37
1 ⵏ ⴷⴰⵡⵓⴷ. ⴰⵍⵉⴼ. ⵡⴰⵔ ⵜᵉⵜⵜⵡⴰⵔⴻⵇⵇ ⵜⴻⴼⵇⴻⵃⵜ ⵏⵏⴻⵛ
ⵅ ⵉⵄⴻⴼⴼⴰⵏⴻⵏ,
ⵡⴰⵔ ⵜⵜⴰⵙⴻⵎ ⵅ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ. ■
2 ⵎⴰⵖⴰⵔ ⴰⴷ ⵡⴹⴰⵏ ⴷⴻⵖⵢⴰ ⴰⵎ ⴰⵔⴱⵉⵄ,
ⴰⵎ ⴰⵔⴱⵉⵄ ⴰⵣⵉⵣⴰ ⴰⴷ ⵙⵍⴰⵡⴻⵏ.
3 ⴱⵉⵜ. ⵜⵜⵛⴻⵍ ⵅ ⵙⵉⴷⵉ ⵓ ⴻⴳⴳ ⵍⵅⴰⵔ,
ⵣⴷⴻⵖ ⴷⵉ ⵜⴻⵎⵎⵓⵔⵜ ⵓ ⵉⵍⵉ ⴷ ⴰⵎⵜⵉⵇⵇⵉ.
4 ⴰⵔⵔ ⵎⴻⵥⵔⵉ ⴷⵉ ⵙⵉⴷⵉ,
ⵓ ⵏⴻⵜⵜⴰ ⴰⴷ ⵛⴻⴽ ⵉⵡⵛ
ⵎⵉⵏ ⴷⵉ ⵉⵜⵜⵎⴻⵥⵔⵉ ⵡⵓⵍ ⵏⵏⴻⵛ.
5 ⴳⵉⵎⴻⵍ. ⴰⵔⵔ ⵜⵉⵛⵍⵉ ⵏⵏⴻⵛ ⵖⴰⵔ ⵙⵉⴷⵉ,
ⵜⵜⵛⴰⵍ ⵅⴰⵙ ⵓ ⵏⴻⵜⵜⴰ ⴰⴷ ⵜⵜ ⵉⴳⴳ. ■
6 ⵏⴻⵜⵜⴰ ⴰⴷ ⵉⵙⵙⴻⴹⵀⴰⵔ ⵜⴰⵙⴻⴳⴷⴰ ⵏⵏⴻⵛ
ⴰⵎ ⵜⴼⴰⵡⵜ,
ⵍⵃⴻⵇⵇ ⵏⵏⴻⵛ ⴰⵎ ⵢⵉⵛⴻⵄⵛⵉⵄⴻⵏ ⵏ ⵜⴼⵓⵛⵜ
ⴷⵉ ⵟⵟⵃⴰ ⵏ ⵓⵣⵉⵍ.
7 ⴷⴰⵍⵉⵜ. ⵙⵓⵙⴻⵎ ⵣⵣⴰⵜ ⵉ ⵙⵉⴷⵉ ⵓ ⵔⴰⵊⴰ ⵜ.
ⵡⴰⵔ ⵜⵜⴻⵊⵊⵉ ⵜⴰⴼⵇⴻⵃⵜ ⵏⵏⴻⵛ ⴰⴷ ⵜⴰⵙⴻⵎ
ⵅ ⵡⴻⵏⵏⵉ ⵉⴼⴻⵍⵀⴻⵏ ⴷⴻⴳ ⵡⴻⴱⵔⵉⴷ ⵏⵏⴻⵙ,
ⵅ ⵡⴻⵔⵢⴰⵣ ⵏⵏⵉ ⵉⵜⵜⴻⴳⴳⴻⵏ ⵜⴰⵃⵔⴰⵢⵎⴻⵛⵜ.
8 ⵀⵉ. ⴻⵊⵊ ⴰⵖⴹⴰⴱ ⵏⵏⴻⵛ ⴰⴷ ⵢⴰⵔⵙⴰ
ⵓ ⴻⵊⵊ ⴰⵙⵄⴰⵔ ⵏⵏⴻⵛ ⴰⴷ ⵉⵔⴰⵃ.
ⵡⴰⵔ ⵜⵜⴻⵊⵊⵉ ⵜⴰⴼⵇⴻⵃⵜ ⵏⵏⴻⵛ
ⴰⴷ ⵜᵉⵜⵜⵡⴰⵙⵙⴰⵔⴻⵖ.
ⵎⴰⵏ ⴰⵢⴰ ⴰⴷ ⵢⴰⵡⵉ ⵎⵖⵉⵔ ⵜⵓⵄⴻⴼⴼⵏⴰ ⵡⴰⵀⴰ.
9 ⵎⴰⵖⴰⵔ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵜⴻⵃⵃⴰⵏ,
ⵎⴰⵛⴰ ⵉⵏⵏⵉ ⵉⵙⵙⵉⵜⵉⵎⴻⵏ ⵅ ⵙⵉⴷⵉ
ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ.
10 ⵡⴰⵡ. ⵎⵖⵉⵔ ⵛⵡⴰⵢⵜ ⵡⴰⵀⴰ
ⵓⵛⴰ ⴰⵄⴻⴼⴼⴰⵏ ⵡⴰⵔ ⵉⵜⵜⵖⵉⵎⵉ ⵄⴰⴷ.
ⴰⴷ ⵜⵃⴻⴽⴽⴰⵔⴻⴷ ⵎⵍⵉⵃ ⵡⴻⵎⵛⴰⵏ ⵏⵏⴻⵙ,
ⵎⴰⵛⴰ ⵡⴰⵔ ⴷⵉⵏ ⵉⵜⵜⵉⵍⵉ ⵄⴰⴷ.
11 ⵉⵎⵀⵉⵏⴻⵏ ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ,
ⴰⴷ ⴰⵔⵔⴻⵏ ⵎⴻⵥⵔⵉ ⴷⵉ ⵍⴻⵀⵏⴰ ⴰⵎⴻⵇⵇⵔⴰⵏ. ■
12 ⵣⴰⵢⵉⵏ. ⴰⵄⴻⴼⴼⴰⵏ ⵉⵜⵜⵅⴰⵔⵔⴻⵚ
ⴷⵉ ⵜⵎⴻⵄⵎⴰⵍⵜ ⵜⵉⵃⵔⴰⵢⵎⵉⵢⵢⵉⵏ ⴹⵉⴷⴷ ⵉ ⵓⵎⵙⴻⴳⴳⴻⴷ,
ⵉⵜⵜⵖⴻⵣⵣⴰ ⵅⴰⵙ ⵜⵉⵖⵎⴰⵙ.
13 ⵙⵉⴷⵉ ⵉⵏⵓ ⵉⴹⴻⵃⵃⴻⵛ ⵅⴰⵙ,
ⵎⴰⵖⴰⵔ ⵉⵜⵜⵡⴰⵍⴰ ⴰⵇⴰ ⴰⵙⵙ ⵏⵏⴻⵙ
ⴰⴷ ⴷⴷ-ⵢⴰⵙ.
14 ⵅⵉⵜ. ⵉⵄⴻⴼⴼⴰⵏⴻⵏ ⵊⴻⴱⴷⴻⵏ-ⴷⴷ ⵙⵙⵉⴼ
ⵓ ⵎⴻⵃⴹⴻⵏ ⵍⵇⴻⵡⵙ,
ⵃⵉⵎⴰ ⴰⴷ ⵖⴻⴹⵍⴻⵏ ⵍⵎⴻⵙⴽⵉⵏ ⴷ ⵓⵎⴻⵣⵍⵓⴹ,
ⵃⵉⵎⴰ ⴰⴷ ⵖⴰⵔⵚⴻⵏ ⵉ ⵢⵉⵏⵏⵉ ⵉⴳⴳⵓⵔⴻⵏ
ⴷⴻⴳ ⵡⴻⴱⵔⵉⴷ ⵏⵙⴻⵏ ⵏⵉⵛⴰⵏ.
15 ⵙⵙⵉⴼ ⵏⵙⴻⵏ ⴰⴷ ⵜⴻⵏ ⵉⵍⵇⴻⴼ ⴷⴻⴳ ⵡⵓⵍ ⵏⵙⴻⵏ,
ⵍⴻⵇⵡⴰⵙ ⵏⵙⴻⵏ ⴰⴷ ⵜⵜⵡⴰⵔⵥⴻⵏ.
16 ⵜⵉⵜ. ⴷⵔⵓⵙ ⵉ ⵖⴰⵔⴻⵙ ⵖⴰⵔ ⵓⵎⵙⴻⴳⴳⴻⴷ,
ⵃⵙⴻⵏ ⵣⴻⴳ ⵓⴼⴻⵢⵢⴻⴹ ⵏ ⵡⴰⵟⵟⴰⵙ ⵏ ⵉⵄⴻⴼⴼⴰⵏⴻⵏ.
17 ⵎⴰⵖⴰⵍ ⵉⵖⴰⴵⴻⵏ ⵏ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵔⵥⴻⵏ,
ⵎⴰⵛⴰ ⵙⵉⴷⵉ ⴰⴷ ⵉⵙⴻⵏⵏⴻⴷ ⵉⵎⵙⴻⴳⴳⴰⴷⴻⵏ.
18 ⵢⵓⴷ. ⵙⵉⴷⵉ ⵉⵙⵙⴻⵏ ⵓⵙⵙⴰⵏ
ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ,
ⵜⴰⵙⵖⴰⵔⵜ ⵏⵙⴻⵏ ⴰⴷ ⵜⴻⵇⵇⵉⵎ ⵉ ⵍⴻⴱⴷⴰ.
19 ⵡⴰⵔ ⵜⵜⵡⴰⵇⴻⵎⵎⵉⵃⴻⵏ ⴷⵉ ⵍⵡⴻⵇⵜ ⵜⴰⵄⴻⴼⴼⴰⵏⵜ,
ⴷⴻⴳ ⵡⵓⵙⵙⴰⵏ ⵏ ⵍⴰⵥ ⴰⴷ ⵜⵜⵡⴰⵙⵙⵊⵉⵡⵏⴻⵏ.
20 ⴽⴰⴼ. ⵎⴰⵖⴰⵔ ⵉⵄⴻⴼⴼⴰⵏⴻⵏ ⴰⴷ ⴼⵏⴰⵏ,
ⵍⵄⴻⴷⵢⴰⵏ ⵏ ⵙⵉⴷⵉ ⴰⴷ ⵡⴻⴷⴷⴰⵔⴻⵏ,
ⴰⴷ ⵜⵜⵡⴰⵇⴹⴰⵏ ⴰⵎ ⵡⴻⵏⵏⵉ ⵉⴵⴰⵏ ⵉⵖⵍⴰⵏ ⵇⴰⵄ
ⵣⴻⴳ ⵉⵣⵎⴰⵔⴻⵏ ⵉⵇⴻⴱⴱⵓⵣⴻⵏ,
ⴰⴷ ⴹⵡⴻⵏ ⴷⵉ ⵜⴰⵢⵢⵓⵜ.
21 ⵍⴰⵎⵉⴷ. ⴰⵄⴻⴼⴼⴰⵏ ⵢⴰⵔⴻⵟⵟⴻⵍ,
ⵡⴰⵔ ⵉⵜⵜⴰⵔⵔⵉ ⴰⵎⴰⵔⵡⴰⵙ,
ⵎⴰⵛⴰ ⴰⵎⵙⴻⴳⴳⴻⴷ ⵉⵜⵜⵃⵉⵏⵏ, ⵉⵜⵜⵉⵛ.
22 ⵎⴰⵖⴰⵔ ⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⴱⴰⵔⴽⴻⵏ
ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ,
ⵎⴰⵛⴰ ⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⵏⴻⵄⵍⴻⵏ,
ⴰⴷ ⵜⵜⵡⴰⵜⴻⵃⵃⴰⵏ.
23 ⵎⵉⵎ. ⵉⵚⵓⵔⴰⴼ ⵏ ⵡⴻⵔⵢⴰⵣ ⵉⵊⴻⵀⴷⴻⵏ
ⵜⵜⵡⴰⵙⵙⵎⴻⵜⵜⵏⴻⵏ ⵣⵉ ⵙⵉⴷⵉ,
ⵏⴻⵜⵜⴰ ⵢⴰⵔⴻⵟⵟⴰ ⵅ ⵡⴻⴱⵔⵉⴷ ⵏⵏⴻⵙ.
24 ⵎⴰⵍⴰ ⵉⵡⴹⴰ, ⵡⴰⵔ ⵉⵜⵜⵎⴻⵏⴹⴰⵔ,
ⵎⴰⵖⴰⵔ ⵙⵉⴷⵉ ⵉⵡⵛⴰ ⴰⵙ ⴰⴼⵓⵙ ⵏⵏⴻⵙ.
25 ⵏⵓⵏ. ⵏⴻⵛⵛ ⵜⵓⵖⴰ ⴰⵢⵉ ⴷ ⴰⵎⴻⵥⵢⴰⵏ, ⵍⴻⵅⵅⵓ ⵡⵙⴰⵔⴻⵖ,
ⵎⴰⵛⴰ ⵄⴻⵎⵎⴰⵔⵚ ⵡⴰⵔ ⵥⵔⵉⵖ
ⴰⵎⵙⴻⴳⴳⴻⴷ ⵉⵜⵜⵡⴰⵊⵊ,
ⵏⵉⵖ ⵜⴰⵔⵡⴰ ⵏⵏⴻⵙ ⴰⵔⴻⵣⵣⵓⵏ ⵅ ⵡⴻⵖⵔⵓⵎ.
26 ⴰⵙⵙ ⵉⴽⵎⴻⵍ ⵉⵜⵜⵃⵉⵏⵏⴰ
ⵓ ⵢⴰⵍⴻⵟⵟⴻⵍ ⵉ ⵉⵎⴻⵣⵍⴰⴹ,
ⵣⵣⴰⵔⵉⵄⴻⵜ ⵏⵏⴻⵙ ⴰⴷ ⵜⵉⵍⵉ ⵉ ⵍⴱⴰⵔⴰⴽⴰ.
27 ⵙⴰⵎⵉⵅ. ⵃⴻⵢⵢⴻⴷ ⵅ ⵍⵖⴰⵔ ⵓ ⴻⴳⴳ ⵍⵅⴰⵔ,
ⵅⴻⵏⵏⵉ ⴰⴷ ⵖⴰⵔⴻⴽ ⵜⵉⵍⵉ ⵜⵣⴻⴷⴷⵉⵖⵜ ⵉ ⵍⴻⴱⴷⴰ ⵇⴰⵄ.
28 ⵎⴰⵖⴰⵔ ⵙⵉⴷⵉ ⵉⵜⵜⴻⵅⵙ ⵍⵃⴻⵇⵇ,
ⵡⴰⵔ ⵉⵙⴻⵎⵎⴻⵃ ⴷⴻⴳ ⵉⵎⵜⵉⵇⵇⴰⵏ ⵏⵏⴻⵙ.
ⵄⴰⵢⵉⵏ. ⴰⴷ ⵜⵜⵡⴰⵃⴹⴰⵏ ⵉ ⵍⴻⴱⴷⴰ ⵇⴰⵄ,
ⵎⴰⵛⴰ ⵣⵣⴰⵔⵉⵄⴻⵜ ⵏ ⵉⵄⴻⴼⴼⴰⵏⴻⵏ ⴰⴷ ⵜᵉⵜⵜⵡⴰⵜⴻⵃⵃⴰ.
29 ⵉⵎⵙⴻⴳⴳⴰⴷⴻⵏ ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ,
ⴰⴷ ⴷⴰⵢⴻⵙ ⵣⴻⴷⵖⴻⵏ ⵉ ⵍⴻⴱⴷⴰ.
30 ⴱⵉ. ⴰⵇⴻⵎⵎⵓⵎ ⵏ ⵓⵎⵙⴻⴳⴳⴻⴷ
ⵉⵜⵜⴱⴰⵔⵔⴻⵃ ⵙ ⵜⵉⵖⵉⵜ,
ⵉⵍⴻⵙ ⵏⵏⴻⵙ ⵉⵙⵙⴰⵡⴰⵍ ⵙ ⵍⵃⴻⵇⵇ.
31 ⵛⵛⴰⵔⵉⵄⴰ ⵏ ⴰⵔⴻⴱⴱⵉ ⵏⵏⴻⵙ ⴷⴻⴳ ⵡⵓⵍ ⵏⵏⴻⵙ,
ⵉⵚⵓⵔⴰⴼ ⵏⵏⴻⵙ ⵡⴰⵔ ⵜⵜⴻⴼⵔⵉⵖⴻⵏ. ■
32 ⵜⵙⴰⴷⵉ. ⴰⵄⴻⴼⴼⴰⵏ ⵉⵍⴻⴱⴱⴻⵜ ⵉ ⵓⵎⵙⴻⴳⴳⴻⴷ,
ⵢⴰⵔⴻⵣⵣⵓ ⴰⴷ ⵜ ⵉⵏⴻⵖ,
33 ⵎⴰⵛⴰ ⵙⵉⴷⵉ ⵡⴰⵔ ⵣⵣⴰⵢⴻⵙ ⵢⴰⵔⴻⵅⵅⵓ
ⴰⴼⵓⵙ ⵏⵏⴻⵙ,
ⵡⴰⵔ ⵅⴰⵙ ⵉⵃⴽⴻⵎ ⵅⵎⵉ ⵜ ⵖⴰ ⵉⵃⴰⴽⴻⵎ.
34 ⵇⵓⴼ. ⵙⵉⵜⵉⵎ ⵅ ⵙⵉⴷⵉ
ⵓ ⵟⵟⴻⴼ ⴷⴻⴳ ⵡⴻⴱⵔⵉⴷ ⵏⵏⴻⵙ.
ⵏⴻⵜⵜⴰ ⴰⴷ ⵛⴻⴽ ⵉⵙⵙⴳⴻⵄⵄⴻⴷ
ⵃⵉⵎⴰ ⴰⴷ ⵜⵡⴰⵔⵜⴻⴷ ⵜⴰⵎⵎⵓⵔⵜ.
ⴰⴷ ⵜⵥⴰⵔⴻⴷ ⴰⵇⴰ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵜⴻⵃⵃⴰⵏ.
35 ⵔⵉⵅ. ⵏⴻⵛⵛ ⵥⵔⵉⵖ ⵉⵊⵊ ⵏ ⵓⵄⴻⴼⴼⴰⵏ
ⴷ ⴱⵓ-ⵍⴻⵅⵛⵓⵏⴻⵜ,
ⵉⵎⴻⵇⵇⴰⵔ ⴰⵎ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ ⵜⴰⵣⵉⵣⴰⵡⵜ. □
36 ⴰⵇⴰ ⵉⵄⴷⵓ, ⵓⵛⴰ ⵅⵣⴰⵔ, ⵡⴰⵔ ⵜ ⵜⵓⵖⵉ ⵛⴰ ⵄⴰⴷ ⴷⵉⵏ.
ⴰⵔⵣⵓⵖ ⵅⴰⵙ, ⵎⴰⵛⴰ ⵉⴷⵡⴻⵍ ⵡⴰⵔ ⵉⴵⵉ ⵄⴰⴷ.
37 ⵛⵉⵏ. ⵃⴹⴰ ⵅ ⵡⴻⵏⵏⵉ ⵉⴵⴰⵏ ⵉⴽⵎⴻⵍ
ⵓ ⵅⴻⵣⵣⴰⵔ ⵖⴰⵔ ⵡⴻⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ,
ⵎⴰⵖⴰⵔ ⴰⵏⴻⴳⴳⴰⵔ ⵏ ⵡⴻⵔⵢⴰⵣ ⵏⵏⵉ
ⴰⴷ ⵢⵉⵍⵉ ⴷ ⵍⴻⵀⵏⴰ.
38 ⵉⵏⵏⵉ ⵉⵜⵜⵄⴻⴷⴷⴰⵏ ⴰⴷ ⵜⵜⵡⴰⵔⴻⴷⴷⴵⴻⵏ ⵊⵎⵉⵄ,
ⵎⵉⵏ ⵉⵇⵇⵉⵎⴻⵏ ⵏ ⵉⵄⴻⴼⴼⴰⵏⴻⵏ
ⴰⴷ ⵉⵜⵜⵡⴰⵜⴻⵃⵃⴰ.
39 ⵜⴰⴼ. ⴰⵙⴻⵏⵊⴻⵎ ⵏ ⵉⵎⵙⴻⴳⴳⴰⴷⴻⵏ
ⴰⴷ ⴷⴷ-ⵢⴰⵙ ⵣⵉ ⵙⵉⴷⵉ,
ⴰⵇⴰ ⵏⴻⵜⵜⴰ ⴷ ⴰⵔⴻⵡⵍⴰ ⵏⵙⴻⵏ
ⴷⵉ ⵍⵡⴻⵇⵜ ⵏ ⵍⴻⵃⵚⴰⵔⴻⵜ.
40 ⵙⵉⴷⵉ ⴰⴷ ⴰⵙⴻⵏ ⵉⵡⵛ ⴰⴼⵓⵙ ⵓ ⴰⴷ ⵜⴻⵏ ⵉⴼⴻⴽⴽ.
ⵏⴻⵜⵜⴰ ⴰⴷ ⵜⴻⵏ ⵉⴼⴻⴽⴽ ⵣⴻⴳ ⵉⵄⴻⴼⴼⴰⵏⴻⵏ
ⵓ ⴰⴷ ⵜⴻⵏ ⵉⵙⵙⴻⵏⵊⴻⵎ,
ⵎⴰⵖⴰⵔ ⵏⵉⵜⵏⵉ ⴰⵔⴻⴽⴽⵡⴰⵍⴻⵏ ⵖⴰⵔⴻⵙ.