Tařaɣit n Arebbi x Ḥizqiyal
2
1 Inna ayi: “A mmis n bnadem, kkar x iḍaren nnek, uca Necc ad kik ssiwřeɣ.” 2 Řami akidi issiweř, yudef-dd dayi Arruḥ uca issekkar-dd ayi x iḍaren inu u necc sřiɣ i tmijja n Wenni kidi issawařen. ■ 3 Netta inna ayi: “A mmis n bnadem, Necc sekkeɣ cek ɣar ayt n Israil, ɣar řegnus iɣewwɣen, inni xafi iɣewwɣen. Nitni d řejdud nsen ɛeddan xafi ař ass-a. ■ 4 Nitni d arraw n wudem ifarɣen d wuř iqesḥen. Necc sekkeɣ cek ɣarsen, ittxeṣṣa ac ad asen tinid: ‘Ammu i iqqar Sidi inu, SIDI!’ 5 Xenni ma ad ac sřen niɣ ad semḥen di man aya, minzi nitni d ict n taddart iɣewwɣen, nitni ad ssnen belli tuɣa anabi di řwest nsen. ■ 6 Uca cek, a mmis n bnadem, war zzaysen tteggʷed u war tteggʷed uřa zeg wawařen nsen. Waxxa aqa din ɣarek tizeggʷura d isennanen u waxxa zeddɣent ɣarek tɣarḍmiwin, war tteggʷed ca zeg wawařen nsen u war zzaysen ttnexřiɛ, minzi nitni d ict n taddart iɣewwɣen. ■ 7 Ad kidsen tessiwřed s wawařen inu, ma ad sřen niɣ ad semḥen di man aya, minzi nitni aqa ttɣewwɣen. 8 Maca cek, a mmis n bnadem, seř min d ac ɣa iniɣ, war ttɣewwiɣ amecnaw taddart nni iɣewwɣen. Arzem aqemmum nnek nican uca ecc min d ac ɣa wceɣ.” ■
9 Uca xenni ẓriɣ, xzar, ijj n ufus isswiẓẓeḍ-dd ɣari, u xzar, dayes ijj n wedlis ittwannḍen.
10 Netta ibezzeɛ i-t zzati. Tuɣa yura zi sennej d wadday uca ttwarin dayes izřan n wecḍan d usqinnef d uweḥweḥ n tamara.”