ⵉⵥⴻⵀⵀⵉⴷⴻⵏ 147

1 ⵀⴰⵍⵍⵉⵍⵓ-ⵢⴰⵀ,

ⵎⴰⵖⴰⵔ ⴰⵣⴻⵀⵀⴻⴷ ⵉ ⴰⵔⴻⴱⴱⵉ ⵏⵏⴻⵖ

ⴷ ⴰⵚⴻⴱⵃⴰⵏ, ⵎⵉⵏⵣⵉ ⵉⵜⵜⴰⵙ-ⴷⴷ ⴰⴽⵉⴷⴻⵙ

ⴰⴷ ⴰⵙ ⵏⵚⴻⴱⴱⴻⵃ.   

2 ⵙⵉⴷⵉ ⵉⴱⴻⵏⵏⴰ ⵓⵔⵛⴰⵍⵉⵎ,

ⵉⵙⵙⵎⵓⵏ ⵉⵎⵎⴻⵏⴻⵄⵔⴰⵇ ⵏ ⵉⵙⵔⴰⵉⵍ.

3 ⵏⴻⵜⵜⴰ ⵉⵙⵙⴳⴻⵏⴼⴰ ⵉⵏⵏⵉ ⵖⴰⵔⵙⴻⵏ ⵓⵍ ⵢⴰⵔⵥⴻⵏ,

ⵉⵜⵜⵛⴻⴷⴷⴰ ⵉⵢⴻⵣⵣⵉⵎⴻⵏ ⵏⵙⴻⵏ ⵉⵜⵜⴻⵇⵙⴻⵏ.   

4 ⵉⵃⴻⵙⵙⴻⴱ ⵇⴻⴷⴷⴰ ⵏ ⵉⵜⵔⴰⵏ,

ⵉⵜⵜⵍⴰⵖⴰ ⵜⴻⵏ ⵎⴰⵔⵔⴰ ⵙ ⵢⵉⵙⴻⵎ.   

5 ⵙⵉⴷⵉⵜⵏⴻⵖ ⴷ ⴰⵎⴻⵇⵇⵔⴰⵏ ⵓ ⵊⵊⴻⵀⴷ ⵏⵏⴻⵙ ⵉⵎⵖⴰⵔ.

ⵍⴻⵄⵇⴻⵍ ⵏⵏⴻⵙ ⵡⴰⵔ ⵖⴰⵔⴻⵙ ⴱⵓ ⵍⴻⵄⴱⴰⵔ.

6 ⵙⵉⴷⵉ ⵉⵜⵜⵙⴻⵏⵏⴻⴷ ⵉⵎⵡⴰⴹⵄⴻⵏ,

ⵉⵙⵙⵀⴻⴽⴽⵡⴰ ⵉⵄⴻⴼⴼⴰⵏⴻⵏ ⴰⵍ ⵜⴰⵎⵎⵓⵔⵜ.

7 ⵇⴰⴷⴰⵎ ⵙⵉⴷⵉ ⵙ ⵓⵖⴻⵏⵏⴻⵊ,

ⵣⴻⵀⵀⴷⴻⵎ ⵉ ⴰⵔⴻⴱⴱⵉ ⵏⵏⴻⵖ ⵙ ⵍⴳⴰⵎⴱⵔⵉ.

8 ⵏⴻⵜⵜⴰ ⴷ ⵡⴻⵏⵏⵉ ⵉⴷⴷⴰⵍⴻⵏ ⴰⵊⴻⵏⵏⴰ

ⵙ ⵉⵙⴻⵢⵏⵓⵜⴻⵏ,

ⴷ ⵡⴻⵏⵏⵉ ⵉⵙⵙⴻⵡⵊⴰⴷⴻⵏ ⴰⵏⵥⴰⵔ ⵉ ⵜⴻⵎⵎⵓⵔⵜ,

ⴷ ⵡⴻⵏⵏⵉ ⵉⵙⵙⵖⴻⵎⵎⴰⵢⴻⵏ ⴰⵔⴱⵉⵄ ⵅ ⵉⴷⵓⵔⴰⵔ.   

9 ⴷ ⵡⴻⵏⵏⵉ ⵉⵜⵜⵉⵛⴻⵏ ⵉ ⵍⵎⴰⵍ ⵎⴰⵛⵛⴰ ⵏⵏⴻⵙ,

ⵓⵍⴰ ⵉ ⵜⴰⵔⵡⴰ ⵏ ⵉⴱⴰⵖⵍⵉⵡⴻⵏ ⵅⵎⵉ ⵖⴰ ⵙⵖⵓⵢⴻⵏ.

10 ⵏⴻⵜⵜⴰ ⵡⴰⵔ ⵢⴰⵔⴻⵟⵟⵉ ⵙ ⵊⵊⴻⵀⴷ ⵏ ⵓⵢⵉⵙ,

ⵉⴹⴰⵔⴻⵏ ⵏ ⵡⴻⵔⵢⴰⵣ ⵡⴰⵔ ⴷ ⴰⵙ ⵜⵜⴻⵄⵊⵉⴱⴻⵏ.

11 ⵢⴰⵔⴻⵟⵟⴰ ⴰⵙ ⵉ ⵙⵉⴷⵉ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ,

ⵉⵏⵏⵉ ⵉⵙⵙⵉⵜⵎⴻⵏ

ⴷⵉ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ.

12 ⴰ ⵓⵔⵛⴰⵍⵉⵎ, ⵚⴻⴱⴱⴻⵃ ⵉ ⵙⵉⴷⵉ,

ⴰ ⵚⵉⵀⵢⵓⵏ, ⵚⴻⴱⴱⴻⵃ ⵉ ⴰⵔⴻⴱⴱⵉ ⵏⵏⴻⵎ.

13 ⵎⴰⵖⴰⵔ ⵏⴻⵜⵜⴰ ⵉⵙⵙⴻⵎⵃⴻⴷ

ⵣⵣⴻⴽⵔⵓⵏⴰⵜ ⵏ ⵜⴻⵡⵡⵓⵔⴰ ⵏⵏⴻⵛ,

ⵉⴱⴰⵔⴻⴽ ⵉⵃⴻⵏⵊⵉⵔⴻⵏ ⵏⵏⴻⵛ ⴷⵉ ⵍⵡⴻⵙⵜ ⵏⵏⴻⵛ,

14 ⵏⴻⵜⵜⴰ ⵉⵡⵛⴰ ⵍⴻⵀⵏⴰ ⵉ ⵉⵢⵎⵉⵔⴻⵏ ⵏⵏⴻⵛ,

ⵉⵙⵙⵊⵉⵡⴻⵏ ⵉ ⵛⴻⴽ ⵙ ⵎⵉⵏ ⵉⵚⴻⴱⵃⴻⵏ ⵇⴰⵄ ⵏ ⵢⵉⵔⴷⴻⵏ.

15 ⵏⴻⵜⵜⴰ ⵉⵙⵙⴻⴽⴽⴰ ⵜⵉⵡⴰⵍⵉⵏ ⵏⵏⴻⵙ ⵖⴰⵔ ⵜⴻⵎⵎⵓⵔⵜ,

ⴰⵡⴰⵍ ⵏⵏⴻⵙ ⵉⵜⵜⴰⵣⵣⴻⵍ ⴰⵟⵟⴰⵙ.   

16 ⵉⵜⵜⵉⵛ ⴰⴷⴼⴻⵍ ⴰⵎ ⵜⴹⵓⴼⵜ,

ⵉⵣⵣⵓⵣⴰⵔⴰ ⵏⵏⴷⴰ ⵉⴳⴻⵔⵙⴻⵏ ⴰⵎ ⵢⵉⵖⵖⴻⴹ.

17 ⵉⵙⵙⴻⴽⴽⴰ ⴰⴷⴼⴻⵍ ⵏⵏⴻⵙ ⴷ ⵉⴱⵇⵓⵇⴻⵏ,

ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⵇⵇⵉⵎ ⵉⴱⴻⴷⴷ

ⵣⵣⴰⵜ ⵉ ⵜⴻⵙⵎⵓⴹⵉ ⵏⵏⴻⵙ?

18 ⵉⵙⵙⴻⴽⴽⴰ ⴰⵡⴰⵍ ⵏⵏⴻⵙ

ⵓⵛⴰ ⵉⵜⵜⴰⵔⵔⴰ ⵉ-ⵜⴻⵏ ⴰⴷ ⴼⴻⵙⵢⴻⵏ,

ⵏⴻⵜⵜⴰ ⵉⵜⵜⴻⵊⵊⴰ ⴰⵙⴻⵎⵎⵉⴹ ⵏⵏⴻⵙ ⵉⵜⵜⵙⵓⴹ,

ⵅⴻⵏⵏⵉ ⵜⵜⵓⵛⵔⵓⵔⴻⵏ ⵡⴰⵎⴰⵏ.

19 ⵏⴻⵜⵜⴰ ⵉⴱⴰⵔⵔⴻⵃ ⵉ ⵢⴰⵄⵇⵓⴱ ⴰⵡⴰⵍⴻⵏ ⵏⵏⴻⵙ,

ⵉ ⵉⵙⵔⴰⵉⵍ ⵜⵉⵡⴻⵚⵚⴰ ⵏⵏⴻⵙ ⴷ ⵍⴼⴰⵔⴰⵢⵉⴹ ⵏⵏⴻⵙ.

20 ⵓⵍⴰ ⵉ ⵢⵉⵊⵊ ⵏ ⵍⴳⴻⵏⵙ ⵏⵏⴻⵖⵏⵉ

ⵡⴰⵔ ⴷ ⴰⵙ ⵉⴳⴳⵉ ⴰⵎⵎⵓ,

ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵛⴰ ⵍⴼⴰⵔⴰⵢⵉⴹ ⵏⵏⴻⵙ.

ⵀⴰⵍⵍⵉⵍⵓ-ⵢⴰⵀ!