ⵡⴻⵏⵏⵉ ⵉⵃⴻⵚⵚⴰⵔⴻⵏ ⴷ ⵡⴻⵏⵏⵉ ⵉⵜⵜⵡⴰⵃⵚⴰⵔⴻⵏ
4
1 ⵥⵔⵉⵖ ⵄⴰⵡⴻⴷ ⵎⴰⵔⵔⴰ ⴷⴷⴻⴵ ⵉ ⵉⵜⵜⵡⴰⴳⴳⴻⵏ ⵙⴰⴷⵓ ⵜⴼⵓⵛⵜ. ⵅⵣⴰⵔ, ⴰⵇⴰ ⴷⴰ ⵉⵎⴻⵟⵟⴰⵡⴻⵏ ⵏ ⵢⵉⵏⵏⵉ ⵉⵜⵜⵡⴰⴷⴻⴵⴻⵏ, ⵎⴰⵛⴰ ⵡⴰⵔ ⵖⴰⵔⵙⴻⵏ ⴱⵓ ⵓⵎⴼⴻⵡⵡⴻⵊ. ⵉⴼⴼⴻⵖ-ⴷⴷ ⵍⵄⵓⵏⴼ ⵣⴻⴳ ⵓⴼⵓⵙ ⵏ ⵢⵉⵏⵏⵉ ⵜⴻⵏ ⵉⵜⵜⴻⴷⴵⴰⵏ, ⵎⴰⵛⴰ ⵡⴰⵔ ⵖⴰⵔⵙⴻⵏ ⴱⵓ ⵓⵎⴼⴻⵡⵡⴻⵊ. 2 ⵅⴻⵏⵏⵉ ⵚⴻⴱⴱⵃⴻⵖ ⵉⵎⴻⵜⵜⵉⵏⴻⵏ ⵏⵏⵉ ⵉⵎⵎⵓⵜⴻⵏ ⵄⴰⴷ ⴰⵟⵟⴰⵙ ⵣⴻⴳ ⵡⴰⵎⵉ, ⵣⴻⴳ ⵉⵏⵏⵉ ⵉⴷⴷⴰⵔⴻⵏ, ⵉⵏⵏⵉ ⵄⴰⴷ ⵉⴷⴷⴰⵔⴻⵏ. 3 ⵎⴰⵛⴰ ⵉⵃⵍⴰⵏ ⵅⴰⵙⴻⵏ ⵙ ⵜⵏⴰⵢⴻⵏ ⵉⴷⵙⴻⵏ ⵏⵏⵉ ⴷ ⵡⴻⵏⵏⵉ ⵡⴰⵔ ⵉⴵⵉⵏ ⵄⴰⴷ, ⴷ ⵡⴻⵏⵏⵉ ⵡⴰⵔ ⵉⵥⵔⵉⵏ ⵄⴰⴷ ⵜⵉⵎⴻⴳⴳⴰ ⵜⵉⵄⴻⴼⴼⴰⵏⵉⵏ ⵏⵏⵉ ⵉⵜⵜⵡⴰⴳⴳⴻⵏⵜ ⵙⴰⴷⵓ ⵜⴼⵓⵛⵜ. 4 ⵓⵛⴰ ⵏⴻⵛⵛ ⵥⵔⵉⵖ ⵎⴰⵔⵔⴰ ⴰⵎⴰⵔⵔⴻⵜ ⴷ ⵎⴰⵔⵔⴰ ⵜⵉⵣⴻⵎⵎⴰⵔ ⴷⵉ ⵍⵅⴻⴷⵎⴻⵜ, ⴰⵇⴰ-ⵜ ⵎⵖⵉⵔ ⴷ ⴰⵎⵄⴰⵏⴰⴷ ⵏ ⵉⵊⵊ ⴰⴽ-ⴷ ⵡⴻⵏⵏⴻⵖⵏⵉ. ⵓⵍⴰ ⴷ ⵎⴰⵏ ⴰⵢⴰ ⴰⵇⴰ-ⵜ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ. 5 ⴰⴱⵓⵀⴰⵍⵉ ⵉⴹⴼⴻⵙ ⵉⴼⴰⵙⵙⴻⵏ ⵏⵏⴻⵙ ⵓⵛⴰ ⵉⵜⵜⴻⵜⵜ ⴰⵢⵙⵓⵎ ⵏ ⵉⵅⴻⴼ ⵏⵏⴻⵙ. ■ 6 ⵉⵃⵍⴰ ⵉⵊⵊ ⵏ ⵡⵓⵔⵓ ⵏ ⵓⴼⵓⵙ ⵉⵛⵛⵓⵔ ⵙ ⵍⵀⵓⴷⵏⴻⵜ ⵓⵍⴰ ⵜⵏⴰⵢⴻⵏ ⵏ ⵉⴼⴰⵙⵙⴻⵏ ⵛⵛⵓⵔⴻⵏ ⵙ ⵓⵎⴰⵔⵔⴻⵜ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.
ⴰⵎⴰⵔⵔⴻⵜ ⵏ ⵡⴻⵏⵏⵉ ⵡⴻⵃⵃⴷⴻⵙ
7 ⵄⴰⵡⴻⴷ ⵥⵔⵉⵖ ⵛⴰ ⵎⵉⵏ ⵉⴵⴰⵏ ⴷⵉ ⵍⴱⴰⵟⴻⵍ ⵙⴰⴷⵓ ⵜⴼⵓⵛⵜ. 8 ⴰⵇⴰ ⴷⵉⵏ ⵉⵊⵊⴻⵏ ⴰⵇⴰ ⵜ ⵃⴰⴼⵉ ⵓ ⵡⴰⵔ ⴷⵉⵏ ⵡⴻⵏⵏⵉ ⴷ ⵡⵉⵙⵙ ⵜⵏⴰⵢⴻⵏ ⵉ ⵉⴱⴻⴷⴷⴻⵏ ⵖⴰⵔⴻⵙ. ⵓⵍⴰ ⵡⴰⵔ ⵖⴰⵔⴻⵙ ⵉⴵⵉ ⵓⵃⴻⵏⵊⵉⵔ ⵓ ⵡⴰⵔ ⵖⴰⵔⴻⵙ ⵓⵎⴰⵙ. ⵡⴰⵔ ⵉⴵⵉ ⵓⵏⴻⴳⴳⴰⵔ ⵖⴰⵔ ⵎⴰⵔⵔⴰ ⴰⵎⴰⵔⵔⴻⵜ ⵏⵏⴻⵙ, ⵓⵍⴰ ⵡⴰⵔ ⵜᵉⵜⵜⵢⵉⵡⵉⵏⴻⵏⵜ ⵜⵉⵟⵟⴰⵡⵉⵏ ⵏⵏⴻⵙ ⵣⴻⴳ ⵡⴰⴳⵍⴰ. “ⵉ ⵓⵎⵉ ⵜⵜⴻⴳⴳⴻⵖ ⵜⴰⵎⴰⵔⴰ ⵓ ⵙⵙⴻⴽⴽⵉⵖ ⵜⵜ ⴷⵉ ⵍⴻⵄⵎⴰⵔ ⵉⵏⵓ ⵣⵉ ⵜⵛⵓⵏⵉ?” ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ ⴷ ⵉⵊⵊ ⵏ ⵛⵛⵖⴻⵍ ⵉⵡⵄⴰⵔ ⵉ ⵢⴻⴵⴰ. 9 ⵜⵏⴰⵢⴻⵏ ⵃⵙⴻⵏ ⵣⴻⴳ ⵉⵊⵊⴻⵏ ⵡⴰⵀⴰ, ⵎⴰⵖⴰⵔ ⵏⵉⵜⵏⵉ ⵖⴰⵔⵙⴻⵏ ⵍⵎⵓⵏⴻⵜ ⴷ ⵍⴻⵎⵍⵉⵃ ⴷⴻⴳ ⵓⵎⴰⵔⵔⴻⵜ ⵏⵙⴻⵏ. 10 ⵎⴰⵖⴰⵔ ⵎⴰⵍⴰ ⵏⵉⵜⵏⵉ ⵡⴹⴰⵏ, ⴰⴷ ⵉⵙⵙⵏⴻⴽⴽⴰⵔ ⵉⵊⵊⴻⵏ ⵣⴻⴳ ⵓⵎⵄⴰⵛⴰⵔ ⵏⵏⴻⵙ ⵄⴰⵡⴻⴷ. ⵎⴰⵛⴰ ⴰⵅⴻⵢⵢⴻⴱ ⵉ ⵡⴻⵏⵏⵉ ⵉⴵⴰⵏ ⵡⴻⵃⵃⴷⴻⵙ ⵎⴰⵍⴰ ⵏⴻⵜⵜⴰ ⵉⵡⴹⴰ, ⵎⵉⵏⵣⵉ ⵡⴰⵔ ⴷⵉⵏ ⵉⵜⵜⵉⵍⵉ ⵃⴻⴷ, ⵎⴰⵃⴻⵏⴷ ⴰⴷ ⵜ ⵉⵙⵙⵏⴻⴽⴽⴰⵔ ⴰⴷ ⵉⴱⴻⴷⴷ. 11 ⵄⴰⵡⴻⴷ ⵎⴰⵍⴰ ⵜⵏⴰⵢⴻⵏ ⵟⵟⵙⴻⵏ ⵎⵓⵏⴻⵏ, ⴰⴷ ⵖⴰⵔⵙⴻⵏ ⵢⵉⵍⵉ ⵍⴻⵃⵎⵓ, ⵎⴰⵛⴰ ⵎⴰⵎⵎⴻⵛ ⵖⴰ ⵉⴳⴳ ⵉⵊⵊⴻⵏ ⵡⴻⵃⵃⴷⴻⵙ ⴰⴷ ⵉⵃⵎⴰ? 12 ⵎⴰⵍⴰ ⴷⵉⵏ ⵉⵊⵊⴻⵏ ⵢⴰⵔⵏⴰ ⵅ ⵉⵊⵊⴻⵏ ⵉ ⵉⴵⴰⵏ ⵡⴻⵃⵃⴷⴻⵙ, ⵎⴰⵛⴰ ⵜⵏⴰⵢⴻⵏ ⴰⴷ ⵖⴰⵔⴻⵙ ⴱⴻⴷⴷⴻⵏ ⵊⵎⵉⵄ. ⵉⵊⵊ ⵏ ⵡⴻⵙⵖⵓⵏ ⵉⵎⵓⴷⴻⵏ ⵅ ⵜⵍⴰⵜⴰ ⵡⴰⵔ ⵉⵇⴻⵟⵟⵓ ⴷⴻⵖⵢⴰ.
ⴰⵊⴻⴵⵉⴷ ⴰⵃⴻⵏⵊⵉⵔ ⴷ ⵓⵎⵉⵖⵉⵙ
13 ⵉⵃⵔⴰ ⵉⵊⵊ ⵏ ⵓⵃⵓⴷⵔⵉ ⴷ ⴰⵎⴻⵣⵍⵓⴹ ⴷ ⴰⵎⵉⵖⵉⵙ ⵣⴻⴳ ⵉⵊⵊ ⵏ ⵓⵊⴻⴵⵉⴷ ⵉⵡⵙⴰⵔ ⴷ ⴰⴱⵓⵀⴰⵍⵉ ⵉ ⵡⴰⵔ ⵉⴼⴻⵀⵀⵎⴻⵏ ⵄⴰⴷ ⵉ ⵡⴻⵄⵍⴰⵎ. 14 ⵎⴰⵖⴰⵔ ⴰⴷ ⴷⴷ-ⵉⴼⴼⴻⵖ ⵣⵉ ⵍⴻⵃⴱⴻⵙ ⵎⴰⵃⴻⵏⴷ ⴰⴷ ⵉⴷⵡⴻⵍ ⴷ ⴰⵊⴻⴵⵉⴷ ⵡⴰⵅⵅⴰ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⴷ ⴰⵎⴻⵣⵍⵓⴹ ⴷⵉ ⵜⴳⴻⵍⴷⵉⵜ ⵏⵏⴻⵙ. 15 ⵏⴻⵛⵛ ⵥⵔⵉⵖ ⵎⴰⵔⵔⴰ ⵉⵏⵏⵉ ⵉⴷⴷⴰⵔⴻⵏ ⵉ ⵉⴳⴳⵓⵔⴻⵏ ⵙⴰⴷⵓ ⵜⴼⵓⵛⵜ, ⵊⵎⵉⵄ ⴰⴽ-ⴷ ⵓⵃⵓⴷⵔⵉ, ⵡⴻⵏⵏⵉ ⴷ ⵡⵉⵙⵙ ⵜⵏⴰⵢⴻⵏ ⵏⵏⵉ ⵉ ⵖⴰ ⵉⴱⴻⴷⴷⴻⵏ ⴷⴻⴳ ⵡⴻⵎⵛⴰⵏ ⵏⵏⴻⵙ. 16 ⵡⴰⵔ ⴷⵉⵏ ⴰⵏⴻⴳⴳⴰⵔ ⵖⴰⵔ ⵍⴳⴻⵏⵙ ⵏⵏⵉ ⴰⵎ ⵉⴽⵎⴻⵍ ⵏⵏⵉ ⵣⵉ ⵉⵣⵡⴰⵔ ⵏⴻⵜⵜⴰ ⴰⵎ ⵢⵉⵅⴻⴼ. ⵡⴰⵅⵅⴰ ⴰⵎⴻⵏⵏⵉ ⵓⵍⴰ ⴷ ⵉⵏⵏⵉ ⴷⴷ ⵖⴰ ⵢⴰⵙⴻⵏ ⴰⵡⴰⵔⵏⵉ ⴰⵙ, ⵡⴰⵔ ⵣⵣⴰⵢⴻⵙ ⴼⴰⵔⵔⵃⴻⵏ. ⵓⵍⴰ ⴷ ⵎⴰⵏ ⴰⵢⴰ ⴰⵇⴰ-ⵜ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.
ⵅ ⵍⵡⵓⵄⵓⴷ ⵉ ⴰⵔⴻⴱⴱⵉ
17 ⵃⴹⴰ ⴰⵚⵓⵔⵉⴼ ⵏⵏⴻⵛ ⵎⴰⵍⴰ ⵛⴻⴽ ⵜⴻⴳⴳⵓⵔⴻⴷ ⵖⴰⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ. ⴰⵇⴰⵔⵔⴻⴱ ⵃⵉⵎⴰ ⴰⴷ ⵜⴻⵙⵃⴻⵙⵙⴻⴷ, ⵃⵙⴻⵏ ⵣⴻⴳ ⵓⵡⴻⵀⵀⴻⴱ ⵏ ⵜⵖⴰⵔⵚⵜ ⵙ ⵓⴼⵓⵙ ⵏ ⵉⴱⵓⵀⴰⵍⵉⵢⵢⴻⵏ, ⵎⴰⵖⴰⵔ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⴰⵇⴰ ⵏⵉⵜⵏⵉ ⵜⵜⴻⴳⴳⴻⵏ ⵜⵓⵄⴻⴼⴼⵏⴰ.