Ḥizqiyal
Tameẓra n uɛuǧi n SIDI
1
1 Deg useggʷas wiss třatin, deg uyur wiss arebɛa, deg wass wiss xemsa n uyur, umi d ayi tuɣa di řwest n imenfiyyen ɣar yeɣzar n Xabur, imsar belli arezmen ijenwan uca ẓriɣ timeẓriwin n AREBBI. ■ 2 Deg wass wiss xemsa n uyur, - tuɣa d aseggʷas wiss xemsa n lmenfa n ujeǧid Yuyakin - , 3 yusa-dd wawař n SIDI nican ɣar Ḥizqiyal, mmis n Buzi, akehhan, di temmurt n Ikaldaniyyen, ɣar yeɣzar n Xabur. Tuɣa din xas afus n SIDI.
4 Ẓriɣ, uca xzar, yusa-dd usemmiḍ n tḥaryaḍt zi ccamal, ijj n useynu d ameqqran, u ict n tmessi tᵉttceɛɛeř. Inneḍ as-dd i useynu ijj n uwesseg u zi řwest nnes iban-dd ca am wuzzař ittwessgen, zi řwest n tmessi. 5 Zi řwest nnes tban-dd ṣṣifet n arebɛa n imuddaren. Ammu dd-ḍharen yina: tuɣa marra ɣarsen ṣṣifet n bnadem. 6 Kuř ijj ɣares arebɛa n wudmawen u kuř ijj ɣares arebɛa n wafriwen. ■ 7 Iḍaren nsen tuɣa aten nican u tiřeqqa n iḍaren nsen amecnaw tiřeqqa n iḍaren n uyenduz uca ttissiqent třeqqat n iḍaren nsen amecnaw udem n nnḥas ittwassuydan. □ 8 Sadu afriwen nsen ɣar arebɛa n iɣezdisen nsen ɣarsen ifassen n bnadem. Arebɛa n imuddaren ɣarsen udmawen d wafriwen. ■ 9 Tuɣa afriwen nsen munen ijj ak-d wenneɣni. Nitni war nnqeřben ca xmi gguren. Gguren nitni, kuř ijj zzaysen iggur nican ɣar zzat.
10 Arwas n wudmawen nsen tuɣa amecnaw udem n bnadem, u ɣar uɣezdis afusi n arebɛa n imuddaren nni amecnaw udem n weyrad u ɣar uɣezdis azeřmaḍ nsen amecnaw udem n ufunas, uca arebɛa n imuddaren nni ɣarsen ɛawed udem n ugider. ■
11 Udmawen nsen d wafriwen nsen bezzɛen x tiwa. Tnayen n wafriwen n kuř ijjen zzaysen ttmunen ɣar wafriwen n wenneɣni u tnayen n wafriwen nneɣni dřin arrimat nsen.
12 Nitni uyuren, kuř ijj nican ɣar zzat, mani ma tuɣa iggur Arruḥ, gguren nitni. Nitni war ttneqřiben ca xmi gguren.
13 X warwas n imuddaren nni: aqa banen-dd amecnaw řefḥem itteḥduduqen icemmḍen, amecnaw iṣefḍawen. Tuɣa timessi tᵉttraḥ tᵉttas-dd jar imuddaren uca timessi tᵉttissiq u zi tmessi tteffɣen-dd wassamen.
14 Imuddaren tuɣa ttazzřen, dekkwařen-dd, amecnaw mammec dd-ttbanen wassamen.
15 Řami ẓriɣ imuddaren nni, xzar ict n tjarrart tbedd x temmurt zzat i imuddaren, ɣar kuř ijj zi arebɛa n wudmawen.
16 Tajarrarin d twaggit nsen banent-i-dd am texrisulit u ɣarsent ṣṣifet d ict. Mammec dd-ḍharent u mammec ttwaggent tuɣa axmi ict n tjarrart tuɣa nican di tjarrart nneɣni. ■
17 Xmi gguren, gguren ɣar arebɛa n iɣezdisen nsen. Nitni war ttneqřiben ca xmi gguren.
18 Yantat nsen tuɣa aten uɛřant u ssagʷadent u yantat nsen ccurent s tiṭṭawin i d asent-i-dd innḍen, ɣar arebɛa n imuddaren nni. ■
19 Xmi gguren imuddaren, ggurent uřa d tjarrarin nni ɣar zzat nsen akidsen, u xmi ttwassgeɛɛden imuddaren zi temmurt, ttwasgeɛɛdent uřa d tijarrarin. ■ 20 Ař mani ixs Arruḥ ad yuyur, din gguren nitni, mani ixs Arruḥ ad iraḥ, uca tijarrarin ɣar zzat nsen ttwasgeɛɛdent, maɣar Arruḥ n imuddaren tuɣa di tjarrarin. 21 Xmi gguren nitni, ggurent uřa d nitenti, u xmi ttbeddan nitni, beddent uřa d nitenti u xmi ttwasgeɛɛden nitni, ttwasgeɛɛdent uřa d tijarrarin akidsen, maɣar Arruḥ n imuddaren tuɣa di tjarrarin. 22 Sennej i izeǧifen n imuddaren tuɣa din min yarewsen deg ict n řqubbet, tban-dd amecnaw ict n řqubbet issaggʷaden n wejris nni itwabezzɛen sennej i izeǧifen nsen. 23 Sadu řqubbet tuɣa afriwen nsen seggmen, sswiẓẓaḍen ijj ɣar wenneɣni. Kuř ijj ɣares tnayen maḥend ad zzaysen issduři ixef nnes uca kuř ijj ɣares ɛawed tnayen nneɣni maḥend ad zzaysen issduři ixef nnes, tuɣa d man aya i arrimat nsen. 24 Xmi gguren, sřiɣ i řḥess n wafriwen nsen amecnaw zzhir n řebḥar, am tmijja n Umzemmar x kuřci, aqa řḥess d ameqqran am řḥess n řɛeskar. Řami bedden, ssehwan afriwen nsen. 25 Tuɣa din ict n tmijja sennej i řqubbet nni tuɣa sennej i izeǧifen nsen. Řami xenni bedden nitni, ssehwan afriwen nsen. 26 Sennej i řqubbet nni tuɣa x izeǧifen nsen iban-dd amecnaw ict n řɛarc s wudem n weẓru n ṣaffir aziza, u sennej qaɛ, x min ittbanen amecnaw řɛarc, iqqim xas min ittbanen amecnaw ṣṣifet n bnadem. 27 Uca ẓriɣ wenni dd-ittbanen am wuzzař ittwessgen, iban-dd am tmessi ɣar daxeř nnes u deg wenneḍ nnes. Zi tejɛinnatin nnes ař sennej u zi min yarwesen di tejɛinnatin nnes ař wadday, ẓriɣ wenni dd-ittbanen am tmessi uca inneḍ as-dd ijj n uwesseg. 28 Am mammec dd-tᵉttban tesřit n wenẓar deg iseynuten deg ijj n wass n wenẓar ijehden, ammu tuɣa ccuf n uwesseg nni i d as dd-innḍen. Wanita d udem n waddud n uɛuǧi n SIDI. Řami t ẓriɣ, wḍiɣ s uɣembub inu ɣar temmurt uca sřiɣ tmijja nni kidi issawařen. ■