Yeccu d Yuḥanna Amseɣḍaṣ
11
1 Awarni řami ikemmeř Yeccu řumur nnes i tenɛac n imeḥḍaren nnes, yuyur ssenni ḥima ad isseřmed u ad ibarreḥ di tneddam nsen. 2 Řami tuɣa Yuḥanna ittesřa di řeḥbes x řexdayem n Lmasiḥ, issekk ca zeg imeḥḍaren nnes. ■ 3 Inna as: “Ma d Cek d wenni dd ɣa yasen niɣ ad nraja ijjen nneɣni?”
4 Yarra-dd Yeccu, inna asen: “Ruḥem, tɛawdem i Yuḥanna min tesřam d min teẓrim! 5 Aqa idarɣařen ttwařan, ineɛḍaben gguren d yenni di iǧa řbarṣ ttwasizdigen, idehcar dewřen ttesřan, imettinen ttwasnekkaren-dd u Řexbar Aṣebḥan ittwabarraḥ i imezřaḍ. ■ 6 Sseɛd n wenni war d ayi ittendrafen.”
7 Řami uyuren ina, ibda Yeccu issawař ak-d řɣaci x Yuḥanna, inna: “Min ɣar dd-teffɣem ɣar řexřa maḥend ad t tẓarem? Ma ɣar ijj n uɣanim issenhezza t usemmiḍ? ■ 8 Maca min ɣar dd-teffɣem ɣar řexřa maḥend ad t tẓarem? Ma ɣar ijj n bnadem s warruḍ yarḍeb? Xzar, inni yarrḍen arruḍ iɣřan yarḍeb, aqa aten di tudrin n ujeǧid. 9 Min ɣar dd-teffɣem xenni maḥend ad t tẓarem? Ijj n unabi? Wah, Necc ad awem iniɣ, aqa d ameqqran ɛad x unabi.
10 Aqa d wa d wenni i xef ittwari wawař-a: ‘Xẓar, ad dd-ssekkeɣ areqqas inu zzat i wudem nnek, wenni i ɣa isswejden abrid nnek zzatek.’ ■
11 S tidett, Necc ad awem iniɣ, jar inni dd-ittwaxeřqen zi temɣarin, war dd-iffiɣ uřa d ijj d ameqqran x Yuḥanna Amseɣḍaṣ, maca ameẓyan di Tgeldit n ijenwan d ameqqran xas.
12 Zeg wussan n Yuḥanna Amseɣḍaṣ ař iḍa tᵉttwandeh Tgeldit n ijenwan am dayes tteggen lɛunf, uca ayt n bu-řexcunect ttᵉṭṭfen tt. ■
13 Minzi marra inabiyyen d wedlis ittwannḍen n Ccariɛa tuɣa ttnabban ař dd-yas Yuḥanna. □
14 Mařa texsem ad tt tqebřem, aqa wanita d Iliya wenni dd ɣa yasen. ■
15 Wenni ɣar iǧa imezzuɣen i useǧi ad iseř.”
16 “Wi ak-d i ɣa ssemquddeɣ jjiř-a? Aqa-t amecnaw iḥenjiren iqqimen di řeswaq ttřaɣan x imeddukkař nsen, ■
17 qqaren: ‘Aqa nẓemmar awem, kenniw war tecḍiḥem. Aqa nɣennej ijj n weẓri n wecḍan i kenniw, maca war tecḍinem.’
18 Maɣar yusa-dd Yuḥanna, war ittett, war isess, uca qqaren nitni: ‘Dayes ijj n řaryaḥ aɛeffan!’ ■
19 Aqa Mmis n bnadem yusa-dd, ittᵉtt, isess, uca nitni qqaren: ‘Aqa din bnadem iřhef x macca d binu, netta d ameddukkeř n ayt n ḍḍariba d imednab!’ Maca tiɣit tᵉttwasegged s řexdayem nnes.”
Řḥukm x tneddam i war yuminen
20 Řexdenni ibda ittwebbex tineddam i di igga azyen ameqqran n řeɛjayeb nnes, minzi nitenti war tubent ca. ■ 21 “Uct xam, a Xurazin, uct xam, a Baytṣayda! Mři tuɣa ttwaggent di Ṣur d Ṣaydun řeɛjayeb ijehden tinni ittwaggen daykent, iři aqa tubent aṭṭas zeg wami s txancet n wecḍan d iɣɣeḍ x izeǧifen nsent. ■ 22 Maca Necc ad awem iniɣ: Ad yiři řḥař i tendint n Ṣur d Ṣaydun ihwen zi řḥař nwem deg wass n lḥisab. ■ 23 I cem, a tandint n Kafarnaḥum, tenni ittwasgeɛɛden ař ajenna? Ɣar řaxart i ɣar d ɣa tehwid. Minzi mařa ttwaggent di Sadum řeɛjayeb ijehden i dayem ittwaggen, iři aqa teqqim ař ass n yiḍa. 24 Maca Necc ad awem iniɣ, ad yiři řḥař i temmurt n Sadum ihwen zi řḥař nnem deg wass n lḥisab.” ■
Taẓaǧit n Yeccu
25 Di tsaɛɛet nni ibda Yeccu ad yini: “Ḥemdeɣ Cek a Baba, Sidi n ujenna d temmurt, minzi tessnuffared aya x imiɣisen d imusnawen, maca tessaregbed aya i iḥenjiren. ■ 26 Wah, a Baba, minzi d wa d arḍa i Cek. 27 Marra min iǧan immewc ayi-dd zi Baba, uca uřa d ijj war issin Tamemmit mɣir Tababat, uca uřa d ijj war issin Tababat mɣir Tamemmit u wi umi ixs Tmemmit ad t issargeb. ■ 28 Asem-dd ɣari marra kenniw, inni yuḥřen d yenni yarbun ddqeř, ad awem wceɣ arraḥet,
29 ksim-dd azayřu inu xawem, řemdem zzayi, minzi Necc d amhin d amwaḍeɛ n wuř uca ad tafem arraḥet i řeɛmur nwem. ■ 30 Minzi azayřu d řeḥmeř inu fsusen.” ■