Řḥukm x řɛedyan n Israil
9
1 Řḥukm issaggʷaden n wawař n SIDI x temmurt n Ḥadrax, řḥukm nni yarsan x Dimacq, - maɣar SIDI iḥeṭṭa x bnadem u x marra tiqebbař n Israil - ,
2 uřa x Ḥamat i-tt-dd-iřesqen,
x Ṣur d Ṣidun, waxxa nitenti d timiɣisin aṭṭas.
3 Tebna Ṣur ijj n lburj i yixef nnes
u teyru nnuqart am tɛejjajt
d wureɣ iqquren am ubeǧaɛ n imesraq.
4 Xzar, SIDI ad tt iṭṭef
u ad iwwet lbaraj nnes ɣar řebḥar,
uca ad tt tecc tmessi.
5 Ackelun ad tt tẓar, ad tedweř teggʷed,
ammu uřa d Ɣazza, ad tarjij aṭṭas,
uřa d Ɛaqrun, maɣar ad ifceř uraji nnes.
Ad ittwateḥḥa ujeǧid zi Ɣazza
u tandint n Acqalun war tᵉttwazeddeɣ.
6 Mmis n řeḥram ad izdeɣ di Acdud,
u Necc ad teḥḥiɣ nnfaxet n Ifilisṭiniyyen. □
7 Necc ad ksiɣ idammen zeg uqemmum nnes
uřa d nnɛawat zi jar tiɣmas nnes
u ammu i ɣa iqqim uřa d netta i AREBBI nneɣ.
Netta ad yiři am ijj n wemɣar di Yahuda
u Ɛaqrun am ijj n Uyabusi.
8 Necc ad ggeɣ řmargeḥ inu deg wenneḍ n Taddart inu,
ḍidd n wenni i ɣa iẓwan u ḍidd n wenni dd ɣa idewřen,
ḥima wenni iḥeṣṣaren war xas iɛeddu ca ɛad,
maɣar řexxu ẓřiɣ t s tiṭṭawin inu.
Ajeǧid i dd ɣa yasen
9 Farḥ, a tayeǧit Ṣihyun, sřiwřew, a tayeǧit Urcalim!
Xzar, Ajeǧid nnem yusa-dd ɣarem,
Netta d amsegged u aqa iwjed ḥima ad issenjem,
Netta d amwaḍeɛ u inya x ijj n weɣyuř,
x ijj n wezɛuq, asnus n ict n teɣyuč.
10 Necc ad qḍiɣ ikarruten n umenɣi zi Ifrayim
uřa d iysan zi Urcalim.
Ad ittwaqřeɛ uřa d řqews.
Netta ad ibarreḥ s řehna i regnus
u ṣṣulṭa nnes ad tiři zi řebḥar ař řebḥar
u zeg iɣzar n Lfuraṭ ař ineggura n temmurt.
11 Uřa d cem, a yeǧis n Ṣihyun, zi ssibbet n idammen n Řɛahd nnem
fekkeɣ-dd imeḥbas nnem zeg wanu yuẓɣen i war di ǧin waman. ■
12 Ɛeqbem ɣar lburj nwem, kenniw imeḥbas inni ɣar iǧa usitem.
Uřa d ass-a Necc ttbarrḥeɣ: Aqa Necc ad ɣarem dd-arreɣ tnayen n tseqqar,
13 maɣar Necc ad meḥḍeɣ Yahuda am ijj n řqews
u ad ggeɣ Ifrayim x řqews.
Necc ad ssekkareɣ iḥenjiren nnem, a Ṣihyun,
ḍidd i iḥenjiren nnek, a Lyunan,
u Necc ad cek arreɣ amecnaw ssif n ijj n bu-teɣruḍt. □
SIDI ad issenjem řgens nnes
14 SIDI ad iban sennej nsen
u fřitcat nnes ad iřint ttwessgent am wassam
u Sidi inu, SIDI, ad iṣuḍ deg uyicc n icarri,
ad yuyur ak-d tḥaryaḍin n uṣemmiḍ n ljanub. ■
15 SIDI n řɛeskarat ad ten issduři u nitni ad ccen.
Ad ddzen iẓra n iǧiy uca ad swen,
ad ggen ddriz am ɣar binu
u ad dewřen ccuren s idammen am ṭṭawya n urucci,
am tɣemmar n uɛalṭar.
16 SIDI, AREBBI nwem ad ten issenjem deg wass nni
am wuǧi n řgens nnes,
maɣar nitni amecnaw iẓra iɣřan
ittissiqen x temmurt nnes.
17 Maɣar mechař ma imɣar ad yiři řxar nnes
u mechař ma imɣar ad yiři waẓři nnes!
Imendi ad isseɣmi iḥudriyyen
uřa binu n jdid tiɛzariyyin.