ⵉⵥⴻⵀⵀⵉⴷⴻⵏ 52

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵅⴻⵎⵎⵉ ⵏ ⴷⴰⵡⵓⴷ.

2 ⵍⴰⵎⵉ ⴷⴷ-ⵢⵓⵙⴰ ⴷⵓⵡⴰⵄ, ⵣⵉ ⵉⴷⵓⵎ, ⵉⵅⴻⴱⴱⴰⵔ ⵛⴰⵡⵓⵍ, ⵉⵏⵏⴰ ⴰⵙ:

“ⴰⵇⴰ ⴷⴰⵡⵓⴷ ⵢⵓⵙⴰ-ⴷⴷ ⵖⴰⵔ ⵜⴰⴷⴷⴰⵔⵜ ⵏ ⴰⵅⵉⵎⴰⵍⵉⴽ.”   

3 ⵎⴰⵎⵎⴻⵛ ⵜⴼⴻⵢⵢⵛⴻⴷ ⵣⵉ ⵜⵄⴻⴼⴼⴰⵏⵜ, ⴰ ⵊⵊⵉⵀⴻⵍ?

ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⴰⵔⴻⴱⴱⵉ

ⵜᵉⵜⵜⴻⴽⴽ ⴰⵙⵙ ⵉⵎⵓⵏ.

4 ⵉⵍⴻⵙ ⵏⵏⴻⵛ ⵉⵜⵜⵅⴰⵔⵔⴻⵚ ⴷⵉ ⵍⵖⴰⵔ,

ⴰⵎ ⵎⴰⵎⵎⴻⵛ ⵍⵎⵓⵙ ⵉⵇⴻⴹⵄⴻⵏ ⵉ ⵓⵃⴻⴼⴼⵉ

ⵢⵉⵡⵢⵉ ⴷⵔⵓⵛⵜ ⵙ ⵍⵖⴻⴼⵍⴻⵜ.

5 ⵛⴻⴽ ⵜᵉⵜⵜⴻⵅⵙⴻⴷ ⵜⴰⵄⴻⴼⴼⴰⵏⵜ ⴰⵟⵟⴰⵙ ⵅ ⵜⵚⴻⴱⵃⴰⵏⵜ,

ⵍⵀⴰⵔⴷ ⵙ ⵉⵅⴰⵔⵔⵉⵇⴻⵏ

ⴽⵜⴰⵔ ⵅ ⵍⵀⴰⵔⴷ ⵏ ⵜⵙⴻⴳⴷⴰ. ⵙⵉⵍⴰⵀ.

6 ⵛⴻⴽ ⵜᵉⵜⵜⴻⵅⵙⴻⴷ ⴰⵡⴰⵍⴻⵏ ⵉⵜⵜⴰⴽⴽⵯⴰⵔⴻⵏ,

ⵓⵍⴰ ⴷ ⵉⵍⴻⵙ ⵉⵛⵛⵓⵔ ⵙ ⵡⴻⵛⵎⴰⵜ.

7 ⵎⴰⵛⴰ ⴰⵔⴻⴱⴱⵉ ⴰⴷ ⵛⴻⴽ ⵢⴰⵔⴻⴷⴷⴻⴵ ⵉ ⵍⴻⴱⴷⴰ,

ⵏⴻⵜⵜⴰ ⴰⴷ ⵛⴻⴽ ⵉⵟⵟⴻⴼ,

ⴰⴷ ⵛⴻⴽ ⵉⴽⴽⴻⵙ ⵣⵉ ⵜⵣⴻⴷⴷⵉⵖⵜ.

ⵏⴻⵜⵜⴰ ⴰⴷ ⵛⴻⴽ ⵉⵇⵍⴻⵄ ⵣⴻⴳ ⵉⵥⴻⵡⵔⴰⵏ ⵏⵏⴻⵛ

ⵣⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ. ⵙⵉⵍⴰⵀ.

8 ⵉⵎⵙⴻⴳⴳⴰⴷⴻⵏ ⴰⴷ ⵜ ⵥⴰⵔⴻⵏ ⴰⴷ ⴳⴳⵯⴻⴷⴻⵏ.

ⴰⴷ ⵅⴰⵙ ⴹⴻⵃⵛⴻⵏ, ⴰⴷ ⵉⵏⵉⵏ:

9 “ⵅⵣⴰⵔ ⴰⵔⵢⴰⵣ ⵉⵊⴻⵀⴷⴻⵏ

ⵡⴻⵏⵏⵉ ⵓⵎⵉ ⵡⴰⵔ ⵉⴳⴳⵉ ⴰⵔⴻⴱⴱⵉ ⵊⵊⴻⵀⴷ ⵏⵏⴻⵙ,

ⵎⴰⵛⴰ ⵜⵓⵖⴰ ⵉⵜⵜⵛⴻⵍ

ⵅ ⵡⴰⴳⵍⴰ ⵏⵏⴻⵙ ⴰⵎⴻⵇⵇⵔⴰⵏ.

ⵜⵓⵖⴰ ⵉⴷⵡⴻⵍ ⵉⵊⵀⴻⴷ

ⵙ ⵟⵟⴱⵉⵄⴻⵜ ⵏⵏⴻⵙ ⵉⵖⴻⵛⵛⴻⵏ.”

10 ⵏⴻⵛⵛ ⴰⴷ ⵉⵍⵉⵖ

ⴰⵎ ⵢⵉⵛⵜ ⵏ ⵜⵣⵉⵜⵓⵏⵜ ⵜⴰⵣⴻⵢⵣⴰⵡⵜ

ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ.

ⵉ ⵍⴻⴱⴷⴰ ⵇⴰⵄ ⵉ ⵖⴰ ⵜⵜⵉⵇⵇⴻⵖ

ⴷⵉ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⴰⵔⴻⴱⴱⵉ.

11 ⵏⴻⵛⵛ ⴰⴷ ⵛⴻⴽ ⵇⴰⴷⵉⵖ ⵉ ⵍⴻⴱⴷⴰ ⵇⴰⵄ,

ⵎⴰⵖⴰⵔ ⵛⴻⴽ ⵜⴻⴳⴳⵉⴷ ⵜ.

ⴰⴷ ⵙⵙⵉⵜⵉⵎⴻⵖ ⴷⴻⴳ ⵢⵉⵙⴻⵎ ⵏⵏⴻⵛ,

ⵎⴰⵖⴰⵔ ⵏⴻⵜⵜⴰ ⴷ ⴰⵚⴻⴱⵃⴰⵏ

ⵉ ⵉⵎⵜⵉⵇⵇⴰⵏ ⵏⵏⴻⵛ.