Twaḥit ɣar Urcalim
21
1 Awarni řami xasen nemmsebḍa, nebda nẓekkwa řebḥar, nruḥ nican uca niweḍ ɣar tegzirt n Kus. Tiwecca nnes niweḍ ɣar Rudus u ssenni ɣar Patara. 2 Nufa din ijj n uɣarrabu i tuɣa iẓekkwan ɣar Finiqiya, nenya dayes uca nruḥ. 3 Řami dd-niweḍ ɣar tegzirt n Qubrus, nejja i-tt x uzeřmaḍ uca nruḥ x řebḥar ɣar Suriya uca ssenni niweḍ ɣar Ṣur minzi aɣarrabu tuɣa igga ad ifarreɣ sseřɛet nnes din. 4 Umi nufa din imeḥḍaren, neqqim ɣarsen sebɛa n wussan. Kuř ass nnan nitni s Arruḥ i Bulus maḥend war ittgeɛɛid ca ɣar Urcalim. ■ 5 Awarni i wussan-a neffeɣ, nuyur. Marra nitni ssqebḍen aneɣ ak-d temɣarin d iḥenjiren nsen ař barra n tendint. X tma n řebḥar wḍan x ifadden nsen uca ẓẓuǧen. 6 Umi nweddeɛ ayawya s usudem n wawmaten, nenya deg uɣarrabu, maca nitni ɛeqben, kuř ijjen ɣar taddart nnes. 7 Umi nkemmeř x usafar zi Ṣur niweḍ ɣar Ptulumayu, nseǧmen x wawmaten uca neqqim akidsen ijj n wass. □ 8 Tiwecca nnes neffeɣ ssenni, niweḍ ɣar Qayṣariya. Nudef ɣar taddart n umbeccar Filippus, wenni tuɣa d ijjen zi sebɛa n imsexxaren, uca neqqim ɣares. □ ■ 9 Tuɣa ɣar wa arebɛa n tḥenjirin, ɛad d tiɛezriyyin, tinni ittnabben. ■
10 Umi nenniwjew din aṭṭas n wussan, ihwa-dd ijj n unabi zi Yahudiyya, qqaren as Aɣabus. ■
11 Yusa-dd ɣarneɣ uca iksi abyas n Bulus, icarf ixef nnes ifassen d iḍaren, inna: “Ammu i iqqar Arruḥ Iqeddsen: ‘Aryaz i ɣar iǧa abyas-a, ammu i t ɣa carfen Wudayen di Urcalim uca ad t sellmen deg ifassen n řegnus.’ ” ■
12 Umi nesřa awařen-a, nettar zzayes, am neccin am yenni zi jjwayeh nni, ḥima war ittgeɛɛid ɣar Urcalim.
13 Maca Bulus yarra-dd, inna: “Min kenniw yuɣin, tᵉttrum uca tessareḍbem uř inu? Minzi aqa ayi wejdeɣ maci ḥima ad ayi carfen waha, maca ɛawed ḥima ad mmteɣ di Urcalim x ssibbet n Yisem n Siditneɣ Yeccu Lmasiḥ.”
14 Umi war d aneɣ ijji ad t nesseqneɛ, nesqar, neqqar: “Ad yiři min ixs Siditneɣ.” ■
15 Awarni ussan nni nessewjed uca ngeɛɛed ɣar Urcalim.
16 Ruḥen akidneɣ ca n iryazen, imeḥḍaren zi Qayṣariya, iwyen-dd ijj n tewmat, qqaren as Mnasun zi Qubrus, aqa-t d ijjen zeg imeḥḍaren imezwura, ḥima ad ɣares nenniwjew.
Ameřqi n Bulus ak-d rrusul d wawmaten di Urcalim
17 Ařami dd-niweḍ ɣar Urcalim, tareḥḥeb zzayneɣ tawmat s řefraḥet.
18 Tiwecca nnes yudef Bulus akidneɣ ɣar Yaɛqub, umi ḥḍaren din akides marra imɣaren.
19 Awarni řami xasen nseǧem, ibda Bulus ad iɛawed s ijj n usettef icna x marra min igga AREBBI jar řegnus s tsexxart nnes. 20 Umi sřin aya, ssemɣaren AREBBI, nnan as: “A umatneɣ, tᵉttwařid mecḥař n ɛecra n řuřuf di Yahudiyya i yumnen, u nitni marra ttasmen x Ccariɛa. 21 Maca yiweḍ asen-dd řexbar xak belli tesseřmaded i marra Udayen inni iǧan jar řegnus maḥend ad semḥen di Ccariɛa n Musa am d asen teqqared ittxeṣṣa war xettnen iḥenjiren nsen war gguren deg webrid n Ccariɛa. 22 Minzi sřin belli aqa tusid-dd da, 23 egg xenni min d ac ɣa nini! Ɣarneɣ arebɛa n yeryazen inni ɣar iǧa ijj n lwaɛd mahend ad ssizdigen ixef nsen. 24 Awi ina akidek, tessizdeged ixef nnek akidsen, uca xeǧeṣ xasen ḥima ad ḥeffen izeǧifen nsen. Xenni ad ssnen marra belli min xak ittwannan war iǧi bu nican, u belli cek tᵉttkemmřed Ccariɛa u tᵉttᵉṭṭfed dayes. 25 Maca zi jjihet n yinni yumnen jar řegnus, aqa nura belli ad beɛɛden x min iqqarṣen i l’aṣnam, x farq-ccɣeř, x jjiyfat, uřa x idammen.” ■
26 Xenni yiwyi Bulus iryazen nni akides uca tiwecca nnes issizdeg ixef nnes akidsen, Ruḥen ɣar Zzawect Tameqqrant, isscen asen mammec ittxeṣṣa ad kemmřen wussan n usizdeg, ař d iqeddem kuř ijjen zzaysen taɣarṣt nnes. ■
Uḍuf n Bulus di Zzawect Tameqqrant
27 Ařami dd-yiweḍ wass sebɛa, ẓrin t Wudayen n Asiya di Zzawect Tameqqrant, ssenhezzen řgens marra ḍidd nnes, ḥarten xas s ifassen, 28 sɣuyyun: “A kenniw, a ayt n Israil, ɣawřem ɣar twiza! Wa d bnadem wenni isseřmaden iwdan marra ḍidd i řgens nneɣ u ḍidd i Ccariɛa u ḍidd i wemcan-a uca issidef-dd ɛawed Iramiyyen ɣar Zzawect Tameqqrant uca issexmaj amcan iqeddsen!” 29 Minzi tuɣa izwaren akides ẓrin Trufimus zi Afasus di tendint, ittɣiř asen belli Bulus issiweḍ i-t-i-dd ɣar Zzawect Tameqqrant. ■ 30 Tandint marra thaj uca iwdan dduqqzen-dd, ḥarten x Bulus, jarren t barra i Zzawect Tameqqrant, řexdenni bellɛent tiwwura.
31 Am arezzun ad t nɣen, yiweḍ řexbar ɣar ukumandar n ubaṭayun, aqa Urcalim amen tekmeř txarweḍ. 32 Řexdenni yiwyi-dd ijj n řqebṭan x mya uřa d ijj ubarru n iɛeskariyyen, uca uzzřen ɣarsen. Ařami ẓrin nitni akumandar d řɛeskar, ssbedden ad wten Bulus. 33 Ařami ɣares dd-iqarreb ukumandar, iṭṭef i-t, yumur ad t carfen s tnayen n snaseř, xenni isseqsa min iɛna netta d min igga. ■ 34 Jar řɣaci aqa din ijjen ittřaɣa ammu u wenneɣni ammu. Řami war izemmar ad issen tidett zi ssibbet n lharaj, yumur ad t awyen ɣar lqecla. 35 Ařami dd-yiweḍ Bulus ɣar ddruj, imsar belli iɛeskariyyen arbun t x ssbab n lɛunf n řgens, 36 minzi aṭṭas n iwdan tuɣa ḍeffaren t, sɣuyyun, nnan: “Kksem t zeg webrid!” ■
37 Ařami dd-iqarreb ɣar lqecla, ḥima ad tt yadef, inna Bulus i ukumandar: “Ma iḥiqq ayi ad ac iniɣ ca?” Inna as: “Ma tessned Tayunanit? 38 Ma war teǧid cek d Amiṣri wenni iggin aɣuwweɣ qbeř ussan-a, indeh akides arebɛa ařaf n yeryazen d iqettařen ɣar řexřa?” 39 Inna as Bulus: “Necc d aryaz d Uday zi Tarsus, ict n tendint ittwassnen di Kilikiya mani dd-xeřqeɣ. Necc ttareɣ zzayek ttesriḥ ḥima ad ssiwřeɣ ɣar řgens.” ■ 40 Umi d as ismeḥ, ibedd Bulus x ddruj, iceyyar s ufus ɣarsen, uca umi arsin qaɛ, issiweř akidsen s iřes n Tɛibranit, inna asen ...