أَسْحيّذْ ن إِجّْ ن ؤُمذْنُوبْ زِي ثْمسْمُونْثْ
5
1 ڒْحَاسُوڒْ، إِتّْوَانَّا بلِّي أَقَا ذِينْ جَارْ أَومْ فَارْقْ-شّْغڒْ، ؤُ أَنشْثْ ن فَارْقْ-شّْغڒْ نِّي وَارْ إِدْجِينْ قَاعْ جَارْ ڒڭْنُوسْ، أَقَا إِجّْ ن مِّيسْ غَارسْ ثَامْغَارْثْ ن بَابَاسْ. ▪ 2 كنِّيوْ ثسُّوفَّامْ إِخفْ نْومْ، وَاخَّا إِتّْخصَّا أَومْ ذِي ثِيذتّْ أَذْ ثْشضْنمْ حِيمَا أَذْ ثْحيّْضمْ ونِّي إِڭِّينْ مَانْ أَيَا زِي ڒْوسْثْ نْومْ. 3 وَاخَّا نشّْ أَڭّْوجغْ عْلَاحْسَابْ أَرِّيمثْ، أَقَا أَيِي حْضَارغْ ذِي أَرُّوحْ، ؤُشَا أَقَا حكْمغْ أَخْمِي حْضَارغْ خْ ونِّي إِڭِّينْ مَانْ أَيَا. 4 إِتّْخصَّا أَذْ ثْمُونمْ مَارَّا ذڭْ يِيسمْ ن سِيذِيثْنغْ يشُّو لْمَاسِيحْ ؤُ نشّْ أَكْ-ذ كنِّيوْ ذِي أَرُّوحْ، س جّهْذْ ن سِيذِيثْنغْ يشُّو لْمَاسِيحْ، 5 ؤُشَا كنِّيوْ أَذْ ث ثْسلّْممْ إِ شِّيطَانْ إِ ثْخسَّارْثْ ن أَرِّيمثْ نّسْ ثَامذْنُوبْثْ حِيمَا أَذْ إِدَّارْ ذِي أَرُّوحْ ذڭْ وَاسّْ ن سِيذِيثْنغْ يشُّو لْمَاسِيحْ. ▪ 6 وَارْ د خَاومْ يُوسِي ؤُفيّشْ! مَا وَارْ ثسِّينمْ شَا بلِّي شْوَايْثْ ن ونْثُونْ إِسّْممّْ مَارَّا ثَاعبُّوزْثْ ن وَارشْثِي؟ ▪ 7 سِيزذْڭمْ إِخفْ نْومْ خنِّي زڭْ ونْثُونْ أَقْذِيمْ حِيمَا خنِّي أَذْ ثِيڒِيمْ ذ أَرشْثِي ن جْذِيذْ. أَقَا كنِّيوْ س ثِيذتّْ بْڒَا أَنْثُونْ، مِينْزِي عَاوذْ ثَاغَارْصْثْ نّغْ ن ؤُسعْذُو أَقَا ثتّْوَاغَارْصْ إِ نشِّينْ، أَقَا نتَّا ذ لْمَاسِيحْ. ▪ 8 أَمُّو خنِّي أجّْ أَنغْ أَذْ نْعيّذْ، وَارْ إِدْجِي س ونْثُونْ أَقْذِيمْ، نِيغْ س ونْثُونْ ن ثُوعفّْنَا ذ ڒْغَارْ، مَاشَا س ونْثُونْ ن ڒصْفَايثْ ذ ثْقدَّاسْثْ. ▪
9 أَقَا ؤُرِيغْ أَومْ-د ذِي ثبْرَاثْ حِيمَا وَارْ تّْعَاشَارمْ أَيْثْ ن فَارْقْ-شّْغڒْ ▪
10 وَارْ سِّيوْڒغْ خْ مَارَّا أَيْثْ ن فَارْقْ-شّْغڒْ نِّي إِدْجَانْ ذِي دُّونشْثْ-أَ، نِيغْ خْ إِضمَّاعنْ نِيغْ خْ إِبعَّاجْ نِيغْ خْ ينِّي إِعبّْذنْ لْ-أَصْنَامْ، مَاڒَا أَمُّو، إِڒِي أَذْ ثفّْغمْ زِي دُّونشْثْ-أَ.
11 مَاشَا ؤُرِيغْ أَومْ-د ڒخُّو حِيمَا وَارْ ثتّْعَاشَّارمْ شَا حذْ، وَاخَّا قَّارنْ أَسْ ؤُمَا، مَاشَا أَقَا-ث ذ بُو-فَارْقْ-شّْغڒْ نِيغْ ذ أَضمَّاعْ نِيغْ ذ ونِّي إِعبّْذنْ لْ-أَصْنَامْ نِيغْ ذ أَمْشقَّافْ نِيغْ ذ أَسْكَارْجِي نِيغْ ذ أَشفَّارْ. أَكْ-ذ حذْ أَمْ وَانِيثَا وَارْ كِيسْ ثتّمْ! ▪
12 مِينْزِي مَانْ ڒْحقّْ غَارِي حِيمَا أَذْ حكْمغْ خْ ينِّي إِدْجَانْ بَارَّا؟ حكّْممْ كنِّيوْ خْ ينِّي إِدْجَانْ ذَاخڒْ!
13 مَاشَا إِنِّي إِدْجَانْ بَارَّا، أَربِّي أَذْ خَاسنْ إِحْكمْ، مَاشَا سْحيّْذثْ خَاومْ أَعفَّانْ! ▪