ⵍⵃⵓⴽⵎ ⵅ ⵓⵔⵛⴰⵍⵉⵎ
9
1 ⵅⴻⵏⵏⵉ ⵉⵍⴰⵖⴰ ⴷⴻⴳ ⵉⵎⴻⵣⵣⵓⵖⴻⵏ ⵉⵏⵓ ⵙ ⵜⵎⵉⵊⵊⴰ ⵜⴻⵊⵀⴻⴷ, ⵉⵏⵏⴰ: “ⴻⵊⵊ ⵉⵎⴻⵃⴹⴰⵢⴻⵏ ⵏ ⵜⴻⵏⴷⵉⵏⵜ ⴰⴷ ⴷⴷ-ⵇⴰⵔⵔⴱⴻⵏ, ⴽⵓⵍ ⵉⵊⵊ ⵙ ⵍⴻⵙⵏⴰⵃ ⵏⵏⴻⵙ ⵏ ⵓⵔⴻⴷⴷⴻⴵ ⴷⴻⴳ ⵓⴼⵓⵙ ⵏⵏⴻⵙ.” 2 ⵓⵛⴰ ⵅⵣⴰⵔ, ⵙⴻⵜⵜⴰ ⵏ ⵢⴻⵔⵢⴰⵣⴻⵏ ⵓⵙⵉⵏ-ⴷⴷ ⵣⴻⴳ ⵡⴻⴱⵔⵉⴷ ⵣⵉ ⵜⴻⵡⵡⴰⵔⵜ ⵢⵓⵄⵍⴰⵏ ⵏⵏⵉ ⵉⵅⴻⵣⵣⴰⵔⴻⵏ ⵖⴰⵔ ⵛⵛⴰⵎⴰⵍ ⵓ ⴽⵓⵍ ⵉⵊⵊ ⵖⴰⵔⴻⵙ ⵍⴻⵙⵏⴰⵃ ⵏⵏⴻⵙ ⵉ ⵓⵜⴻⵃⵃⵉ ⴷⴻⴳ ⵓⴼⵓⵙ ⵏⵏⴻⵙ. ⴷⵉ ⵍⵡⴻⵙⵟ ⵏⵙⴻⵏ ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵣ, ⵜⵓⵖⴰ ⵢⴰⵔⴹ ⵍⴻⵇⵟⴻⵏ, ⵢⵉⵡⵉ ⵜⴰⴷⵡⴰⵜ ⵏ ⵓⵎⴰⵔⵉⵔ ⵖⴰⵔ ⵡⴻⴱⵢⴰⵙ ⵏⵏⴻⵙ. ⵓⴷⴼⴻⵏ ⵏⵉⵜⵏⵉ ⵓⵛⴰ ⴳⴳⵉⵏ ⴰⴷ ⴱⴻⴷⴷⴻⵏ ⵖⴰⵔ ⵓⵄⴰⵍⵟⴰⵔ ⵏ ⵏⵏⵃⴰⵙ. 3 ⴰⵄⵓⴵⵉ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⵣⵉ ⵙⴻⵏⵏⴻⵊ ⵏ ⵓⴽⵉⵔⵓⴱ ⵏⵏⵉ ⵅ ⵉⴵⴰⵏ, ⵢⵓⵢⵓⵔ ⵖⴰⵔ ⵜⵏⴻⴱⴷⴰⵜ ⵏ ⵜⴰⴷⴷⴰⵔⵜ ⵓⵛⴰ ⵏⴻⵜⵜⴰ ⵉⵍⴰⵖⴰ-ⴷⴷ ⵉ ⵡⴻⵔⵢⴰⵣ ⵏⵏⵉ ⵢⴰⵔⴹⴻⵏ ⵍⴻⵇⵟⴻⵏ ⴷ ⵡⴻⵏⵏⵉ ⵢⵉⵡⵢⴻⵏ ⵜⴰⴷⵡⴰⵜ ⵏ ⵓⵎⴰⵔⵉⵔ ⵖⴰⵔ ⵡⴻⴱⵢⴰⵙ ⵏⵏⴻⵙ. □ 4 ⵉⵏⵏⴰ ⴰⵙ ⵙⵉⴷⵉ: “ⵛⵓⵇⵇ ⴷⵉ ⵍⵡⴻⵙⵟ ⵏ ⵜⴻⵏⴷⵉⵏⵜ, ⴷⵉ ⵍⵡⴻⵙⵟ ⵏ ⵓⵔⵛⴰⵍⵉⵎ, ⵓⵛⴰ ⴻⴳⴳ ⴽⵔⵓⵣ ⴷ ⵍⴻⵄⵍⴰⵎⴻⵜ ⵅ ⵜⴻⵏⵢⴰⵔⵉⵏ ⵏ ⵢⴻⵔⵢⴰⵣⴻⵏ ⵏⵏⵉ ⵉⵜⵜⵏⵉⵅⵙⵉⵙⴻⵏ ⴷ ⵜⵜⵡⴻⵄⵄⴹⴻⵏ ⵅ ⵙⵙⵉⴱⴱⴻⵜ ⵏ ⵎⴰⵔⵔⴰ ⵊⵊⵄⴰⵢⴻⴼ ⵏⵏⵉ ⵉⵜⵜⵡⴰⴳⴳⴻⵏ ⴷⵉ ⵍⵡⴻⵙⵟ ⵏⵏⴻⵙ.” 5 ⵓⵎⵉ ⵙⵍⵉⵖ, ⵉⵏⵏⴰ ⵉ ⵉⵏⵏⴻⵖⵏⵉ: “ⵛⵓⵇⵇⴻⵎ ⴷⵉ ⵜⴻⵏⴷⵉⵏⵜ ⴰⵡⴰⵔⵏⵉ ⴰⵙ, ⵏⵖⴻⵎ, ⵡⴰⵔ ⵣⵣⵉⴵⵉⵣⴻⵎ ⵓ ⵡⴰⵔ ⴰⵔⴻⵃⵃⵎⴻⵎ! 6 ⵏⵖⴻⵎ ⵉⵡⴻⵙⵙⵓⵔⴰ, ⵉⵃⵓⴹⵔⵉⵢⵢⴻⵏ, ⵜⵉⵄⴻⵣⵔⵉⵢⵉⵏ, ⵉⵃⴻⵏⵊⵉⵔⴻⵏ ⴷ ⵜⴻⵎⵖⴰⵔⵉⵏ ⴰⵍ ⵖⴰ ⵜⵜⵡⴰⵀⴻⵍⵍⴽⴻⵏ ⵇⴰⵄ, ⵎⴰⵛⴰ ⵡⴰⵔ ⵜⵜⵀⴰⴷⴰⵎ ⵓⵍⴰ ⴷ ⵉⵊⵊ ⵅⴰⵙ ⴽⵔⵓⵛ ⴷ ⵍⴻⵄⵍⴰⵎⴻⵜ. ⴱⴷⴰⵎ ⵣⵉ ⵣⵣⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ.” ⵓⵛⴰ ⵏⵉⵜⵏⵉ ⴱⴷⴰⵏ ⵣⴻⴳ ⵉⵡⴻⵙⵙⵓⵔⴰ ⵏⵏⵉ ⵉⴵⴰⵏ ⵣⵣⴰⵜ ⵉ ⵜⴰⴷⴷⴰⵔⵜ. 7 ⵓⵛⴰ ⵏⴻⵜⵜⴰ ⵉⵏⵏⴰ ⴰⵙⴻⵏ: “ⵙⵅⴻⵎⵊⴻⵎ ⵜⴰⴷⴷⴰⵔⵜ ⵓⵛⴰ ⵛⵛⵓⵔⴻⵎ ⵍⴻⵎⵔⴰⵃⴰⵜ ⵙ ⵍⵅⴻⵛⴱⴰⵜ ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ. ⴼⴼⵖⴻⵎ!” ⴼⴼⵖⴻⵏ ⵏⵉⵜⵏⵉ ⵓⵛⴰ ⵏⵖⵉⵏ ⵉⵡⴷⴰⵏ ⴷⵉ ⵜⴻⵏⴷⵉⵏⵜ. 8 ⵍⴰⵎⵉ ⵜⴻⵏ ⵏⵖⵉⵏ ⵓⵛⴰ ⵇⵇⵉⵎⴻⵖ ⵏⴻⵛⵛ, ⵉⵎⵙⴰⵔ ⴰⵇⴰ ⵏⴻⵛⵛ ⵡⴹⵉⵖ ⵅ ⵓⵖⴻⵎⴱⵓⴱ ⵉⵏⵓ ⵖⴰⵔ ⵜⴻⵎⵎⵓⵔⵜ ⵓⵛⴰ ⵏⵏⵉⵖ: “ⴰⵅ, ⵙⵉⴷⵉ ⵉⵏⵓ, ⵙⵉⴷⵉ, ⵎⴰ ⴰⴷ ⵜⴰⵔⴻⴷⴷⴵⴻⴷ ⵍⴻⵅⵅⵓ ⵎⵉⵏ ⵉⵇⵇⵉⵎⴻⵏ ⵏ ⵉⵙⵔⴰⵉⵍ ⵓⵎⵉ ⵖⴰ ⵜⵣⴻⴵⵄⴻⴷ ⴰⵙⵄⴰⵔ ⵏⵏⴻⵛ ⵅ ⵓⵔⵛⴰⵍⵉⵎ?” 9 ⵅⴻⵏⵏⵉ ⵉⵏⵏⴰ ⴰⵢⵉ: “ⵍⵎⵓⵄⵚⵉⵢⵢⴻⵜ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⴷ ⵢⴰⵀⵓⴷⴰ ⵜⴻⵎⵖⴰⵔ ⴰⵟⵟⴰⵙ ⵓ ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵉⴷⴰⵎⵎⴻⵏ ⵓ ⵜⴻⵏⴷⵉⵏⵜ ⵜⴻⵛⵛⵓⵔ ⵙ ⵓⵙⴼⴰⵔⵖ ⵏ ⵍⵃⴻⵇⵇ, ⵎⵉⵏⵣⵉ ⵏⵉⵜⵏⵉ ⵇⵇⴰⵔⴻⵏ: ‘ⵙⵉⴷⵉ ⵉⵙⵎⴻⵃ ⴷⵉ ⵜⴻⵎⵎⵓⵔⵜ ⵓⵛⴰ ⵙⵉⴷⵉ ⵡⴰⵔ ⵉⵥⴰⵔⵔ!’ 10 ⵙ ⵓⵢⴰ ⵓⵍⴰ ⴷ ⵏⴻⵛⵛ ⴰⴷ ⴳⴳⴻⵖ ⴰⵎⵎⵓ. ⵜⵉⵟⵟ ⵉⵏⵓ ⵡⴰⵔ ⵜⵙⴻⵎⵎⴻⵃ ⵓ ⵏⴻⵛⵛ ⵡⴰⵔ ⵜⵜⵃⵉⵏⵏⵉⵖ. ⵏⴻⵛⵛ ⴰⴷ ⵙⵙⴻⵏⵇⴻⵍⴱⴻⵖ ⴰⴱⵔⵉⴷ ⵏⵙⴻⵏ ⵅ ⵓⵣⴻⴵⵉⴼ ⵏⵙⴻⵏ.” ■
11 ⵓⵛⴰ ⵅⵣⴰⵔ, ⴰⵔⵢⴰⵣ ⵏⵏⵉ ⵢⴰⵔⴹⴻⵏ ⵍⴻⵇⵟⴻⵏ, ⵡⴻⵏⵏⵉ ⴷⴷ-ⵢⵉⵡⵢⴻⵏ ⵖⴰⵔ ⵡⴻⴱⵢⴰⵙ ⵏⵏⴻⵙ ⵜⴰⴷⵡⴰⵜ ⵏ ⵓⵎⴰⵔⵉⵔ, ⴰⵇⴰ ⵢⴰⵔⵔⴰ-ⴷⴷ ⵍⴻⵅⴱⴰⵔ, ⵉⵏⵏⴰ: “ⴳⴳⵉⵖ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⵓⵎⵓⵔⴻⴷ.”