ⵜⴰⵇⴱⵉⵞ ⵏ ⴷⴰⵏ ⵜⴻⵟⵟⴻⴼ ⵍⴰⵢⵉⵛ ⴷ ⵜⴰⵙⵖⴰⵔⵜ ⵏⵏⴻⵙ
18
1 ⴷⴻⴳ ⵡⵓⵙⵙⴰⵏ ⵏⵏⵉ ⵡⴰⵔ ⴷⵉⵏ ⵜⵓⵖⵉ ⴰⵊⴻⴵⵉⴷ ⴷⵉ ⵉⵙⵔⴰⵉⵍ ⵓ ⴷⴻⴳ ⵡⵓⵙⵙⴰⵏ ⵏⵏⵉ ⵜⵓⵖⴰ ⵜⴰⵇⴱⵉⵍⵜ ⵏ ⴷⴰⵏ ⵜⴰⵔⴻⵣⵣⵓ ⵜⴰⵙⵖⴰⵔⵜ ⵉ ⵢⵉⵅⴻⴼ ⵏⵏⴻⵙ ⵎⴰⵃⴻⵏⴷ ⴰⴷ ⴷⴰⵢⴻⵙ ⵜⴻⵣⴷⴻⵖ, ⵎⵉⵏⵣⵉ ⵡⴰⵔ ⴷ ⴰⵙ ⴷⴷ-ⵜⴻⴽⴽⴰⵔ ⵄⴰⴷ ⵜⴻⵙⵖⴰⵔⵜ ⵊⴰⵔ ⵜⵇⴻⴱⴱⴰⵍ ⵏ ⵉⵙⵔⴰⵉⵍ. ■ 2 ⵙⵙⴻⴽⴽⴻⵏ ⴰⵢⵜ ⵏ ⴷⴰⵏ ⵣⵉ ⵍⵡⴰⵛⵓⵏ ⵏⵙⴻⵏ ⵅⴻⵎⵙⴰ ⵏ ⵢⴻⵔⵢⴰⵣⴻⵏ ⵣⵉ ⵎⴰⵔⵔⴰ ⵟⵟⵔⵓⴼⴰ ⵏⵙⴻⵏ, ⵉⵔⵢⴰⵣⴻⵏ ⵏⵏⵉ ⴷ ⴰⵢⵜ ⵏ ⵓⵎⴻⵏⵖⵉ ⵉⵏⵏⵉ ⴷⴷ-ⵢⵓⵙⵉⵏ ⵣⵉ ⵚⵓⵔⵄⴰ ⴷ ⵉⵛⵜⴰ’ⵓⵍ, ⵃⵉⵎⴰ ⴰⴷ ⴰⵔⵣⵓⵏ ⵍⴻⵅⴱⴰⵔ ⵅ ⵜⴻⵎⵎⵓⵔⵜ, ⴰⴷ ⴷⴰⵢⴻⵙ ⵢⴰⵔⵣⵓⵏ. ⵏⵉⵜⵏⵉ ⵏⵏⴰⵏ ⴰⵙⴻⵏ: “ⵓⵢⵓⵔⴻⵎ, ⴰⵔⵣⵓⵎ ⵜⴰⵎⵎⵓⵔⵜ!” ⵓⵙⵉⵏ-ⴷⴷ ⵖⴰⵔ ⵉⴷⵓⵔⴰⵔ ⵏ ⵉⴼⵔⴰⵢⵉⵎ ⵖⴰⵔ ⵜⴰⴷⴷⴰⵔⵜ ⵏ ⵎⵉⵅⴰ ⵓⵛⴰ ⵙⵙⴻⵏⵙⴻⵏ ⴷⵉⵏⵏⵉ. 3 ⵓⵎⵉ ⵉⵡⴹⴻⵏ ⵏⵉⵜⵏⵉ ⵖⴰⵔ ⵜⴰⴷⴷⴰⵔⵜ ⵏ ⵎⵉⵅⴰ, ⵄⴻⵇⵍⴻⵏ ⵅ ⵜⵎⵉⵊⵊⴰ ⵏ ⵡⴻⴱⵍⵉⵖ ⵣⴻⴳ ⴰⵢⵜ ⵏ ⵍⴰⵡⵉ, ⵓⵛⴰ ⴼⴼⵖⴻⵏ ⵣⴻⴳ ⵡⴻⴱⵔⵉⴷ ⵖⴰⵔⴻⵙ, ⵏⵏⴰⵏ ⴰⵙ: “ⵎⵉⵏ ⵛⴻⴽ ⵉ ⴷⴰ ⴷⴷ-ⵢⵉⵡⵢⴻⵏ ⵓ ⵎⵉⵏ ⵉ ⴷⴰ ⵜᵉⵜⵜⴻⴳⴳⴻⴷ ⵓ ⵎⵉⵏ ⵉ ⴷⴰ ⵜⴰⵔⴻⵣⵣⵓⴷ ⵛⴻⴽ?” 4 ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙⴻⵏ: “ⵜⴰ ⴷ ⵜⴰ ⵉ ⵉⴳⴳⴰ ⵎⵉⵅⴰ ⴰⴽⵉⴷⵉ. ⵏⴻⵜⵜⴰ ⵉⵛⵔⴰ ⴰⵢⵉ ⵓ ⴰⵎⵎⵓ ⵉ ⴷⴻⵡⵍⴻⵖ ⵏⴻⵛⵛ ⴷ ⴰⴽⴻⵀⵀⴰⵏ ⵏⵏⴻⵙ.” 5 ⵏⵉⵜⵏⵉ ⵏⵏⴰⵏ ⴰⵙ: “ⵙⴻⵇⵙⴰ ⴰⵏⴻⵖ ⴰⵔⴻⴱⴱⵉ, ⵎⴰⵃⴻⵏⴷ ⴰⴷ ⵏⴻⵙⵙⴻⵏ, ⵎⴰ ⴰⴱⵔⵉⴷ ⵉ ⵖⴰ ⵏⵓⵢⵓⵔ, ⴰⴷ ⵢⵉⵍⵉ ⵎⵍⵉⵃ.” 6 ⵢⴰⵔⵔⴰ-ⴷⴷ ⵅⴰⵙⴻⵏ ⵓⴽⴻⵀⵀⴰⵏ: “ⵓⵢⵓⵔⴻⵎ ⴷⵉ ⵍⴻⵀⵏⴰ! ⴰⴱⵔⵉⴷ ⵉ ⵜⴻⵅⵙⴻⵎ ⴰⴷ ⵜ ⵜⴻⴽⴽⴻⵎ, ⴰⵇⴰ-ⵜ ⵢⴰⵔⴻⵣⵎⴻⵏ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵙⵉⴷⵉ.” 7 ⵅⴻⵏⵏⵉ ⵔⵓⵃⴻⵏ ⵅⴻⵎⵙⴰ ⵏ ⵢⴻⵔⵢⴰⵣⴻⵏ ⵏⵏⵉ, ⵉⵡⴹⴻⵏ ⵖⴰⵔ ⵍⴰⵢⵉⵛ. ⵏⵉⵜⵏⵉ ⵥⵔⵉⵏ ⴰⵇⴰ ⵍⴳⴻⵏⵙ ⵉⵣⴷⴻⵖ ⴷⴰⵢⴻⵙ ⴷⵉ ⵍⴰⵎⴰⵏ ⴰⵎ ⵎⴰⵎⵎⴻⵛ ⵜ ⵜⵓⵖⴰ ⴷ ⵍⵇⴰⵄⵉⴷⴰ ⵖⴰⵔ ⴰⵢⵜ ⵏ ⵚⵉⴷⵓⵏ, ⵙ ⵍⵀⵓⴷⵏⴻⵜ ⵓ ⴷⵉ ⵍⴰⵎⴰⵏ. ⵜⵓⵖⴰ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⴷⵉ ⵜⴻⵎⵎⵓⵔⵜ ⵡⴻⵏⵏⵉ ⵉⵃⵚⴰⵔⴻⵏ ⵅ ⵢⵉⵊⵊⴻⵏ ⴷⵉ ⵛⴰ ⵏ ⵍⵃⴰⵊⵊⴻⵜ ⵏⵉⵖ ⵉⵟⵟⴻⴼ ⵛⴰ ⵙ ⵍⴻⵅⵛⵓⵏⴻⵜ. ⵏⵉⵜⵏⵉ ⵜⵓⵖⴰ ⵉⴳⴳⵯⴻⵊⴻⵏ ⴰⵟⵟⴰⵙ ⵅ ⴰⵢⵜ ⵏ ⵚⵉⴷⵓⵏ ⵓ ⵡⴰⵔ ⵖⴰⵔⵙⴻⵏ ⵜⵓⵖⵉ ⵡⴰⵍⵓ ⵓⵍⴰ ⴰⴽ-ⴷ ⵉⵊⵊ ⵏ ⴱⵏⴰⴷⴻⵎ. 8 ⵓⵛⴰ ⵓⵙⵉⵏ-ⴷⴷ ⵖⴰⵔ ⴰⵢⵜⵎⴰⵜⵙⴻⵏ ⴷⵉ ⵚⵓⵔⵄⴰ ⴷ ⵉⵛⵜⴰ’ⵓⵍ ⵓⵛⴰ ⵏⵏⴰⵏ ⴰⵙⴻⵏ ⴰⵢⵜⵎⴰⵜⵙⴻⵏ: “ⵎⴰⵏ ⴰⵡⴰⵍ ⵉ ⵖⴰⵔⵡⴻⵎ?” 9 ⵏⵉⵜⵏⵉ ⴰⵔⵔⵉⵏ-ⴷⴷ ⵅⴰⵙⴻⵏ: “ⴽⴽⴰⵔⴻⵎ, ⵊⵊⴻⵎ ⴰⴷ ⵏⴳⴻⵄⵄⴻⴷ, ⵎⵉⵏⵣⵉ ⵏⴻⵥⵔⴰ ⵜⴰⵎⵎⵓⵔⵜ, ⵓ ⵅⵣⴰⵔ, ⴰⵇⴰ-ⵜⵜ ⵜⴻⵛⵏⴰ ⴰⵟⵟⴰⵙ. ⵎⴰ ⵅⴻⵏⵏⵉ ⵜⴻⵅⵙⴻⵎ ⴰⴷ ⵜⴻⵇⵇⵉⵎⴻⵎ ⵜᵉⵜⵜⴰⵔⵙⴰⵎ ⴰⵎⵎⵓ? ⵡⴰⵔ ⵜⵜⴻⵄⴳⵉⵣⴻⵎ ⵛⴰ ⵎⴰⵃⴻⵏⴷ ⴰⴷ ⵜⴰⴷⴼⴻⵎ ⵖⴰⵔ ⵜⴻⵎⵎⵓⵔⵜ ⵃⵉⵎⴰ ⴰⴷ ⵜⵜ ⵜᵉⵟⵟⴼⴻⵎ ⴷ ⵍⵡⴰⵔⵜ. 10 ⵎⴰⵍⴰ ⴽⴻⵏⵏⵉⵡ ⴰⴷ ⵜⴰⵡⴹⴻⵎ ⴷⵉⵏ, ⵅⴻⵏⵏⵉ ⴰⴷ ⵜⴰⴼⴻⵎ ⵉⵊⵊ ⵏ ⵍⴳⴻⵏⵙ ⵉⵣⴻⴷⴷⵖⴻⵏ ⴷⵉ ⵍⴰⵎⴰⵏ ⵓⵛⴰ ⵜⴰⵎⵎⵓⵔⵜ ⵜⴻⵡⵙⴻⵄ ⴰⵟⵟⴰⵙ ⵖⴰⵔ ⵜⵏⴰⵢⴻⵏ ⵏ ⵉⵖⴻⵣⴷⵉⵙⴻⵏ, ⵎⵉⵏⵣⵉ ⴰⵔⴻⴱⴱⵉ ⵉⴳⴳⴰ ⴰⵡⴻⵎ ⵜⵜ ⴷⴻⴳ ⵓⴼⵓⵙ ⵏⵡⴻⵎ, ⴰⵇⴰ-ⵜ ⴷ ⵉⵊⵊ ⵏ ⵡⴻⵎⵛⴰⵏ ⵎⴰⵏⵉ ⵡⴰⵔ ⴷ ⴰⵙ ⵉⵜⵜⵅⴻⵚⵚⵉ ⵡⴰⵍⵓ ⵏ ⵎⵉⵏ ⵉⴵⴰⵏ ⵅ ⵜⴻⵎⵎⵓⵔⵜ.”
11 ⵅⴰⵙ ⵓⵛⴰ ⴽⴽⵙⴻⵏ ⵉⵇⵉⴹⴰⵏ ⵏⵙⴻⵏ ⵙⵙⴻⵏⵏⵉ, ⵣⵉ ⵍⴰⴵ ⵏ ⴷⴰⵏ ⵣⵉ ⵚⵓⵔⵄⴰ ⴷ ⵉⵛⵜⴰ’ⵓⵍ, ⵙⴻⵜⵜⴰ ⵎⵢⴰ ⵏ ⵢⴻⵔⵢⴰⵣⴻⵏ ⵃⴻⵣⵣⵎⴻⵏ ⵙ ⵍⴻⵙⵏⴰⵃ. 12 ⵏⵉⵜⵏⵉ ⴳⴻⵄⵄⴷⴻⵏ ⵓⵛⴰ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⵖⴰⵔ ⵇⴰⵔⵢⴰⵜ-ⵢⴰⵄⴰⵔⵉⵎ ⴷⵉ ⵢⴰⵀⵓⴷⴰ. ⵅ ⵓⵢⴰ ⵇⵇⴰⵔⴻⵏ ⴰⵙ ⵉ ⵡⴻⵎⵛⴰⵏ ⵏⵏⵉ ‘ⵎⴰⵅⴰⵏ-ⴷⴰⵏ’ ⴰⵍ ⴰⵙⵙ-ⴰ. ⵅⵣⴰⵔ, ⴰⵇⴰ-ⵜⵜ ⴰⵡⴰⵔⵏⵉ ⵉ ⵇⴰⵔⵢⴰⵜ-ⵢⴰⵄⴰⵔⵉⵎ. □ ■ 13 ⵙⵙⴻⵏⵏⵉ ⴼⴼⵖⴻⵏ, ⵄⴷⵓⵏ ⵖⴰⵔ ⵉⴷⵓⵔⴰⵔ ⵏ ⵉⴼⵔⴰⵢⵉⵎ ⵉⵡⴹⴻⵏ ⵖⴰⵔ ⵜⴰⴷⴷⴰⵔⵜ ⵏ ⵎⵉⵅⴰ. 14 ⵅⴻⵏⵏⵉ ⵙⵙⵉⵡⵍⴻⵏ ⵅⴻⵎⵙⴰ ⵏ ⵢⴻⵔⵢⴰⵣⴻⵏ, ⵉⵏⵏⵉ ⵜⵓⵖⴰ ⵉⴳⴳⵓⵔⴻⵏ ⵃⵉⵎⴰ ⴰⴷ ⴱⴻⵔⴳⴻⵏ ⵜⴰⵎⵎⵓⵔⵜ ⵏ ⵍⴰⵢⵉⵛ, ⵏⵏⴰⵏ ⵉ ⴰⵢⵜⵎⴰⵜⵙⴻⵏ: “ⵎⴰ ⵜⴻⵙⵙⵏⴻⵎ, ⴰⵇⴰ ⴷⵉ ⵜⵓⴷⵔⵉⵏ ⵏⵏⵉ ⴰⵇⴰ ⴷⵉⵏ ⵉⵊⵊ ⵏ ⵓⴱⴰⵍⵟⵓ ⵏ ⵓⴽⴻⵀⵀⴰⵏ ⴷ ⵍⴻⵅⵢⴰⵍⴰⵜ ⵜⵉⵎⴻⵥⵢⴰⵏⵉⵏ ⵏ ⵍ’ⴰⵚⵏⴰⵎ ⴷ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ ⴷ ⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ? ⵅⴻⵏⵏⵉ ⵍⴻⵅⵅⵓ, ⵜⴻⵙⵙⵏⴻⵎ ⵎⵉⵏ ⵅⴰⵡⴻⵎ ⴰⴷ ⵜ ⵜⴻⴳⴳⴻⵎ.”
15 ⵍⴻⵅⴷⴻⵏⵏⵉ ⴼⴼⵖⴻⵏ ⵣⴻⴳ ⵡⴻⴱⵔⵉⴷ ⵏⵙⴻⵏ, ⵓⵙⵉⵏ-ⴷⴷ ⵖⴰⵔ ⵜⴰⴷⴷⴰⵔⵜ ⵏ ⵡⴻⴱⵍⵉⵖ, ⵖⴰⵔ ⵜⴰⴷⴷⴰⵔⵜ ⵏ ⵡⴻⵔⵢⴰⵣ ⵣⴻⴳ ⴰⵢⵜ ⵏ ⵍⴰⵡⵉ, ⵖⴰⵔ ⵜⴰⴷⴷⴰⵔⵜ ⵏ ⵎⵉⵅⴰ, ⵓⵛⴰ ⵙⵙⴻⵇⵙⴰⵏ ⵅ ⵎⴰⵎⵎⴻⵛ ⵉⴵⴰ. 16 ⵙⴻⵜⵜⴰ-ⵎⵢⴰ ⵏ ⵢⴻⵔⵢⴰⵣⴻⵏ ⵣⴻⴳ ⴰⵢⵜ ⵏ ⴷⴰⵏ ⵉ ⵉⵃⴻⵣⵣⵎⴻⵏ ⵙ ⵍⴻⵙⵏⴰⵃ ⵏⵙⴻⵏ, ⵇⵇⵉⵎⴻⵏ ⴱⴻⴷⴷⴻⵏ ⵖⴰⵔ ⵡⴰⴷⴰⴼ ⵏ ⵜⴻⵡⵡⴰⵔⵜ. 17 ⵅⴻⵎⵙⴰ ⵏ ⵢⴻⵔⵢⴰⵣⴻⵏ, ⵉⵏⵏⵉ ⵜⵓⵖⴰ ⵉⴼⴼⵖⴻⵏ ⵃⵉⵎⴰ ⴰⴷ ⴱⴻⵔⴳⴰⴳⴻⵏ ⵜⴰⵎⵎⵓⵔⵜ, ⴳⴻⵄⵄⴷⴻⵏ, ⵓⴷⴼⴻⵏ ⵓ ⵉⵡⵢⴻⵏ ⵍⴻⵅⵢⴰⵍ ⵉⵏⴻⵇⵛⴻⵏ ⴷ ⵓⴱⴰⵍⵟⵓ ⵏ ⵓⴽⴻⵀⵀⴰⵏ ⴷ ⵍⴻⵅⵢⴰⵍⴰⵜ ⵜⵉⵎⴻⵥⵢⴰⵏⵉⵏ ⵏ ⵍ’ⴰⵚⵏⴰⵎ ⴷ ⵍⴻⵅⵢⴰⵍ ⵉⴼⴻⵙⵢⴻⵏ. ⴰⴽⴻⵀⵀⴰⵏ ⵉⵇⵇⵉⵎ ⵉⴱⴻⴷⴷ ⵖⴰⵔ ⵓⵇⴻⵎⵎⵓⵎ ⵏ ⵜⴻⵡⵡⴰⵔⵜ ⴰⴽ-ⴷ ⵙⴻⵜⵜⴰ-ⵎⵢⴰ ⵏ ⵢⴻⵔⵢⴰⵣⴻⵏ ⵉⵃⴻⵣⵣⵎⴻⵏ ⵙ ⵍⴻⵙⵏⴰⵃ. 18 ⵅⴻⵎⵙⴰ ⵉⵏⴰ ⵓⴷⴼⴻⵏ ⵖⴰⵔ ⵜⴰⴷⴷⴰⵔⵜ ⵏ ⵎⵉⵅⴰ, ⴽⴽⵙⴻⵏ ⵍⴻⵅⵢⴰⵍ ⵉⵏⴻⵇⵛⴻⵏ ⴷ ⵓⴱⴰⵍⵟⵓ ⵏ ⵓⴽⴻⵀⵀⴰⵏ ⴷ ⵍⴻⵅⵢⴰⵍⴰⵜ ⵜⵉⵎⴻⵥⵢⴰⵏⵉⵏ ⵏ ⵍ’ⴰⵚⵏⴰⵎ ⴷ ⵍⴻⵅⵢⴰⵍ ⵉⴼⴻⵙⵢⴻⵏ. ⵅⴻⵏⵏⵉ ⵉⵏⵏⴰ ⴰⵙⴻⵏ ⵓⴽⴻⵀⵀⴰⵏ: “ⵎⵉⵏ ⴷⵉⵏ ⵜᵉⵜⵜⴻⴳⴳⴻⵎ?” 19 ⵏⵉⵜⵏⵉ ⵏⵏⴰⵏ ⴰⵙ: “ⵙⵓⵙⴻⵎ, ⵙⴰⵔⵙ ⴰⴼⵓⵙ ⵏⵏⴻⵛ ⵅ ⵓⵇⴻⵎⵎⵓⵎ ⵏⵏⴻⵛ, ⵓⵢⵓⵔ ⴰⴽⵉⴷⵏⴻⵖ ⵓ ⴷⵡⴻⵍ ⴷ ⴱⴰⴱⴰ ⴷ ⴰⴽⴻⵀⵀⴰⵏ ⵏⵏⴻⵖ! ⵎⵉⵏ ⵉⵃⵍⴰⵏ, ⵎⴰⵍⴰ ⵛⴻⴽ ⴷ ⴰⴽⴻⵀⵀⴰⵏ ⴷⵉ ⵜⴰⴷⴷⴰⵔⵜ ⵏ ⵉⵊⵊ ⵏ ⵡⴻⵔⵢⴰⵣ ⵡⴰⵀⴰ ⵏⵉⵖ ⵎⴰⵍⴰ ⵛⴻⴽ ⴷ ⴰⴽⴻⵀⵀⴰⵏ ⵉ ⵢⵉⵛⵜ ⵏ ⵜⴻⵇⴱⵉⵍⵜ ⴷ ⵢⵉⵊⵊ ⵏ ⵍⴰⴵ ⴷⵉ ⵉⵙⵔⴰⵉⵍ?” 20 ⵍⴻⵅⴷⴻⵏⵏⵉ ⵉⴼⴰⵔⵃ ⵡⵓⵍ ⵏ ⵡⴻⵔⵢⴰⵣ ⵏⵏⵉ ⵓⵛⴰ ⵉⴽⵙⵉ ⴰⴱⴰⵍⵟⵓ ⵏ ⵓⴽⴻⵀⵀⴰⵏ ⴷ ⵍⴻⵅⵢⴰⵍⴰⵜ ⵜⵉⵎⴻⵥⵢⴰⵏⵉⵏ ⵏ ⵍ’ⴰⵚⵏⴰⵎ ⴷ ⵍⴻⵅⵢⴰⵍ ⵉⵏⴻⵇⵛⴻⵏ ⵓⵛⴰ ⵢⵓⴷⴻⴼ ⵊⴰⵔ ⵍⴳⴻⵏⵙ. 21 ⵓⵛⴰ ⵄⴻⵇⴱⴻⵏ ⵏⵉⵜⵏⵉ, ⴼⴼⵖⴻⵏ ⵓⵛⴰ ⵏⴻⴷⵀⴻⵏ ⵉⵃⴻⵏⵊⵉⵔⴻⵏ ⴷ ⵍⵎⴰⵍ ⴷ ⴷⴷⵇⵓⵍⴰⵜ ⴰⴽⵉⴷⵙⴻⵏ ⵖⴰⵔ ⵣⵣⴰⵜ.
22 ⵓⵎⵉ ⵏⵉⵜⵏⵉ ⵜⵓⵖⴰ ⵉⴳⴳⵯⴻⵊⴻⵏ ⴰⵟⵟⴰⵙ ⵅ ⵜⴰⴷⴷⴰⵔⵜ ⵏ ⵎⵉⵅⴰ, ⵍⴰⵖⴰⵏ-ⴷⴷ ⵉ ⵢⴻⵔⵢⴰⵣⴻⵏ ⴷⵉ ⵜⵓⴷⵔⵉⵏ ⵢⵓⴷⵙⴻⵏ ⵅ ⵜⴰⴷⴷⴰⵔⵜ ⵏ ⵎⵉⵅⴰ, ⵃⵉⵎⴰ ⴰⴷ ⵎⵓⵏⴻⵏ ⵓⵛⴰ ⵏⵉⵜⵏⵉ ⵅⴻⵛⵛⴻⵏ ⵅ ⴰⵢⵜ ⵏ ⴷⴰⵏ. 23 ⵏⵉⵜⵏⵉ ⵍⴰⵖⴰⵏ ⴰⵡⴰⵔⵏⵉ ⵉ ⴰⵢⵜ ⵏ ⴷⴰⵏ, ⵎⴰⵛⴰ ⵉⵏⴰ ⵏⵏⵇⴻⵍⴱⴻⵏ ⴰⵣⴻⴵⵉⴼ ⵏⵙⴻⵏ, ⵏⵏⴰⵏ ⵉ ⵎⵉⵅⴰ: “ⵎⵉⵏ ⵛⴻⴽ ⵢⵓⵖⵉⵏ? ⵎⴰⵢⴻⵎⵎⵉ ⵜⵍⴰⵖⵉⴷ ⵃⵉⵎⴰ ⴰⴷ ⵜⵜⵡⴰⵙⵙⵎⵓⵏⴻⵏ ⵎⴰⵔⵔⴰ?” 24 ⵉⵏⵏⴰ ⵏⴻⵜⵜⴰ: “ⴽⴻⵏⵏⵉⵡ ⵜⴻⴽⴽⵙⴻⵎ ⵅⴰⴼⵉ ⵉⵔⴻⴱⴱⵉⵜⴻⵏ ⵉⵏⵓ ⵉ ⴳⴳⵉⵖ ⵓⵍⴰ ⴷ ⴰⴽⴻⵀⵀⴰⵏ ⵓⵛⴰ ⵜⵓⵢⵓⵔⴻⵎ. ⵎⵉⵏ ⵖⴰⵔⵉ ⵍⴻⵅⵅⵓ ⵄⴰⴷ? ⵎⴰⵎⵎⴻⵛ ⵜⴻⴳⴳⵉⵎ ⵄⴰⴷ ⵜⴻⵇⵇⴰⵔⴻⵎ ⴰⵢⵉ: ‘ⵎⵉⵏ ⵛⴻⴽ ⵢⵓⵖⵉⵏ?’ ” 25 ⴰⵢⵜ ⵏ ⴷⴰⵏ ⵏⵏⴰⵏ ⴰⵙ: “ⵖⴰⵔⴻⴽ ⴰⴷ ⵏⵙⴻⵍ ⵉ ⵜⵎⵉⵊⵊⴰ ⵏⵏⴻⵛ ⵖⴰⵔⵏⴻⵖ ⵏⵉⵖ ⵉⵣⴻⵎⵎⴰⵔ ⴰⴷ ⵅⴰⵡⴻⵎ ⵡⴹⴰⵏ ⵉⵔⵢⴰⵣⴻⵏ ⵢⴻⵡⵄⴰⵔⴻⵏ ⵓ ⵉⵍⵉ ⴰⴷ ⵜⴰⵖ ⴰⴷ ⵉⵡⴻⴷⴷⴰⵔ ⵍⴻⵄⵎⴰⵔ ⵏⵏⴻⵛ ⵓⵍⴰ ⴷ ⵍⴻⵄⵎⵓⵔ ⵏ ⵜⴰⴷⴷⴰⵔⵜ ⵏⵏⴻⵛ.” 26 ⵓⵛⴰ ⵓⵢⵓⵔⴻⵏ ⴰⵢⵜ ⵏ ⴷⴰⵏ ⴷⴻⴳ ⵡⴻⴱⵔⵉⴷ ⵏⵙⴻⵏ ⵓⵛⴰ ⵓⵎⵉ ⵉⵥⵔⴰ ⵎⵉⵅⴰ ⴱⴻⵍⵍⵉ ⵏⵉⵜⵏⵉ ⵜⵓⵖⴰ ⵊⴻⵀⴷⴻⵏ ⵅⴰⵙ, ⵉⵏⵏⴻⵇⵍⴻⴱ, ⵢⴰⵔⴻⴳⴳⵯⴻⵃ ⵖⴰⵔ ⵜⴰⴷⴷⴰⵔⵜ ⵏⵏⴻⵙ.
27 ⵏⵉⵜⵏⵉ ⵎⴰⵛⴰ ⵉⵡⵢⴻⵏ ⵎⵉⵏ ⵉⴳⴳⵉⵏ ⵎⵉⵅⴰ ⵓⵍⴰ ⴷ ⴰⴽⴻⵀⵀⴰⵏ ⵡⴻⵏⵏⵉ ⵜⵓⵖⴰ ⵖⴰⵔⴻⵙ ⵉⵜⵜⵙⴻⵅⵅⴰⵔⴻⵏ. ⵏⵉⵜⵏⵉ ⵉⵡⴹⴻⵏ ⵖⴰⵔ ⵍⴰⵢⵉⵛ, ⵖⴰⵔ ⵉⵊⵊ ⵏ ⵍⴳⴻⵏⵙ ⵉⵣⴻⴷⴷⵖⴻⵏ ⴷⵉ ⵍⵀⵓⴷⵏⴻⵜ ⴷ ⵍⴰⵎⴰⵏ ⵓⵛⴰ ⵏⵖⵉⵏ ⵜⴻⵏ ⵙ ⵍⴻⵇⴹⴻⵄ ⵏ ⵙⵙⵉⴼ ⵓ ⵙⵙⵛⴻⵎⴹⴻⵏ ⵜⴰⵏⴷⵉⵏⵜ ⵙ ⵜⵎⴻⵙⵙⵉ. 28 ⵡⴰⵔ ⴷⵉⵏ ⵓⵍⴰ ⴷ ⵉⵊⵊⴻⵏ ⵉⵣⴻⵎⵎⴰⵔ ⴰⴷ ⵉⴼⴻⴽⴽ, ⵎⵉⵏⵣⵉ ⵍⴰⵢⵉⵛ ⵜⵓⵖⴰ ⵜⵉⴳⴳⵯⵡⴻⵊ ⴰⵟⵟⴰⵙ ⵅ ⵚⵉⴷⵓⵏ ⵓ ⵡⴰⵔ ⵜⵓⵖⵉ ⵖⴰⵔⵙⴻⵏ ⵡⴰⵍⵓ ⵓⵍⴰ ⴰⴽ-ⴷ ⵉⵊⵊ ⵏ ⴱⵏⴰⴷⴻⵎ. ⵜⵓⵖⴰ-ⵜⵜ ⴷⵉ ⵍⴻⵡⴹⴰ ⵏ ⵜⴻⵖⵣⵓⵔⵜ ⵏⵏⵉ ⵖⴰⵔ ⴱⴰⵢⵜ-ⵔⴰⵃⵓⴱ. ⴰⵡⴰⵔⵏⵉ ⵓⵢⴰ ⴱⵏⴰⵏ ⵜⴰⵏⴷⵉⵏⵜ ⵄⴰⵡⴻⴷ ⵓⵛⴰ ⵣⴻⴷⴷⵖⴻⵏ ⴷⴰⵢⴻⵙ. 29 ⵏⵉⵜⵏⵉ ⵇⵇⴰⵔⴻⵏ ⴰⵙ ⵉ ⵜⴻⵏⴷⵉⵏⵜ ‘ⴷⴰⵏ’, ⵅ ⵢⵉⵙⴻⵎ ⵏ ⴱⴰⴱⴰⵜⵙⴻⵏ ⴷⴰⵏ, ⵡⴻⵏⵏⵉ ⴷⴷ-ⵉⵜⵜⵡⴰⵔⵡⴻⵏ ⵉ ⵉⵙⵔⴰⵉⵍ. ⵎⴰⵛⴰ ⵣⵉⵛ ⵜⴰⵏⴷⵉⵏⵜ ⵜⵓⵖⴰ ⵇⵇⴰⵔⴻⵏ ⴰⵙ ⵍⴰⵢⵉⵛ. ■
30 ⴰⵢⵜ ⵏ ⴷⴰⵏ ⵙⵙⴱⴻⴷⴷⴻⵏ ⵍⴻⵅⵢⴰⵍ ⵉⵏⴻⵇⵛⴻⵏ ⵉ ⵢⵉⵅⴻⴼ ⵏⵙⴻⵏ. ⵓⵛⴰ ⵢⴰⵀⵓⵏⴰⵜⴰⵏ, ⵎⵎⵉⵙ ⵏ ⵊⴰⵔⵛⵓⵎ, ⵎⵎⵉⵙ ⵏ ⵎⵓⵙⴰ, ⵏⴻⵜⵜⴰ ⴰⴽ-ⴷ ⵉⵃⴻⵏⵊⵉⵔⴻⵏ ⵏⵏⴻⵙ, ⵜⵓⵖⴰ ⴰⵜⴻⵏ ⴷ ⵉⴽⴻⵀⵀⴰⵏⴻⵏ ⵏ ⵜⴻⵇⴱⵉⵍⵜ ⵏ ⴷⴰⵏ ⴰⵍ ⴰⵙⵙ ⵉ ⴷⵉ ⵜᵉⵜⵜⵡⴰⵏⴷⴻⵀ ⵜⴻⵎⵎⵓⵔⵜ ⵖⴰⵔ ⵍⵎⴻⵏⴼⴰ. □ 31 ⵏⵉⵜⵏⵉ ⵜⵓⵖⴰ ⵙⵙⴱⴻⴷⴷⴻⵏ ⵍⴻⵅⵢⴰⵍ ⵉⵏⴻⵇⵛⴻⵏ ⵏ ⵎⵉⵅⴰ, ⵜⴻⵏⵏⵉ ⵉⴳⴳⴰ, ⵣⵣⴰⵜ ⵉ ⵢⵉⵅⴻⴼ ⵏⵙⴻⵏ ⵎⴰⵔⵔⴰ ⵓⵙⵙⴰⵏ ⵎⵉⵏ ⵜⴻⴽⴽⴰ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵜⴻⴵⴰ ⴷⵉ ⵛⵉⵍⵓ.