ⵍⵎⴻⵡⵜ ⵏ ⵛⴰⵡⵓⵍ
10
1 ⵎⵎⴻⵏⵖⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴰⴽ-ⴷ ⵉⵙⵔⴰⵉⵍ. ⵉⵔⵢⴰⵣⴻⵏ ⵏ ⵉⵙⵔⴰⵉⵍ ⴰⵔⴻⵡⵍⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⵡⴹⴰⵏ ⴷ ⵉⵎⴻⵜⵜⴰⵏ ⵅ ⵜⴻⵎⵎⵓⵔⵜ ⵏ ⵉⴷⵓⵔⴰⵔ ⵏ ⵊⵉⵍⴱⵓⵄⴰ. ■ 2 ⵉⴼⵉⵍⵉⵙⵟⵉⵏⵉⵢⵢⴻⵏ ⴹⴼⴰⵔⴻⵏ ⵛⴰⵡⵓⵍ ⴷ ⴰⵔⵔⴰⵡⴻⵏ ⵏⵏⴻⵙ ⴱⵍⴰ ⵇⴻⵟⵟⵓ. ⵉⴼⵉⵍⵉⵙⵟⵉⵏⵉⵢⵢⴻⵏ ⵏⵖⵉⵏ ⵢⵓⵏⴰⵜⴰⵏ, ⴰⴱⵉⵏⴰⴷⴰⴱ ⴷ ⵎⴰⵍⴽⵉⵛⵓⵄⴰ, ⴰⵔⵔⴰⵡⴻⵏ ⵏ ⵛⴰⵡⵓⵍ. 3 ⵜⵓⵖⴰ ⴰⵎⴻⵏⵖⵉ ⴰⴽ-ⴷ ⵛⴰⵡⵓⵍ ⵉⵡⵄⴰⵔ. ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ ⵓⴼⵉⵏ ⵜ ⵓ ⵏⴻⵜⵜⴰ ⵜⵓⵖⴰ ⵉⴳⴳⵯⴻⴷ ⴰⵟⵟⴰⵙ ⵣⴻⴳ ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ. 4 ⵉⵏⵏⴰ ⵛⴰⵡⵓⵍ ⵉ ⵓⵃⴻⵎⵎⴰⵍ ⵏ ⵍⴻⵙⵏⴰⵃ ⵏⵏⴻⵙ: “ⵙⵓⴼⴼⴻⵖ-ⴷⴷ ⵙⵙⵉⴼ ⵏⵏⴻⵛ, ⵙⵏⵓⵇⵇⴻⴱ ⴰⵢⵉ ⵣⵣⴰⵢⴻⵙ! ⵏⵉⵖ ⴰⴷ ⴷⴷ-ⴰⵙⴻⵏ ⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ, ⴰⴷ ⵣⵣⴰⵢⵉ ⵙⵜⴻⵀⵣⴰⵏ.” ⵎⴰⵛⴰ ⴰⵃⴻⵎⵎⴰⵍ ⵏⵏⴻⵙ ⵏ ⵍⴻⵙⵏⴰⵃ ⵡⴰⵔ ⵉⵅⵙ ⴰⴷ ⵜⵜ ⵉⴳⴳ, ⵎⴰⵖⴰⵔ ⵜⵓⵖⴰ ⵉⴳⴳⵯⴻⴷ ⴰⵟⵟⴰⵙ. ⵅⴻⵏⵏⵉ ⵉⴽⵙⵉ ⵛⴰⵡⵓⵍ ⵙⵙⵉⴼ ⵓⵛⴰ ⵉⵙⵙⴻⵖⴹⴻⵍ ⵉⵅⴻⴼ ⵏⵏⴻⵙ ⵅⴰⵙ. 5 ⵓⵎⵉ ⵉⵥⵔⴰ ⵓⵃⴻⵎⵎⴰⵍ ⵏ ⵍⴻⵙⵏⴰⵃ, ⴰⵇⴰ ⵛⴰⵡⵓⵍ ⵉⵎⵎⵓⵜ, ⵉⵡⴹⴰ ⵍⴰ ⴷ ⵏⴻⵜⵜⴰ ⵅ ⵙⵙⵉⴼ ⵏⵏⴻⵙ ⵓⵛⴰ ⵉⵎⵎⵓⵜ. 6 ⵉⵎⵎⵓⵜ ⵛⴰⵡⵓⵍ ⴰⴽ-ⴷ ⵜⵍⴰⵜⴰ ⵏ ⵡⴰⵔⵔⴰⵡⴻⵏ ⵏⵏⴻⵙ ⵓⵛⴰ ⴰⵎⵎⵓ ⵜⴻⵎⵎⵓⵜ ⵇⴰⵄ ⵜⴰⴷⴷⴰⵔⵜ ⵏⵏⴻⵙ. 7 ⵓⵎⵉ ⵥⵔⵉⵏ ⵎⴰⵔⵔⴰ ⵢⴻⵔⵢⴰⵣⴻⵏ ⵏ ⵉⵙⵔⴰⵉⵍ, ⵉⵏⵏⵉ ⵜⵓⵖⴰ ⴷⵉ ⵍⴻⵡⴹⴰ ⵏ ⵜⴻⵖⵣⵓⵔⵜ, ⴱⴻⵍⵍⵉ ⵉⵔⵢⴰⵣⴻⵏ ⵏ ⵉⵙⵔⴰⵉⵍ ⴰⵔⴻⵡⵍⴻⵏ ⵓ ⵛⴰⵡⵓⵍ ⴷ ⵡⴰⵔⵔⴰⵡⴻⵏ ⵏⵏⴻⵙ ⵜⵜⵡⴰⵏⵖⴻⵏ, ⵙⴻⵎⵃⴻⵏ ⵏⵉⵜⵏⵉ ⴷⵉ ⵜⵏⴻⴷⴷⴰⵎ ⵏⵙⴻⵏ ⵓⵛⴰ ⴰⵔⴻⵡⵍⴻⵏ. ⵍⴻⵅⴷⴻⵏⵏⵉ ⵓⵙⵉⵏ-ⴷⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⴷⴻⵡⵍⴻⵏ ⵣⴻⴷⴷⵖⴻⵏ ⴷⵉⵏ. 8 ⵜⵉⵡⴻⵛⵛⴰ ⵏⵏⴻⵙ ⵓⵎⵉ ⴷⴷ-ⵓⵙⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵃⵉⵎⴰ ⴰⴷ ⴽⴻⵛⵛⴹⴻⵏ ⵉⵏⵏⵉ ⵉⵜⵜⵡⴰⵏⵖⴻⵏ, ⵉⵎⵙⴰⵔ, ⴰⵇⴰ ⵓⴼⵉⵏ ⵛⴰⵡⵓⵍ ⴷ ⵡⴰⵔⵔⴰⵡⴻⵏ ⵏⵏⴻⵙ, ⵉⵏⵏⵉ ⵜⵓⵖⴰ ⵉⵡⴹⴰⵏ ⵅ ⵡⴻⴷⵔⴰⵔ ⵏ ⵊⵉⵍⴱⵓⵄⴰ. 9 ⵏⵉⵜⵏⵉ ⴽⴻⵛⵛⴹⴻⵏ ⵜ ⵓⵛⴰ ⵉⵡⵢⴻⵏ ⴰⵣⴻⴵⵉⴼ ⵏⵏⴻⵙ ⴷ ⵍⴻⵙⵏⴰⵃ ⵏⵏⴻⵙ ⵓⵛⴰ ⵙⵙⴻⴽⴽⴻⵏ ⵜⴻⵏ ⴷⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵃⵉⵎⴰ ⴰⴷ ⵙⵙⵉⵡⴹⴻⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵖⴰⵔ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ ⵏⵙⴻⵏ ⵓ ⵖⴰⵔ ⵍⴳⴻⵏⵙ. 10 ⵏⵉⵜⵏⵉ ⵙⵙⴰⵔⵙⴻⵏ ⵍⴻⵙⵏⴰⵃ ⵏ ⵛⴰⵡⵓⵍ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏⵙⴻⵏ ⵓ ⴰⵛⴻⵇⵇⵓⴼ ⵏ ⵓⵣⴻⴵⵉⴼ ⵏⵏⴻⵙ ⵙⴻⵎⵎⴰⵔⴻⵏ ⵜ ⵖⴰⵔ ⵍⵃⵉⴹ ⵏ ⴱⴰⵢⵜ-ⵛⴰⵏ.
11 ⵓⵎⵉ ⵙⵍⴰⵏ ⵎⴰⵔⵔⴰ ⵉⵎⴻⵣⴷⴰⵖ ⵏ ⵢⴰⴱⵉⵛ ⵎⵉⵏ ⴳⴳⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴰⴽ-ⴷ ⵛⴰⵡⵓⵍ, 12 ⴽⴽⴰⵔⴻⵏ ⵎⴰⵔⵔⴰ ⵉⵔⵢⴰⵣⴻⵏ ⵉⵎⴻⵃⴹⴻⵏ, ⴽⵙⵉⵏ ⵍⵅⴻⵛⴱⴻⵜ ⵏ ⵛⴰⵡⵓⵍ ⴷ ⵍⵅⴻⵛⴱⴰⵜ ⵏ ⵡⴰⵔⵔⴰⵡⴻⵏ ⵏⵏⴻⵙ ⵓⵛⴰ ⵉⵡⵢⴻⵏ ⵜⴻⵏⵜ ⵖⴰⵔ ⵢⴰⴱⵉⵛ. ⵏⵉⵜⵏⵉ ⵏⴻⴹⵍⴻⵏ ⵉⵖⵙⴰⵏ ⵏⵙⴻⵏ ⵙⴰⴷⵓ ⵉ ⵜⵛⴻⵊⵊⴰⵔⵜ ⵏ ⵢⵉⴳⴳ ⴷⵉ ⵢⴰⴱⵉⵛ ⵓⵛⴰ ⵥⵓⵎⵎⴻⵏ ⵙⴻⴱⵄⴰ ⵏ ⵡⵓⵙⵙⴰⵏ.
13 ⵛⴰⵡⵓⵍ ⵉⵎⵎⵓⵜ ⴷⵉ ⵙⵙⵉⴱⴱⴻⵜ ⵏ ⵍⴻⵖⴷⴰⵔ ⵏⵏⴻⵙ ⵉ ⵣⵉ ⵜⵓⵖⴰ ⵉⵖⴻⴷⴷⴰⵔ ⵙⵉⴷⵉ, ⴷⵉ ⵙⵙⵉⴱⴱⴻⵜ ⵏ ⵡⴰⵡⴰⵍ ⵏ ⵙⵉⴷⵉ ⵉ ⵡⴰⵔ ⴷⴰⵢⴻⵙ ⵉⵟⵟⵉⴼ ⵏⴻⵜⵜⴰ, ⵓ ⵓⵎⵉ ⵢⴰⵔⵣⵓ ⵛⵛⵡⴰⵔ ⵖⴰⵔ ⵡⴻⵏⵏⵉ ⵉⵙⵙⴰⵡⴰⵍⴻⵏ ⴰⴽ-ⴷ ⵉⵎⴻⵜⵜⴰⵏ, 14 ⵡⴰⵔ ⵉⵙⵙⴻⵇⵙⵉ ⵙⵉⴷⵉ. ⵙ ⵓⵢⴻⵏⵏⵉ ⵉⵏⵖⴰ ⵉ-ⵜ ⵙⵉⴷⵉ ⵓⵛⴰ ⵉⵙⵙⵎⵓⵟⵟⵉⵢ ⵜⴰⴳⴻⵍⴷⴰ ⵉ ⴷⴰⵡⵓⴷ, ⵎⵎⵉⵙ ⵏ ⵢⴰⵙⵙⴰ.