Amenḍar n Israil d uřeqqeḥ nnes
2
1 “Ad yiři řqedd n ayt n Israil am yejdi n řebḥar i war izemmaren ad ittwaɛbar u war izemmar ad ittwaḥseb uca ad tafed mani i d asen nnan: ‘Kenniw war teǧim d řgens inu!’, ad asen ittwanna: ‘Kenniw d iḥenjiren n AREBBI iddaren!’ ■ 2 Ayt n Yahuda d ayt n Israil ad munen u ad ggen ijj n umɣar i yixef nsen u ad ffɣen zi temmurt n řeḥṣaret, maɣar ass n Yazraɛil ad yiři d ijj n wass d ameqqran. ■ 3 Inim i wawmaten nwem: ‘Ɛemmi!’ u i yessmatwem: ‘Ruḥama!’ 4 Dɛam ak-d yemmatwem, dɛam, maɣar nettat war teǧi d tamɣart inu u Necc war ǧiɣ d aryaz nnes. Ejj i-tt ad tekkes farq-ccɣeř nnes zeg uɣembub nnes uřa d zzina zi jar ibbac nnes. 5 Niɣ aqa ad as kkseɣ arruḍ ad tt tejjeɣ d taɛaryant¸ ad tt ssarseɣ diha am wass amezwaru i di dd-texřeq, wah ad tt arreɣ d ict n řexřa, ad tt arreɣ am ict n temmurt yuẓɣen uca ad tt jjeɣ ad temmet s ufadi. 6 Necc war arreḥmeɣ x iḥenjiren nnes, maɣar nitni d iḥenjiren i dd-ixeřqen zi farq-ccɣeř. 7 Maɣar yemmatsen aqa tfesded ixef nnes, wah tenni tuɣa s ddeyset zzaysen, tegga řefḍiḥet, maɣar teqqar: ‘Ad ḍfareɣ inni d ayi iɛeccqen, inni d ayi itticen aɣrum inu d waman inu d taḍuft inu d tiffest inu d zzect inu d tsessit inu.’ 8 S uyenni, aqa ad bellɛeɣ abrid nnem s cbarq ak-d isennanen u ad ssbeddeɣ aɣbar nnes ḥima war tᵉttif ɛad imesraq nnes. 9 Nettat ad teḍfar inni tt iɛecqen, war xasen tḥarret maca. Nettat ad xasen tarzu, maca war ten tᵉttif ca. Xenni ad tini: ‘Necc ad ɛeqbeɣ, ad dewřeɣ ɣar weryaz inu amezwaru, maɣar deg wussan nni tuɣa ayi mliḥ x řexxu.’
10 Nettat war teɛqiř, aqa d Necc i tuɣa d wenni d as iwcin imendi d binu n jdid d zzect u aqa d Necc i tuɣa d wenni d as iwcin aṭṭas n nnuqart d wureɣ i zi ggin nitni řexyař nsen n Baɛl.
11 S uyenni i ɣa ɛeqbeɣ, ad kkseɣ imendi inu di řweqt nnes uřa d binu inu n jdid di řweqt nnes ittwaggen u taḍuft inu d tiffest inu i zi teddař tuɛɛaryent nnes ad tent qeřɛeɣ zzayes.
12 Xenni řexxu ad ɛarriɣ x řeḥya nnes zzat i tiṭṭawin n yinni tt ittexsen uca uřa d ijjen war izemmar ad tt ifekk zeg ifassen inu.
13 Necc ad ssbeddeɣ marra řefraḥet nnes, uraren nnes, ussan nnes n ubeddi n uyur uřa d ussan nnes n ssebt, wah marra ussan nnes ittwaggen.
14 Ad areddǧeɣ tazayart nnes d tcejjart n wartu nnes i zi tenna: ‘Tina d řmunet i d ayi wcin yinni d ayi ittexsen.’ Ad tent arreɣ d ijj n wezɣar u řmař n yeyyar ad zzaysent ccen. □ ■
15 Necc ad tt wteɣ x marra ussan n Ibaɛlen, ussan i di tiwi-dd asen tiwhibin n řebxur i řexyařat n Baɛl u tegga tixrazin nnes d tseddect nnes u teḍfar inni tt ittexsen, maca nettat tᵉttu ayi, ammu i iqqar SIDI.
16 S uyenni Necc ad tt ɣarreɣ, ad tt nedheɣ ɣar řexřa, u din ad ssiwřeɣ ak-d wuř nnes.
17 Ssenni ad as wceɣ imarjaɛen nnes n uḍiř u ad arreɣ taɣzurt n Axur d tawwart n usitem. Nettat ad dinni tɣennej am tɣennej deg wussan n temẓi nnes, am x wass umi dd-teffeɣ zi temmurt n Miṣra.
18 Deg wass nni, inna SIDI, ad ayi třaɣid: ‘Aryaz inu!’, u war d ayi teqqared ɛad: ‘Baɛl inu!’
19 Ad as kkseɣ ismawen n řexyařat n Baɛl zeg uqemmum nnes. War ttfekkaren ɛad deg ismawen nsen. 20 Deg wass nni ad ggeɣ ijj n Řɛahd di ṭṭweɛ nsen ak-d řewḥuc n řexřa u ak-d ijḍaḍ n ujenna u ak-d imuddaren nni ittbuɛen x wudem n temmurt. Ad kkseɣ řqews d ssif d umenɣi zi temmurt u ad ten ssarreyḥeɣ di řhudnet. □ ■
21 Necc ad cem awyeɣ d tasřit i Necc i řebda, wah ad cem awyeɣ d tasřit i Necc s tsegda d řheqq, s tmexsiwt icewwaren d arreḥmet. 22 Necc ad cem awyeɣ d tasřit i Necc s řaman, u cem ad tessned SIDI. ■
23 Deg wass nni, inna SIDI, ad imsar aqa Necc ad sřeɣ ɣar ujenna u ajenna ad iseř ɣar temmurt 24 u tammurt ad tseř ɣar imendi uřa ɣar binu n jdid d zzect, u ina ad sřen ɣar Yazraɛil. 25 Necc ad tt zarɛeɣ i Necc di temmurt u Necc ad arreḥmeɣ x Lu-Ruḥama, u ad iniɣ i Lu-Ɛammi: ‘Cem d řgens inu i teǧid!’, u netta ad yini: ‘AREBBI inu!’ ” ■