ⵉⵥⴻⵀⵀⵉⴷⴻⵏ 95

1 ⴰⵙⴻⵎ-ⴷⴷ, ⴻⵊⵊ ⴰⵏⴻⵖ ⴰⴷ ⵏⴻⵙⵍⵉⵡⵍⴻⵡ ⵣⵣⴰⵜ ⵉ ⵙⵉⴷⵉ,

ⴻⵊⵊ ⴰⵏⴻⵖ ⴰⴷ ⵏⴷⵓⵇⵇⴻⵣ ⵙ ⵓⵙⵍⵉⵡⵍⴻⵡ

ⵉ ⵜⴻⵚⴹⴰⵔⵜ ⵏ ⵓⵙⴻⵏⵊⴻⵎ ⵏⵏⴻⵖ.

2 ⴻⵊⵊ ⴰⵏⴻⵖ ⴰⴷ ⵏⴰⴷⴻⵙ

ⵖⴰⵔ ⵡⵓⴷⴻⵎ ⵏⵏⴻⵙ ⵙ ⵓⵇⴰⴷⵉ,

ⴻⵊⵊ ⴰⵏⴻⵖ ⴰⴷ ⴰⵙ ⵏᵉⵙⵍⵉⵡⵍⴻⵡ ⵙ ⵉⵣⴻⵀⵀⵉⴷⴻⵏ.

3 ⵎⴰⵖⴰⵔ ⵙⵉⴷⵉ ⴷ ⵉⵊⵊ ⴰⵔⴻⴱⴱⵉ ⴷ ⴰⵎⴻⵇⵇⵔⴰⵏ,

ⵉⵊⵊ ⵏ ⵓⵊⴻⴵⵉⴷ ⴷ ⴰⵎⴻⵇⵇⵔⴰⵏ

ⵙⴻⵏⵏⴻⵊ ⵉ ⵎⴰⵔⵔⴰ ⵉⵔⴻⴱⴱⵉⵜⴻⵏ.

4 ⴷⴻⴳ ⵓⴼⵓⵙ ⵏⵏⴻⵙ ⴵⴰⵏ

ⵉⵎⵓⵛⴰⵏ ⵢⵓⴵⵖⴻⵏ ⵇⴰⵄ ⵏ ⵜⴻⵎⵎⵓⵔⵜ,

ⵓⵍⴰ ⴷ ⵜⵉⵇⵉⵛⵛⴰⵜⵉⵏ ⵏ ⵉⴷⵓⵔⴰⵔ

ⴰⵇⴰ ⴰⵜⴻⵏⵜ ⵏⵏⴻⵙ.

5 ⵏⵏⴻⵙ ⵍⴻⴱⵃⴰⵔ, ⵎⴰⵖⴰⵔ ⵉⵅⵍⴻⵇ ⵉ-ⵜ-ⵉ-ⴷⴷ,

ⵓ ⵉⴼⴰⵙⵙⴻⵏ ⵏⵏⴻⵙ ⴳⴳⵉⵏ ⵓⵍⴰ ⴷ ⵍⴱⴰⵔ.

6 ⴰⵙⴻⵎ-ⴷⴷ, ⴻⵊⵊ ⴰⵏⴻⵖ

ⴰⴷ ⴰⵙ ⵏⴱⴻⵏⴷⴻⵇ, ⴰⴷ ⵏⴻⵙⵊⴻⴷ,

ⴻⵊⵊ ⴰⵏⴻⵖ ⴰⴷ ⵏⴻⵙⵊⴻⴷ ⵅ ⵉⴼⴰⴷⴷⴻⵏ ⵣⵣⴰⵜ ⵉ ⵙⵉⴷⵉ,

ⵡⴻⵏⵏⵉ ⴷ ⴰⵏⴻⵖ ⵉⴳⴳⵉⵏ,

7 ⵎⴰⵖⴰⵔ ⵏⴻⵜⵜⴰ ⴷ ⴰⵔⴻⴱⴱⵉ ⵏⵏⴻⵖ

ⵓ ⵏⴻⵛⵛⵉⵏ ⴷ ⵍⴳⴻⵏⵙ ⵏ ⵜⴰⵔⴻⵡⵙⴰ ⵏⵏⴻⵙ,

ⵓⵍⴰ ⴷ ⵓⴵⵉ ⵏ ⵓⴼⵓⵙ ⵏⵏⴻⵙ.

ⵎⴰⵍⴰ ⴰⵙⵙ-ⴰ ⵜⵙⴻⴵⴻⵎ ⵖⴰⵔ ⵜⵎⵉⵊⵊⴰ ⵏⵏⴻⵙ,   

8 ⵡⴰⵔ ⵙⵙⴻⵇⵙⵉⵃⴻⵎ ⵛⴰ ⵓⵍ ⵏⵡⴻⵎ,

ⴰⵎ ⴷⵉ ⵎⴰⵔⵉⴱⴰ,

ⴰⵎ ⴷⴻⴳ ⵡⴰⵙⵙ ⵏ ⵎⴰⵙⵙⴰ ⴷⵉ ⵍⴻⵅⵍⴰ,   

9 ⵎⴰⵏⵉ ⵜⵓⵖⴰ ⴷ ⴰⵢⵉ ⵜⵜⵊⴰⵔⵔⴱⴻⵏ

ⵍⴻⵊⴷⵓⴷ ⵏⵡⴻⵎ,

ⵇⴻⴵⴱⴻⵏ ⴰⵢⵉ,

ⵡⴰⵅⵅⴰ ⵜⵓⵖⴰ ⵥⵔⵉⵏ ⵍⵅⴻⴷⵎⴻⵜ ⵉⵏⵓ.   

10 ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ

ⵜⵓⵖⴰ ⵜⵜⵄⵉⴼⴼⴻⵖ ⵊⵊⵉⵍ-ⴰ, ⵏⵏⵉⵖ:

“ⴰⵇⴰ-ⵜⴻⵏ ⴷ ⵉⵊⵊ ⵏ ⵍⴳⴻⵏⵙ

ⵙ ⵡⵓⵍ ⵉⵡⴻⴷⴷⴰⵔⴻⵏ,

ⵡⴰⵔ ⵙⵙⵉⵏⴻⵏ ⵉⴱⵔⵉⴷⴻⵏ ⵉⵏⵓ.”  

11 ⵙ ⵓⵢⴻⵏⵏⵉ ⵏⴻⵛⵛ ⵊⵊⵓⴵⴻⵖ

ⴷⴻⴳ ⵡⴻⵖⴹⴰⴱ ⵉⵏⵓ:

“ⵏⵉⵜⵏⵉ ⵡⴰⵔ ⴷⴷ-ⵜⵜⵉⴷⴼⴻⵏ ⵄⴻⵎⵎⴰⵔⵚ

ⴷⵉ ⴰⵔⵔⴰⵃⴻⵜ ⵉⵏⵓ!”