 12 ⵎⴰⵔⵔⴰ ⴰⵔⵔⵉⵎⴻⵜ ⵏⵙⴻⵏ: ⵉⵄⵓⵔⴰⵔ ⵏⵙⴻⵏ, ⵉⴼⴰⵙⵙⴻⵏ ⵏⵙⴻⵏ ⴷ ⵡⴰⴼⵔⵉⵡⴻⵏ ⵏⵙⴻⵏ, ⵓⵛⴰ ⵓⵍⴰ ⴷ ⵜⵉⵊⴰⵔⵔⴰⵔⵉⵏ ⵏⵙⴻⵏ ⵛⵛⵓⵔⴻⵏ ⵙ ⵜⵉⵟⵟⴰⵡⵉⵏ ⴷⴻⴳ ⵡⴻⵏⵏⴻⴹ ⵏⵙⴻⵏ ⵖⴰⵔ ⵎⴰⵔⵔⴰ ⴰⵔⴻⴱⵄⴰ ⵉⵎⵓⴷⴷⴰⵔⴻⵏ ⵏⵏⵉ, ⵡⴰⵀ ⵄⴰⴷ ⵜⵉⵊⴰⵔⵔⴰⵔⵉⵏ ⵏⵙⴻⵏ. 13 ⵙⵍⵉⵖ ⵉⵛⵜ ⵏ ⵜⵎⵉⵊⵊⴰ ⴰⵇⴰ ⵜᵉⵜⵜⵍⴰⵖⴰ ⴰⵙⴻⵏⵜ ⵉ ⵜⵊⴰⵔⵔⴰⵔⵉⵏ: ‘ⵜⴰⵊⴰⵔⵔⴰⵔⵜ ⵏ ⴷⴷⴻⵡⵔⴰⵏ!’ 14 ⴽⵓⵍ ⵉⵊⵊ ⵖⴰⵔⴻⵙ ⴰⵔⴻⴱⵄⴰ ⵏ ⵡⵓⴷⵎⴰⵡⴻⵏ: ⵓⴷⴻⵎ ⴰⵎⴻⵣⵡⴰⵔⵓ ⵜⵓⵖⴰ ⴷ ⵓⴷⴻⵎ ⵏ ⵓⴽⵉⵔⵓⴱ, ⵓ ⵓⴷⴻⵎ ⵡⵉⵙⵙ ⵜⵏⴰⵢⴻⵏ ⴷ ⵓⴷⴻⵎ ⵏ ⴱⵏⴰⴷⴻⵎ, ⵓ ⵓⴷⴻⵎ ⵡⵉⵙⵙ ⵜⵍⴰⵜⴰ ⴷ ⵓⴷⴻⵎ ⵏ ⵡⴻⵢⵔⴰⴷ, ⵓ ⵓⴷⴻⵎ ⵡⵉⵙⵙ ⴰⵔⴻⴱⵄⴰ ⴷ ⵓⴷⴻⵎ ⵏ ⵓⴳⵉⴷⴻⵔ.
15 ⵙⵙⴳⴻⵄⵄⴷⴻⵏ ⵉⴽⵉⵔⵓⴱⴻⵏ ⵉⵅⴻⴼ ⵏⵙⴻⵏ. ⵡⴰ ⴷ ⵙⵉⵎⴰⵏⵜ ⵏ ⵓⵎⵓⴷⴷⴰⵔ ⵉ ⵥⵔⵉⵖ ⵖⴰⵔ ⵢⴻⵖⵣⴰⵔ ⵏ ⵅⴰⴱⵓⵔ. 16 ⵓⵎⵉ ⵓⵢⵓⵔⴻⵏ ⵉⴽⵉⵔⵓⴱⴻⵏ, ⵓⵢⵓⵔⴻⵏⵜ ⵓⵍⴰ ⴷ ⵜⵉⵊⴰⵔⵔⴰⵔⵉⵏ ⵖⴰⵔ ⵓⵖⴻⵣⴷⵉⵙ ⵏⵙⴻⵏ, ⵓⵎⵉ ⵙⵙⴳⴻⵄⵄⴷⴻⵏ ⵉⴽⵉⵔⵓⴱⴻⵏ ⴰⴼⵔⵉⵡⴻⵏ ⵏⵙⴻⵏ ⵎⴰⵃⴻⵏⴷ ⴰⴷ ⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ ⵣⵉ ⵜⴻⵎⵎⵓⵔⵜ, ⵡⴰⵔ ⵇⵏⵓⵏⵏⵢⴻⵏⵜ ⵜⵊⴰⵔⵔⴰⵔⵉⵏ ⵏⵏⵉ ⴰⵍⴰⵎⵉ ⴰⴳⴳⵯⴻⵊⴻⵏⵜ ⵅ ⵓⵖⴻⵣⴷⵉⵙ ⵏⵙⴻⵏ. ■ 17 ⵓⵎⵉ ⴱⴻⴷⴷⴻⵏ ⵏⵉⵜⵏⵉ, ⴱⴻⴷⴷⴻⵏⵜ ⵓⵍⴰ ⴷ ⵏⵉⵜⴻⵏⵜⵉ, ⵓⵎⵉ ⵙⵙⴳⴻⵄⵄⴷⴻⵏ ⵏⵉⵜⵏⵉ ⵉⵅⴻⴼ ⵏⵙⴻⵏ, ⵙⵙⴳⴻⵄⵄⴷⴻⵏⵜ ⵓⵍⴰ ⴷ ⵏⵉⵜⴻⵏⵜⵉ ⵉⵅⴻⴼ ⵏⵙⴻⵏⵜ, ⵎⵉⵏⵣⵉ ⴱⵓⵃⴱⴻⵍ ⵏ ⵉⵎⵓⴷⴷⴰⵔⴻⵏ ⵜⵓⵖⴰ-ⵜ ⴷⴰⵢⵙⴻⵏⵜ. ■
18 ⵅⴻⵏⵏⵉ ⵉⴼⴼⴻⵖ ⵓⵄⵓⴵⵉ ⵏ ⵙⵉⴷⵉ ⵣⵉ ⵙⴻⵏⵏⴻⵊ ⵏ ⵜⵏⴻⴱⴷⴰⵜ ⵏ ⵜⴰⴷⴷⴰⵔⵜ ⵓⵛⴰ ⵉⴱⴻⴷⴷ ⵙⴻⵏⵏⴻⵊ ⵉ ⵉⴽⵉⵔⵓⴱⴻⵏ. 19 ⵉⴽⵉⵔⵓⴱⴻⵏ ⵙⵙⴳⴻⵄⵄⴷⴻⵏ ⴰⴼⵔⵉⵡⴻⵏ ⵏⵙⴻⵏ ⵓⵛⴰ, ⵓⵎⵉ ⴷⴷ-ⴼⴼⵖⴻⵏ, ⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ ⵣⵉ ⵜⴻⵎⵎⵓⵔⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ ⵓⵛⴰ ⵓⵍⴰ ⴷ ⵜⵉⵊⴰⵔⵔⴰⵔⵉⵏ ⵖⴰⵔ ⵓⵖⴻⵣⴷⵉⵙ ⵏⵙⴻⵏ. ⵏⵉⵜⵏⵉ ⵇⵇⵉⵎⴻⵏ ⴱⴻⴷⴷⴻⵏ ⵖⴰⵔ ⵡⴰⴷⴰⴼ ⵏ ⵜⴻⵡⵡⴰⵔⵜ ⵏ ⵛⵛⴰⵔⵇ ⵏ ⵜⴰⴷⴷⴰⵔⵜ ⵏ ⵙⵉⴷⵉ ⵓⵛⴰ ⴰⵄⵓⴵⵉ ⵏ ⴰⵔⴻⴱⴱⵉ ⵜⵓⵖⴰ-ⵜ ⵅⴰⵙⴻⵏ ⵣⵉ ⵙⴻⵏⵏⴻⵊ. 20 ⵡⴰ ⴷ ⴰⵎⵓⴷⴷⴰⵔ ⵉ ⵥⵔⵉⵖ ⵙⴰⴷⵓ ⴰⵔⴻⴱⴱⵉ ⵏ ⵉⵙⵔⴰⵉⵍ ⵖⴰⵔ ⵢⴻⵖⵣⴰⵔ ⵏ ⵅⴰⴱⵓⵔ. ⵅⴻⵏⵏⵉ ⵙⵙⵏⴻⵖ ⴱⴻⵍⵍⵉ ⵜⵓⵖⴰ ⴰⵜⴻⵏ ⴷ ⵉⴽⵉⵔⵓⴱⴻⵏ. ■ 21 ⴽⵓⵍ ⵉⵊⵊ ⵖⴰⵔⴻⵙ ⴰⵔⴻⴱⵄⴰ ⵏ ⵡⵓⴷⵎⴰⵡⴻⵏ ⵓ ⴽⵓⵍ ⵉⵊⵊ ⵖⴰⵔⴻⵙ ⴰⵔⴻⴱⵄⴰ ⵏ ⵡⴰⴼⵔⵉⵡⴻⵏ ⵓ ⵙⴰⴷⵓ ⴰⴼⵔⵉⵡⴻⵏ ⵏⵙⴻⵏ ⴰⵇⴰ ⴷⵉⵏ ⵎⵉⵏ ⵢⴰⵔⵡⴻⵙⴻⵏ ⴷⴻⴳ ⵉⴼⴰⵙⵙⴻⵏ ⵏ ⵉⵡⴷⴰⵏ. ■ 22 ⵓⴷⵎⴰⵡⴻⵏ ⵏⵙⴻⵏ ⴰⵎ ⵡⵓⴷⵎⴰⵡⴻⵏ ⵏⵏⵉ ⵥⵔⵉⵖ ⵖⴰⵔ ⵢⴻⵖⵣⴰⵔ ⵏ ⵅⴰⴱⵓⵔ, ⵎⴰⵎⵎⴻⵛ ⴷⴷ-ⴱⴰⵏⴻⵏ ⵡⵓⴷⵎⴰⵡⴻⵏ ⵏⵏⵉ, ⵓⵍⴰ ⴷ ⵏⵉⵜⵏⵉ ⵙ ⵢⵉⵅⴻⴼ ⵏⵙⴻⵏ. ⵏⵉⵜⵏⵉ ⴳⴳⵓⵔⴻⵏ ⴽⵓⵍ ⵉⵊⵊ ⵏⵉⵛⴰⵏ ⵖⴰⵔ ⵣⵣⴰⵜ ⵏⵏⴻⵙ.