Imeddukkʷař n Daniyal di tefqunt icemḍen
3
1 Ajeǧid Nabuxadnaṣṣar igga ijj n řexyař n wureɣ s yijj n řuɛřa n settin iɣaǧen d yijj n tiru n setta n iɣaǧen. Issbedd i-t di řwaṭa n Dura di lɛamala n Babil. 2 Xenni issekk ujeǧid Nabuxadnaṣṣar ireqqasen ḥima ad ssmunen ijeǧiden i iǧan sadu ujeǧid d imḍebbaren imeqqranen d lwulat, řquḍat imezwura n tgeldit d yenni x txubay d imesnawen n izerfan d imweḍḍfen n tudrin n ccreɛ d marra inni ɣar teǧa ṣṣulṭa di lɛamalat maḥend ad dd-asen ɣar udeccen n řexyař nni issbedd ujeǧid. 3 Xenni munen ijeǧiden nni iǧan sadu i ujeǧid d imḍebbaren imeqqranen d lwulat d řquḍat imezwura n tgeldit d yenni x txubay d imesnawen n izerfan d imweḍḍfen n tudrin n ccreɛ d marra inni ɣar teǧa ṣṣulṭa di lɛamalat i udeccen n řexyař nni issbedd ujeǧid Nabuxadnaṣṣar u nitni bedden zzat i řexyař nni issbedd Nabuxadnaṣṣar. 4 Uca iřaɣa ijj n umbarreḥ s jjehd “A řegnus d timmura d iřsawen, i kenniw ittwaqqar ammu:
5 Di tsaɛɛet i di i ɣa tesřem řḥess n řbuq d tzammart d lɛud d lgambri d lharpa d temja d marra markat n llɣa, ittxeṣṣa ad tewḍam ad tsejdem i řexyař n wureɣ i issbedd ujeǧid Nabuxadnaṣṣar. 6 Wenni war iwḍin u war isjed ad ittwammenḍar di řwest n tefqunt n tmessi itteḥduduqen di tsaɛɛet nni.”
7 S uyenni, di tsaɛɛet i di sřen marra řegnus i řḥess n řbuq d tzamart d lɛud d lgambri d lharpa d marra markat n dduzan n llɣa, wḍan marra řegnus d temmura d iřsawen ɣar temmurt u sejden i řexyař n wureɣ nni issbedd ujeǧid Nabuxadnaṣṣar.
8 Di řweqt nni, qarrben-dd ca n Ikaldaniyyen di ssibbet-a, uca cetcan zeg Wudayen s bṭayṭay. 9 Nitni ṭṭfen deg wawař, nnan i ujeǧid Nabuxadnaṣṣar: “A ajeǧid, ddar i řebda!
10 Cek, a ajeǧid, tumured belli marra iwdan nni isřin i řḥess n řbuq d tzamart d lɛud d lgambri d lharpa d temja d marra markat n dduzan n llɣa, ad wḍan ad sejden i řexyař n wureɣ.
11 Wenni war iwḍin u isjed, ad immenḍar di řwest n tefqunt n tmessi itteḥduduqen.
12 Aqa din iryazen Udayen, inni teggid x uḍebbar n lɛamala n Babil, aqa aten d Cadrax, Micax d Ɛabd-Naɣu. Iryazen-a war wcin taynit i řumur nnek, a ajeǧid. Arebbiten nnek war ten ttweqqaren u řexyař nnek war d as sejden.”
13 Xenni inna Nabuxadnaṣṣar deg uxeyyeq d tefqeḥt nnes aqa ad nedhen Cadrax, Micax d Ɛabd-Naɣu zzates. Xenni nedhen iryazen nni zzat i ujeǧid.
14 Nabuxadnaṣṣar iṭṭef deg wawař, inna asen: “Cadrax, Micax d Ɛabd-Naɣu ma s neɛmada zeɛma war tᵉttweqqarem irebbiten inu u war tsejjadem i řexyař i ssbeddeɣ?
15 Xenni řexxu, mařa kenniw, di tsaɛɛet i di i ɣa tesřem i řḥess n řbuq d tzamart d lɛud d lgambri d lharpa d temja d marra markat n dduzan n llɣa, twejdem maḥend ad tewḍam u ad tsejdem i řexyař i ssbeddeɣ necc, aqa mliḥ. Maca mařa war tsejdem, ad tᵉttwammenḍarem di tefqunt n tmessi itteḥduduqen di tsaɛɛet nni. U man Arebbi i kenniw i ɣa ifekken zeg ifassen inu?
16 Arrin-dd Cadrax d Micax d Ɛabd-Naɣu, nnan i ujeǧid Nabuxadnaṣṣar: “War neḥdaj ad xak dd-narr di tmesřact-a.
17 Mařa xenni AREBBI nneɣ nni nsexxar, ɣares tizemmar ḥima ad aneɣ ifekk zi tefqunt n tmessi itteḥduduqen, xenni ad aneɣ ifekk zeg ufus nnek, a ajeǧid!
18 Mařa lla, ad tessned, a ajeǧid, aqa neccin war nettweqqar irebbiten nnek d řexyař i tessbedded cek, war d as nsejjed ca.”
19 Xenni isɛar ujeǧiḍ u tbeddeř ṣṣifet n wudem nnes zzat i Cadrax, Micax d Ɛabd-Naɣu. Netta iṭṭef deg wawař, inna ad arnin di tefqunt sebɛa n tseqqar am mammec numen tt ssareqqen, 20 u netta yumur iryazen inni d iryazen ijehden qaɛ zi řɛeskar nnes, ad carfen Cadrax d Micax d Ɛabd-Naɣu ḥima ad ten nḍaren ammu di tefqunt n tmessi itteḥduduqen. 21 Xenni ttwacarfen iryazen nni ak-d iseřhamen nsen d ssraweř nsen d tcuccay nsen d warruḍ nsen nneɣni uca nḍaren ten di řwest n tefqunt n tmessi itteḥduduqen. 22 Minzi řumur n ujeǧid tuɣa iqseḥ aṭṭas u tafqunt teḥma ař ṭṭarf, nɣin iḥudaq n tmessi iryazen nni ssgeɛɛden Cadrax d Micax d Ɛabd-Naɣu 23 uca třata n yeryazen nni, Cadrax, Micax d Ɛabd-Naɣu, wḍan ttwacarfen di řwest n tefqunt n tmessi itteḥduduqen.
24 Xenni innexřeɛ ujeǧid Nabuxadnaṣṣar, ikkar deɣya, iṭṭef deg wawař, inna i imcawaren nnes: “Ma war nenḍar třata n yeryazen ittwacarfen di řwest n tmessi?” Nitni arrin-dd, nnan i ujeǧid: “Nican, a ajeǧid” 25 Netta yarra-dd, inna: “Xzar, ttwařiɣ arebɛa n yeryazen gguren di řwest n tmessi u timessi war d asen teggi ca u ṣṣifet n wiss arebɛa amecnaw ijj n mmis n irebbiten!”
26 Xenni iqarreb-dd Nabuxadnaṣṣar ɣar tewwart n tefqunt n tmessi itteḥduduqen, iṭṭef deg wawař, inna: “Kenniw, Cadrax, Micax, Ɛabd-Naɣu, kenniw imsexxaren n AREBBI Amɛuǧi x kuřci, ffɣem-dd u asem-dd da!” Xenni ffɣen-dd, Cadrax d Micax d Ɛabd-Naɣu zi řwest n tmessi itteḥduduqen. 27 Xenni ssmunen ijeǧiden nni iǧan sadu i ujeǧid d imḍebbaren d imcawaren n ujeǧid uca ẓrin aqa iryazen nni war d asen imsar ca s tmessi u acewwaf n uzeǧif nsen war icmiḍ ca u iseřhamen nsen war ttwařeqfen u war daysen uřa d ict jjurret n arriḥet n tmessi.
28 Xenni iṭṭef Nabuxadnaṣṣar deg wawař, inna: “Ad ittwabarek AREBBI n Cadrax, Micax d Ɛabd-Naɣu, wenni dd-issekken Lmalak nnes u ifekk inni tuɣa xas ittecřen. Nitni beḍřen řumur n ujeǧid u sellmen arrimat nsen, maɣar war xsen ad weqqaren niɣ ad sejden uřa i yijj n arebbi mɣir AREBBI nsen. 29 X uyenni iffeɣ-dd zzayi řumur maḥend kuř řgens d temmurt d yiřes nni i ɣa iceqqfen deg AREBBI n Cadrax, Micax d Ɛabd-Naɣu, ad ittwaqess d iwetwiten u taddart nnes ad tedweř d ijj n uzubay, maɣar war din uřa d ijj n arebbi wenni izemmaren ad ifekk ammu.” ■
30 Xenni yarni asen ujeǧid di ccan i Cadrax, Micax d Ɛabd-Naɣu di lɛamala n Babil.
Tamezwarut n tabrat n ujeǧid Nibuxadnaṣr i marra řegnus
31 Ajeǧid Nabuxadnaṣṣer, i marra řegnus d temmura d iřsawen nni izeddɣen di marra ddunect: Ad yiři řehna nwem d ameqqran!
32 Iɛjeb ayi řḥař ḥima ad awem ssecneɣ řeɛřamat d lmuɛjizat nni d ayi igga AREBBI Amɛuǧi x kuřci. 33 Mammec mɣarent řeɛřamat nnes d mammec jehdent lmuɛjizat nnes! Tageldit nnes d ict n tgeldit i řebda d lmulk nnes zi jjiř ař jjiř.” ■