ⵉⵥⴻⵀⵀⵉⴷⴻⵏ 132

1 ⵉⵥⵍⵉ ⵏ ⵓⴳⴻⵄⵄⴻⴷ.

ⴰ ⵙⵉⴷⵉ, ⵉⴷⴰⵔ ⴷⴰⵡⵓⴷ, ⵉⴷⴰⵔ ⵎⴰⵔⵔⴰ ⴰⵡⴻⴷⴷⴻⴱ ⵏⵏⴻⵙ,

2 ⵎⴰⵎⵎⴻⵛ ⵉⵊⵊⵓⴵ ⵉ ⵙⵉⴷⵉ,

ⵉⵡⴰⵄⴷ ⵉ ⵓⵎⵥⴻⵎⵎⴰⵔ ⵏ ⵢⴰⵄⵇⵓⴱ:

3 “ⵓⵛⵜ, ⵎⴰⵍⴰ ⴰⴷ ⴰⴷⴼⴻⵖ ⵖⴰⵔ ⵜⴰⵇⵉⴷⵓⵏⵜ ⵏ ⵜⴰⴷⴷⴰⵔⵜ ⵉⵏⵓ,

ⴰⴷ ⵃⴻⴱⵛⴻⵖ ⵅ ⵇⴰⵎⴰ ⵏ ⵔⴻⵛⵜⵓ ⵉⵏⵓ,   

4 ⴰⴷ ⵙⴻⵎⵎⵃⴻⵖ ⵢⵉⴹⴻⵚ ⵉ ⵜⵉⵟⵟⴰⵡⵉⵏ ⵉⵏⵓ,

ⵓⵍⴰ ⴷ ⴰⵏⵓⴷⴻⵎ ⵉ ⵡⴰⴱⵍⵉⵡⴻⵏ ⵉⵏⵓ,

5 ⵇⴱⴻⵍ ⵉ ⵖⴰ ⴰⴼⴻⵖ ⴰⵎⵛⴰⵏ ⵉ ⵙⵉⴷⵉ,

ⵉⵛⵜ ⵏ ⵜⵥⴻⴷⴷⵉⵖⵜ ⵉ ⵙⵉⴷⵉ, ⴰⵎⵥⴻⵎⵎⴰⵔ ⵏ ⵢⴰⵄⵇⵓⴱ!”

6 ⵅⵥⴰⵔ, ⵏⴻⵙⵍⴰ ⵅ ⵜⵜⴰⴱⵓⵜ ⴷⵉ ⵉⴼⵔⴰⵜⴰ,

ⵏⵓⴼⴰ ⵉ-ⵜⵜ ⴷⴻⴳ ⵉⵢⵢⴰⵔⴻⵏ ⵏ ⵢⴰⵄⴰⵔ.   

7 ⴰⴷ ⵏⴰⴷⴻⴼ ⵖⴰⵔ ⵜⵥⴻⴷⴷⵉⵖⵉⵏ ⵏⵏⴻⵙ,

ⴰⴷ ⵏⴰⴹⴰⵔ ⵥⵥⴰⵜ ⵉ ⵜⵏⴻⴱⴷⴰⵜ ⵏ ⵉⴹⴰⵔⴻⵏ ⵏⵏⴻⵙ.

8 ⴽⴽⴰⵔ, ⵙⵉⴷⵉ, ⵓⵢⵓⵔ ⵖⴰⵔ ⴰⵔⵔⴰⵃⴻⵜ ⵏⵏⴻⴽ,

ⵛⴻⴽ ⴷ ⵜⵜⴰⴱⵓⵜ ⵏ ⵊⵊⴻⵀⴷ ⵏⵏⴻⴽ.

9 ⴻⵊⵊ ⵉⴽⴻⵀⵀⴰⵏⴻⵏ ⵏⵏⴻⴽ ⴰⴷ ⵢⴰⵔⴹⴻⵏ ⵙ ⵜⵙⴻⴳⴷⴰ,

ⵉⵎⵜⵉⵇⵇⴰⵏ ⵏⵏⴻⴽ ⴰⴷ ⵙⵍⵉⵡⴻⵍⵡⴻⵏ.

10 ⵡⴰⵔ ⴷⴷ-ⵜⴰⵔⵔⵉ ⵓⴷⴻⵎ ⵏ ⵓⵎⴻⴷⵀⵓⵏ ⵏⵏⴻⴽ ⴷⵉ ⵟⵟⵡⴻⵄ ⵏ ⵓⵎⵙⴻⵅⵅⴰⵔ ⵏⵏⴻⴽ ⴷⴰⵡⵓⴷ.

11 ⵙⵉⴷⵉ ⵉⵊⵊⵓⴵ ⵉ ⴷⴰⵡⵓⴷ ⵙ ⵍⴰⵎⴰⵏ,

ⵄⴻⵎⵎⴰⵔⵚ ⴰⴷ ⵉⵃⴻⵢⵢⴻⴷ ⵏⴻⵜⵜⴰ ⵅ ⵜⵊⴰⴵⵉⵜ ⵏⵏⴻⵙ:

“ⵣⵉ ⵍⵖⵉⴵⴻⵜ ⵏ ⵓⵄⴻⴷⴷⵉⵙ ⵏⵏⴻⴽ ⴰⴷ ⵙⵙⵖⵉⵎⴻⵖ ⵉⵊⵊ ⵅ ⵍⵄⴰⵔⵛ ⵏⵏⴻⴽ.   

12 ⵎⴰⵍⴰ ⵉⵃⴻⵏⵊⵉⵔⴻⵏ ⵏⵏⴻⴽ ⴰⴷ ⵃⴹⴰⵏ ⵍⵄⴰⵀⴷ ⵉⵏⵓ ⴷ ⵛⵛⵀⴰⴷⴰⵜ ⵉⵏⵓ,

ⵜⵉⵏⵏⵉ ⴷ ⴰⵙⴻⵏ ⵉ ⵖⴰ ⵙⵙⵍⴻⵎⴷⴻⵖ,

ⵅⴻⵏⵏⵉ ⵓⵍⴰ ⴷ ⵉⵃⴻⵏⵊⵉⵔⴻⵏ ⵏⵙⴻⵏ ⴰⴷ ⵇⵇⵉⵎⴻⵏ ⵅ ⵍⵄⴰⵔⵛ ⵏⵏⴻⴽ ⵉ ⵍⴻⴱⴷⴰ.”

13 ⵎⴰⵖⴰⵔ ⵙⵉⴷⵉ ⵉⴼⴰⵔⵥ ⵚⵉⵀⵢⵓⵏ,

ⵉⵎⴻⵥⵔⵉ ⵜⵜ ⴷ ⵜⴰⵥⴻⴷⴷⵉⵖⵜ ⵉ ⵢⵉⵅⴻⴼ ⵏⵏⴻⵙ.

14 “ⵡⴰ ⴷ ⴰⵎⵛⴰⵏ ⵏ ⴰⵔⵔⴰⵀⴻⵜ ⵉⵏⵓ ⵉ ⵍⴻⴱⴷⴰ,

ⴷⴰ ⵉ ⵅⵙⴻⵖ ⴰⴷ ⵥⴻⴷⵖⴻⵖ, ⵏⴻⵛⵛ ⵅⵙⴻⵖ ⵜ.   

15 ⴰⴷ ⴱⴰⵔⴽⴻⵖ ⵏⵏⵉⵄⵎⴻⵜ ⵏ ⵚⵉⵀⵢⵓⵏ,

ⴰⴷ ⵙⵙⵊⵉⵡⵏⴻⵖ ⵉⵎⴻⵥⵍⴰⴹ ⵏⵏⴻⵙ ⵙ ⵡⴻⵖⵔⵓⵎ.

16 ⴰⴷ ⵙⵙⵢⴰⵔⴹⴻⵖ ⵉⴽⴻⵀⵀⴰⵏⴻⵏ ⵏⵏⴻⵙ ⵙ ⵓⵙⴻⵏⵊⴻⵎ ⴰⵎ ⵙ ⵡⴻⵔⵔⵓⴹ,

ⵉⵎⵜⵉⵇⵇⴰⵏ ⵏⵏⴻⵙ ⴰⴷ ⵙⵍⵉⵡⴻⵍⵡⴻⵏ ⵙ ⵊⵊⴻⵀⴷ.   

17 ⴷⵉⵏⵏⵉ ⴰⴷ ⵙⵙⵖⴻⵎⵎⵢⴻⵖ ⵉⵊⵊ ⵏ ⵓⵢⵉⵛⵛ ⵉ ⴷⴰⵡⵓⴷ,

ⵉⵊⵊ ⵏ ⵍⴻⴼⵏⴰⵔ ⵉ ⵓⵎⴻⴷⵀⵓⵏ ⵉⵏⵓ ⵙⵙⵡⴻⵊⴷⴻⵖ ⵜ ⴷⵉⵏ.  

18 ⴰⴷ ⵙⵙⵢⴰⵔⴹⴻⵖ ⵍⵄⴻⴷⵢⴰⵏ ⵏⵏⴻⵙ ⵙ ⵓⵙⴻⴹⵃⵉ,

ⵎⴰⵛⴰ ⴰⴷ ⵅⴰⵙ ⵜⴻⵏⵏⵓⵡⴰⵔ ⵜⴻⵎⵔⵉⵙⵜ ⵏⵏⴻⵙ.”