ⵍⵇⵓⴹⴰⵜ 17

ⵎⵉⵅⴰ ⴷ ⵍⴻⵅⵢⴰⵍ ⵏⵏⴻⵙ ⵏ ⵚⵚⴰⵏⴰⵎ

1 ⵉⵊⵊ ⵏ ⵡⴻⵔⵢⴰⵣ ⵜⵓⵖⴰ ⵉⵣⴻⴷⴷⴻⵖ ⵅ ⵉⴷⵓⵔⴰⵔ ⵏ ⵉⴼⵔⴰⵢⵉⵎ, ⵇⵇⴰⵔⴻⵏ ⴰⵙ ⵎⵉⵅⴰ-ⵢⴰⵀⵓ. 2 ⵏⴻⵜⵜⴰ ⵉⵏⵏⴰ ⵉ ⵢⴻⵎⵎⴰⵙ: “ⴰⵍⴻⴼ ⵓ-ⵎⵢⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵉ ⴷ ⴰⵎ ⵉⵜⵜⵡⴰⴽⴽⵙⴻⵏ, ⵉ ⵅⴰⵙⴻⵏⵜ ⵜⴻⵏⵏⵉⴷ ⵉⵛⵜ ⵏ ⵏⵏⴻⵄⵍⴻⵜ ⵉ ⵣⵉ ⵜⵏⴻⵟⵇⴻⴷ ⴷⴻⴳ ⵉⵎⴻⵣⵣⵓⵖⴻⵏ ⵉⵏⵓ, ⵅⵣⴰⵔ, ⵏⵏⵓⵇⴰⵔⵜ ⵏⵏⵉ ⴰⵇⴰ-ⵜⵜ ⵖⴰⵔⵉ, ⵏⴻⵛⵛ ⴽⵙⵉⵖ ⵜⵜ.” ⵢⴻⵎⵎⴰⵙ ⵜⴻⵏⵏⴰ: “ⴰⴷ ⵉⵜⵜⵡⴰⴱⴰⵔⴻⴽ ⵎⵎⵉ ⵣⵉ ⵙⵉⴷⵉ!” 3 ⵏⴻⵜⵜⴰ ⵢⴰⵔⵔⴰ ⴰⵍⴻⴼ ⵓ-ⵎⵢⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵉ ⵢⴻⵎⵎⴰⵙ ⵓⵛⴰ ⵢⴻⵎⵎⴰⵙ ⵜⴻⵏⵏⴰ ⴰⵙ: “ⵏⵏⵓⵇⴰⵔⵜ ⵙⵙⵇⴻⴷⴷⵙⴻⵖ ⵜⵜ ⵉ ⵙⵉⴷⵉ ⵣⴻⴳ ⵓⴼⵓⵙ ⵉⵏⵓ ⵉ ⵎⵎⵉ ⵃⵉⵎⴰ ⴰⴷ ⵣⵣⴰⵢⴻⵙ ⵉⴳⴳ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ ⴷ ⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ. ⵅⴻⵏⵏⵉ ⵍⴻⵅⵅⵓ ⴰⴷ ⴰⵛ ⵜⵜ ⴰⵔⵔⴻⵖ.” 4 ⵏⴻⵜⵜⴰ ⵎⴰⵛⴰ ⵢⴰⵔⵔⴰ ⵏⵏⵓⵇⴰⵔⵜ ⵄⴰⵡⴻⴷ ⵉ ⵢⴻⵎⵎⴰⵙ. ⵅⴻⵏⵏⵉ ⵜⴻⴽⵙⵉ ⵢⴻⵎⵎⴰⵙ ⵎⵉⵜⴰⵢⴻⵏ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵓ ⵜⴻⵡⵛⴰ ⵉ-ⵜⴻⵏⵜ ⵉ ⵢⵉⵊⵊ ⵏ ⵡⴻⵎⵣⵉⵍ ⵏ ⵡⵓⵔⴻⵖ, ⵡⴻⵏⵏⵉ ⵣⵣⴰⵢⴻⵙ ⵉⴳⴳⵉⵏ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ ⴷ ⵢⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ ⵓⵛⴰ ⴳⴳⵉⵏ ⵜⴻⵏⵜ ⴷⵉ ⵜⴰⴷⴷⴰⵔⵜ ⵏ ⵎⵉⵅⴰ-ⵢⴰⵀⵓ. 5 ⵜⵓⵖⴰ ⵎⵉⵅⴰ ⵖⴰⵔⴻⵙ ⵉⵛⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵓ ⵏⴻⵜⵜⴰ ⵉⴳⴳⴰ ⵉⵊⵊ ⵏ ⵓⴱⴰⵍⵟⵓ ⵏ ⵓⴽⴻⵀⵀⴰⵏ ⴷ ⵍⴻⵅⵢⴰⵍⴰⵜ ⵜⵉⵎⴻⵥⵢⴰⵏⵉⵏ ⵏ ⵍ’ⴰⵚⵏⴰⵎ ⵓⵛⴰ ⵉⵍⴻⵇⵇⴻⵎ ⵉⵊⵊⴻⵏ ⵣⴻⴳ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴷ ⵖⴰⵔⴻⵙ ⵢⵉⵍⵉ ⴷ ⴰⴽⴻⵀⵀⴰⵏ.

6 ⴷⴻⴳ ⵡⵓⵙⵙⴰⵏ ⵏⵏⵉ ⵡⴰⵔ ⴷⵉⵏ ⵜⵓⵖⵉ ⴰⵊⴻⴵⵉⴷ ⴷⵉ ⵉⵙⵔⴰⵉⵍ. ⴽⵓⵍ ⵉⵊⵊ ⵉⵜⵜⴻⴳⴳ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ.    7 ⴷⵉ ⴱⴰⵢⵜ-ⵍⴰⵃⵎ ⴷⵉ ⵢⴰⵀⵓⴷⴰ ⵜⵓⵖⴰ ⴷⵉⵏ ⵉⵊⵊ ⵏ ⵡⴻⴱⵍⵉⵖ ⵣⵉ ⵍⵡⴰⵛⵓⵏ ⵏ ⵢⴰⵀⵓⴷⴰ. ⵏⴻⵜⵜⴰ ⵜⵓⵖⴰ ⴷ ⵉⵊⵊ ⵏ ⵓⵍⴰⵡⵉ, ⵜⵓⵖⴰ ⵉⵣⴻⴷⴷⴻⵖ ⴷⵉⵏⵏⵉ ⴷ ⴰⴱⴰⵔⵔⴰⵏⵉ. 8 ⴰⵔⵢⴰⵣ-ⴰ ⵉⴼⴼⴻⵖ ⵣⵉ ⵜⴻⵏⴷⵉⵏⵜ ⵏⵏⵉ, ⵣⵉ ⴱⴰⵢⵜ-ⵍⴰⵃⵎ ⴷⵉ ⵢⴰⵀⵓⴷⴰ, ⵃⵉⵎⴰ ⴰⴷ ⵉⵣⴷⴻⵖ ⴰⵎ ⵓⴱⴰⵔⵔⴰⵏⵉ ⵎⴰⵏⵉ ⵎⴰ ⵉⵣⴻⵎⵎⴰⵔ ⴰⴷ ⵢⴰⴼ ⴰⵎⵛⴰⵏ. ⵅ ⵡⴻⴱⵔⵉⴷ ⵏⵏⴻⵙ ⵢⵉⵡⴻⴹ ⵖⴰⵔ ⵉⴷⵓⵔⴰⵔ ⵏ ⵉⴼⵔⴰⵢⵉⵎ ⵖⴰⵔ ⵜⴰⴷⴷⴰⵔⵜ ⵏ ⵎⵉⵅⴰ. 9 ⵎⵉⵅⴰ ⵉⵙⵙⴻⵇⵙⴰ ⵜ: “ⵎⴰⵏⵉⵙ ⵉ ⴷⴷ-ⵜⵓⵙⵉⴷ ⵛⴻⴽ?” ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙ: “ⵏⴻⵛⵛ ⴷ ⴰⵍⴰⵡⵉ ⵣⵉ ⴱⴰⵢⵜ-ⵍⴰⵃⵎ ⴷⵉ ⵢⴰⵀⵓⴷⴰ. ⵏⴻⵛⵛ ⴳⴳⵓⵔⴻⵖ, ⵃⵉⵎⴰ ⴰⴷ ⵣⴻⴷⵖⴻⵖ ⵎⴰⵏⵉ ⵎⴰ ⵉ ⵖⴰ ⵢⴰⴼⴻⵖ ⴰⵎⵛⴰⵏ.” 10 ⵅⴻⵏⵏⵉ ⵉⵏⵏⴰ ⴰⵙ ⵎⵉⵅⴰ: “ⵇⵇⵉⵎ ⵖⴰⵔⵉ ⵓⵛⴰ ⵜⵉⵍⵉⴷ ⴰⵢⵉ ⴷ ⴱⴰⴱⴰ ⴷ ⴰⴽⴻⵀⵀⴰⵏ! ⵏⴻⵛⵛ ⴰⴷ ⴰⵛ ⵡⵛⴻⵖ ⵄⴻⵛⵔⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⴷ ⵛⴰ ⵏ ⵡⴻⵔⵔⵓⴹ ⴷ ⵍⴻⵄⵡⴻⵍⵜ.” ⵓⵛⴰ ⴰⵍⴰⵡⵉ ⵢⵓⵢⵓⵔ ⴰⴽⵉⴷⴻⵙ. 11 ⴰⵍⴰⵡⵉ ⵢⴰⵔⴹⴰ ⵅⴰⵙ ⴷⴻⴳ ⵡⴰⵡⴰⵍ ⵃⵉⵎⴰ ⴰⴷ ⵉⵇⵇⵉⵎ ⴰⴽ-ⴷ ⵡⴻⵔⵢⴰⵣ ⵓ ⴰⴱⵍⵉⵖ ⵜⵓⵖⴰ ⵉ ⵎⵉⵅⴰ ⴰⵎ ⵢⵉⵊⵊⴻⵏ ⵣⴻⴳ ⴰⵔⵔⴰⵡ ⵏⵏⴻⵙ. 12 ⵎⵉⵅⴰ ⵉⵛⵛⵓⵔ ⴰⵍⴰⵡⵉ ⵓⵛⴰ ⵉⴷⵡⴻⵍ ⵡⴻⴱⵍⵉⵖ ⴷ ⴰⴽⴻⵀⵀⴰⵏ ⵉ ⵏⴻⵜⵜⴰ ⵓⵛⴰ ⵉⵇⵇⵉⵎ ⴷⵉ ⵜⴰⴷⴷⴰⵔⵜ ⵏ ⵎⵉⵅⴰ. 13 ⵓⵛⴰ ⵉⵏⵏⴰ ⵎⵉⵅⴰ: “ⵍⴻⵅⵅⵓ ⵙⵙⵏⴻⵖ ⵏⴻⵛⵛ, ⴰⵇⴰ ⵙⵉⴷⵉ ⴰⴷ ⴰⵢⵉ ⵉⴳⴳ ⵍⵅⴰⵔ, ⵎⴰⵖⴰⵔ ⵏⴻⵛⵛ ⵖⴰⵔⵉ ⴰⵍⴰⵡⵉ ⵡⴰⵏⵉⵜⴰ ⴷ ⴰⴽⴻⵀⵀⴰⵏ.”