Cawul deg webrid ɣar Dimacq
9
1 Maca Cawul tuɣa ɛad ittṣuḍ s uɛeddi d řmewt ḍidd n imeḥḍaren n Siditneɣ. ■ 2 Ittar zeg arrays n ikehhanen tibratin i temzidawin n Dimacq, maḥend, mařa yufa ca n yinni iḍeffaren ‘Abrid’, iryazen niɣ timɣarin, izemmar ad ten icedd u ad ten dd-indeh ɣar Urcalim. 3 Řami din iruḥ, imsar, am tuɣa ittqarrab ɣar Dimacq, tařɣa-dd xas deɣya ict n tfawt zeg ujenna. ■ 4 Iwḍa ɣar temmurt, xenni isřa i ict n tmijja teqqar as: “Cawul, Cawul mayemmi xafi tdarraced? Tzeyyared x yixef nnek umi teccated di sřek n buykucḍan.” 5 Yarra-dd, inna: “Min teɛnid Cek, a Sidi?” Inna as Siditneɣ: “Aqa d NECC, Yeccu wenni x tdarrced. ■ 6 Kkar, tudfed ɣar tendint, ad ac ittwanna min ittxeṣṣa ad tegged!” ■ 7 Uca iryazen inni kis isafaren, bedden ttbehten, minzi nitni sřin tmijja, maca war ẓrin ḥed. ■
8 Ikkar-dd Cawul zi temmurt, waxxa arzment tiṭṭawin nnes, war iqqim izemmar ad ittwara u nitni gewwden t zeg ufus, nedhen t ɣar Dimacq. 9 Třata n wussan tuɣa war ittwiři, war icci, war iswi.
10 Tuɣa din di Dimacq ijj n umeḥḍar qqaren as Ananiyas. SIDI inna as deg ict n tmeẓriwt: “A Ananiyas!” Inna as: “Aq ayi danita, a Sidi inu!”
11 Inna as Siditneɣ: “Kkar, truḥed ɣar webrid umi qqaren ‘Abrid isseggden’, xenni di taddart n Yahuda, seqsa x ijj n weryaz zi Tarsus, qqaren as Cawul, xzar, aqa ittẓaǧa din, ■
12 yusa-dd ɣares deg ijj n tmeẓriwt, aqa ijj n weryaz qqaren as Ananiyas yudef-dd uca issars xas afus nnes ḥima ad idweř ittwařa ɛawed.”
13 Yarra-dd Ananiyas: “A Sidi, aqa sřiɣ aṭṭas n tmesřayin x weryaz-a mecḥař d řɣar i igga deg imqeddasen nnek di Urcalim. ■
14 Aqa da, ɛawed danita ɣares ttesriḥ zeg uɣezdis n imeqqranen n ikehhanen maḥend ad iḥebbes marra inni ittřaɣan x Yisem nnek.”
15 Maca SIDI inna as: “Ruḥ minzi wa aqa-t ɣari d řqecɛet ifarzen ḥima ad yarbu Isem inu ɣar řegnus u ɣar ijeǧiden u jar ayt n Israil, ■
16 minzi ad as ssecneɣ mecḥař ittxeṣṣa as ad iweddeb di ṭṭweɛ n Yisem inu.” ■
17 Iruḥ Ananiyas, yudef ɣar taddart, issars xas afus nnes, inna: “A uma Cawul, aqa Siditneɣ Yeccu, wenni d ac dd-iḍharen deg webrid i zi dd-tusid, issekk ayi-dd ḥima ad tᵉttwařid ɛawed u ad tᵉttwaccured s Arruḥ Iqeddsen.” ■
18 Řexdenni tewḍa-dd ca amecnaw taqcurt zi tiṭṭawin nnes, ttwarzment tiṭṭawin nnes. Ikkar uca ittwaseɣḍeṣ.
Cawul ibda ittbarreḥ s Řexbar Aṣebḥan di Dimacq
19 Umi icca, imḥeḍ uca iqqim ca n wussan ak-d imeḥḍaren di Dimacq. 20 Řexdenni ibda ittbarreḥ di temzida n Wudayen x Yeccu, belli Netta d Mmis n AREBBI. 21 Marra inni tuɣa ittesřan, ttbehten, qqaren: “Ma war iǧi d wanita i tuɣa ittareddǧen marra inni tuɣa ittřaɣan s Yisem-a di Urcalim, u ma war iǧi d wanita i dd-ittwassekken ɛad danita zi ssibbet d ict, maḥend ad ten icarf u ad ten igewwed ɣar imeqqranen n ikehhanen!” 22 Cawul tuɣa yarenni di jjehd, issedhec Udayen inni izeddɣen di Dimacq am d asen isscen belli Yeccu wanita d Lmasiḥ.
23 Umi ɛdun wussan, ggin Wudayen ict n texceft ḥima ad t nɣen. 24 Maca taḥiřet nsen i zi tuɣa arezzun ad t nɣen, tᵉttwassargeb i Cawul, maɣar nitni tuɣa ḥeṭṭan tiwwura n tendint s uziř u s ǧiřet, maḥend ad awḍen ad t nɣen. ■ 25 Maca imeḥḍaren nnes ggin t deg ict n tsuǧet uca ssehwan t zi řḥiḍ s ǧiřet. ■
Cawul di Urcalim
26 Yuyur netta ɣar Urcalim, yarzu ad imun ak-d imeḥḍaren, maca nitni marra ggʷeden zzayes, war ttiqqen ca belli netta idweř d ameḥḍar. ■ 27 Maca Barnaba iksi t ɣares uca indeh i-t ɣar rrusul uca Cawul ixebbar i-ten mammec iẓra SIDI deg webrid u mammec kis issiweř u mammec tuɣa ittbarreḥ s teryast s Yisem n Yeccu di Dimacq. □ ■ 28 Tuɣa iqqim akidsen ittadef itteffeɣ zi Urcalim, 29 uca ittbarreḥ s teryast s Yisem n Yeccu, ittqacaḥ ak-d Wudayen inni issawařen iřes n Tyunanit, maca nitni arzun ad t nɣen. 30 Umi ssnen tawmat man aya, nedhen t ɣar Qayṣariya uca sekken t ssenni ɣar Tarsus.
31 Tamesmunt di marra Yahudiyya d Ljalil d Samarya tuɣa dayes řehna, tᵉttwabna di l’iman uca teggur di tiggʷudi n AREBBI u s ufewwej n Arruḥ Iqeddsen, uca truḥ di tyumi.
Asgenfi n Iniyas
32 Řami tuɣa Cimɛun iggur di tneddam, ihwa-dd ɣar imqeddasen inni izeddɣen di tendint n Lidda. 33 Yufa din ijj n bnadem, qqaren as Iniyas, izzeř di qama u teɛdu xas tmenya n iseggʷusa d aneɛḍab. 34 Inna as Cimɛun: “A Iniyas, Yeccu Lmasiḥ ad cek issgenfa. Kkar, tessud i ixef nnek!” Řexdenni ikkar deɣya. 35 Uca ẓrin t marra imezdaɣ n Lidda d Sarun uca dewřen-dd ɣar AREBBI.
Asnekkar n Tabita
36 Tuɣa di tendint n Yaffa ict n tmeḥḍart, qqaren as Tabita, maca s yiřes n Tyunanit qqaren as ‘Durka’, ixs ad yini ‘Ɣazala’. Ta tuɣa teccur s řexdayem tiṣebḥanin i tuɣa tᵉttegg u s ṣṣdaqi i tuɣa tessuffuɣ. 37 Deg wussan nni tehřec uca temmut. Sirden tt uca ssarsen tt di tɣurfet. 38 Maca imeḥḍaren sřin belli Cimɛun aqa-t di tendint n Lidda, tenni zzat n Yaffa. Xenni ssekken nitni tnayen n yeryazen ḥima ad zzayes ḥeccmen: “War ttɛeṭṭař maḥend ad kidsen tuyured ɣarneɣ!” 39 Ikkar Cimɛun, yuyur akidsen. Řami dd-yiweḍ, nedhen t ɣar tɣurfet sennej. Beddent-i-dd ɣares marra tijjař, runt, sscanent as tcamirat d ijeǧaben i tuɣa tᵉttegg Tabita ařami tuɣa-tt ɛad teddar. □
40 Maca Cimɛun issuffeɣ i-tent marra ɣar barra, isjed, iẓẓuǧ uca inneqřeb-dd ɣar řxecbet, inna: “Tabita, kkar!” Nettat tarzem tiṭṭawin nnes uca řami teẓra Cimɛun, teqqim. 41 Isswiẓẓeḍ ɣares afus nnes, issnekkar i-tt-i-d, xenni iřaɣa-dd x imqeddasen d tijjař, isscen asen tt, belli aqa teddar.
42 Iffeɣ-dd řexbar-a ɣar tendint-a marra uca aṭṭas umnen di Siditneɣ. 43 Uca iqqim di Yaffa, war iǧi drus n wussan, ɣar ijj n weryaz wenni tuɣa iɛeddeř iřmawen, qqaren as Cimɛun.