Tameẓriwt wiss tnayen n arebɛa n iccawen d arebɛa n imziřen
2
1 Necc ssgeɛɛdeɣ tiṭṭawin inu uca ẓriɣ, u xzar aqa din arebɛa n waccawen. 2 Necc nniɣ i lmalak nni kidi issawařen: “Min ɛnan ina?” Netta yarra-dd xafi: “Ina d arebɛa n waccawen nni izuzzaren Yahuda, Israil d Urcalim.” 3 Xenni isscen ayi SIDI arebɛa n imziřen. 4 Řexdenni necc nniɣ: “Min umi dd-usin nitni, min ɣa ggen?” Netta issiweř, inna: “Ina d accawen nni izuzzaren Yahuda, ařami war dd-issgeɛɛed ɛad uřa d ijj azeǧif nnes, maca ina usin-dd ḥima ad ten ssnexřɛen, ḥima ad nḍaren accawen n řegnus nni dd-issgeɛɛden icc ḍidd i temmurt n Yahuda ḥima ad tt zuzzaren.”
Tameẓriwt wiss třata n weryaz s ufiřu n řeqyas
5 Necc ssgeɛɛdeɣ tiṭṭawin inu, ẓriɣ, u xzar, aqa din ijj n weryaz s ufiřu n řeɛbar deg ufus nnes. 6 Necc nniɣ: “Mani i ɣa traḥed cek?” Netta yarra-dd “Necc ad raḥeɣ ḥima ad ɛbareɣ Urcalim maḥend ad ẓareɣ mecḥař teǧa tiru nnes u mecḥař teǧa tuzzeggart nnes.” 7 U xzar, iffeɣ-dd lmalak nni kidi issawařen uca ijj n lmalak nneɣni iffeɣ-dd ḥima ad kides immeřqa, 8 inna as: “Deɣyet, siweř ak-d uḥudri nni, ini:
‘Urcalim ad tiři d ict n ddemnet tennurzem temɣar
zi ssibbet n waṭṭas n iwdan d řmař i iǧan di řwest nnes.
9 Necc ad as iřiɣ d ijj n řḥiḍ n tmessi i d as-dd ittennḍen, iqqar SIDI,
u di řwest nnes ad as iřiɣ i uɛuǧi.
10 Deɣyam, deɣyam, arewřem zi temmurt n ccamal, ammu i iqqar SIDI,
\qt maɣar Necc ad kenniw bḍiɣ x arebɛa n isemmiḍen n ujenna,
ammu i iqqar SIDI.
11 Deɣyat, Ṣihyun, fekket,
cem d tenni izeddɣen ɣar yeǧis n Babil!’ ”
12 “Maɣar ammu i iqqar SIDI n řɛeskarat:
Di ṭṭweɛ n uɛuǧi,
issekk ayi-dd Netta ɣar řegnus nni kenniw ikeccḍen,
maɣar wenni kenniw i ɣa iḥadan, iḥada mummu n tiṭṭ inu.
13 Maɣar xzar, Necc ssenhezzeɣ afus inu xasen,
u nitni ad dewřen d takeccaḍt n imsexxaren nsen.
Kenniw ad tessnem
aqa issekk ayi-dd SIDI n řɛeskarat.
14 Sřiwřew u farḥ, a tayeǧit Ṣihyun,
maɣar xzar, Necc ad dd-aseɣ u ad zedɣeɣ di řwest nnem,
ammu i iqqar SIDI. ■
15 Deg wass nni ad qqnen waṭṭas n řegnus ɣar SIDI,
u nitni ad iřin d řgens inu,
u Necc ad zedɣeɣ di řwest nnem u ad tessned,
aqa SIDI n řɛeskarat issekk ayi-dd ɣarem.
16 SIDI ad iṭṭef Yahuda d taɣarst x temmurt iqeddsen.
Netta ad ifarz Urcalim ɛad.
17 Ejj marra ddat ad isseɣd zzat i wudem n SIDI,
maɣar Netta ifaq-dd zi Tzeddiɣt nnes Iqeddsen.”