Awařen n Yeccu x řemřac d waǧaf
19
1 Ařami ikemmeř Yeccu awařen-a, iffeɣ zi Ljalil, yiweḍ ɣar jjwayeh n temmurt n Yahudiyya tinni iǧan x ujemmaḍ n yeɣzar n L'Urdun. ■ 2 Aqa iḍfar i-t ijj n řɣaci d ameqqran, issgenfa ten dinni. 3 Usin-dd ɣares uřa d Ifarisiyyen, tuɣa arezzun ad t jarrben, nnan as: “Ma iḥeǧeř i weryaz ad iǧef i temɣart nnes amenni waha?” ■ 4 Yarra-dd xasen, inna: “Ma war teɣrim ca belli wenni ten dd-ixeřqen, ixřeq i-ten-dd zeg umezwaru d awtem d tewtemt, ■ 5 uca aqa inna: ‘S uyenni ad ismeḥ weryaz di babas d yemmas, ad iqqen ɣar temɣart nnes, uca tnayen idsen nni ad iřin d ict n arrimet’? ■ 6 Ammu war ttiřin ɛad d tnayen, maca ad iřin d ict n arrimet. Min issmun AREBBI, war t ibeṭṭi bnadem.” ■ 7 Nnan as: “Mayemmi yumur Musa xenni maḥend ad iwc tabrat n waǧaf, ḥima ad as iǧef?” ■ 8 Inna asen: “Musa ijja kenniw ad teǧfem i temɣarin nwem zi ssibbet n řeqsaḥet n wuřawen nwem, maca war iǧi ammu zeg umezwaru. 9 Maca Necc ad awem iniɣ: Wenni i ɣa iǧfen i temɣart nnes, war iǧi di ssibbet n farq-ccɣeř, uca ad imřec icten nneɣni, aqa netta izenna, u wenni i ɣa imeřcen tamɣart tenni iǧfen, aqa uřa d netta izenna.” ■ 10 Imeḥḍaren nnes nnan as: “Mařa ammu i teǧa tmesřact jar bnadem d temɣart nnes, xenni nhřa ma ad imřec.”
11 Maca Netta inna asen: “Maci marra zemmaren ad qebřen awař-a mɣir inni umi temmewc. ■
12 Minzi aqa din inni ittwaqessen inni dd-ittwaxeřqen ammu zeg uɛeddis n yemmatsen, uca aqa din inni ittwaqessen zeg ifassen n iwdan uca aqa din inni iqessen ixef nsen di ṭṭweɛ n Tgeldit n ijenwan. Wenni izemmaren ad t iqbeř, ejj i-t ad t iqbeř.”
Yeccu ibarek iḥenjiren imeẓyanen
13 Řexdenni iwyen as-dd iḥenjiren imeẓyanen maḥend ad xasen issars afus nnes uca ad asen iksi s řmeɛruf, maca imeḥḍaren nnes webbxen ten. ■
14 Maca Yeccu inna: “Jjem iḥenjiren ad ɣari dd-asen, war ten mennɛem ca, minzi Tageldit n ijenwan n yinni amecnaw nitni.” ■
15 Issars xasen afus nnes uca iruḥ ssenni.
Yeccu ak-d webřiɣ wenni d bab n wagřa
16 Uca xzar, iqarreb-dd ijjen, inna as: “A Amseɣɣar Aṣebḥan, min ɣa ggeɣ d aṣebḥan ḥima ad ɣari tiři Tudart ittduman?” ■
17 Inna as Yeccu: “Mayemmi i d ayi třaɣid ‘Aṣebḥan’? War iǧi ḥed d aṣebḥan mɣir Ijjen, aqa-t d AREBBI. Maca mařa texsed ad tadfed ɣar Tudart, ṭṭef di tweṣṣa.”
18 Inna as: “Man tina?” Inna as Yeccu: “War neqq, war zenni, war tticar, war cehhed s ẓur, ■
19 weqqar babac d yemmac uca ad texsed amqarreb nnek am ixef nnek.” ■ 20 Abřiɣ inna as: “Aqa ḍfareɣ timesřayin-a marra zi temẓi inu. Min d ayi ittxiṣṣen ɛad?” 21 Yeccu inna as: “Mařa texsed ad tiřid tkemmřed, ruḥ, zenz marra min ɣarek, ewc i-t i imezřaḍ uca ad ɣarek yiři ijj n řkenz deg ujenna, xenni as-dd, ḍfar ayi-dd.” ■ 22 Řami isřa webřiɣ awař-a, iruḥ icḍen, minzi tuɣa ɣares aṭṭas n wagřa.
23 Xas uca inna Yeccu i imeḥḍaren nnes: “S tidett, Necc ad awem iniɣ, aqa yewɛar x bab n wagřa ad yadef ɣar Tgeldit n ijenwan. ■ 24 Uca Necc ad awem iniɣ ɛawed, aqa ihwen i weřɣem ad yekk zi tiṭṭ n tsineft x bu wagřa ad yadef ɣar Tgeldit n AREBBI.” 25 Umi tt sřin imeḥḍaren nnes, nnxeřɛen, nnan: “Wi izemmaren xenni ad ittwassenjem ɛad?” 26 Am tuɣa daysen ixezzar Yeccu, inna asen: “Ɣar iwdan war izemmar, maca ɣar AREBBI kuřci di tzemmar nnes!” ■
27 Xenni yarra-dd Buṭrus, inna as: “Xzar, aqa neccin nejja kuřci, neḍfar i Cek-dd. Min ɣarneɣ i ɣa yiřin?” ■ 28 Yeccu inna asen: “S tidett, Necc ad awem iniɣ, aqa xmi i ɣa tedweř marra ddunect d jdid, xmi i ɣa iqqim Mmis n bnadem x řɛarc n uɛuǧi nnes, aqa uřa d kenniw inni d ayi dd-iḍfaren ad teqqimem x tenɛac n řekrasi igellden ḥima ad tḥekmem x tenɛac n tqebbař n ayt n Israil. ■ 29 Kuř ijjen wenni isemḥen di tudrin niɣ deg aytmas niɣ di yessmas niɣ di babas niɣ deg yemmas niɣ di temɣart nnes d tarwa nnes uřa di tneddam di ṭṭweɛ n Yisem inu, ad iksi mya n tseqqar uca ad iwart Tudart ittduman. ■ 30 Maca aṭṭas n yinni iǧan d imezwura, ad iřin d ineggura uca aṭṭas n ineggura ad iřin d imezwura.” ■