ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⵙⵓⵍⵉⵎⴰⵏ - ⵜⴰⵙⵖⴰⵔⵜ 2
25
1 ⵓⵍⴰ ⴷ ⵉⵏⴰ ⴷ ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⵙⵓⵍⵉⵎⴰⵏ ⵏⵏⵉ ⵉⵜⵜⵄⴰⵡⴰⴷⴻⵏ ⵓⵔⵉⵏ ⵜⴻⵏ ⵉⵔⵢⴰⵣⴻⵏ ⵏ ⵃⵉⵣⵇⵉⵢⴰ,
ⴰⵊⴻⴵⵉⴷ ⵏ ⵢⴰⵀⵓⴷⴰ.
2 ⴰⵇⴰ ⴷ ⵛⵛⴰⵏ ⵏ ⴰⵔⴻⴱⴱⵉ
ⵎⴰⵃⴻⵏⴷ ⴰⴷ ⵉⵙⵙⴰⵔ ⵉⵛⵜ ⵏ ⵜⵎⴻⵙⵍⴰⵛⵜ,
ⵎⴰⵛⴰ ⵛⵛⴰⵏ ⵏ ⵉⵊⴻⴵⵉⴷⴻⵏ
ⴷ ⴰⴱⴻⵇⵇⴻⵛ ⴷⴻⴳ ⵉⵛⵜ ⵏ ⵜⵎⴻⵙⵍⴰⵛⵜ. ■
3 ⵍⵓⵄⵍⴰ ⵏ ⵓⵊⴻⵏⵏⴰ ⴷ ⵍⴰⴵⴰⵖ ⵏ ⵜⴻⵎⵎⵓⵔⵜ,
ⴷ ⵡⵓⵍ ⵏ ⵉⵊⴻⴵⵉⴷⴻⵏ ⵡⴰⵔ ⴵⵉⵏ ⵉ ⵓⴱⴻⵇⵇⴻⵛ.
4 ⴽⴽⴻⵙ ⴽⵓⴼⴼⵓ ⵣⵉ ⵏⵏⵓⵇⴰⵔⵜ,
ⴰⴷ ⴷⴷ-ⵜⴻⴼⴼⴻⵖ ⵉⵛⵜ ⵏ ⵍⵇⴻⵛⵄⴻⵜ ⵉ ⵡⴻⵎⵣⵉⵍ.
5 ⵙⴱⴻⵄⵄⴻⴷ ⵉⵄⴻⴼⴼⴰⵏⴻⵏ
ⵣⵉ ⵣⵣⴰⵜ ⵏ ⵡⵓⴷⴻⵎ ⵏ ⵓⵊⴻⴵⵉⴷ,
ⵅⴻⵏⵏⵉ ⴰⴷ ⵉⵜⵜⵡⴰⵙⵙⴻⵎⵜⴻⵏ
ⵍⵄⴰⵔⵛ ⵏⵏⴻⵙ ⵙ ⵜⵙⴻⴳⴷⴰ. ■
6 ⵡⴰⵔ ⵜⴼⴻⵢⵢⴻⵛ ⵣⵣⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ,
ⵡⴰⵔ ⵜⵜⴱⴻⴷⴷⵉ ⵎⴰⵏⵉ ⵜⵜⴱⴻⴷⴷⴰⵏ ⵉⵎⴻⵇⵇⵔⴰⵏⴻⵏ.
7 ⵎⴰⵖⴰⵔ ⵉⵃⵍⴰ ⴰⴷ ⴰⵛ ⵉⵏⵉⵏ: “ⴳⴻⵄⵄⴻⴷ-ⴷⴷ ⴷⴰ!”,
ⵓⵍⴰ ⵎⴰ ⴰⴷ ⵛⴻⴽ ⵙⵙⴻⵀⵡⴰⵏ
ⵣⵣⴰⵜ ⵉ ⵡⵓⴷⴻⵎ ⵏ ⵉⵊⵊ ⵏ ⵓⵎⵛⴻⵏⵏⴻⵄ
ⵏⵏⵉ ⵥⵔⵉⵏⵜ ⵜⵉⵟⵟⴰⵡⵉⵏ ⵏⵏⴻⵛ. ■
8 ⵡⴰⵔ ⵜⵜⵇⴻⴵⵉⵇ ⴰⴷ ⵜⴻⴷⵄⵉⴷ,
ⵎⴰⵖⴰⵔ ⵎⵉⵏ ⵜⴻⵅⵙⴻⴷ ⴰⴷ ⵜⴻⴳⴳⴻⴷ
ⵖⴰⵔ ⵓⵏⴻⴳⴳⴰⵔ ⵏⵏⴻⵙ,
ⵎⴰⵍⴰ ⵊⵊⴰⵔ ⵏⵏⴻⵛ ⴰⴷ ⵛⴻⴽ ⵉⵙⵙⴻⴼⴹⴻⵃ? ■
9 ⵛⴰⵔⵔⴻⵄ ⴰⴽ-ⴷ ⵊⵊⴰⵔ ⵏⵏⴻⵛ,
ⵎⴰⵛⴰ ⵡⴰⵔ ⵙⵙⵓⴼⴼⵓⵖ ⵙⵙⵉⵔⵔ ⵏ ⵡⴻⵏⵏⴻⵖⵏⵉ,
10 ⵃⵉⵎⴰ ⵡⴻⵏⵏⵉ ⴷ ⴰⵙ ⵉⵜⵜⴻⵙⵍⴰⵏ
ⵡⴰⵔ ⵛⴻⴽ ⵉⵙⵙⵃⴻⵛⵛⴻⵎ ⵛⴰ,
ⵎⴰⵖⴰⵔ ⵍⴻⵅⴷⴻⵏⵏⵉ ⵡⴰⵔ ⵉⵣⴻⵎⵎⴰⵔ
ⴰⴷ ⵜᵉⵜⵜⵡⴰⵙⵙⴱⴻⵄⵄⴻⴷ ⵍⴻⴼⴹⵉⵃⴻⵜ ⵏⵏⴻⵛ ⵄⴰⴷ.
11 ⴰⵎ ⵜⵜⴻⴼⴼⴰⵃⵉⵏ ⵏ ⵡⵓⵔⴻⵖ
ⵅ ⵟⵟⴱⴰⵙⴰ ⵏ ⵏⵏⵓⵇⴰⵔⵜ,
ⴰⵎⵎⵓ ⴵⴰⵏ ⵡⴰⵡⴰⵍⴻⵏ ⵙⵙⵉⵡⵍⴻⵏ ⵜⴻⵏ
ⵙ ⵍⴻⵇⵢⴰⵙ ⵏⵏⴻⵙ.
12 ⴰⵎ ⵉⵛⵜ ⵏ ⵜⵅⴰⴷⴻⵏⵜ ⵏ ⵡⵓⵔⴻⵖ
ⵓ ⴰⵎ ⵉⵛⵜ ⵏ ⵜⵙⴻⴷⴷⴻⵛⵜ ⵏ ⵡⵓⵔⴻⵖ ⵉⵖⵍⴰⵏ ⵇⴰⵄ,
ⴰⵎⵎⵓ ⵉ ⵉⴵⴰ ⵓⵡⴻⴱⴱⴻⵅ ⴰⵎⵉⵖⵉⵙ
ⵖⴰⵔ ⵓⵎⴻⵣⵣⵓⵖ ⵉⵜⵜⴻⵙⵍⴰⵏ.
13 ⴰⵎ ⵡⴻⴷⴼⴻⵍ ⴰⵙⴻⵎⵎⴰⴹ
ⴷⴻⴳ ⵉⵊⵊ ⵏ ⵡⴰⵙⵙ ⵏ ⵜⵎⴻⵢⵔⴰ,
ⴰⵎⵎⵓ ⵉ ⵉⴵⴰ ⵓⵎⵙⴻⵅⵅⴰⵔ ⴷⴰⵢⴻⵙ ⵍⴰⵎⴰⵏ
ⵉ ⵡⴻⵏⵏⵉ ⵜ ⵉⵙⵙⴻⴽⴽⴰⵏ,
ⵎⴰⵖⴰⵔ ⵉⵙⵙⴼⴰⵇⴰ ⵍⴻⵄⵎⴰⵔ ⵏ ⴱⴰⴱ ⵏⵏⴻⵙ. ■
14 ⴰⵎ ⵉⵙⴻⵢⵏⵓⵜⴻⵏ ⴷ ⵓⵙⴻⵎⵎⵉⴹ ⴱⵍⴰ ⴰⵏⵥⴰⵔ,
ⴰⵎⵎⵓ ⴰⵔⵢⴰⵣ ⵏⵏⵉ ⵉⵜⵜⵄⴻⴼⴼⴰⵔ
ⴷⴻⴳ ⵉⵛⵜ ⵏ ⵜⴻⵔⵣⴻⴼⵜ ⵡⴰⵔ ⵉⵙⴻⴽⴽⵡⵉⵏ.
15 ⵙ ⵜⵜⴰⵙⵉⵄ ⵏ ⵍⵅⴰⴹⴰⵔ ⵉⵜⵜⵡⴰⵙⵙⴻⵇⵏⴻⵄ ⵍⵃⴰⴽⴻⵎ,
ⵉⵊⵊ ⵏ ⵢⵉⵍⴻⵙ ⴰⵎⵉⵥⵉⴷ ⵉⵜⵜⴰⵔⴻⵥⵥⴰ ⵉⵖⵙⴰⵏ. ■
16 ⵎⴰⵍⴰ ⵜⵓⴼⵉⴷ ⵜⴰⵎⵎⴻⵏⵜ,
ⴻⵛⵛ ⵎⵉⵏ ⵜⴻⵃⵡⴰⵊⴻⴷ ⵡⴰⵀⴰ,
ⵏⵉⵖ ⴰⴷ ⵜⴰⴼⴼ ⵜⴻⵛⵛⵉⴷ ⴽⵜⴰⵔ ⵣⵉ ⵎⵉⵏ ⵜⴻⵃⵡⴰⵊⴻⴷ,
ⵓ ⴱⴰⵍⴰⴽ ⴰⴷ ⵜⵜ-ⵉ-ⴷⴷ ⵜⵄⵓⵇⵇⴻⴷ.
17 ⵡⴰⵔ ⵙⵙⵔⵓⵙⴰ ⴰⴹⴰⵔ ⵏⵏⴻⵛ
ⴰⵟⵟⴰⵙ ⴷⵉ ⵜⴰⴷⴷⴰⵔⵜ ⵏ ⵊⵊⴰⵔ ⵏⵏⴻⵛ,
ⵏⵉⵖ ⴰⴷ ⵛⴻⴽ ⵉⵊⵊⵉⵡⴻⵏ ⵓ ⴰⴷ ⵛⴻⴽ ⵉⵄⵉⴼⴼ.
18 ⴰⵎ ⵡⴻⴼⴹⵉⵙ ⴷ ⵙⵙⵉⴼ ⴷ ⴼⵍⵉⵜⵛⴰ ⵉⵇⴻⴹⵄⴻⵏ,
ⴰⵎⵎⵓ ⵉ ⵉⴵⴰ ⵡⴻⵔⵢⴰⵣ ⵏⵏⵉ ⵉⵛⴻⵀⵀⴷⴻⵏ
ⵙ ⵥⵓⵔ ⵅ ⵊⵊⴰⵔ ⵏⵏⴻⵙ. ■
19 ⴰⵎ ⵜⵉⵖⵎⴻⵙⵜ ⵢⴰⵔⵥⴻⵏ
ⵓ ⴰⵎ ⵓⴹⴰⵔ ⵉⵏⵇⵔⴰⴹⴻⵏ,
ⴰⵎⵎⵓ ⵉ ⵉⴵⴰ ⵓⵜⴻⵛⵍⵉ
ⵅ ⵡⴻⵏⵏⵉ ⵡⴰⵔ ⴷⵉ ⵉⴵⵉ ⵜⵜⵉⵇⴻⵜ
ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ.
20 ⴰⵎ ⵡⴻⵏⵏⵉ ⵉⵜⵜⴻⴽⴽⵙⴻⵏ ⴰⴱⴰⵔⵜⴻⵙⵙⵓ ⵏⵏⴻⵙ
ⴷⴻⴳ ⵉⵊⵊ ⵏ ⵡⴰⵙⵙ ⵉⵙⵎⴻⴹ
ⵓ ⴰⵎ ⵍⵅⴻⴵ ⵉ ⵜⵜⴻⴳⴳⴻⵏ ⵅ ⵏⵉⵟⵔⵓⵏ,
ⴰⵎⵎⵓ ⵉ ⵉⴵⴰ ⵡⴻⵏⵏⵉ ⵉⵜⵜⵖⴻⵏⵏⴰⵊⴻⵏ ⵉⵣⵍⴰⵏ
ⵣⵣⴰⵜ ⵉ ⵢⵉⵊⵊⴻⵏ ⵙ ⵡⵓⵍ ⵉⵛⴹⴻⵏ. ■
21 ⵎⴰⵍⴰ ⵉⴵⵓⵥ ⵡⴻⵏⵏⵉ ⵛⴻⴽ ⵉⵛⴰⵔⵔⵀⴻⵏ,
ⵅⴻⵏⵏⵉ ⴻⵡⵛ ⴰⵙ ⴰⵖⵔⵓⵎ,
ⵎⴰⵍⴰ ⵉⴼⴼⵓⴷ, ⴻⵡⵛ ⴰⵙ ⴰⴷ ⵉⵙⵓ, ■
22 ⵎⴰⵖⴰⵔ ⴰⵎⵎⵓ ⵉ ⵜⵢⴰⵔⵔⵡⴻⴷ
ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⵅ ⵓⵣⴻⴵⵉⴼ ⵏⵏⴻⵙ,
ⵓ ⵙⵉⴷⵉ ⴰⴷ ⵛⴻⴽ ⵉⵅⴻⴵⴻⵚ.
23 ⴰⵙⴻⵎⵎⵉⴹ ⵣⵉ ⵛⵛⴰⵎⴰⵍ ⵉⵜⵜⴰⵡⵉ-ⴷⴷ ⴰⵏⵥⴰⵔ,
ⵉⵍⴻⵙ ⴰⵖⴻⴷⴷⴰⵔ ⵉⵜⵜⴰⵡⵉ-ⴷⴷ ⵓⴷⵎⴰⵡⴻⵏ ⵉⵅⴻⵢⵢⵇⴻⵏ.
24 ⵉⵃⵍⴰ ⴰⴷ ⵜⵣⴻⴷⵖⴻⴷ
ⴷⴻⴳ ⵉⵛⵜ ⵜⴻⵖⵎⴰⵔⵜ ⵏ ⵜⵣⴻⵇⵇⴰ,
ⵓⵍⴰ ⵅ ⵜⴰⵣⴻⴷⴷⵉⵖⵜ
ⴰⴽ-ⴷ ⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴻⵎⵛⵓⴱⴱⵓⵛⴻⵏ
ⴷⴻⴳ ⵉⵛⵜ ⵏ ⵜⴰⴷⴷⴰⵔⵜ ⵜⵛⴰⵔⵛ. ■
25 ⴰⵎ ⵡⴰⵎⴰⵏ ⵉⵚⴻⵎⵎⴰⴹⴻⵏ
ⵉ ⵢⵉⵊⵊ ⵏ ⵍⴻⵄⵎⴰⵔ ⵢⵓⵃⴻⵍ,
ⴰⵎⵎⵓ ⵉ ⵉⴵⴰ ⵍⴻⵅⴱⴰⵔ ⴰⵚⴻⴱⵃⴰⵏ
ⵣⴻⴳ ⵉⵛⵜ ⵏ ⵜⴻⵎⵎⵓⵔⵜ ⵜⵉⴳⴳⵯⴻⵊ.
26 ⴰⵎ ⵉⵊⵊ ⵏ ⵍⵄⵓⵏⵚⴰⵔ ⵉⵜⵜⵡⴰⴼⴻⵙⴷⴻⵏ
ⵓ ⴰⵎ ⵉⵊⵊ ⵏ ⵡⴰⵏⵓ ⵖⴻⵛⵛⴻⵏ ⵜ,
ⴰⵎⵎⵓ ⵉ ⵉⴵⴰ ⵓⵎⵙⴻⴳⴳⴻⴷ ⵉⵜⵜⵣⴻⵄⵣⵉⵄⴻⵏ
ⵣⵣⴰⵜ ⵉ ⵡⵓⴷⴻⵎ ⵏ ⵉⵄⴻⴼⴼⴰⵏⴻⵏ.
27 ⵎⴰⵛⵛⴰ ⵏ ⵡⴰⵟⵟⴰⵙ ⵏ ⵜⴰⵎⵎⴻⵏⵜ
ⵡⴰⵔ ⵉⴵⵉ ⵛⴰ ⵎⵍⵉⵃ,
ⵎⴰⵛⴰ ⵜⴰⵔⴻⵣⵣⵓⵜ
ⴷⵉ ⵜⵎⴻⵙⵍⴰⵢⵉⵏ ⵢⴻⵡⵄⴰⵔⴻⵏ ⴷ ⵛⵛⴰⵏ.
28 ⴰⵎ ⵉⵛⵜ ⵏ ⵜⴻⵏⴷⵉⵏⵜ ⵉⵀⴻⴷⵎⴻⵏ ⴱⵍⴰ ⵍⵃⵉⴹ,
ⴰⵎⵎⵓ ⵉ ⵉⴵⴰ ⵉⵊⵊ ⵏ ⵡⴻⵔⵢⴰⵣ
ⵡⴰⵔ ⵉⵜⵜⴻⵟⵟⴻⴼ ⴱⵓⵃⴱⴻⵍ ⵏⵏⴻⵙ. ■