Tařaɣit n Yeccu Lmasih x tenɛac n rrusul
10
1 Iřaɣa Yeccu x tenɛac n imeḥḍaren nnes, iwca asen ṣṣulṭa ḥima ad ssuffɣen řaryaḥ imengas u ḥima ad ssgenfan marra řehřacat d řeɛyubat. ■ 2 Ismawen n tenɛac n rrusul d yina: amezwaru nsen Cimɛun umi qqaren Buṭrus, ixs ad yini ‘D Aẓru’, d umas Andrawus, d Yaɛqub, mmis n Zabdi, d umas Yuḥanna, □ 3 d Filippus d Bar-Tulumawus, Tuma d Matta, ijj n bu-ḍḍariba, d Yaɛqub, mmis n Ḥalfa, d Labbawus, umi qqaren Taddawus, 4 d Cimɛun Amɛessab, d Yahuda Isxariyuṭi wenni t isellmen. 5 Yeccu issekk tenɛac-a, yumur i-ten, inna: “War ttruḥem ca x webrid n řegnus, war ttadfem ca ɣar tendint n Isamariyyen, 6 maca ḥsen ad traḥem ɣar wuǧi iweddaren n taddart n Israil. ■ 7 Xmi i ɣa traḥem, barrḥem am teqqarem: ‘Tageldit n ijenwan aqa tiweḍ-dd!’ ■ 8 Sgenfam imehřac, sizdgem inni di iǧa řbarṣ, suffɣem ccwaṭen. Kenniw teksim břa ca, xenni wcem tt břa ca. ■ 9 War kessim ca wureɣ uřa d nnuqart uřa d nnḥas deg ibuyas nwem, ■ 10 war kessim ca tacyart i webrid uřa d tnayen n tcamirat uřa d sandaliyat uřa d taɣɣarct, minzi axeddam isdaheǧ macca nnes. ■
11 Man tandint niɣ dcar i ɣa tadfem, arzum wi dayes isdaheǧ, uca qqimem din ař d traḥem. ■
12 Mařa tudfem ɣar taddart, seǧmem x aytbab nnes di řehna.
13 Mařa taddart tesdaheǧ, jjem xas řehna nwem, mařa war t tesdiheǧ, xenni řehna nwem ad ɣarwem dd-iɛqeb.
14 Mařa tufim ca n yijjen war kenniw iqebbeř u war ittesři i wawařen nwem, ffɣem zi taddart niɣ zi tendint nni, zzerzem taɛejjajt zeg iḍaren nwem. ■
15 S tidett, Necc ad awem iniɣ: Ad yiři řḥař i temmurt n Sadum d Ɛamurra ihwen zi tendint nni deg wass n lḥisab.” ■
Yeccu issawař x řeḥṣaret d udarrec
16 “Xzarem, řexxu ad kenniw ssekkeɣ am uǧi di řwest n wuccanen. Iřim tfettnem amecnaw ifiɣran u ɣeffřem am idbiren. ■
17 Maca ḥḍam ixef nwem zeg iwdan, minzi nitni ad kenniw sellmen i taddart n ccreɛ, ad kenniw hettken s urekkuḍ di temzidawin nsen, ■
18 ad kenniw nedhen zzat i řḥukkam d zzat i ijeǧiden di ssibbet inu, ḥima ad tiřim d cchadet i nitni uřa i řegnus. ■
19 Mařa sellmen kenniw, war kessim ca s wemnus mammec d min ɣa tessiwřem, minzi ad awem immewc di tsaɛɛet nni min ittxeṣṣa ad tinim. ■ 20 Maɣar war iǧi d kenniw inni issawařen, maca d Arruḥ n Babatwem d Netta i daywem issawařen. 21 Umas ad isellem umas ɣar řmewt u babas mmis, uca ad kkaren tarwa d aɣezdis i lwalidin nsen, ad ten nɣen. ■ 22 Ad kenniw carhen marra idsen x ssibbet n Yisem inu, maca wenni i ɣa iṣbaren ař aneggaru ad ittwassenjem. ■ 23 Mařa darrcen xawem di tendint-a, arewřem ɣar tenneɣnit. S tidett, Necc ad awem iniɣ: kenniw war tᵉttekkem ca x marra tineddam n Israil ař dd ɣa yas Mmis n bnadem.” ■
24 “War iǧi umeḥḍar yuɛřa x umseřmad nnes, uřa d umsexxar x bab nnes. ■ 25 Ikfa i umeḥḍar ad yiři am umseřmad nnes u amsexxar am bab nnes. Mařa řaɣan as i bab n taddart ‘Bᵉɛalzabul’, ixs ad yini ‘ibřis’, mecḥař dd ɣa immarennyen zeg aytbab n taddart nnes! ■ 26 War tteggʷedem ca zzaysen. Minzi war din min idřin ad iqqim war ittwaɛarri, uřa war din min inuffaren ad iqqim war ittwissen.” ■
27 “Min d awem qqareɣ di taǧest, inim t di tfawt, min tesřim, qqaren t deg imezzuɣen nwem, barrḥem zzayes x tzeɣwin. 28 War tteggʷedem ca zeg inni ineqqen arrimet, maca war zemmaren ad nɣen řeɛmar. Ggʷedem d amezwaru zeg wenni izemmaren ad isshellek řeɛmar d arrimet di jahennama. ■ 29 Ma war ttmenzin tnayen n ẓẓawec s yijj n uṣuldi n nnḥas? Uřa d ijj zzaysen war dd-iweṭṭi ca x temmurt břa Babatwem, 30 uca uřa d iẓuṭṭan n ucuwwaf n uzeǧif nwem ttwaḥessben marra. ■ 31 S uyenni war tteggʷedem ca, aqa kenniw teɛdum ẓẓawec aṭṭas. 32 Kuř ijjen wenni zzayi i ɣa icehden zzat i iwdan, uřa d Necc ad zzayes cehdeɣ zzat i Baba i iǧan deg ijenwan. ■ 33 Maca wenni d ayi ɣa inkaren zzat i iwdan, uřa d Necc ad t nkareɣ zzat i Baba i iǧan deg ijenwan.”
34 “War ttɣiřem ca belli usiɣ-dd ḥima ad awyeɣ řehna i ddunect. Necc war dd-usiɣ ca ḥima ad awyeɣ řehna maca ssif. ■ 35 Usiɣ-dd ḥima ad bḍiɣ aryaz x babas, d yeǧis x yemmas, d tesřit x řallas. ■ 36 Uca aytbab n taddart n bnadem ad dewřen d řɛedyan nnes. ■ 37 Wenni ittexsen babas niɣ d yemmas xafi, war d ayi isdiheǧ ca, uca wenni ittexsen mmis niɣ d yeǧis xafi, war d ayi isdiheǧ ca. ■ 38 Wenni war ikessin ṣṣalib nnes uca ad ayi dd-iḍfar, aqa netta war d ayi isdiheǧ ca. □ ■ 39 Wenni i ɣa yafen tudart nnes ad tt ixsar, d wenni i ɣa ixsaren tudart nnes di ṭṭweɛ inu ad tt yaf. ■
40 Wenni kenniw i ɣa iqebřen, iqebbeř ayi, u wenni d ayi ɣa iqebřen, iqbeř wenni d ayi dd-issekken. ■
41 Wenni i ɣa iqebřen anabi s yisem n unabi, ad iṭṭef řmunet zeg ufus n Unabi, d wenni i ɣa iqebřen amseggad s Yisem n Umseggad, ad iṭṭef řmunet zeg ufus n Umseggad. ■ 42 Wenni i ɣa iwcen i yijjen zeg ina imeẓyanen, waxxa mɣir ijj n řkas n waman d asemmaḍ waha, minzi wanita d ameḥḍar, s tidett, Necc ad awem iniɣ, war d as tᵉttriḥ řmunet nnes ɛemmarṣ.” ■