ⵉⵥⴻⵀⵀⵉⴷⴻⵏ 64

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.

2 ⵙⴻⵍ, ⴰ ⴰⵔⴻⴱⴱⵉ, ⵉ ⵜⵎⵉⵊⵊⴰ ⵉⵏⵓ ⵅⵎⵉ ⵜⵜⵛⴻⵜⵛⵉⵖ,

ⵃⴹⴰ ⵜⵓⴷⴰⵔⵜ ⵉⵏⵓ ⵣⴻⴳ ⵓⵙⵉⴳⴳⵯⴻⴷ ⵏ ⵍⴻⵄⴷⵓ.

3 ⵙⴷⵓⵔⵔⵉ ⴰⵢⵉ ⵣⵉ ⵜⵎⴻⵄⵎⵓⵍⵜ ⵏ ⵉⵄⴻⴼⴼⴰⵏⴻⵏ,

ⵣⵉ ⵍⵖⴰⵛⵉ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ,

4 ⵉⵏⵏⵉ ⵉⵙⵙⴻⵇⴹⴰⵄⴻⵏ ⵉⵍⴻⵙ ⵏⵙⴻⵏ

ⴰⵎ ⵢⵉⵊⵊ ⵏ ⵙⵙⵉⴼ,

ⵇⴰⵔⵔⵚⴻⵏ ⴰⵡⴰⵍ ⵢⴰⵔⴻⵣⴳⴻⵏ

ⴰⵎ ⴼⵍⵉⵜⵛⴰ ⵏ ⵍⵇⴻⵡⵙ ⵏⵙⴻⵏ,

5 ⵃⵉⵎⴰ ⴰⴷ ⵡⵜⴻⵏ ⵙ ⵍⵇⴻⵡⵙ

ⵅ ⵡⴻⵏⵏⵉ ⵉⴽⴻⵎⵎⵍⴻⵏ

ⵣⴻⴳ ⵉⵎⵓⵛⴰⵏ ⵉⵏⵓⴼⴼⴰⵔⴻⵏ.

ⴷⴻⵖⵢⴰ ⴰⴷ ⵅⴰⵙ ⵏⴻⵢⵢⵛⴻⵏ,

ⵉⵡⴰ ⵡⴰⵔ ⴷⵉⵏ ⵎⵉⵏⵣⵉ ⵉ ⵖⴰ ⴳⴳⵯⴻⴷⴻⵏ.

6 ⵏⵉⵜⵏⵉ ⵃⴻⵣⵣⵎⴻⵏ

ⵎⴰⵃⴻⵏⴷ ⴰⴷ ⴳⴳⴻⵏ ⵎⵉⵏ ⵡⴰⵔ ⵉⵃⵍⵉⵏ,

ⵙⵙⴰⵡⴰⵍⴻⵏ ⵙ ⵜⵏⵓⴼⴼⵔⴰ

ⵎⴰⵃⴻⵏⴷ ⴰⴷ ⵏⴻⴷⵢⴻⵏ ⵜⵉⵅⵛⵉⴼⵉⵏ.

ⵇⵇⴰⵔⴻⵏ: “ⵡⵉ ⵜⴻⵏ ⵉ ⵖⴰ ⵉⵥⴰⵔⴻⵏ!”

7 ⵏⵉⵜⵏⵉ ⵜⵜⵅⴰⵔⵔⵚⴻⵏ

ⴷⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ: “ⴰⵇⴰ ⵏⴻⵡⵊⴻⴷ,

ⵉⵛⵜ ⵏ ⵜⵎⴻⵄⵎⵓⵍⵜ ⵏ ⵜⴻⵃⵔⴰⵢⵎⴻⵛⵜ!”

ⴰⵇⴰ ⵎⵉⵏ ⵉⴵⴰⵏ ⴷⴰⵅⴻⵍ ⴷⴻⴳ ⵡⴻⵔⵢⴰⵣ

ⵓ ⴷⴻⴳ ⵡⵓⵍ ⵏⵏⴻⵙ ⴰⵇⴰ ⵢⵓⴵⴻⵖ.

8 ⴰⵔⴻⴱⴱⵉ ⴰⴷ ⵜⴻⵏ ⵉⵡⵡⴻⵜ ⵙ ⴼⵍⵉⵜⵛⴰ ⵏ ⵍⵇⴻⵡⵙ,

ⴷⴻⵖⵢⴰ ⴰⴷ ⴱⴰⵏⴻⵏ ⵊⵊⵔⴰⵢⴻⵃ ⵏⵙⴻⵏ.

9 ⵉⵍⴻⵙ ⵏⵙⴻⵏ ⴰⴷ ⵜⴻⵏ ⵢⴰⵔⵔ

ⴰⴷ ⵏⵇⴰⵔⴹⴻⵏ ⴷⴻⴳ ⵉⵅⴻⴼ ⵏⵙⴻⵏ,

ⴽⵓⵍ ⵉⵊⵊ, ⵣⴻⴳ ⵉⵏⵏⵉ ⵜⴻⵏ ⵉⵜⵜⵡⴰⵍⴰⵏ,

ⴰⴷ ⵢⴰⵔⵡⴻⵍ.

10 ⵅⴻⵏⵏⵉ ⴰⴷ ⴳⴳⵯⴻⴷⴻⵏ ⵎⴰⵔⵔⴰ ⵉⵡⴷⴰⵏ,

ⴰⴷ ⴱⴰⵔⵔⵃⴻⵏ ⵜⵉⵎⴻⴳⴳⴰ ⵏ ⴰⵔⴻⴱⴱⵉ

ⵓⵛⴰ ⴰⴷ ⵅⵣⴰⵔⴻⵏ ⵎⵍⵉⵃ ⴷⵉ ⵎⵉⵏ ⴷⴷ ⵉⵜⵜⴻⴳⴳ.

11 ⴰⵎⵙⴻⴳⴳⴻⴷ ⴰⴷ ⵉⴼⴰⵔⵃ ⴷⵉ ⵙⵉⴷⵉ

ⵓ ⴰⴷ ⵖⴰⵔⴻⵙ ⴷⴷ-ⵢⴰⵔⵡⴻⵍ,

ⵎⴰⵔⵔⴰ ⵉⵏⵏⵉ ⵓⵎⵉ ⵉⵙⴻⴳⴳⴻⴷ ⵡⵓⵍ ⴰⴷ ⴼⴰⵔⵃⴻⵏ.