إِعِيبْرَانِييّنْ 4

أَريّحْ إِ ڒْڭنْسْ ن أَربِّي

‏1 أجّْ أَنغْ أَذْ نڭّْوذْ خنِّي، أَقَا ؤُڒَا ذ إِجّْ زَّايْومْ، مِينْثْرَا عَاذْ ذِينْ إِجّْ ن لْوَاعْذْ ن وَاذَافْ ذِي أَرَّاحثْ نّسْ، أَذْ إِضْهَارْ إِتّْغِيمَا غَارْ ضفَّارْ غَارْ وَاذَافْ. ‏2 مِينْزِي إِتّْوَابَارّحْ ڒخْبَارْ أَصبْحَانْ عَاوذْ إِ نشِّينْ، أَمْ إِتّْوَابَارّحْ ؤُڒَا إِ نِيثْنِي، مَاشَا أَوَاڒْ وَارْ ذ أَسنْ إِنْفِيعْ إِ ينِّي ذ أَسْ إِسْڒِينْ، مِينْزِي ثُوغَا وَارْ د-إِتِّيسْ شَا أَكْ-ذ لْ-إِيمَانْ ذڭْ إِنِّي ذ أَسْ إِسْڒَانْ. ‏3 مِينْزِي نشِّينْ، إِنِّي يُومْننْ، أَذْ نَاذفْ غَارْ أَرَّاحثْ أَمْ مَامّشْ إِنَّا:

”أَمْ مَامّشْ جُّودْجغْ ذڭْ وغْضَابْ إِنُو:

’نِيثْنِي وَارْ د-تِّيذْفنْ شَا غَارْ أَرَّاحثْ إِنُو!‘ “،

وَاخَّا ڒخْذَايمْ ن أَربِّي أَقَا تّْوَاكمّْڒنْثْ زڭْ وَامِي ثتّْوَاڭّْ دُّونشْثْ.    ‏4 مِينْزِي إِنَّا خْ وَاسّْ ن سّبْثْ:

”يَاريّحْ أَربِّي زِي مَارَّا ڒخْذَايمْ نّسْ

ذڭْ وَاسّْ وِيسّْ سبْعَا.“   

‏5 ؤُشَا عَاوذْ ذَانِيثَا إِنَّا أَوَاڒْ-أَ:

”وَارْ د-تِّيذْفنْ شَا ذِي أَرَّاحثْ إِنُو!“   

‏6 ؤُمِي ثقِّيمْ بلِّي مَارَّا زمَّارنْ أَذْ د-أَذْفنْ غَارْ أَرَّاحثْ-أَ، مَاشَا إِنِّي ؤُمِي إِتّْوَابَارّحْ س ڒخْبَارْ أَصبْحَانْ غَارْ ؤُمزْوَارُو وَارْ ؤُذِيفنْ شَا خْ سِّيبّثْ ن ڒْمُوعْصِييّثْ نْسنْ، ‏7 أَقَا نتَّا إِزيَّارْ زِي جْذِيذْ أَوَارْنِي أَطَّاسْ ن ڒْوقْثْ إِجّْ ن وَاسّْ نّغْنِي، أَمْ مَامّشْ إِتّْوَارِي قْبڒْ أَقَا ذَاوُوذْ إِنَّا:

”أَسّْ-أَ مَاڒَا ثسْڒِيمْ إِ ثْمِيجَّا نّسْ،

وَارْ سّقْسِيحمْ شَا ؤُڒَاونْ نْومْ!“   

‏8 مِينْزِي مَاڒَا ثُوغَا يَاشُووَا، مِّيسْ ن نُونْ، أَقَا إِسِّيذفْ إِ-ثنْ ذِي أَرَّاحثْ، وَارْ غَارسْ إِتِّيڒِي عَاذْ ڒْهَارْذْ خْ إِجّْ ن وَاسّْ نّغْنِي أَوَارْنِي مَانْ أَيَا. ‏9 س ؤُينِّي إِثْخصَّا إِ ڒْڭنْسْ ن أَربِّي أَذْ إِقِّيمْ إِتّطّفْ ذڭْ إِشْثْ ن أَرَّاحثْ ن سّبْثْ.

‏10 مِينْزِي وِي يُوذْفنْ غَارْ أَرَّاحثْ نّسْ، أَقَا نتَّا أَذْ يَاريّحْ زِي ڒخْذَايمْ نّسْ أَمْ مَامّشْ أَربِّي زِي ثِينِّي نّسْ.

‏11 جّمْ أَنغْ خنِّي أَذْ نمْكَابَارْ حِيمَا أَذْ نَاذفْ غَارْ أَرَّاحثْ نِّي، مَاحنْذْ وَارْ نْوطِّي أَمْ مَامّشْ وْضَانْ إِنِّي وَارْ إِطِّيعنْ.

‏12 مِينْزِي أَوَاڒْ ن أَربِّي إِدَّارْ، إِخدّمْ مَانِي مَّا، إِقْضعْ كْثَارْ زِي كُوڒْ سِّيفْ س ثْنَاينْ ن وُوذْمَاونْ، إِتَّاكّْوَاضْ أَڒْ أَبطُّو ن ڒعْمَارْ ذ أَرُّوحْ ذ ڒمْفَاصڒْ ذ وَاضُوفْ، ؤُشَا إِحكّمْ خْ ثْنَاوِي ذ إِخَارِّيصنْ ن وُوڒْ.   

‏13 وَارْ ذِينْ ؤُڒَا ذ إِشْثْ ن ثْمسْڒَاشْثْ إِ زَّايسْ د-إِتّْوَاخڒْقنْ ثتّْوَاسْنُوفَّارْ زَّايسْ، مَاشَا مَارَّا ثِيمسْڒَايِينْ أَقَا أَثنْثْ تّْوَاعَارّْينْثْ، تّْوَارزّْمنْثْ غَارْ ثِيطَّاوِينْ ن ونِّي ؤُمِي إِ-كْ-د إِ غَا نڭّْ ڒحْسَابْ.   

يشُّو ذ أَرَّايْسْ نّغْ إِمْغَارْ ن إِكهَّاننْ

‏14 س ؤُينِّي أَمْ غَارْنغْ أَرَّايْسْ ن إِكهَّاننْ إِمْغَارْ، يشُّو لْمَاسِيحْ، مِّيسْ ن أَربِّي ونِّي إِسّْڭعّْذنْ غَارْ ؤُجنَّا، أجّْ أَنغْ أَذْ نْشبَّارْ ذِي شّْهَاذثْ نّسْ،   

‏15 مِينْزِي وَارْ غَارْنغْ أَرَّايْسْ ن إِكهَّاننْ وَارْ إِزمَّارْ أَذْ يَاشَا أَكْ-ذ ثُوضْعفْثْ نّغْ، مَاشَا إِجّنْ ونِّي إِتّْوَاجَارّْبنْ ذِي مَارَّا أَمْ نشِّينْ، مَاشَا بْڒَا دّنْبْ.   

‏16 أَذْ د-نْقَارّبْ خنِّي س تِّيقّثْ غَارْ ڒْعَارْشْ ن أَرْضَا، حِيمَا أَذْ نكْسِي أَرّحْمثْ ؤُشَا أَذْ نَافْ أَرْضَا ذِي ڒْوقْثْ ن ڒْمحْنثْ.