ⴰⵡⴰⵍⴻⵏ ⵉⵡⴻⵥⵏⴻⵏ 24

1 ⵡⴰⵔ ⵜⵜⴰⵙⴻⵎ.

ⵣⴻⴳ ⵉⵔⵢⴰⵣⴻⵏ ⵉⵄⴻⴼⴼⴰⵏⴻⵏ,

ⵡⴰⵔ ⴰⵔⴻⵣⵣⵓ ⵛⴰ ⵜⵎⵓⵏⴻⵜ ⴰⴽⵉⴷⵙⴻⵏ.   

2 ⵎⴰⵖⴰⵔ ⵓⵍ ⵏⵙⴻⵏ ⵉⵜⵜⴻⵇⵇⴻⵔ ⵖⴰⵔ ⵓⵔⴻⴷⴷⴻⴵ,

ⴰⵡⴰⵍⴻⵏ ⵏ ⵉⵢⴻⵏⵛⵉⵛⴻⵏ ⵏⵙⴻⵏ

ⵉ ⴷⴷ-ⵉⵜⵜⵡⴰⵢⴻⵏ ⵖⴰⵔ ⴰⵔⵥⵉⵢⵢⴻⵜ.   

3 ⵜⴰⴷⴷⴰⵔⵜ ⵜᵉⵜⵜⵡⴰⴱⵏⴰ ⵙ ⵜⵉⵖⵉⵜ,

ⵜᵉⵜⵜⵡⴰⵙⵙⴻⵎⵜⴻⵏ ⵙ ⵍⴻⴼⵀⴰⵎⴻⵜ,

4 ⵙ ⵜⵓⵙⵙⵏⴰ ⵜⵜⵡⴰⵄⴻⵎⵎⴰⵔⴻⵏ

ⵉⵅⵅⴰⵎⴻⵏ ⵏ ⴷⴰⵅⴻⵍ,

ⵙ ⵎⴰⵔⵔⴰ ⴰⴳⵍⴰ ⵉⵖⵍⴰⵏ ⴷ ⵡⴰⴳⵍⴰ ⵉⵍⵉⵇⵇⴻⵏ.

5 ⴰⵔⵢⴰⵣ ⴰⵎⵉⵖⵉⵙ ⵉⵊⵀⴻⴷ,

ⴰⵔⵢⴰⵣ ⵏ ⵜⵓⵙⵙⵏⴰ ⵢⴰⵔⴻⵏⵏⵉ ⴷⵉ ⵊⵊⴻⵀⴷ ⵏⵏⴻⵙ,   

6 ⵎⴰⵖⴰⵔ ⵉⵜⵜⵅⴻⵚⵚⴰ

ⴰⴷ ⵉⵜⵜⵡⴰⵏⴷⴻⵀ ⵓⵎⴻⵏⵖⵉ ⵙ ⵓⴷⴻⴱⴱⴰⵔ,

ⵓ ⵙ ⵍⴻⵎⵖⴰⵔⴻⵜ ⵏ ⵓⵎⵛⴰⵡⴰⵔ ⴰⴷ ⵢⵉⵍⵉ ⵓⵙⴻⵏⵊⴻⵎ.   

7 ⵜⵉⵖⵉⵜ ⵜⵓⵄⵍⴰ ⵅ ⵓⴱⵓⵀⴰⵍⵉ,

ⵏⴻⵜⵜⴰ ⵡⴰⵔ ⵢⴰⵔⴻⵣⵣⴻⵎ ⴰⵇⴻⵎⵎⵓⵏ ⵏⵏⴻⵙ

ⴷⵉ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ.   

8 ⵡⴻⵏⵏⵉ ⵉⵜⵜⵅⴰⵔⵔⵉⵚⴻⵏ ⴷⵉ ⵍⵖⴰⵔ,

ⴰⴷ ⴰⵙ ⵍⴰⵖⴰⵏ ⴰⵔⵔⴰⵢⵙ ⵏ ⴱⵓ-ⵜⴻⵃⵍⴰⵢⵎⴻⵛⵜ.

9 ⵍⴻⵎⵡⴰⵢⴰⵍ ⵏ ⵓⵅⴰⵔⵔⴻⵚ ⵏ ⵓⴱⵓⵀⴰⵍⵉ ⴷ ⴷⴷⴻⵏⴱ,

ⵓ ⴰⵎⴻⵙⵜⴻⵀⵣⵉⵢ ⴷ ⵏⵏⵄⵉ ⵉ ⴱⵏⴰⴷⴻⵎ.

10 ⵎⴰⵍⴰ ⵜⴰⵔⵅⵓⴷ ⵣⴻⴳ ⵉⵅⴻⴼ ⵏⵏⴻⵛ

ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ,

ⴰⵎⵎⵓ ⵓⵍⴰ ⴷ ⵊⵊⵀⴻⴷ ⵏⵏⴻⵛ ⴰⴷ ⵜᵉⵜⵜⵡⴰⵃⵚⴰⵔ.

11 ⵙⴻⵏⵊⴻⵎ ⵉⵏⵏⵉ ⵉⵜⵜⵡⴰⵟⵟⴼⴻⵏ

ⵎⴰⵃⴻⵏⴷ ⴰⴷ ⵜⵜⵡⴰⵏⵖⴻⵏ,

ⵉⵏⵏⵉ ⵜⴻⵏ ⵉⵜⵜⴰⵡⵢⴻⵏ

ⵖⴰⵔ ⵎⴰⵏⵉ ⵜⴻⵏ ⵉ ⵖⴰ ⵏⵖⴻⵏ,

ⵙⴱⴻⴷⴷ ⵉ-ⵜⴻⵏ!   

12 ⵎⴰⵍⴰ ⵛⴻⴽ ⴰⴷ ⵜⵉⵏⵉⴷ:

“ⵅⵣⴰⵔ, ⴰⵇⴰ ⵡⴰⵔ ⵏⴻⵙⵙⵉⵏ ⵡⴰⵍⵓ ⵅ ⵎⴰⵏ ⴰⵢⴰ!”,

ⵎⴰ ⵡⴻⵏⵏⵉ ⵉⵡⴻⵣⵣⵏⴻⵏ ⵓⵍⴰⵡⴻⵏ,

ⵡⴰⵔ ⵜ ⵉⵙⵙⴰⵔⴳⵉⴱ?

ⵡⴻⵏⵏⵉ ⵉⵃⴻⵟⵟⴰⵏ ⵍⴻⵄⵎⴰⵔ ⵏⵏⴻⵛ, ⵉⵙⵙⴻⵏ ⵉ-ⵜ!

ⵏⴻⵜⵜⴰ ⴰⴷ ⵉⵅⴻⴵⴻⵚ ⴱⵏⴰⴷⴻⵎ

ⵄⵍⴰⵃⵙⴰⴱ ⵍⵅⴻⴷⵎⴻⵜ ⵏⵏⴻⵙ.   

13 ⴻⵛⵛ ⵜⴰⵎⵎⴻⵏⵜ, ⴰ ⵎⵎⵉ,

ⵎⴰⵖⴰⵔ ⵏⴻⵜⵜⴰⵜ ⵜⴻⵚⴱⴻⵃ,

ⵜⴰⵎⵎⴻⵏⵜ ⵏ ⵜⴻⵖⵔⴰⵙⵜ

ⴰⵇⴰ ⴷ ⵜⵎⵉⵥⵉⴷⵜ ⵉ ⵡⴰⵏⴻⵖ ⵏⵏⴻⵛ.

14 ⴰⵎⵎⵓ ⵉ ⵜⴻⴵⴰ ⵜⵓⵙⵙⵏⴰ ⵏ ⵜⵉⵖⵉⵜ

ⵉ ⵍⴻⵄⵎⴰⵔ ⵏⵏⴻⵛ.

ⵎⴰⵍⴰ ⵜⵓⴼⵉⴷ ⵜⵜ, ⵅⴻⵏⵏⵉ ⵜⴻⴵⴰ ⵜⵉⵡⴻⵛⵛⴰ,

ⵍⴰⵢⴰⵙ ⵏⵏⴻⵛ ⵡⴰⵔ ⵉⵜⵜⵡⴰⵇⴻⵟⵟⴻⵄ ⵛⴰ.   

15 ⴰ ⴰⵄⴻⴼⴼⴰⵏ, ⵡⴰⵔ ⵜᵉⵜⵜⵃⴰⵎⴰ

ⵅ ⵜⵣⴻⴷⴷⵉⵖⵜ ⵏ ⵓⵎⵙⴻⴳⴳⴻⴷ,

ⵡⴰⵔ ⵀⴻⴷⴷⴻⵎ ⴰⵎⵛⴰⵏ ⵏ ⵡⴰⵔⴻⵢⵢⴻⵃ ⵏⵏⴻⵙ!

16 ⵎⴰⵖⴰⵔ ⴰⵎⵙⴻⴳⴳⴻⴷ

ⴰⴷ ⵉⵡⴹⴰ ⵙⴻⴱⵄⴰ ⵏ ⵜⵡⴰⵍⴰⵡⵉⵏ,

ⴰⴷ ⴷⴷ-ⵉⴽⴽⴰⵔ ⵄⴰⵡⴻⴷ,

ⵎⴰⵛⴰ ⵉⵄⴻⴼⴼⴰⵏⴻⵏ ⴰⴷ ⵏⵏⵇⴰⵔⴹⴻⵏ ⵙ ⵍⵖⴰⵔ.   

17 ⵡⴰⵔ ⴼⴰⵔⵔⴻⵃ ⵉ ⵓⵡⴻⵟⵟⵓ ⵏ ⵍⴻⵄⴷⵓ ⵏⵏⴻⵛ,

ⵎⴰⵍⴰ ⵏⴻⵜⵜⴰ ⵉⵏⵇⴰⵔⴹ,

ⴻⵊⵊ ⵓⵍ ⵏⵏⴻⵛ ⵡⴰⵔ ⵉⴼⴰⵔⵔⴻⵃ,   

18 ⵎⴰⵃⴻⵏⴷ ⵙⵉⴷⵉ ⵡⴰⵔ ⵜ ⵉⵥⴰⵔⵔ

ⵓ ⵎⴰⵏ ⴰⵢⴰ ⴰⴷ ⵢⵉⵍⵉ ⴷ ⵍⵄⵉⴱ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,

ⴰⵍⴰⵎⵉ ⵏⴻⵜⵜⴰ ⴰⴷ ⵅⴰⵙ ⵉⵙⵙⵃⴻⵢⵢⴻⴷ ⴰⵖⴹⴰⴱ ⵏⵏⴻⵙ.

19 ⵡⴰⵔ ⵜⵜⵅⴻⵢⵢⵉⵇ ⴰⵟⵟⴰⵙ

ⵅ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ,

ⵡⴰⵔ ⵜⵜⴰⵙⴻⵎ ⵣⴻⴳ ⵉⵄⴻⴼⴼⴰⵏⴻⵏ,   

20 ⵎⴰⵖⴰⵔ ⴰⵇⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ

ⵡⴰⵔ ⵖⴰⵔⴻⵙ ⵜⵉⵡⴻⵛⵛⴰ,

ⵍⴻⴼⵏⴰⵔ ⵏ ⵉⵄⴻⴼⴼⴰⵏⴻⵏ ⴰⴷ ⵉⵜⵜⵡⴰⵙⵙⴻⵅⵙⵉ.   

21 ⴰ ⵎⵎⵉ, ⴳⴳⵯⴻⴷ ⵙⵉⴷⵉ ⴷ ⵓⵊⴻⴵⵉⴷ,

ⵡⴰⵔ ⵜⵜⵅⴻⴵⴻⴹ ⵛⴰ ⵉⵅⴻⴼ ⵏⵏⴻⵛ

ⴰⴽ-ⴷ ⵢⵉⵏⵏⵉ ⵉⵅⵙⴻⵏ ⴰⴷ ⵏⵇⴻⵍⴱⴻⵏ ⴽⵓⵍⵛⵉ,

22 ⵎⴰⵖⴰⵔ ⴰⴷ ⴷⴷ-ⵢⴰⵙ ⵓⴹⴻⵢⵢⴻⵄ ⵏⵙⴻⵏ

ⴷⴻⴳ ⵉⵊⵊ ⵏ ⵓⵎⵓⵔ,

ⵡⵉ ⵉⵙⵙⵏⴻⵏ ⴰⵏⴻⴳⴳⴰⵔⵓ ⴰⵄⴻⴼⴼⴰⵏ

ⵏ ⵉⵙⴻⴳⴳⵯⵓⵙⴰ ⵏⵙⴻⵏ?

ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⴰⵢⵜ ⵏ ⵜⵉⵖⵉⵜ -ⵜⴰⵙⵖⴰⵔⵜ 2

23 ⵓⵍⴰ ⴷ ⵢⵉⵏⴰ ⴷ ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⵉⵎⵉⵖⵉⵙⴻⵏ.

ⴰⵙⴼⴰⵔⵣ ⵏ ⵡⵓⴷⵎⴰⵡⴻⵏ ⴷⵉ ⴷⴷⴻⵄⵡⴻⵜ

ⵡⴰⵔ ⵉⴵⵉ ⵛⴰ ⵎⵍⵉⵃ.   

24 ⵡⴻⵏⵏⵉ ⵉⵇⵇⴰⵔⴻⵏ ⵉ ⵓⵄⴻⴼⴼⴰⵏ: “ⵛⴻⴽ ⴷ ⴰⵎⵙⴻⴳⴳⴻⴷ!”,

ⵡⴰⵏⵉⵜⴰ ⴰⴷ ⵜ ⵏⴻⵄⵍⴻⵏ ⵍⴻⴳⵏⵓⵙ,

ⴰⴷ ⵜ ⵛⴰⵔⵀⴻⵏ ⵛⵛⵓⵄⵓⴱ.   

25 ⵎⴰⵛⴰ ⵉⵏⵏⵉ ⵜⴻⵏ ⵉ ⵖⴰ ⵉⵃⴰⴽⵎⴻⵏ,

ⴰⴷ ⵉⵍⵉⵏ ⵎⵍⵉⵃ,

ⵍⴱⴰⵔⴰⴽⴰ ⵙ ⵎⴰⵔⵔⴰ ⵍⵅⴰⵔ ⴰⴷ ⵖⴰⵔⵙⴻⵏ ⴷⴷ-ⵜⴰⵙ.

26 ⴰⵎ ⵉⵊⵊⴻⵏ ⵡⴻⵏⵏⵉ ⵉⵙⵙⵓⴷⵓⵎⴻⵏ ⵉⵢⴻⵏⵛⵉⵛⴻⵏ,

ⴰⵎⵎⵓ ⵉ ⵢⴻⴵⴰ ⵡⴻⵏⵏⵉ ⴷⴷ-ⵉⵜⵜⴰⵔⵔⴰⵏ

ⵙ ⵡⴰⵡⴰⵍⴻⵏ ⵉⵙⴻⴳⴳⵎⴻⵏ.

27 ⵙⴻⵡⵊⴻⴷ ⵍⵅⴻⴷⵎⴻⵜ ⵏⵏⴻⵛ ⴱⴰⵔⵔⴰ,

ⴽⴻⵎⵎⴻⵍ ⵉ-ⵜⵜ ⵉ ⵢⵉⵅⴻⴼ ⵏⵏⴻⵛ ⴷⴻⴳ ⵉⵢⵢⴰⵔ,

ⵓⵛⴰ ⴱⵏⴰ ⵜⴰⴷⴷⴰⵔⵜ ⵏⵏⴻⵛ ⴰⵡⴰⵔⵏⵉ ⵎⴰⵏ ⴰⵢⴰ!

28 ⵡⴰⵔ ⵜⵜⵉⵍⵉ ⴷ ⴰⵛⴻⵀⵀⴰⴷ ⴱⵍⴰ ⵙⵙⵉⴱⴱⴻⵜ

ⵅ ⵊⵊⴰⵔ ⵏⵏⴻⵛ.

ⵎⴰ ⵉⵄⴻⴷⴷⴻⵍ ⴰⴷ ⵜⵖⴰⵔⵔⴻⴷ ⵙ ⵉⵢⴻⵏⵛⵉⵛⴻⵏ ⵏⵏⴻⵛ?

29 ⵡⴰⵔ ⵇⵇⴰⵔ: “ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵉⴳⴳⴰ,

ⴰⵎⵎⵓ ⵉ ⴷⴷ-ⴰⵙ ⵖⴰ ⴳⴳⴻⵖ ⵓⵍⴰ ⴷ ⵏⴻⵛⵛ!”,

ⵎⴰⵖⴰⵔ ⵏⴻⵛⵛ ⴰⴷ ⴷⴷ-ⵅⴻⵍⴼⴻⵖ ⵣⵉ ⴽⵓⵍ ⵉⵊⵊⴻⵏ

ⵄⵍⴰⵃⵙⴰⴱ ⵍⵅⴻⴷⵎⴻⵜ ⵏⵏⴻⵙ.   

30 ⵏⴻⵛⵛ ⴽⴽⴻⵖ ⵅ ⵢⴻⵢⵢⴰⵔ ⵏ ⵉⵊⵊ ⵏ ⵓⵎⴻⵄⴳⵓⵣ,

ⵅ ⵓⵎⴰⵔⵊⴻⵄ ⵏ ⵓⴹⵉⵍ ⵏ ⵉⵊⵊ ⵏ ⴱⵏⴰⴷⴻⵎ

ⵙ ⵡⵓⵍ ⵏⵏⴻⵙ ⵡⴰⵔ ⵉⵎⵜⵉⵏⴻⵏ.

31 ⵅⵣⴰⵔ, ⵜⴳⴻⵄⵄⴻⴷ-ⴷⴷ ⵅⴰⵙ ⵎⴰⵔⵔⴰ ⵜⴻⵢⵣⵉⵜ,

ⵜⴻⴷⵍⴰ ⵜⵣⴻⴳⴳⵯⴰⵔⵜ ⵓⴷⴻⵎ ⵏ ⵜⴻⵎⵎⵓⵔⵜ ⵏⵏⴻⵙ,

ⴰⵇⴰ ⵍⵃⵉⴹ ⵏⵏⴻⵙ ⵏ ⵡⴻⵥⵔⵓ ⵉⵜⵜⵡⴰⵀⴷⴻⵎ.

32 ⵍⴰⵎⵉ ⵜⵜ ⵥⵔⵉⵖ, ⴽⵙⵉⵖ ⵜⵜ ⵖⴰⵔ ⵡⵓⵍ ⵉⵏⵓ,

ⵥⵔⵉⵖ ⵜⵜ ⵓⵛⴰ ⴽⵙⵉⵖ ⵜⵜ ⴰⵎ ⵢⵉⵊⵊ ⵏ ⵓⵡⴻⴱⴱⴻⵅ.

33 “ⴻⵊⵊ ⴰⵢⵉ ⴰⴷ ⵟⵟⵚⴻⵖ ⵛⵡⴰⵢⵜ ⴷⵔⵓⵙⵜ,

ⵛⵡⴰⵢⵜ ⴷⵔⵓⵙⵜ ⵏ ⵓⵏⵓⴷⴻⵎ,

ⵛⵡⴰⵢⵜ ⴷⵔⵓⵙⵜ ⵏ ⵓⴱⵓⵣⵣⴻⵍ ⵙ ⵉⴼⴰⵙⵙⴻⵏ ⴹⴻⴼⵚⴻⵏ,   

34 ⴷⵉⵏⵏⵉ ⴷⴷ ⵖⴰ ⵢⴰⵙ ⵣⵣⴻⵍⴹ ⵏⵏⴻⵛ,

ⵓⵍⴰ ⴷ ⵍⴻⵖⴱⴻⵏ ⵏⵏⴻⵛ

ⴰⵎ ⵢⵉⵊⵊ ⵏ ⵡⴻⵔⵢⴰⵣ ⵙ ⵍⴻⵙⵏⴰⵃ.”