S liman weḥḥdes, war iǧi s řexdayem n Ccariɛa
3
1 A Igalaṭiyyen ifɣuřen, wi kenniw issuffɣen zeg webrid? Aqa Lmasiḥ tuɣa ittwarcem qibač i tiṭṭawin nwem am wenni immuten x ṣṣalib. ■ 2 Degga waha xseɣ ad t ssneɣ zzaywem: Ma tᵉṭṭfem Arruḥ s řexdayem n Ccariɛa niɣ umi tᵉtteggem array i l’iman? 3 Ma amenni d ifɣuřen i teǧam? Tebdam s Arruḥ, ma řexxu ad tkemmřem s ddat? 4 Ma teẓrim tamara aṭṭas x walu? Ma tuɣa s tidett x walu? 5 Wenni d awem iwcin Arruḥ uca ittegg lmuɛjizat jar awem, ma ittegg i-tent zi řexdayem n Ccariɛa niɣ umi tᵉtteggem array i l’iman, 6 am mammec tuɣa Ibrahim yumen di AREBI uca xenni ittwaḥseb as-dd man aya d tasegda. ■ 7 S uyenni ssnem, belli inni iǧan n l’iman, nitni d ayt n Ibrahim. 8 Minzi issen AREBBI qbeř aqa řegnus ad ttwaseggden s l’iman, izzar ibeccar i Ibrahim s Řexbar Aṣebḥan, am mammec qqarent Tira Iqeddsen: “Dayek i ɣa ttwabarken řegnus marra.” ■ 9 S uyenni inni yumnen ad ttwabarken ak-d řmumen Ibrahim.
10 Marra inni iddaren s řexdayem n Ccariɛa, aqa nitni sadu nneɛřet, minzi tura: “D amenɛuř kuř ijjen wenni war iqqimen ittᵉṭṭef di marra timesřayin yuran deg wedlis n Ccariɛa ḥima ad tent igg!” ■
11 Aqa ittban belli war din ḥed i ɣa ittwaseggden ɣar AREBBI s Ccariɛa, minzi tura: “Amseggad s l’iman ad iddar!” ■
12 Maca Ccariɛa war tkemmeř ca s l’iman, maca bnadem wenni itteggen min dayes yurin, ad zzayes iddar. ■
13 Lmasiḥ aqa ixeǧeṣ xaneɣ, ḥima ad aneɣ ifekk zi nneɛřet nni iǧan x yenni sadu Ccariɛa am d idweř xaneɣ d amenɛuř, minzi tura: “D amenɛuř man wen ma yuyřen x teḥnact!” ■
14 ḥima ad tiweḍ lbaraka n Ibrahim ɣar řegnus di Yeccu Lmasiḥ maḥend s l’iman ad neṭṭef lwaɛd n Arruḥ.
Ccariɛa d lwaɛd
15 A aytma, ad ssiwřeɣ am mammec tamesřact teǧa d ict n tmesřact n bnadem: Uřa d řɛahd i iǧan zi bnadem, awarni řami ittwaxtem, war izemmar bnadem ad t ibḍeř niɣ ad t ibeddeř. ■
16 Aqa lwuɛud ttwaggen i Ibrahim d zzariɛet nnes. Netta war d as yini ca: “I iɛeqqayen n zzariɛet nwem!”, am i waṭṭas, maca: “I uɛeqqa n zzariɛet nnek!”, am i yijjen, wenni aqa-t d Lmasiḥ. ■
17 Xenni qqareɣ ammu: Řɛahd wenni iggin AREBBI zic di Lmasiḥ, war t tbeṭṭiř ca Ccariɛa tenni tusa-dd arbeɛmeyya u-třatin n iseggʷusa awarni man aya ḥima ad tegg lwaɛd ixwan. ■
18 Minzi mařa řwart iǧa s Ccariɛa, aqa war iǧi ɛad s lwaɛd. Maca AREBBI aqa iwca i-t i Ibrahim s lwaɛd. ■
19 Xenni i umi tneffeɛ Ccariɛa? Aqa tᵉttwammarni ɣar lwaɛd x ssibbet n ddnub ařami dd-tusa Zzariɛet tenni umi ittwagg lwaɛd. U s lmalakat temmewc Ccariɛa deg ufus n ijj n lwaṣit. ■ 20 Lwaṣit war din iǧi i ijjen, maca AREBBI d ijjen.
21 Ma xenni Ccariɛa ḍidd i lwaɛd n AREBBI? Ɛemmarṣ! Minzi mařa tuɣa temmewc ict n Ccariɛa tzemmar ad tesseddar, d tidett tuɣa tasegda s Ccariɛa. 22 Maca adlis n Ccariɛa ibelleɛ x marra di ddnub, ḥima lwaɛd ad immewc s l’iman di Yeccu Lmasiḥ i yenni yumnen. ■
23 Maca qbeř ma i dd ɣa yas l’iman, tuɣa aneɣ nemmeḥḍa di Ccariɛa uca ittwabelleɛ xaneɣ zzayes ařami dd-yusa l’iman wenni tuɣa i ɣa iḍharen. 24 S uyenni tuɣa Ccariɛa am wenni d aneɣ ittarebban ař Lmasiḥ, ḥima ad nettwasegged s l’iman. ■ 25 Maca řexxu, umi dd-yusa l’iman, aqa war neqqim ɛad sadu wenni ittarebban.
Ayt n Arebbi
26 Minzi marra kenniw d ayt n AREBBI s l’iman di Yeccu Lmasiḥ. ■ 27 Minzi marra inni ittwasɣeḍṣen di Lmasiḥ, aqa arḍen Lmasiḥ. ■ 28 Xenni war din ɛad Uday niɣ Aramiy, war din ɛad ismeɣ niɣ aḥurri, war din ɛad aryaz niɣ tamɣart, minzi marra kenniw d ijjen i teǧam di Yeccu Lmasiḥ. ■ 29 Mařa kenniw teǧam n Lmasiḥ, aqa kenniw d zzariɛet n Ibrahim uca ɛlaḥsab lwaɛd d iwriten. ■