Řeḥṣaret d ufekki n Urcalim
12
1 Řḥukm issaggʷaden n SIDI x Israil. SIDI issawař, Netta d wenni ittbezzaɛen ajenna u issrusa dsas n temmurt u issbedda arruḥ n bnadem di daxeř nnes:
2 “Xzarem, Necc ad ggeɣ Urcalim d ṭṭebṣi n udewwex i marra řegnus i d as dd-innḍen uca ad dd-yas ṭṭebṣi nni uřa x Yahuda ɣar řeḥṣaret n Urcalim.
3 Deg wass nni ad imsar aqa Necc ad arreɣ Urcalim d ijj n weẓru ideqřen i marra řegnus. Marra inni yarezzun ad t ssgeɛɛden, ad ssyezmen ixef nsen aṭṭas u marra řegnus n ddunect ad ttwasmunen ḍidd nnes.
4 Deg wass nni, iqqar SIDI, ad wteɣ marra iysan s arjef d imnayen nnes s tubbuheřya, maca ad qqimeɣ arezzmeɣ tiṭṭawin inu x taddart n Yahuda, xmi i ɣa wteɣ marra iysan n řegnus s tuddarɣeč. 5 Imgewwaden n Yahuda ad inin deg wuř nsen: ‘Imezdaɣ n Urcalim ad iřin d jjehd inu s ufus n SIDI n řɛeskarat, AREBBI nsen!’
6 Deg wass nni ad ggeɣ imgewwaden n Yahuda am ijj n řmejmar n tmessi di taffa n ukeccuḍ u am ijj n weṣfeḍ jar tiqebbiḍin n imendi u nitni ad ffzen marra řegnus i d asen dd-innḍen, ɣar yeffus u ɣar uzeřmaḍ, uca Urcalim ad teqqim ɛad deg wemcan nnes, di Urcalim. 7 SIDI ad issenjem amezwar iqiḍan n Yahuda ḥima ccan n taddart n Dawud d ccan n imezdaɣ n Urcalim war iddikkwiř d ameqqran aṭṭas qibač i Yahuda.
8 Deg wass nni ad issduři SIDI imezdaɣ n Urcalim u wenni i ɣa innqarḍen jar asen ad yiři deg wass nni am Dawud, uca taddart n Dawud ad tiři am AREBBI, am Lmalak n SIDI zzat i wudem nsen.
9 Deg wass nni ad imsar, aqa Necc ad rekkzeɣ ad mḥiɣ marra řegnus i dd ɣa yasen i řeḥṣaret ɣar Urcalim.
Ticti n uyejdur n Israil
10 Maca ad farrɣeɣ Arruḥ n arḍa d tẓaǧitin x taddart n Dawud u x imezdaɣ n Urcalim u nitni ad ɣari dd-xẓaren wenni di ssnuqqben, u nitni ad xas wten ayejdur am wtin agejdur x uyenni n mmis u ad xas ceḍnen s terzugi am wenni ittecḍinen x mmis amenzu. ■
11 Deg wass nni ad tiři tɣuyyit n wecḍan temɣar di Urcalim, am tɣuyyit n wecḍan x Hadad-Rimmun di teɣzurt n Majiddun. ■
12 Tammurt ad tesɣuyy zeg wecḍan, kuř řaǧ weḥḥdes.
Řaǧ n taddart n Dawud weḥḥdes d temɣarin nsen weḥḥedsent
u řaǧ n taddart n Natan weḥḥdes d temɣarin nsen weḥḥedsent.
13 Řaǧ n taddart n Lawi weḥḥdes d temɣarin nsen weḥḥedsent,
řaǧ n Cimɛi weḥḥdes d temɣarin nsen weḥḥedsent.
14 Marra řaǧat nneɣni, kuř řaǧ weḥḥdes uřa d timɣarin weḥḥedsent.”