ⵉⵥⴻⵀⵀⵉⴷⴻⵏ 116

1 ⵏⴻⵛⵛ ⵜⵜⴻⵅⵙⴻⵖ,

ⵎⴰⵖⴰⵔ ⵙⵉⴷⵉ ⵉⵙⵍⴰ

ⵉ ⵜⵎⵉⵊⵊⴰ ⵉⵏⵓ, ⵉ ⵜⵓⵜⵔⴰ ⵉⵏⵓ,

2 ⵎⴰⵖⴰⵔ ⵏⴻⵜⵜⴰ ⵉⵡⵛⴰ ⴰⵢⵉ ⴰⵎⴻⵥⵥⵓⵖ ⵏⵏⴻⵙ.

ⴰⴷ ⴰⵙ ⵍⴰⵖⵉⵖ ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵉⵏⵓ.

3 ⵉⵙⴻⵖⵡⴰⵏ ⵏ ⵍⵎⴻⵡⵜ ⵏⵏⴹⴻⵏ ⴰⵢⵉ-ⴷⴷ,

ⵜⴻⵡⴹⴰ-ⴷⴷ ⵅⴰⴼⵉ ⵜⵉⴳⴳⵯⵓⴷⴰ ⵏ ⵍⴰⵅⴰⵔⵜ.

ⵏⴻⵛⵛ ⵓⴼⵉⵖ ⴰⵇⴰ ⴰⵢⵉ ⵜⵜⵡⴰⵃⵚⴰⵔⴻⵖ ⵓ ⵛⴻⴹⵏⴻⵖ.   

4 ⵍⴰⵖⵉⵖ ⵅ ⵢⵉⵙⴻⵎ ⵏ ⵙⵉⴷⵉ, ⵏⵏⵉⵖ:

“ⴰ ⵙⵉⴷⵉ, ⴼⴻⴽⴽ ⵍⴻⵄⵎⴰⵔ ⵉⵏⵓ!”

5 ⵙⵉⴷⵉ ⴷ ⴰⵃⵏⵉⵏ ⴷ ⴰⵎⵙⴻⴳⴳⴻⴷ,

ⴰⵔⴻⴱⴱⵉ ⵏⵏⴻⵖ ⴷⴰⵢⴻⵙ ⵍⴻⵃⵏⵓⵏⴻⵛⵜ.

6 ⵙⵉⴷⵉ ⵉⵃⴻⵟⵟⴰ ⵓⵍⴰⵡⴻⵏ ⵏ ⵉⵃⴰⴼⵉⵢⵢⴻⵏ.

ⵏⴻⵛⵛ ⵜⵓⵖⴰ ⴰⵢⵉ ⴰⵎ ⵓⵏⴻⵄⴹⴰⴱ,

ⵎⴰⵛⴰ ⵏⴻⵜⵜⴰ ⵉⵙⵙⴻⵏⵊⴻⵎ ⴰⵢⵉ.

7 ⵀⵏⴰ ⵄⴰⵡⴻⴷ, ⴰ ⵍⴻⵄⵎⴰⵔ ⵉⵏⵓ,

ⵎⴰⵖⴰⵔ ⵙⵉⴷⵉ ⵉⴳⴳⴰ ⴰⵛ ⵎⵉⵏ ⵉⵚⴻⴱⵃⴻⵏ.   

8 ⵎⴰⵖⴰⵔ ⵛⴻⴽ ⵜⴻⵃⴹⵉⴷ ⵍⴻⵄⵎⴰⵔ ⵉⵏⵓ

ⵣⵉ ⵍⵎⴻⵡⵜ,

ⵜⵉⵟⵟⴰⵡⵉⵏ ⵉⵏⵓ ⵣⴻⴳ ⵉⵎⴻⵟⵟⴰⵡⴻⵏ,

ⴰⴹⴰⵔ ⵉⵏⵓ ⵣⴻⴳ ⵓⵏⴻⵇⵔⴰⴹ.

9 ⴰⴷ ⵓⵢⵓⵔⴻⵖ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ,

ⴷⵉ ⵜⴻⵎⵎⵓⵔⴰ ⵏ ⵢⵉⵏⵏⵉ ⵉⴷⴷⴰⵔⴻⵏ.

10 ⵏⴻⵛⵛ ⵓⵎⵏⴻⵖ, ⵙ ⵓⵢⴻⵏⵏⵉ ⵏⵏⵉⵖ:

“ⵏⴻⵛⵛ ⵜⵜⵡⴰⵃⵚⴰⵔⴻⵖ ⴰⵟⵟⴰⵙ!”   

11 ⴷⵉ ⵜⵉⴳⴳⵯⵓⴷⵉ ⵉⵏⵓ ⵏⵏⵉⵖ:

“ⵎⴰⵔⵔⴰ ⵉⵡⴷⴰⵏ ⴷ ⴰⵢⵜ ⵏ ⴱⵓ-ⵉⵅⴰⵔⵔⵉⵇⴻⵏ!”   

12 ⵎⴰⵎⵎⴻⵛ ⵉ ⵖⴰ ⵅⴻⴵⵚⴻⵖ ⵙⵉⴷⵉ

ⵅ ⵎⴰⵔⵔⴰ ⵍⵅⴰⵔ ⵉ ⴷ ⴰⵢⵉ ⵉⴳⴳⴰ?

13 ⴰⴷ ⵙⵙⴳⴻⵄⵄⴷⴻⵖ

ⵍⴽⴰⵙ ⵏ ⵓⵙⴻⵏⵊⴻⵎ ⴰⵎⴻⵇⵇⵔⴰⵏ,

ⴰⴷ ⵍⴰⵖⵉⵖ ⵅ ⵢⵉⵙⴻⵎ ⵏ ⵙⵉⴷⵉ.

14 ⵏⴻⵛⵛ ⴰⴷ ⴽⴻⵎⵎⵍⴻⵖ

ⵍⵡⵓⵄⵓⴷ ⵉⵏⵓ ⵉ ⵙⵉⴷⵉ,

ⵇⵉⴱⴰⵍⵜ ⵉ ⵎⴰⵔⵔⴰ ⵍⴳⴻⵏⵙ ⵏⵏⴻⵙ.

15 ⴰⵇⴰ ⵉⵖⵍⴰ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ

ⵍⵎⴻⵡⵜ ⵏ ⵉⵎⵜⵉⵇⵇⴰⵏ ⵏⵏⴻⵙ.

16 ⴰ ⵙⵉⴷⵉ, ⴰⵇⴰ ⵏⴻⵛⵛ ⴷ ⴰⵎⵙⴻⵅⵅⴰⵔ ⵏⵏⴻⵛ,

ⵏⵏⴻⵛ ⴷ ⴰⵎⵙⴻⵅⵅⴰⵔ ⵏⵏⴻⵛ,

ⵎⵎⵉⵙ ⵏ ⵜⴰⵢⵢⴰ ⵏⵏⴻⵛ.

ⵛⴻⴽ ⵜⴻⵙⵙⴰⵔⵅⵓⴷ ⵅⴰⴼⵉ ⵉⵛⴻⴷⴷⵉⵢⴻⵏ ⵉⵏⵓ.

17 ⵏⴻⵛⵛ ⴰⴷ ⵛⴻⴽ ⴷⴷ-ⴰⵡⵢⴻⵖ

ⵜⴰⵡⵀⵉⴱⵜ ⵏ ⵓⵇⴰⴷⵉ,

ⴰⴷ ⵍⴰⵖⵉⵖ ⵅ ⵢⵉⵙⴻⵎ ⵏ ⵙⵉⴷⵉ.

18 ⵏⴻⵛⵛ ⴰⴷ ⵙⵙⵇⴻⴼⵍⴻⵖ ⵍⵡⵓⵄⵓⴷ ⵉⵏⵓ ⵉ ⵙⵉⴷⵉ,

ⵇⵉⴱⴰⵍⵜ ⵉ ⵎⴰⵔⵔⴰ ⵍⴳⴻⵏⵙ ⵏⵏⴻⵙ.

19 ⴷⵉ ⵍⴻⵎⵔⴰⵃⴰⵜ ⵏ ⵜⴰⴷⴷⴰⵔⵜ ⵏ ⵙⵉⴷⵉ,

ⴷⵉ ⵍⵡⴻⵙⵟ ⵏⵏⴻⵎ, ⴰ ⵓⵔⵛⴰⵍⵉⵎ!

ⵀⴰⵍⵍⵉⵍⵓ-ⵢⴰⵀ.