ⵉⵥⴻⵀⵀⵉⴷⴻⵏ 5

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⴽ-ⴷ ⵜⴻⵎⵊⴰ. ⴰⵣⴻⵀⵀⴻⴷ ⵏ ⴷⴰⵡⵓⴷ.

2 ⴰ ⵙⵉⴷⵉ, ⵙⴻⵍ ⵉ ⵎⵉⵏ ⵖⴰ ⵉⵏⵉⵖ,

ⴼⴻⵀⵎⴻⵜ ⵉ ⵓⵏⵉⵅⵙⴻⵙ ⵉⵏⵓ.

3 ⵃⴻⴽⴽⴰⵔ ⵉ ⵜⵎⵉⵊⵊⴰ ⵏ ⵜⵓⵜⵔⴰ ⵉⵏⵓ,

ⴰ ⴰⵊⴻⴵⵉⴷ ⵉⵏⵓ ⴷ ⴰⵔⴻⴱⴱⵉ ⵉⵏⵓ,

ⴰⵇⴰ ⵉ ⵛⴻⴽ ⵓⵎⵉ ⵜⵜⵥⴰⴵⵉⵖ.

4 ⵖⴰⵔ ⵜⵓⴼⴼⵓⵜ, ⴰ ⵙⵉⴷⵉ, ⵜⴻⵙⵍⵉⴷ ⵛⴻⴽ ⵉ ⵜⵎⵉⵊⵊⴰ ⵉⵏⵓ,

ⵖⴰⵔ ⵜⵓⴼⴼⵓⵜ ⵏⵏⵇⴻⵍⴱⴻⵖ-ⴷⴷ ⵖⴰⵔⴻⴽ,

ⵓⵛⴰ ⵇⵇⵉⵎⴻⵖ ⵜⵜⵔⴰⵊⵉⵖ ⵛⴻⴽ.

5 ⵛⴻⴽ ⵡⴰⵔ ⵜⴻⴵⵉⴷ ⵛⴰ ⴷ ⴰⵔⴻⴱⴱⵉ

ⵏⵏⵉ ⵉⵜⵜⴻⵅⵙⴻⵏ ⵜⵓⵄⴻⴼⴼⵏⴰ,

ⴱⵏⴰⴷⴻⵎ ⴰⵄⴻⴼⴼⴰⵏ ⵡⴰⵔ ⵖⴰⵔⴻⴽ ⵉⵜⵜⵉⴼ ⴰⵖⵉⵎⵉ.

6 ⵉⴱⵓⵃⴰⵍⵉⵢⵢⴻⵏ ⵡⴰⵔ ⵜⵜⵖⵉⵎⵉⵏ ⵜⵜⴱⴻⴷⴷⴰⵏ

ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵛ,

ⵛⴻⴽ ⵜⵛⴰⵔⵔⵀⴻⴷ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ.

7 ⴰⴷ ⵜⵀⴻⵍⵍⴽⴻⴷ ⴰⵢⵜ ⵏ ⴱⵓ-ⵉⵅⴰⵔⵔⵉⵇⴻⵏ,

ⵙⵉⴷⵉ ⵉⵜⵜⵄⵉⴼⴼⴰ ⴰⵔⵢⴰⵣ ⵏ ⵉⴷⴰⵎⵎⴻⵏ ⴷ ⵍⵖⴻⵛⵛ.

8 ⵎⴰⵛⴰ ⵙ ⵍⴻⵎⵖⴰⵔⴻⵜ ⵏ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ

ⴰⴷ ⴰⴷⴼⴻⵖ ⵖⴰⵔ ⵜⴰⴷⴷⴰⵔⵜ ⵏⵏⴻⵛ,

ⴰⴷ ⵙⴻⵊⴷⴻⵖ ⵖⴰⵔ ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ

ⵙ ⵜⵉⴳⴳⵯⵓⴷⵉ ⵣⵣⴰⵢⴻⴽ.

9 ⴰ ⵙⵉⴷⵉ, ⵙⵓⵢⵓⵔ ⴰⵢⵉ ⵅ ⵡⴻⴱⵔⵉⴷ ⵏ ⵜⵙⴻⴳⴷⴰ ⵏⵏⴻⵛ,

ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵉ ⴷ ⴰⵢⵉ ⵉⵃⴻⵚⵚⴰⵔⴻⵏ,

ⵙⴻⴳⴳⴻⵎ ⴰⴱⵔⵉⴷ ⵏⵏⴻⵛ ⵣⵣⴰⵜ ⵉ ⵡⵓⴷⴻⵎ ⵉⵏⵓ.

10 ⵎⵉⵏⵣⵉ ⴷⴻⴳ ⵓⵇⴻⵎⵎⵓⵎ ⵏⵙⴻⵏ ⵡⴰⵔ ⴷⵉⵏ ⴱⵓ ⵍⴰⵎⴰⵏ,

ⵊⵊⵓⴼ ⵏⵙⴻⵏ ⴷ ⴰⵅⴻⵢⵢⴻⴱ,

ⵜⵎⵉⵊⵊⴰ ⵏⵙⴻⵏ ⴷ ⴰⵏⴹⴻⵍ ⵢⴰⵔⴻⵣⵎⴻⵏ,

ⴰⵔⴻⴱⴱⵓⵏ ⵜⵅⴰⵏⵛⴻⵜ ⵙ ⵢⵉⵍⴻⵙ ⵏⵙⴻⵏ.   

11 ⵅⵍⴻⴼ ⵣⵣⴰⵢⵙⴻⵏ, ⴰ ⴰⵔⴻⴱⴱⵉ,

ⴻⵊⵊ ⵉ-ⵜⴻⵏ ⴰⴷ ⵡⴹⴰⵏ

ⵙ ⵍⴻⵛⵡⴰⵔ ⵏ ⵢⵉⵅⴻⴼ ⵏⵙⴻⵏ,

ⴰⵥⵥⴻⵍ ⵅⴰⵙⴻⵏ ⴷⵉ ⵙⵙⵉⴱⴱⴻⵜ

ⵏ ⵡⴰⵟⵟⴰⵙ ⵏ ⵉⵅⴻⵟⵟⴰⵏ ⵏⵙⴻⵏ,

ⵎⵉⵏⵣⵉ ⵏⵉⵜⵏⵉ ⵖⴻⵡⵡⵖⴻⵏ ⵅⴰⴽ.

12 ⵎⴰⵔⵔⴰ ⵉⵏⵏⵉ ⵖⴰⵔⴻⴽ ⵢⴰⵔⴻⴽⴽⵡⴰⵍⴻⵏ

ⴰⴷ ⴼⴰⵔⵃⴻⵏ,

ⴰⴷ ⵙⵍⵉⵡⴻⵍⵡⴻⵏ ⵉ ⵍⴻⴱⴷⴰ.

ⵛⴻⴽ ⵜⴼⴰⵔⵢⴻⴷ ⵅⴰⵙⴻⵏ!

ⴰⵇⴰ ⵉⵏⵏⵉ ⵉⵜⵜⴻⵅⵙⴻⵏ ⵉⵙⴻⵎ ⵏⵏⴻⵛ

ⴰⴷ ⵏⴻⴳⵣⴻⵏ ⵙ ⵍⴻⴼⵔⴰⵃⴻⵜ ⵉ ⵖⴰⵔⵙⴻⵏ ⴷⴰⵢⴻⴽ.

13 ⵎⵉⵏⵣⵉ ⵛⴻⴽ, ⴰ ⵙⵉⴷⵉ, ⴰⴷ ⵜⴱⴰⵔⴽⴻⴷ ⴰⵎⵙⴻⴳⴳⴰⴷ,

ⴰⴷ ⴰⵙ ⵜⵇⵓⵡⵡⴰⵔⴻⴷ ⵙ ⵓⵃⵉⵏⵏⵉ

ⴰⵎ ⵙ ⵜⵙⴻⴷⴷⴰⵔⵜ ⵏ ⵓⵙⴻⵍⵇⵉ ⵜⴰⵎⴻⵇⵇⵔⴰⵏⵜ.