45
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ‘ⵜⵍⵉⵍⵍⵉⵛⵉⵏ’. ⵣⴻⴳ ⴰⵢⵜ ⵏ ⵇⵓⵔⴰⵃ. ⴰⵅⴻⵎⵎⵉ. ⵉⵣⵍⵉ ⵏ ⵜⴰⵢⵔⵉ.  
 
2 ⵣⴻⴳ ⵡⵓⵍ ⵉⵏⵓ ⵉⴷⴷⵓⵇⵇⴻⵣ-ⴷⴷ
ⵉⵊⵊ ⵏ ⵡⴰⵡⴰⵍ ⴷ ⴰⵚⴻⴱⵃⴰⵏ,
ⵇⵇⴰⵔⴻⵖ ⵉ ⵓⵊⴻⴵⵉⴷ ⵎⵉⵏ ⵙⵙⵡⴻⵊⴷⴻⵖ,
ⵉⵍⴻⵙ ⵉⵏⵓ ⴷ ⵍⴻⵇⵍⴻⵎ ⵏ ⵉⵊⵊ ⵏ ⵓⵎⴰⵔⵉⵔ ⵉⵎⴻⵃⴹⴻⵏ.   
3 “ⵛⴻⴽ ⵜⴻⵛⵏⵉⴷ ⵅ ⵎⴰⵔⵔⴰ ⵜⴰⵔⵡⴰ ⵏ ⴱⵏⴰⴷⴻⵎ,
ⵍⵅⴰⴹⴰⵔ ⵉⵜⵜⵡⴰⵣⴻⴵⴻⵄ ⵅ ⵉⵢⴻⵏⵛⵉⵛⴻⵏ ⵏⵏⴻⵛ,
ⵅ ⵓⵢⴰ ⵉⴱⴰⵔⴻⴽ ⵉ ⵛⴻⴽ ⴰⵔⴻⴱⴱⵉ ⵉ ⵍⴻⴱⴷⴰ.
 
4 ⴱⵢⴻⵙ ⵙⵙⵉⴼ ⵅ ⵜⵎⴻⵙⵙⴰⴹⵜ ⵏⵏⴻⵛ,
ⴱⵓ-ⵜⴻⵖⵔⵓⴹⵜ,
ⵜⵉⵙⵙⵉⵇⵜ ⵏⵏⴻⵛ ⴷ ⵍⵄⴻⵣⵣ ⵏⵏⴻⵛ.
5 ⵡⴰⵀ, ⵍⵄⴻⵣⵣ ⵏⵏⴻⵛ! ⵉⵍⵉ ⵜⴼⴻⵍⵃⴻⴷ,
ⵏⴷⴻⵀ ⴷⵉ ⵟⵟⵡⴻⵄ ⵏ ⵜⵉⴷⴻⵜⵜ,
ⴹⵉⴷⴷ ⵉ ⵍⴻⵃⵚⴰⵔⴻⵜ ⵏ ⵜⵙⴻⴳⴷⴰ.
ⴰⴼⵓⵙ ⵏⵏⴻⵛ ⴰⴼⵓⵙⵉ ⴰⴷ ⵛⴻⴽ ⵉⵙⵙⴻⵍⵎⴻⴷ
ⵜⵉⵎⴻⵙⵍⴰⵢⵉⵏ ⵙⵙⴰⴳⴳⵯⴰⴷⴻⵏⵜ.
6 ⴼⵍⵉⵜⵛⴰⵜ ⵏⵏⴻⵛ ⵇⴻⴹⵄⴻⵏⵜ,
- ⵡⴰⵀ, ⵍⴻⴳⵏⵓⵙ ⴰⴷ ⵡⴹⴰⵏ ⵙⴰⴷⵓ ⵓⴼⵓⵙ ⵏⵏⴻⵛ -
ⵛⵓⵇⴻⵏⵜ ⵓⵍ ⵏ ⵍⵄⴻⴷⵢⴰⵏ ⵏ ⵓⵊⴻⴵⵉⴷ.
 
7 ⵍⴽⵓⵔⵙⵉ ⵏⵏⴻⵛ ⵉⴳⴻⵍⵍⴷⴻⵏ, ⴰⵔⴻⴱⴱⵉ,
ⴰⵇⴰ-ⵜ ⵉ ⵍⴻⴱⴷⴰ ⵇⴰⵄ.
ⴰⵣⴻⴵⴰⴹ ⵏ ⵜⴳⴻⵍⴷⵉⵜ ⵏⵏⴻⵛ
ⴷ ⵉⵊⵊ ⵏ ⵓⵣⴻⴵⴰⴹ ⵏ ⵜⵙⴻⴳⴷⴰ.   
8 ⵛⴻⴽ ⵜᵉⵜⵜⴻⵅⵙⴻⴷ ⵜⴰⵙⴻⴳⴷⴰ ⵓ ⵜⵛⴰⵔⵔⵀⴻⴷ ⵍⵖⴰⵔ.
ⵅ ⵓⵢⴰ ⵉ ⵛⴻⴽ ⵉⴷⵀⴻⵏ, ⴰⵔⴻⴱⴱⵉ, ⴰⵔⴻⴱⴱⵉ ⵏⵏⴻⵛ
ⵙ ⵣⵣⴻⵛⵜ ⵏ ⵍⴻⴼⵔⴰⵃⴻⵜ
ⵜⵉⵡⴰ ⵉ ⵉⵄⵛⵉⵔⴻⵏ ⵏⵏⴻⵛ.   
 
9 ⵎⴰⵔⵔⴰ ⵍⴻⵄⴱⴰⵢⴰⵜ ⵏⵏⴻⵛ
ⴰⵎ ⵎⵉⵔⵔⵓ ⴷ ⵡⴻⵛⴼⵉⵍ ⴷ ⵍⵇⴰⵔⴼⴰ,
ⵣⵉ ⵍⴻⵇⵚⵓⵔ ⵏ ⵍⵄⴰⵊ ⵙⵙⴼⴰⵔⵔⴰⵃⴻⵏ ⵛⴻⴽ
ⵙ ⵓⵣⴻⵏⵣⵓⵏ ⵅ ⵉⴼⵉⵍⴰⵏ ⵏ ⵍⴳⴰⵎⴱⵔⵉ,   
10 ⵢⴻⵙⵙⵉⵙ ⵏ ⵓⵊⴻⴵⵉⴷ ⴰⵇⴰ-ⵜⴻⵏⵜ
ⵊⴰⵔ ⵜⵉⵏⴻⵡⵊⵉⵡⵉⵏ ⵏⵏⴻⵛ ⵉⵡⴻⵇⵇⴰⵔⴻⵏ,
ⵜⴰⵙⵍⵉⵜ ⵏ ⵓⵊⴻⴵⵉⴷ ⵜⴱⴻⴷⴷ ⴰⵛ ⵅ ⵓⴼⵓⵙⵉ,
ⵡⴻⵔⵔⵓⴹ ⵣⴻⴳ ⵡⵓⵔⴻⵖ ⵉⵖⵍⴰⵏ ⵇⴰⵄ ⵣⵉ ⵓⴼⵉⵔ.
 
11 ⵙⴻⵍ, ⵢⴻⴵⵉ, ⵅⵣⴰⵔ, ⴻⵡⵛ ⴰⵎⴻⵣⵣⵓⵖ ⵏⵏⴻⵎ!
ⵜⵜⵓ ⵍⴳⴻⵏⵙ ⵏⵏⴻⵎ ⴷ ⵜⴰⴷⴷⴰⵔⵜ ⵏ ⴱⴰⴱⴰⵎ!
12 ⵅⴻⵏⵏⵉ ⴰⵊⴻⴵⵉⴷ ⴰⴷ ⵉⵎⵎⴻⵥⵔⵉ ⴷⴻⴳ ⵡⴰⵥⵔⵉ ⵏⵏⴻⵎ,
ⵎⴰⵖⴰⵔ ⵏⴻⵜⵜⴰ ⴷ ⵙⵉⴷⵉ ⵏⵏⴻⵎ!
ⴱⴻⵏⴷⴻⵇ ⵣⵣⴰⵜⴻⵙ!
13 ⵢⴻⴵⵉⵙ ⵏ ⵚⵓⵔ ⵙ ⵉⵛⵜ ⵏ ⵜⴰⵔⵣⴻⴼⵜ,
ⵡⴰⵀ, ⴰⵢⵜ ⵏ ⴱⵓ-ⵡⴰⴳⵍⴰ ⵏ ⵉⵊⵊ ⵏ ⵍⴳⴻⵏⵙ
ⴰⴷ ⴰⵔⵣⵓⵏ ⴰⴷ ⵅⴰⵎ ⴰⵔⴹⴰⵏ.   
 
14 ⵢⴻⴵⵉⵙ ⵏ ⵓⵊⴻⴵⵉⴷ
ⴰⵇⴰ-ⵜⵜ ⴷ ⴰⵄⵓⴵⵉ ⵎⴰⵔⵔⴰ ⴷⴰⵅⴻⵍ,
ⴰⵔⵔⵓⴹ ⵏⵏⴻⵙ ⴷ ⵉⵊⵊ ⵏ ⵓⵎⵓⴷⵉ
ⵣⴻⴳ ⵓⴼⵉⵍⵓ ⵏ ⵡⵓⵔⴻⵖ.
15 ⴰⴷ ⵜᵉⵜⵜⵡⴰⵏⴷⴻⵀ ⵖⴰⵔ ⵓⵊⴻⴵⵉⴷ
ⴷⴻⴳ ⵡⴰⵔⵔⵓⴹ ⵙ ⵜⵉⵏⵜⴰⵜ ⵉⴼⴰⵔⵣⴻⵏ.
ⵜⵉⵄⵣⴰⵔⵉⵢⵢⵉⵏ ⵜⵉⵏⵏⵉ ⵜⵜ ⵉⴹⴻⴼⴼⴰⵔⴰⵏ,
ⴰⵇⴰ ⴰⵜⴻⵏⵜ ⴷ ⵜⵉⵎⴻⴷⴷⵓⴽⴽⴰⵍ ⵏⵏⴻⵙ
ⵏⵏⵉ ⴷⴷ ⵖⴰⵔⴻⴽ ⵜⵜⵡⴰⵡⵢⴻⵏⵜ.
16 ⴰⵇⴰ ⵜⵜⵡⴰⵡⵢⴻⵏⵜ ⵙ ⵍⴻⴼⵔⴰⵃⴻⵜ ⴷ ⵡⴰⵔⵛⴻⵇ,
ⴰⵎⵎⵓ ⵉ ⵖⴰ ⴰⴷⴼⴻⵏⵜ
ⵖⴰⵔ ⵍⴻⵇⵚⴰⵔ ⵏ ⵓⵊⴻⴵⵉⴷ.
 
17 ⵜⴰⵔⵡⴰ ⵏⵏⴻⵛ ⴰⴷ ⵉⵍⵉⵏ
ⴷⴻⴳ ⵡⴻⵎⵛⴰⵏ ⵏ ⵍⴻⵊⴷⵓⴷ ⵏⵏⴻⵛ,
ⵛⴻⴽ ⴰⴷ ⵜⴻⵏ ⵜⴻⴳⴳⴻⴷ ⴷ ⵍⵃⵓⴽⴽⴰⵎ
ⴷⵉ ⵎⴰⵔⵔⴰ ⵜⴰⵎⵎⵓⵔⵜ.
18 ⵏⴻⵛⵛ ⴰⴷ ⵉⴷⴰⵔⴻⵖ ⵉⵙⴻⵎ ⵏⵏⴻⵛ
ⴷⵉ ⴽⵓⵍ ⵊⵊⵉⵍ ⴷ ⴽⵓⵍ ⵊⵊⵉⵍ ⴰⵡⴰⵔⵏⵉ ⴰⵙ.
ⵅ ⵓⵢⴰ, ⴰⴷ ⵛⴻⴽ ⵇⴰⴷⴰⵏ
ⵎⴰⵔⵔⴰ ⵍⴻⴳⵏⵓⵙ ⵉ ⵍⴻⴱⴷⴰ ⵇⴰⵄ.”