5
1 ⵡⴰⵔ ⵜⵇⴻⴵⵉⵇ ⵙ ⵓⵇⴻⵎⵎⵓⵎ ⵏⵏⴻⵛ ⵓ ⵃⴹⴰ ⴰⵇⴰ ⵓⵍ ⵏⵏⴻⵛ ⵡⴰⵔ ⵉⵜⵜⴻⵎⵃⵉⵣⵡⴰⵔ ⴰⴷ ⵉⵏⵟⴻⵇ ⴰⵡⴰⵍ ⵣⵣⴰⵜ ⵉ ⴰⵔⴻⴱⴱⵉ. ⵎⴰⵖⴰⵔ ⴰⵔⴻⴱⴱⵉ ⴷⴻⴳ ⵓⵊⴻⵏⵏⴰ, ⵎⴰⵛⴰ ⵛⴻⴽ ⴷⵉ ⵜⴻⵎⵎⵓⵔⵜ. ⵅ ⵓⵢⴰ ⴻⵊⵊ ⴰⴷ ⵉⵍⵉⵏ ⵡⴰⵡⴰⵍⴻⵏ ⵏⵏⴻⵛ ⵓⴷⵔⵓⵙⴻⵏ. 2 ⵎⴰⵖⴰⵔ ⴰⵎ ⵜⴰⵔⵊⵉⵜ ⵜᵉⵜⵜⴰⵙ-ⴷⴷ ⵙ ⵡⴰⵟⵟⴰⵙ ⵏ ⵍⴻⵀⵀⵓ, ⴰⵎⵎⵓ ⵓⵍⴰ ⴷ ⵍⵀⴰⵔⴷ ⵏ ⵓⴱⵓⵀⴰⵍⵉ ⵙ ⵡⴰⵟⵟⴰⵙ ⵏ ⵡⴰⵡⴰⵍⴻⵏ. 3 ⵎⴰⵍⴰ ⵛⴻⴽ ⵜⴻⴳⴳⵉⴷ ⵉ ⴰⵔⴻⴱⴱⵉ ⵉⵛⵜ ⵏ ⵜⵊⴰⴵⵉⵜ, ⵡⴰⵔ ⵜⵜⵔⴰⵊⴰ ⵛⴰ ⵅⴻⵏⵏⵉ ⵎⴰⵃⴻⵏⴷ ⴰⴷ ⵜⵜ ⵜⴽⴻⵎⵎⵍⴻⴷ, ⵎⴰⵖⴰⵔ ⵡⴰⵔ ⴷ ⴰⵙ ⵜⵜⴻⵄⵊⵉⴱⴻⵏ ⵉⴱⵓⵀⴰⵍⵉⵢⵢⴻⵏ. ⵎⵉⵏ ⵜⵡⴰⵄⴷⴻⴷ, ⵉⵜⵜⵅⴻⵚⵚⴰ ⴰⴷ ⵜ ⵜⵜⴽⴻⵎⵎⵍⴻⴷ. ■ 4 ⵉⵀⵍⴰ ⵎⴰⵍⴰ ⵡⴰⵔ ⵜⵡⴰⵄⴷⴻⴷ ⵅ ⵎⴰⵍⴰ ⵛⴻⴽ ⵜⵡⴰⵄⴷⴻⴷ, ⵎⴰⵛⴰ ⵡⴰⵔ ⵜⴽⴻⵎⵎⵍⴻⴷ. ■ 5 ⵡⴰⵔ ⵜⵜⴻⵊⵊⵉ ⴰⵇⴰ ⴰⵇⴻⵎⵎⵓⵎ ⵏⵏⴻⵛ ⴰⴷ ⵢⴰⵔⵔ ⴰⵔⵔⵉⵎⴻⵜ ⵏⵏⴻⵛ ⴰⴷ ⵜⴻⵅⴹⴰ ⵓ ⵡⴰⵔ ⵜⴻⵇⵇⴰⵔ ⵣⵣⴰⵜ ⵉ ⵡⵓⴷⴻⵎ ⵏ ⵍⵎⴰⵍⴰⴽ, ⴰⵇⴰ ⵎⴰⵏ ⴰⵢⴰ ⴷ ⴰⵡⴻⴷⴷⴰⵔ ⵡⴰⵀⴰ. ⵎⴰⵢⴻⵎⵎⵉ ⵖⴰ ⵉⴼⴼⵓⴳⴻⵎ ⴰⵔⴻⴱⴱⵉ ⵅ ⵎⵉⵏ ⵜⴻⵇⵇⴰⵔⴻⴷ ⵓ ⴰⴷ ⵢⴰⵔⴻⴷⴷⴻⴵ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵛ? 6 ⵎⴰⵖⴰⵔ ⴷⴻⴳ ⵡⴰⵟⵟⴰⵙ ⵏ ⵜⵉⵔⵊⴰ, ⴰⵇⴰ ⴷⴰⵢⵙⴻⵏⵜ ⵎⵉⵏ ⵉⴵⴰⵏ ⴷⵉ ⵍⴱⴰⵟⴻⵍ, ⴰⵎⵎⵓ ⵓⵍⴰ ⴷⴻⴳ ⵡⴰⵟⵟⴰⵙ ⵏ ⵡⴰⵡⴰⵍⴻⵏ. ⵙ ⵓⵢⴰ: ⴳⴳⵯⴻⴷ ⴰⵔⴻⴱⴱⵉ!■
ⵍⴻⵃⵚⴰⵔⴻⵜ ⴷ ⵓⵙⴼⴰⵔⵖ ⵏ ⵍⵃⴻⵇⵇ
7 ⵎⴰⵍⴰ ⵛⴻⴽ ⵜⵃⴻⴽⴽⴰⵔⴻⴷ ⵍⴻⵃⵚⴰⵔⴻⵜ ⵏ ⵉⵎⴻⵣⵍⴰⴹ ⵓⵍⴰ ⴷ ⴰⵎⵏⴰⵄ ⵏ ⵍⵃⴻⵇⵇ ⴷ ⵜⵙⴻⴳⴷⴰ ⴷⵉ ⵍⵄⴰⵎⴰⵍⴰ, ⵡⴰⵔ ⵜⵜⴰⵔⵊⵉⴼ ⵛⴰ ⴰⵇⴰ ⵎⴰⵏ ⴰⵢⴰ ⵢⵓⵙⴰ-ⴷⴷ ⴰⵙⴻⵏ ⵙ ⵍⵅⴰⴹⴰⵔ, ⵎⴰⵖⴰⵔ ⵅ ⵢⵉⵊⵊ ⵏ ⵓⵎⴻⵇⵇⵔⴰⵏ ⴰⵇⴰ ⴷⵉⵏ ⵡⴻⵏⵏⵉ ⴷ ⴰⵎⴻⵇⵇⵔⴰⵏ ⵅⴰⵙ ⵓⵛⴰ ⵅⴰⵙⴻⵏ ⴱⴻⴷⴷⴻⵏ ⵉⵏⵏⵉ ⴷ ⵉⵎⴻⵇⵇⵔⴰⵏⴻⵏ ⵄⴰⴷ. 8 ⵉⵊⵊ ⵏ ⵓⵊⴻⴵⵉⴷ ⵉⵜⵜⵛⴻⵟⵟⴰⵔⴻⵏ ⵉ ⵜⴻⵎⵎⵓⵔⵜ ⵏ ⵜⴼⴻⴵⴰⵃⵜ, ⴰⵇⴰ ⵏⴻⵜⵜⴰ ⴷ ⵍⴻⴼⴹⴻⵍ ⵉ ⵜⴻⵎⵎⵓⵔⵜ ⴷⵉ ⵎⴰⵔⵔⴰ ⵉⵖⴻⵣⴷⵉⵙⴻⵏ.
ⴰⴷ ⵉⴼⵏⴰ ⵡⴰⴳⵍⴰ ⴷ ⴱⵏⴰⴷⴻⵎ
9 ⵡⴻⵏⵏⵉ ⵉⵜⵜⴻⵅⵙⴻⵏ ⵜⵎⴻⵏⵢⴰⵜ, ⵡⴰⵔ ⵉⵜⵜⵊⵉⵡⵉⵏ ⵄⴻⵎⵎⴰⵔⵚ ⵜⵎⴻⵏⵢⴰⵜ, ⵓ ⵡⴻⵏⵏⵉ ⵉⵜⵜⴻⵅⵙⴻⵏ ⴰⴳⵍⴰ, ⵄⴻⵎⵎⴰⵔⵚ ⵡⴰⵔ ⵉⵜⵜⵊⵉⵡⵉⵏ ⵍⵎⵓⵏⴻⵜ ⵏⵏⴻⵙ. ⵓⵍⴰ ⴷ ⵎⴰⵏ ⴰⵢⴰ ⴰⵇⴰ-ⵜ ⴷⵉ ⵍⴱⴰⵟⴻⵍ.
10 ⵎⴰⵏⵉ ⵉⵜⵜⵎⴰⵔⵏⵉ ⵡⴰⴳⵍⴰ, ⴰⵎⵎⵓ ⵜⵜⵎⴰⵔⵏⵉⵏ ⵓⵍⴰ ⴷ ⵉⵏⵏⵉ ⵜ ⵉ ⵖⴰ ⵉⵛⵛⴻⵏ. ⵎⴰⵏ ⵍⴻⴼⴹⴻⵍ ⵉ ⵖⴰ ⵉⵇⵇⵉⵎⴻⵏ ⵉ ⴰⵢⵜⴱⴰⴱ ⵏⵏⴻⵙ ⵎⵖⵉⵔ ⵜⵉⵟⵟⴰⵡⵉⵏ ⵏⵙⴻⵏ ⵣⴻⵎⵎⴰⵔⴻⵏⵜ ⴰⴷ ⵅⵣⴰⵔⴻⵏⵜ ⴰⵢⴰ? 11 ⵉⴹⴻⵚ ⵏ ⵓⵅⴻⴷⴷⴰⵎ ⴷ ⵎⵉⵥⵉⴷ, ⵎⴰ ⵏⴻⵜⵜⴰ ⵖⴰⵔⴻⵙ ⴷⵔⵓⵙ ⵏⵉⵖ ⴰⵟⵟⴰⵙ ⵏ ⵎⴰⵛⵛⴰ, ⵎⴰⵛⴰ ⵉ ⴱⵓ-ⵡⴰⴳⵍⴰ ⴰⴼⴻⵢⵢⴻⴹ ⵏⵏⴻⵙ ⵡⴰⵔ ⵜ ⵉⵜⵜⴻⵊⵊⵉ ⴰⴷ ⵉⵟⵟⴻⵚ.
12 ⴰⵇⴰ ⴷⵉⵏ ⵉⵊⵊ ⵏ ⵍⵖⴰⵔ ⵉ ⵥⵔⵉⵖ ⵙⴰⴷⵓ ⵜⴼⵓⵛⵜ, ⵉⵊⵊ ⵏ ⵍⵖⴰⵔ ⵉⵜⵜⴻⴳⴳ ⴰⵎ ⵍⴻⵀⵍⴰⵛ: ⴰⴳⵍⴰ ⵉⵜⵜⵄⴻⵙⵙ ⵅⴰⵙ ⴱⴰⴱ ⵏⵏⴻⵙ ⵉ ⴷⵔⵓⵛⵜ ⵉ ⵉⵅⴻⴼ ⵏⵏⴻⵙ. 13 ⵉⴼⵏⴰ ⵣⴻⵄⵎⴰ ⵡⴰⴳⵍⴰ ⵏⵏⴻⵙ ⵙ ⵉⵛⵜ ⵏ ⵜⴻⵎⵙⴰⵔⵜ ⴷ ⵜⴰⵄⴻⴼⴼⴰⵏⵜ ⵓⵛⴰ ⵏⴻⵜⵜⴰ ⵜⵓⵖⴰ ⵢⴻⵊⵊ-ⴷⴷ ⵎⵎⵉⵙ, ⵅⴻⵏⵏⵉ ⵡⴰⵔ ⵖⴰⵔⴻⵙ ⵉⵇⵇⵉⵎ ⵡⴰⵍⵓ ⵄⴰⴷ ⴷⴻⴳ ⵓⴼⵓⵙ ⵏⵏⴻⵙ. 14 ⴰⵎ ⵎⴰⵎⵎⴻⵛ ⴷⴷ-ⵉⴼⴼⴻⵖ ⵏⴻⵜⵜⴰ ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵙ, ⴰⵎⵎⵓ ⵉ ⵖⴰ ⵉⵄⵇⴻⴱ ⴷ ⴰⵄⴰⵔⵢⴰⵏ. ⴰⴷ ⵢⵓⵢⵓⵔ ⴰⵎ ⵎⴰⵎⵎⴻⵛ ⵉ ⴷⴷ-ⵢⵓⵙⴰ. ⵙ ⵎⴰⵔⵔⴰ ⴰⵎⴰⵔⵔⴻⵜ ⵏⵏⴻⵙ ⵉ ⵣⵉ ⵉⵎⴰⵔⵔⴻⵜ, ⵡⴰⵔ ⵉⵣⴻⵎⵎⴰⵔ ⴰⴷ ⴽⵉⴷⴻⵙ ⵉⴽⵙⵉ ⵓⵍⴰ ⴷ ⵉⵛⵜ ⵍⵃⴰⵊⵊⴻⵜ ⴷⴻⴳ ⵓⴼⵓⵙ ⵏⵏⴻⵙ. ■ 15 ⵓⵍⴰ ⴷ ⵜⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⴷ ⵜⴰⵄⴻⴼⴼⴰⵏⵜ: ⵏⵉⵛⴰⵏ ⵎⴰⵎⵎⴻⵛ ⵉ ⴷⴷ-ⵢⵓⵙⴰ ⵏⴻⵜⵜⴰ, ⴰⴷ ⵢⵓⵢⵓⵔ. ⵎⴰⵏ ⵍⴻⴼⴹⴻⵍ ⵏⵏⴻⵙ ⵅⴻⵏⵏⵉ ⵉ ⵡⴻⵏⵏⵉ ⵉⵎⴰⵔⵔⵜⴻⵏ ⵉ ⵓⵙⴻⵎⵎⵉⴹ ⵡⴰⵀⴰ? 16 ⵄⴰⵡⴻⴷ ⵉⵜⵜⵖⵉⵎⴰ ⵉⵜⵜⴻⵜⵜ ⴷⵉ ⵜⴰⴵⴻⵙⵜ ⵎⴰⵔⵔⴰ ⵓⵙⵙⴰⵏ ⵏⵏⴻⵙ ⴰⵎ ⴽⴻⵎⵍⴻⵏ. ⵉⵜⵜⵡⴰⵎⴰⵔⵔⴻⵜ ⵙ ⵍⴻⵃⵍⴰⵛ ⵏⵏⴻⵙ ⴷ ⵓⴷⵓⵇⵇⴻⵣ ⵏⵏⴻⵙ ⵏ ⵡⴻⵖⴹⴰⴱ.
17 ⵅⵣⴰⵔ, ⵎⵉⵏ ⵜⵜⵡⴰⵍⵉⵖ ⴷ ⵎⴰⵏ ⴰⵢⴰ: ⴰⵇⴰ ⴷ ⵍⴻⵎⵍⵉⵃ ⵓ ⵉⵛⵏⴰ ⴰⵇⴰ ⵉⵊⵊ ⴰⴷ ⵉⵛⵛ, ⴰⴷ ⵉⵙⵓ ⵓ ⴰⴷ ⵉⵥⴰⵔ ⵎⴰⵔⵔⴰ ⵍⵅⴰⵔ ⵉ ⵎⴰⵔⵔⴰ ⴰⵎⴰⵔⵔⴻⵜ ⵏⵏⴻⵙ ⵉ ⵓⵎⵉ ⵉⵜⵜⵎⴰⵔⵔⴰⵜ ⴱⵏⴰⴷⴻⵎ ⵙⴰⴷⵓ ⵜⴰⴼⵓⵛⵜ ⴷⵉ ⵍⵇⴻⴷⴷ ⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵉ ⴷ ⴰⵙ ⴷⴷ-ⵢⴰⵔⵣⴻⴼ ⴰⵔⴻⴱⴱⵉ, ⵎⴰⵖⴰⵔ ⵜⴰ ⴷ ⵜⴰⵙⵖⴰⵔⵜ ⵏⵏⴻⵙ. ■
18 ⵄⴰⵡⴻⴷ ⴽⵓⵍ ⴱⵏⴰⴷⴻⵎ ⵉ ⵓⵎⵉ ⵉⵡⵛⴰ ⴰⵔⴻⴱⴱⵉ ⴰⴳⵍⴰ ⴷ ⵜⵅⵓⴱⴰⵢ ⵓ ⵉ ⵓⵎⵉ ⵉⵡⵛⴰ ⵜⵉⵣⴻⵎⵎⴰⵔ ⵎⴰⵃⴻⵏⴷ ⴰⴷ ⵣⵣⴰⵢⴻⵙ ⵉⵛⵛ ⵓ ⴰⴷ ⵣⵣⴰⵢⴻⵙ ⵢⴰⵔⴱⵓ ⵜⴰⵙⵖⴰⵔⵜ ⵏⵏⴻⵙ ⵓ ⴰⴷ ⵣⵣⴰⵢⴻⵙ ⵉⴼⴰⵔⵃ ⵖⴰⵔ ⵓⵎⴰⵔⵔⴻⵜ ⵏⵏⴻⵙ, ⴰⵇⴰ-ⵜⵜ ⴷ ⵜⴰⵔⵣⴻⴼⵜ ⵏ ⴰⵔⴻⴱⴱⵉ. 19 ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵜⵜⵉⴷⴰⵔ ⵄⴰⴷ ⴰⵟⵟⴰⵙ ⴷⴻⴳ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ, ⵎⵉⵏⵣⵉ ⴰⵔⴻⴱⴱⵉ ⵉⵙⵍⴰ ⴰⵙ ⵓⵎⵉ ⴷ ⴰⵙ ⵉⵡⵛⴰ ⵍⴻⴼⵔⴰⵃⴻⵜ ⴷⴻⴳ ⵡⵓⵍ ⵏⵏⴻⵙ.