Man wen iǧan d ameqqran di Tgeldit n ijenwan?
18
1 Di tsaɛɛet nni usin-dd imeḥḍaren ɣar Yeccu, nnan: “S tidett, man wen iǧan d ameqqran di Tgeldit n ijenwan?” ■ 2 Yeccu iřaɣa-dd x ijj n uḥenjir ɣares, issbedd i-t di řwest nsen, 3 inna: “S tidett Necc ad awem iniɣ: Mařa war ttubem u tdewřem am iḥenjiren, ɛemmarṣ ad tadfem ɣar Tgeldit n ijenwan. ■ 4 Wenni i ɣa issmeẓyen ixef nnes amecnaw aḥenjir-a, aqa d wenni d ameqqran di Tgeldit n ijenwan, ■ 5 u wenni i ɣa iqebřen ijjen i iǧan am uḥenjir-a s Yisem inu, iqebbeř ayi. ■ Aɛřam ɣar řgens x min i ɣa iɣarren i ddenb
6 Maca kuř ijjen wenni i ɣa issenqarḍen ijjen zeg imeẓyanen-a i zzayi ittamnen, iḥřa as ad as tᵉttwagg ict n teṣḍart n tsirt tedqeř ɣar yiri nnes, ad ittwasɣareq di řaǧaɣ n řebḥar. ■ 7 Uct x ddunect x ssibbet n tɛenkrifin. Iwa ittxeṣṣa ad dd-asent tɛenkrifin, maca amcum n bnadem nni itteggen taɛenkrift. ■ 8 Mařa isseɣwa cek ufus nnek niɣ aḍar nnek, xenni qess i-ten, nḍar i-ten xak. Iḥřa ac ad tadfed ɣar Tudart d aqejdaḥ niɣ d ameɛḍuř x umenḍar s tnayen n ifassen niɣ s tnayen n iḍaren di tmessi i war ixessyen i řebda. ■ 9 Mařa tesseɣwa cek tiṭṭ nnek, xenni qeřɛ i-tt, nḍar i-tt xak, iḥřa ac ad tadfed ɣar Tudart s ict n tiṭṭ x uweṭṭu di jᵉhennama iccuren s tmessi s tnayen n tiṭṭawin.
Amedya n wuǧi iweddaren
10 Ɣarwem ad tesseḥqarem ijjen zeg imeẓyanen-a. Minzi Necc ad awem iniɣ, aqa lmalakat nsen deg ijenwan aqa řebda ttwařant tifras n Baba i iǧan deg ijenwan. ■
11 Minzi Mmis n bnadem yusa-dd ḥima ad issenjem min iweddaren. ■
12 Mammec i d awem ittɣiř? Mařa din ca n bnadem ɣares mya n wuǧi uca ijjen zzaysen iweddar, ma xenni war ittejji tesɛa u-tesɛin deg idurar, ad iraḥ ad yarzu x wenni iweddaren? ■
13 U mařa yufa i-t, s tidett Necc ad awem iniɣ, ad zzayes ifarḥ ktar zi min ɣa ifarḥ zi tesɛa u-tesɛin inni war iweddaren.
14 Ammu uřa d Babatwem i iǧan deg ijenwan war ixs ad iweddar uřa d ijj zeg imeẓyanen-a.”
Ddenb n ijj n uma
15 “Mařa ixḍa umac akidek, ruḥ ɣares, webbex i-t mɣir jar ac d jar as waha. Mařa isřa ɣarek, aqa tarbeḥed umac. ■
16 Maca mařa war ɣarek isři ca, awi akidek ca n ijjen nneɣni niɣ tnayen ḥima x uqemmum n tnayen niɣ n třata n řechud ad ittwaḍmen wawař marra. ■
17 Mařa netta war ɣarsen isři, xenni ini tt i tmesmunt n řmuminin uca mařa war isři uřa ɣar tmesmunt, xenni ejj i-t ad ɣarwem yiři am ijj n bu-ḍḍariba niɣ am ijj n lkuffar. ■
18 S tidett Necc ad awem iniɣ: Marra min ɣa tceddem di temmurt, ad yiři icedd deg ujenna, uca marra min ɣa tfesyem di temmurt, ad yiři ifsi deg ujenna. ■
19 Ad awem iniɣ ɛawed, mařa tnayen n iwdan ad mmsetfaqen x temmurt x ca n řḥajjet i ɣa ttaren, aqa d man aya d asen i ɣa ittwagg zi Baba i iǧan deg ijenwan. 20 Minzi mani i ɣa munen tnayen niɣ třata s Yisem inu, Necc ad din iřiɣ di řwest nsen.” ■
Amedya n umsexxar aɛeffan
21 Řexdenni yusa-dd ɣares Buṭrus, inna: “A Sidi, mecḥař n twařawin i ɣa ixḍa akidi uma u necc ad as samḥeɣ? Ma ař sebɛa n twařawin?” ■ 22 Inna as Yeccu: “War d ac qqareɣ ca ař sebɛa, maca ař sebɛin di sebɛa n imuren! ■ 23 S uyenni Tageldit n ijenwan tᵉttawi-dd deg ijj n ujeǧid i ixsen ad yegg řeḥsab ak-d imsexxaren nnes. 24 Umi ibda ad imseḥsab, iwyen-dd ɣares ijj n bnadem itturs as ɛecra-ařaf n talintat, ɛřaḥař settin milyun dinar. 25 Am war tuɣi ɣares min zi ɣa yarr amarwas, yumur bab nnes ḥima ad ittwammenz, netta d temɣart nnes d tarwa nnes d marra min ɣares, ḥima ad ittwaxeǧeṣ umarwas. ■ 26 Iwḍa as umsexxar nni ɣar iḍaren, ittar, inna: ‘A sidi, ṣbar xafi, ad ac arreɣ marra.’ 27 Aqa izziǧez as bab n umsexxar nni, iḍřeq as uca isamḥ as deg umarwas.
28 Řami dd-iffeɣ umsexxar nni, yufa ijjen zeg inni tuɣa d imsexxaren akides u wanita itturs as mya n dinar. Iṭṭef i-t, icebbar as deg yiri, inna: ‘Xeǧeṣ min d ac tturseɣ!’ 29 Iwḍa-y-as umsexxar amɛacar nni ɣar iḍaren, ittḥeccem i-t, iqqar: ‘Ṣbar xafi, ad ac arreɣ marra’. 30 Maca netta war ixs, iruḥ inḍar i-t di řeḥbes ař dd ɣa yarr amarwas.
31 Řami ẓřin imsexxaren imɛacaren nnes min tuɣa imsaren, ceḍnen aṭṭas uca ruḥen, nnan tt i bab nsen. 32 Uca iřaɣa-dd xas sidis, inna as: ‘A amsexxar aɛeffan, marra min d ac tturseɣ, samḥeɣ ac minzi tᵉttared ayi. 33 Ma war iǧi zeɛma uřa d cek xak ad ac izziǧez wenni d amsexxar nnek amɛacar amecnaw mammec i d ayi tezziǧed cek?’ 34 Xenni ixeyyeq sidis, isseɛdu t deg ifassen n imɛaddaben ař ɣa ixeǧeṣ marra min dayes d amarwas. 35 Ammu i ɣa yegg Baba wenni iǧan deg ujenna i kenniw, mařa kenniw war tsimiḥem kuř ijjen zzaywem i umas ixeṭṭan nnes s wuřawen.” ■