ⴰⵢⵓⴱ 26

ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⴱⵉⵍⴷⴰⴷ: ⵍⴻⵎⵖⴰⵔⴻⵜ ⵏ ⴰⵔⴻⴱⴱⵉ

1 ⵅⴰⵙ ⵓⵛⴰ ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ:

2 ⵎⴰⵎⵎⴻⵛ ⵜⴻⴳⴳⵉⴷ ⵜⴻⵡⵛⵉⴷ ⴰⴼⵓⵙ

ⵉ ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⵊⵊⴻⵀⴷ,

ⵎⴰⵎⵎⴻⵛ ⵜⴱⴻⴷⴷⴻⴷ ⵖⴰⵔ ⵓⵖⵉⵍ

ⵏ ⵡⴻⵏⵏⵉ ⵡⴰⵔ ⵖⴰⵔ ⵜⴻⴵⵉ ⵜⵣⴻⵎⵎⴰⵔ!

3 ⵣⴻⵄⵎⴰ ⴰⵇⴰ ⵜⴻⵡⵛⵉⴷ ⴰⵡⴻⵚⵚⵉ ⵉⵙⴻⴱⵃⴻⵏ

ⵉ ⵡⴻⵏⵏⵉ ⵡⴰⵔ ⵖⴰⵔ ⵜⴻⴵⵉ ⵜⵉⵖⵉⵜ,

ⵎⴰⵎⵎⴻⵛ ⵉ ⵜⴻⵙⵙⴰⵔⴳⴱⴻⴷ ⴰⵟⵟⴰⵙ ⵏ ⵜⵡⴰⵍⴰⵡⵉⵏ

ⵎⵓⵎⵎⵓ ⵏ ⵜⵎⴻⵙⵍⴰⵛⵜ!

4 ⵉ ⵓⵎⵉ ⵜⵄⴰⵡⴷⴻⴷ ⵍⴻⵅⵅⵓ ⴰⵡⴰⵍⴻⵏ ⵏⵏⴻⵛ?

ⵎⴰⵏ ⵏⵏⴻⴼⵙ ⴷⴷ-ⵉⴼⴼⵖⴻⵏ ⵣⵣⴰⵢⴻⴽ?

5 ⵍⴻⵅⵢⴰⵍⴰⵜ ⵏ ⵉⵎⴻⵜⵜⴰⵏ ⴼⴻⵙⵙⵢⴻⵏ

ⵙⴰⴷⵓ ⵡⴰⵎⴰⵏ ⴷ ⵉⵎⴻⵣⴷⴰⵖ ⵏⵙⴻⵏ.

6 ⴷ ⴰⵄⴰⵔⵢⴰⵏ ⵜⴻⵣⵣⴻⵍ ⵣⵣⴰⵜⴻⵙ ⵍⴰⵅⴰⵔⵜ,

ⵡⴰⵔ ⴷⵉⵏ ⵜⴻⴵⵉ ⵜⵇⴻⴱⴱⴰⵔⵜ ⵉ ⵜⴻⵙⵔⴰⴼⵜ ⵏ ⵓⵀⴻⵍⵍⴻⴽ.   

7 ⵉⴱⴻⵣⵣⴻⵄ ⴰⵊⴻⵏⵏⴰ ⴷⵉ ⵛⵛⴰⵎⴰⵍ

ⵜⵉⵡⴰ ⵍⵅⴰⵡⵉ ⵏ ⵡⵓⴷⴻⵎ ⵏ ⵡⴰⵎⴰⵏ,

ⵢⵓⵢⴻⵍ ⵜⴰⵎⵎⵓⵔⵜ ⵖⴰⵔ ⵡⴰⵍⵓ.   

8 ⵏⴻⵜⵜⴰ ⵉⵜⵜⵛⴻⴷⴷⴰ ⴰⵎⴰⵏ ⴷⴻⴳ ⵉⵙⴻⵢⵏⵓⵜⴻⵏ ⵏⵏⴻⵙ,

ⵎⴰⵛⴰ ⵡⴰⵔ ⵉⵜⵜⴰⵔⴻⵥⵥⵉ ⴰⵙⴻⵢⵏⵓ ⵙⵡⴰⴷⴷⴰⵢ.

9 ⵉⵙⵙⴷⵓⵔⵔⵓⵢ ⵓⴷⴻⵎ ⵏ ⵍⵄⴰⵔⵛ ⵏⵏⴻⵙ,

ⵉⵜⵜⴱⴻⵣⵣⴰⵄ ⵅⴰⵙ ⴰⵙⴻⵢⵏⵓ ⵏⵏⴻⵙ.   

10 ⵢⴰⵔⵛⴻⵎ ⵜⴰⵇⵓⵔⴰⵛⵜ ⵅ ⵡⵓⴷⴻⵎ ⵏ ⵡⴰⵎⴰⵏ,

ⴰⵍ ⵜⵎⴰ ⵏ ⵜⴼⴰⵡⵜ ⴰⴽ-ⴷ ⵜⴰⴵⴻⵙⵜ.   

11 ⵉⴱⵉⵍⴰⵔⴻⵏ ⵏ ⵓⵊⴻⵏⵏⴰ ⵜⵜⴰⵔⵊⵉⵊⵉⵏ,

ⵜⵜⵏⴻⵅⵍⴰⵄⴻⵏ ⵣⴻⴳ ⵓⵡⴻⴷⴷⴻⴱ ⵏⵏⴻⵙ.

12 ⵙ ⵊⵊⴻⵀⴷ ⵏⵏⴻⵙ ⵉⵙⵙⵀⴰⵊ ⵍⴻⴱⵃⴰⵔ,

ⵙ ⵍⴻⴼⵀⴰⵎⴻⵜ ⵏⵏⴻⵙ ⵉⵍⴱⴻⵣ ⵔⴰⵀⴰⴱ.   

13 ⵙ ⴰⵔⵔⵓⵃ ⵏⵏⴻⵙ ⵉⵜⵜⵉⵙⵙⵉⵇ ⵓⵊⴻⵏⵏⴰ

ⴰⵎ ⵡⵓⴷⴻⵎ ⵏ ⵜⴻⵏⵏⵉ ⵡⴰⵔ ⵉⵜⵜⵍⴻⵃⵃⵉⴼⴻⵏ,

ⴰⴼⵓⵙ ⵏⵏⴻⵙ ⵉⵙⵙⵏⵓⵇⵇⴻⴱ

ⴰⴼⵉⵖⴰⵔ ⵉⵜⵜⴻⵃⵍⵓⴵⵓⴹⴻⵏ ⵙ ⵜⴰⵣⵍⴰ.   

14 ⵅⵣⴰⵔ, ⵎⴰⵏ ⴰⵢⴰ ⵡⴰⵀⴰ

ⵉⵅⴻⴼ ⵏ ⵉⴱⵔⵉⴷⴻⵏ ⵏⵏⴻⵙ,

ⵏⴻⵙⵍⴰ ⵎⵖⵉⵔ ⵜⴰⵃⴻⵙⵙⴻⵛⵜ

ⵏ ⵛⴰ ⵏ ⵡⴰⵡⴰⵍⴻⵏ ⵣⵣⴰⵢⴻⵙ.

ⵡⵉ ⵉⵣⴻⵎⵎⴰⵔⴻⵏ ⵅⴻⵏⵏⵉ

ⴰⴷ ⵉⵙⵙⴻⵏ ⴰⵊⵊⴰⵊ ⵏ ⵊⵊⵀⴻⴷ ⵏⵏⴻⵙ?