إِعِيبْرَانِييّنْ 3

يشُّو لْمَاسِيحْ يُوعْڒَا خْ مُوسَا

‏1 س ؤُينِّي، أَ أَيْثْمَا إِمْقدَّاسنْ، إِنِّي إِتّْوَاڒَاغَانْ س ثْڒَاغِيثْ ن ؤُجنَّا، خْزَارمْ غَارْ رَّاسُولْ وَانِيثَا، غَارْ أَرَّايْسْ ن إِكهَّاننْ ن شّْهَاذثْ نّغْ، يشُّو لْمَاسِيحْ،      ‏2 ونِّي ذ أَمْثِيقِّي إِ ونِّي إِ-ث-إِ-د إِسّْڭعّْذنْ، أَمْ مَامّشْ ثُوغَا مُوسَا ذ أَمْثِيقِّي خْ مَارَّا ثَادَّارْثْ نّسْ.    ‏3 مِينْزِي أَعُودْجِي ن وَانِيثَا ذ أَمقّْرَانْ س وَاطَّاسْ خْ ونِّي ن مُوسَا، أَمْ شَّانْ ن ؤُبنَّايْ ن ثَادَّارْثْ إِمْغَارْ خْ شَّانْ ن ڒبْنِي نّسْ. ‏4 مِينْزِي مَارَّا ثَادَّارْثْ ثتّْوَابْنَا زڭْ إِجّنْ، مَاشَا ونِّي إِبنَّانْ مَارَّا ذ أَربِّي.    ‏5 ثتّْوَاوكّڒْ إِ مُوسَا مَارَّا ثَادَّارْثْ نّسْ أَمْ إِ يِيجّْ ن ؤُمْسخَّارْ، مَاحنْذْ أَذْ إِشْهذْ خْ ثْمسْڒَايِينْ مِينْ خفْ غَا إِسِّيوڒْ نتَّا.    ‏6 مَاشَا لْمَاسِيحْ أَمْ ثْممِّيثْ إِتّْوَاڭّْ خْ ثَادَّارْثْ نّسْ، ؤُ ثَادَّارْثْ نّسْ ذ نشِّينْ، مَاڒَا نقِّيمْ نتّطّفْ ذِي تِّيقّثْ ؤُ ذِي ڒمْغَارثْ ن ؤُسِيثمْ نّسْ أَڒْ أَنڭَّارْ.   

ثْمِيجَّا ن أَربِّي

‏7 مِينْزِي أَرُّوحْ إِقدّْسنْ إِنَّا:

”أَقَا أَسّْ-أَ مَاڒَا ثسْڒِيمْ ثْمِيجَّا نّسْ،   

‏8 وَارْ تّسّقْسِيحمْ شَا ؤُڒَاونْ نْومْ مَاحنْذْ أَذْ ث ثسْعَارمْ،

أَمشْنَاوْ إِنِّي إِغوّْغنْ،

ؤُ أَمشْنَاوْ ذڭْ وَاسّْ ن ؤُجَارّبْ ذِي ڒخْڒَا،   

‏9 ؤُمِي ذ أَيِي جَارّْبنْ ڒجْذُوذْ نْومْ، قدْجْبنْ أَيِي،

أَمْ ژْرِينْ ثِيمڭَّا ثِيمقّْرَانِينْ إِنُو أَربْعِينْ ن إِسڭّْوُوسَا.

‏10 س ؤُينِّي عِيفّغْ زِي جِّيڒْ نِّي، نِّيغْ:

’وَا ذ إِجّْ ن ڒْڭنْسْ إِ إِودَّارنْ ذڭْ وُوڒْ نّسْ

نِيثْنِي وَارْ سِّيننْ شَا إِبْرِيذنْ إِنُو!‘،

‏11 أَڒَامِي جُّودْجغْ ذڭْ وغْضَابْ إِنُو:

’وَارْ د-تِّيذْفنْ شَا غَارْ أَرَّاحثْ إِنُو!‘ “   

‏12 س ؤُينِّي، أَ أَيْثْمَا، حْضَامْ حِيمَا عمَّارْصْ وَارْ إِتِّيڒِي حذْ زَّايْومْ غَارسْ ؤُڒْ ذ أَعفَّانْ إِ وَارْ إِتِّيمْننْ ؤُمِي غَا ثَاڭّْوجمْ خْ أَربِّي إِدَّارنْ،

‏13 مَاشَا قدْجْبمْ إِخفْ نْومْ كُوڒْ أَسّْ أَڒْ أَسّْ ؤُمِي قَّارنْ: ’أَسّْ-أَ!‘، حِيمَا ؤُڒَا ذ إِجّْ زَّايْومْ وَارْ إِتّقْسِيحْ شَا س وشْمَاثْ ن دّنْبْ.

‏14 مِينْزِي نتّْوَاسْمُونْ أَكْ-ذ لْمَاسِيحْ، مَاڒَا نقِّيمْ نْشبَّارْ ذِي ڒْعَاهْذْ-أَ ذ أَمْثِيقِّي زڭْ ؤُمزْوَارْ أَڒْ أَنڭَّارْ.

‏15 أَمْ مَامّشْ إِتّْوَانَّا:

”أَسّْ-أَ، مَاڒَا ثسْڒِيمْ ثْمِيجَّا نّسْ،

وَارْ ثسّقْسِيحمْ شَا ؤُڒَاونْ نْومْ

مَاحنْذْ أَذْ ث ثسْعَارمْ.“   

‏16 خنِّي مِينْ إِعْنَانْ نِيثْنِي إِنِّي إِسْڒِينْ ث، خنِّي غوّْغنْ؟ مَا وَارْ دْجِينْ نِيثْنِي مَارَّا ذ إِنِّي د-إِفّْغنْ زِي مِيصْرَا س ؤُفُوسْ ن مُوسَا؟

‏17 زِي مَانْ ونْ إِعِيفّْ نتَّا خنِّي أَربْعِينْ ن إِسڭّْوُوسَا؟ مَا وَارْ إِدْجِي زڭْ ينِّي إِخْضَانْ، إِنِّي ؤُمِي إِوْضَانْ إِغْسَانْ نْسنْ ذِي ڒخْڒَا؟   

‏18 إِ ؤُمِي إِجِّيدْجْ نتَّا، بلِّي وَارْ د-تِّيذْفنْ شَا ذِي أَرَّاحثْ نّسْ، مَا وَارْ إِدْجِي إِ ينِّي وَارْ د أَسْ إِتّڭّنْ أَرَّايْ وَاهَا؟   

‏19 أَقَا نتّْوَاڒَا بلِّي نِيثْنِي وَارْ زمَّارنْ أَذْ أَذْفنْ خْ سِّيبّثْ ن بْڒَا لْ-إِيمَانْ نْسنْ.