ⵉⵥⴻⵀⵀⵉⴷⴻⵏ 57

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ‘ⵡⴰⵔ ⵜ ⵜⵜⴰⵔⴻⴷⴷⴻⴵ!’ ⵏ ⴷⴰⵡⵓⴷ. ⵜⵉⵔⴰ ⵉⵏⴻⵇⵛⴻⵏ. ⵓⵎⵉ ⵢⴰⵔⵡⴻⵍ ⵣⵉ ⵛⴰⵡⵓⵍ ⴷⴻⴳ ⵉⴼⵔⵉ.  

2 ⵃⵉⵏⵏ ⵅⴰⴼⵉ, ⴰ ⴰⵔⴻⴱⴱⵉ, ⵃⵉⵏⵏ ⵅⴰⴼⵉ,

ⵎⴰⵖⴰⵔ ⵍⴻⵄⵎⴰⵔ ⵉⵏⵓ ⵢⴰⵔⴻⴽⴽⵡⴰⵍ-ⴷⴷ ⵖⴰⵔⴻⴽ.

ⵏⴻⵛⵛ ⵓⴼⵉⵖ ⴰⴷⵓⵔⵔⵉ

ⴷⵉ ⵜⵉⵍⵉ ⵏ ⵡⴰⴼⵔⵉⵡⴻⵏ ⵏⵏⴻⵛ,

ⴰⵍ ⵖⴰ ⵄⴷⵓⵏⵜ ⵍⵎⵓⵚⵉⴱⴰⵜ.

3 ⵏⴻⵛⵛ ⴰⴷ ⵍⴰⵖⵉⵖ ⵖⴰⵔ ⴰⵔⴻⴱⴱⵉ,

ⴰⵎⵄⵓⴵⵉ ⵅ ⴽⵓⵍⵛⵉ,

ⵖⴰⵔ ⴰⵔⴻⴱⴱⵉ ⵡⴻⵏⵏⵉ ⴷ ⴰⵢⵉ ⵖⴰ ⵉⵏⴻⴷⵀⴻⵏ

ⵖⴰⵔ ⵓⵏⴻⴳⴳⴰⵔ ⵉⵚⴻⴱⵃⴻⵏ.

4 ⵏⴻⵜⵜⴰ ⴰⴷ ⴷⴷ-ⵉⵙⵙⴻⴽⴽ ⴰⵙⴻⵏⵊⴻⵎ ⵉⵏⵓ

ⵣⴻⴳ ⵓⵊⴻⵏⵏⴰ,

ⴰⴷ ⵉⵙⵙⴱⴻⵀⴷⴻⵍ ⵡⴻⵏⵏⵉ ⵉⵅⵙⴻⵏ

ⴰⴷ ⴰⵢⵉ ⵉⵙⴰⵔⴹ. ⵙⵉⵍⴰⵀ.

ⴰⵔⴻⴱⴱⵉ ⴰⴷ ⵉⵙⵙⴻⴽⴽ

ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ

ⴷ ⵍⴰⵎⴰⵏ ⵏⵏⴻⵙ.

5 ⵍⴻⵄⵎⴰⵔ ⵉⵏⵓ ⴰⵇⴰ-ⵜ ⵊⴰⵔ ⵉⵢⵔⴰⴷⴻⵏ,

ⵣⵣⵍⴻⵖ ⵊⴰⵔ ⵉⵚⴻⴼⴹⴰⵡⴻⵏ ⵢⴰⵔⴻⵇⵇⴻⵏ,

ⵜⴰⵔⵡⴰ ⵏ ⴱⵏⴰⴷⴻⵎ, ⵉⵏⵏⵉ ⵜⵉⵖⵎⴰⵙ ⵏⵙⴻⵏ

ⴰⵎ ⵍⴰⵏⵙⴰⵜ ⴷ ⴼⵍⵉⵜⵛⴰⵜ ⵏ ⵍⵇⴻⵡⵙ,

ⵉⵍⴻⵙ ⵏⵙⴻⵏ ⴰⵎ ⵢⵉⵊⵊ ⵏ ⵙⵙⵉⴼ ⵉⵇⴹⴻⵄ.

6 ⴰ ⴰⵔⴻⴱⴱⵉ, ⵙⴳⴻⵄⵄⴻⴷ ⵉⵅⴻⴼ ⵏⵏⴻⵛ

ⵜⵉⵡⴰ ⵉ ⵉⵊⴻⵏⵡⴰⵏ,

ⴰⵔⵔ ⴰⵄⵓⴵⵉ ⵏⵏⴻⵛ

ⵙⴻⵏⵏⴻⵊ ⵉ ⵎⴰⵔⵔⴰ ⵜⴰⵎⵎⵓⵔⵜ.   

7 ⵏⵉⵜⵏⵉ ⴳⴳⵉⵏ ⵜⵔⴰⵛⵛⴰ ⵉ ⵉⵚⵓⵔⴰⴼ ⵉⵏⵓ,

ⵍⴻⵄⵎⴰⵔ ⵉⵏⵓ ⵜⵓⵖⴰ ⵉⵖⵏⴻⵙ.

ⵏⵉⵜⵏⵉ ⵖⵣⵉⵏ ⴰⵢⵉ ⴰⵃⴼⵓⵔ,

ⵎⴰⵛⴰ ⵡⴹⴰⵏ ⴷⴰⵢⴻⵙ ⵙⵉⵎⴰⵏⵜ ⵏⵙⴻⵏ.

ⵙⵉⵍⴰⵀ.   

8 ⴰ ⴰⵔⴻⴱⴱⵉ, ⵓⵍ ⵉⵏⵓ ⵢⴰⵔⴻⴽⴽⴻⵏ,

ⵓⵍ ⵉⵏⵓ ⵢⴰⵔⴻⴽⴽⴻⵏ.

ⴰⵇⴰ ⵏⴻⵛⵛ ⴰⴷ ⵖⴻⵏⵏⵊⴻⵖ ⴰⴷ ⵣⴻⵀⵀⴷⴻⵖ.   

9 ⴼⴰⵇ, ⴰⵄⵓⴵⵉ ⵉⵏⵓ! ⴼⴰⵇ,

ⵍⵀⴰⵔⴱⴰ ⴷ ⵍⴳⴰⵎⴱⵔⵉ!

ⵏⴻⵛⵛ ⵜⵜⴻⵅⵙⴻⵖ ⴰⴷ ⵙⵙⴼⴰⵇⴻⵖ

ⵜⴰⴼⴰⵡⵜ ⵏ ⵍⴻⴼⵊⴰⵔ.

10 ⵏⴻⵛⵛ ⴰⴷ ⵛⴻⴽ ⵇⴰⴷⵉⵖ ⵊⴰⵔ ⵍⴻⴳⵏⵓⵙ,

ⴰ ⵙⵉⴷⵉ ⵉⵏⵓ,

ⴰⴷ ⵣⴻⵀⵀⴷⴻⵖ ⵊⴰⵔ ⵛⵛⵓⵄⵓⴱ ⵉ ⵛⴻⴽ.   

11 ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ

ⵜᵉⵜⵜⴰⴽⴽⵡⴰⴹ ⴰⵍ ⵉⵊⴻⵏⵡⴰⵏ,

ⵍⴰⵎⴰⵏ ⵏⵏⴻⵛ ⴰⵍ ⵉⵙⴻⵢⵏⵓⵜⴻⵏ.   

12 ⴰ ⴰⵔⴻⴱⴱⵉ, ⵙⴳⴻⵄⵄⴻⴷ ⵉⵅⴻⴼ ⵏⵏⴻⵛ

ⵜⵉⵡⴰ ⵉ ⵉⵊⴻⵏⵡⴰⵏ,

ⴰⵔⵔ ⴰⵄⵓⴵⵉ ⵏⵏⴻⵛ

ⵙⴻⵏⵏⴻⵊ ⵉ ⵎⴰⵔⵔⴰ ⵜⴰⵎⵎⵓⵔⵜ.