ⵉⵥⴻⵀⵀⵉⴷⴻⵏ 135

1 ⵀⴰⵍⵍⵉⵍⵓ-ⵢⴰⵀ, ⵚⴻⴱⴱⵃⴻⵎ ⵉⵙⴻⵎ ⵏ ⵙⵉⴷⵉ,

ⵚⴻⴱⴱⵃⴻⵎ ⵅⴰⵙ, ⴰ ⵉⵎⵙⴻⵅⵅⴰⵔⴻⵏ ⵏ ⵙⵉⴷⵉ,

2 ⵉⵏⵏⵉ ⵉⴱⴻⴷⴷⴻⵏ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ,

ⴷⵉ ⵍⴻⵎⵔⴰⵃⴰⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏⵏⴻⵖ.

3 ⵀⴰⵍⵍⵉⵍⵓ-ⵢⴰⵀ, ⵎⴰⵖⴰⵔ ⵙⵉⴷⵉ ⵉⵚⴱⴻⵃ,

ⵥⴻⵀⵀⴷⴻⵎ ⵉ ⵢⵉⵙⴻⵎ ⵏⵏⴻⵙ, ⵎⴰⵖⴰⵔ ⵏⴻⵜⵜⴰ ⴷ ⵍⴻⴹⵔⴰⴼⴻⵜ.

4 ⵎⴰⵖⴰⵔ ⵙⵉⴷⵉ ⵉⴼⴰⵔⵥ ⵢⴰⵄⵇⵓⴱ ⵉ ⵢⵉⵅⴻⴼ ⵏⵏⴻⵙ,

ⵉⵙⵔⴰⵢⵉⵍ ⴷ ⴰⴳⵍⴰ ⵏⵏⴻⵙ.   

5 ⵎⴰⵖⴰⵔ ⵏⴻⵛⵛ ⵙⵙⵏⴻⵖ ⴰⵇⴰ ⵙⵉⴷⵉ ⴷ ⴰⵎⴻⵇⵇⵔⴰⵏ,

ⵙⵉⴷⵉⵜⵏⴻⵖ ⴷ ⴰⵎⴻⵇⵇⵔⴰⵏ ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ.

6 ⵎⴰⵔⵔⴰ ⵎⵉⵏ ⴷ ⴰⵙ ⵉⵜⵜⴻⵄⵊⵉⴱⴻⵏ ⵉ ⵙⵉⴷⵉ, ⵉⴳⴳⴰ ⵉ-ⵜ,

ⴷⴻⴳ ⵉⵊⴻⵏⵡⴰⵏ ⵓ ⵅ ⵜⴻⵎⵎⵓⵔⵜ,

ⴷⵉ ⵍⴻⴱⵃⵓⵔ ⵓ ⴷⴻⴳ ⵡⴰⵎⴰⵏ ⵢⵓⴵⵖⴻⵏ ⵎⴰⵔⵔⴰ.

7 ⵏⴻⵜⵜⴰ ⵉⵙⵙⴳⴻⵄⵄⴻⴷ ⵉⵙⴻⵢⵏⵓⵜⴻⵏ ⵥⵉ ⵟⵟⵔⵓⴼⴰ ⵏ ⵜⴻⵎⵎⵓⵔⵜ,

ⵏⴻⵜⵜⴰ ⵉⵜⵜⴻⴳⴳ ⴰⵙⵙⴰⵎⴻⵏ ⴰⴽ-ⴷ ⵡⴻⵏⵥⴰⵔ,

ⵉⵜⵜⴳⴻⵡⵡⴰⴷ ⴰⵙⴻⵎⵎⵉⴹ ⵥⵉ ⵍⴻⵀⵔⵉⵜ ⵏⵏⴻⵙ ⵖⴰⵔ ⴱⴰⵔⵔⴰ.   

8 ⵏⴻⵜⵜⴰ ⵉⵡⵜⴰ ⵉⵎⴻⵏⵥⴰ ⵏ ⵎⵉⵚⵔⴰ,

ⵥⴻⴳ ⵉⵡⴷⴰⵏ ⴰⵍ ⵍⵎⴰⵔ.   

9 ⵏⴻⵜⵜⴰ ⵉⵙⵙⴻⴽⴽ ⵍⴻⵄⵍⴰⵎⴰⵜ ⴷ ⵍⵎⵓⵄⵊⵉⵥⴰⵜ ⴷⵉ ⵍⵡⴻⵙⵜ ⵏⵏⴻⴽ, ⴰ ⵎⵉⵚⵔⴰ,

ⵖⴰⵔ ⴼⵉⵔⵄⵓⵏ ⵓ ⵖⴰⵔ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ.   

10 ⵏⴻⵜⵜⴰ ⵉⵡⵜⴰ ⴰⵟⵟⴰⵙ ⵏ ⵍⴻⴳⵏⵓⵙ ⵓ ⵉⵏⵖⴰ ⵉⵊⴻⴵⵉⴷⴻⵏ ⵉⵊⴻⵀⴷⴻⵏ.   

11 ⵙⵉⵃⵓⵏ, ⴰⵊⴻⴵⵉⴷ ⵏ ⵉⵎⵓⵔⵉⵢⵢⴻⵏ, ⵓ ⵄⵓⵊ, ⴰⵊⴻⴵⵉⴷ ⵏ ⴱⴰⵛⴰⵏ,

ⵓ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏ ⴽⴻⵏⵄⴰⵏ.

12 ⵉⵡⵛⴰ ⴰⵙⴻⵏ ⵜⴰⵎⵎⵓⵔⵜ ⴷ ⵜⴰⵙⵖⴰⵔⵜ,

ⴷ ⵜⴰⵙⵖⴰⵔⵜ ⵉ ⵉⵙⵔⴰⵉⵍ, ⵍⴳⴻⵏⵙ ⵏⵏⴻⵙ.   

13 ⴰ ⵙⵉⴷⵉ, ⵉⵙⴻⵎ ⵏⵏⴻⴽ ⵉⵜⵜⵖⵉⵎⴰ ⵉ ⵍⴻⴱⴷⴰ,

ⴰⵅⴰⵔⵔⴻⵚ ⴷⴰⵢⴻⴽ ⴰⴷ ⵢⵉⵍⵉ ⵥⵉ ⵊⵊⵉⵍ ⴰⵍ ⵊⵊⵉⵍ.   

14 ⵎⴰⵖⴰⵔ ⵙⵉⴷⵉ ⴰⴷ ⵢⴰⵔⵔ ⵜⴰⵙⵖⴰⵔⵜ ⵖⴰⵔ ⵍⴳⴻⵏⵙ ⵏⵏⴻⵙ,

ⵏⴻⵜⵜⴰ ⴰⴷ ⵉⵃⵉⵏⵏ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ.   

15 ⵍⴻⵅⵢⴰⵍⴰⵜ ⵏ ⵚⵚⴰⵏⴰⵎ ⵏ ⵍⴻⴳⵏⵓⵙ ⴰⵇⴰ ⴰⵜⴻⵏⵜ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ,

ⵜⵜⵡⴰⴳⴳⴻⵏⵜ ⵙ ⵉⴼⴰⵙⵙⴻⵏ ⵏ ⵉⵡⴷⴰⵏ.  

16 ⵏⵉⵜⴻⵏⵜⵉ ⵖⴰⵔⵙⴻⵏⵜ ⵉⵊⵊ ⵏ ⵓⵇⴻⵎⵎⵓⵎ, ⵎⴰⵛⴰ ⵡⴰⵔ ⵙⵙⵉⵡⵉⵍⴻⵏⵜ,

ⵖⴰⵔⵙⴻⵏ ⵜⵉⵟⵟⴰⵡⵉⵏ, ⵎⴰⵛⴰ ⵡⴰⵔ ⵜⵜⵡⵉⵍⵉⵏⵜ,

17 ⵏⵉⵜⴻⵏⵜⵉ ⵖⴰⵔⵙⴻⵏ ⵜⵉⵎⴻⵥⵥⵓⵖⴻⵏ, ⵎⴰⵛⴰ ⵡⴰⵔ ⵜⵜⴻⵙⵍⵉⵏⵜ,

ⵡⴰⵍⵓ ⴰⵙⵓⴹⵉ ⵏ ⵏⵏⴻⴼⵙ ⴷⴻⴳ ⵓⵇⴻⵎⵎⵓⵏ ⵏⵙⴻⵏ.

18 ⴰⴷ ⴷⴻⵡⵍⴻⵏ ⵉⵏⵏⵉ ⵜⴻⵏ ⵉⴳⴳⵉⵏ ⴰⵎ ⵏⵉⵜⴻⵏⵜⵉ,

ⵎⴰⵔⵔⴰ ⵡⵉ ⵅⴰⵙⴻⵏⵜ ⵉⵜⵜⵛⴰⵍ.

19 ⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⴱⴰⵔⴽⴻⵎ ⵙⵉⴷⵉ,

ⴰ ⵜⴰⴷⴷⴰⵔⵜ ⵏ ⵀⴰⵔⵓⵏ, ⴱⴰⵔⴽⴻⵎ ⵙⵉⴷⵉ.

20 ⴰ ⵜⴰⴷⴷⴰⵔⵜ ⵏ ⵍⴰⵡⵉ, ⴱⴰⵔⴽⴻⵎ ⵙⵉⴷⵉ!

ⴻⵊⵊ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⵯⴻⴷⴻⵏ ⵙⵉⴷⵉ, ⴰⴷ ⴱⴰⵔⴽⴻⵏ ⵙⵉⴷⵉ.

21 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵥⵉ ⵚⵉⵀⵢⵓⵏ,

ⵏⴻⵜⵜⴰ ⴷ ⵡⴻⵏⵏⵉ ⵉⵥⴻⴷⴷⵖⴻⵏ ⴷⵉ ⵓⵔⵛⴰⵍⵉⵎ. ⵀⴰⵍⵍⵉⵍⵓ-ⵢⴰⵀ!