إِرُومَانِييّنْ 1

إِرُومَانِييّنْ

ثَامزْوَارُوثْ

‏1 بُولُوسْ، أَمْسخَّارْ ن يشُّو لْمَاسِيحْ، ذ رَّاسُولْ إِتّْوَاڒَاغَانْ، نِّي إِتّْوَاحُوزنْ إِ ڒخْبَارْ أَصبْحَانْ ن أَربِّي،    ‏2 - ونِّي إِزَّارْ إِوَاعْذْ زَّايسْ زڭْ ؤُموَارُو س إِنَابِييّنْ نّسْ ذِي ثِيرَا إِقدّْسنْ - ،    ‏3 خْ مِّيسْ، ونِّي د-إِتّْوَاخڒْقنْ زِي جِّيهثْ ن أَرِّيمثْ زِي زَّارِيعثْ ن ذَاوُوذْ،    ‏4 مَاشَا زِي جِّيهثْ ن أَرُّوحْ إِقدّْسنْ إِ د-إِسّْنكَّارنْ يشُّو لْمَاسِيحْ، سِيذِيثْنغْ، زِي ثَادَّارْثْ ن إِمتِّيننْ، أَقَا إِتّْوَاسَّارْڭبْ ذ مِّيسْ ن أَربِّي.    ‏5 أَقَا زَّايسْ إِ نطّفْ أَرْضَا ؤُ زَّايسْ إِ نتّْوَاڒَاغَا ذ رُّوسُولْ جَارْ مَارَّا ڒڭْنُوسْ حِيمَا أَذْ طَّاعنْ ڒڭْنُوسْ س لِيمَانْ ذڭْ يِيسمْ نّسْ، ‏6 مَاغَارْ ؤُڒَا ذ كنِّيوْ ثتّْوَاڒَاغَامْ زِي ڒڭْنُوسْ س يشُّو لْمَاسِيحْ. ‏7 غَارْ مَارَّا إِنِّي إِدْجَانْ ذِي رُومَا، أَ إِمْعِيزّنْ ن أَربِّي، إِنِّي إِتّْوَاڒَاغَانْ ذ إِمْقدَّاسنْ: أَرْضَا ذ ڒهْنَا أَذْ كِيذْومْ إِڒِينْ زِي أَربِّي بَابَاثْنغْ ؤُ زِي سِيذِيثْنغْ يشُّو لْمَاسِيحْ.   

بُولُوسْ إِتّْوحّشْ أَذْ يَارْزفْ غَارْ رُومَا

‏8 أَمزْوَارْ تّْشكَّارغْ أَربِّي إِنُو س يشُّو لْمَاسِيحْ زِي جِّيهثْ نْومْ مَارَّا، مِينْزِي لِيمَانْ نْومْ أَقَا سْڒِينْ خَاسْ ذِي دُّونشْثْ مَارَّا. ‏9 مَاغَارْ أَربِّي، ونِّي عبّْذغْ ذِي أَرُّوحْ ذِي ڒخْبَارْ أَصبْحَانْ ن مِّيسْ، إِشْهذْ خَافِي أَقَا نشّْ تِّيذَارغْ كنِّيوْ ڒبْذَا ذِي ثْژَادْجِيثِينْ إِنُو،   

‏10 ؤُ تّْژَادْجِيغْ أَذْ أَيِي ثتّْوَارْزمْ زِي ڒخُّو ذ ثْسَاونْثْ إِشْثْ ن ثوَّارْثْ س أَرَّايْ ن أَربِّي مَاحنْذْ أَذْ غَارْومْ د-أَسغْ.   

‏11 مِينْزِي وحّْشغْ أَذْ كنِّيوْ ژَترغْ حِيمَا أَذْ أَومْ وْشغْ شَا ن ثْموْشَا ن أَرُّوحْ، حِيمَا أَذْ ذَايسْ ثقِّيممْ.   

‏12 أَذْ نتّْوَاسّْفوّجْ جْمِيعْ، س لِيمَانْ نْومْ ذ ونِّي إِنُو.

‏13 مَاشَا خْسغْ، أَ أَيْثْمَا، أَذْ ثسّْنمْ بلِّي أَطَّاسْ ن إِمُورنْ ڭِّيغْ أَذْ غَارْومْ د-أَسغْ، - مَاشَا أَڒْ أَسّْ-أَ تّْوَامنْعغْ - ، حِيمَا أَذْ غَارِي ثِيڒِي ڒْغِيدْجثْ ذَايْومْ عَاوذْ أَمْ مَامّشْ ذِي ڒڭْنُوسْ نّغْنِي،   

‏14 مَاغَارْ نشّْ ذ بُو-ؤُمَارْوَاسْ مَاحنْذْ أَذْ بَارّْحغْ س ڒخْبَارْ أَصبْحَانْ إِ إِيُونَانِييّنْ ؤُ إِ إِبَارْبَارِييّنْ، إِ أَيْثْ ن ثِيغِيثْ ؤُ إِ إِپُوهَاڒِييّنْ، ؤُڒَا إِ مَارَّا إِوْذَانْ.   

‏15 أَمُّو إِ تّْوَاجبْذغْ مَاحنْذْ أَذْ بَارّْحغْ س ڒخْبَارْ أَصبْحَانْ ؤُڒَا إِ كنِّيوْ إِ يدْجَانْ ذِي رُومَا.

جّهْذْ ن ڒخْبَارْ أَصبْحَانْ ن يشُّو لْمَاسِيحْ

‏16 مِينْزِي وَارْ تّْسضْحِيغْ شَا س ڒخْبَارْ أَصبْحَانْ، مِينْزِي نتَّا ذ جّهْذْ ن أَربِّي إِ ثُوذَارْثْ إِ مَارَّا وِي يُومْننْ، مَا إِ ينِّي يُومْننْ زڭْ وُوذَاينْ غَارْ ؤُمزْوَارْ، نِيغْ إِ ينِّي يُومنْ زڭْ إِرَامِييّنْ.   

‏17 مِينْزِي ثَاسڭْذَا ن أَربِّي أَقَا ثْبَانْ ذَايسْ ذِي لْ-إِنْجِيلْ زِي لِيمَانْ غَارْ لِيمَانْ، أَمْ مَامّشْ ثُورَا:

’أَمْسڭَّاذْ س لِيمَانْ أَذْ إِدَّارْ.‘   

لْغَاضَابْ ن أَربِّي

‏18 مِينْزِي أَغْضَابْ ن أَربِّي إِتّْبَانْ-د زڭْ ؤُجنَّا خْ مَارَّا ڒْمُوعْصِييّثْ ذ ثُوعفّْنَا ن إِوْذَانْ إِنِّي إِسّْذُوڒُوينْ ثِيذتّْ س ڒْمُوعْصِييّثْ،

‏19 مِينْزِي ثُوسّْنَا ن أَربِّي إِتّْبَانْ ذَايْسنْ، مِينْزِي أَربِّي أَقَا إِسّْشنْ أَسنْ ث-إِ-د.    ‏20 مِينْزِي مِينْ إِنُّوفَّارنْ ن أَربِّي، أَقَا إِتّْوَاژَارْ س ڒعْقڒْ س ينِّي زَّايسْ د-إِتّْوَاڭّنْ زڭْ وَامِي ثتّْوَاڭّْ دُّونشْثْ، أَمْ جّهْذْ نّسْ ن ڒبْذَا، أَمْ ثِيفْرَاسْ نّسْ ن أَربِّي، أَڒَامِي نِيثْنِي وَارْ غَارْسنْ بُو سْمَاحثْ،    ‏21 مِينْزِي، وَاخَّا سّْننْ أَربِّي، وَارْ ث سّْعُودْجنْ نِيغْ وَارْ ث شكَّارنْ أَمْ أَربِّي، مَاشَا ذوْڒنْ ذ إِپُوهَاڒِييّنْ ذڭْ إِخَارِيصّنْ نْسنْ ؤُشَا ؤُڒْ نْسنْ إِبَارشْننْ، إِذْوڒْ ذ أَفْغُوڒْ.    ‏22 ؤُمِي حسّْبنْ إِخفْ نْسنْ ذ إِمِيغِيسنْ، ذوْڒنْ ذ إِفْغَاڒْ، ‏23 بدّْڒنْ أَعُودْجِي ن أَربِّي ونِّي وَارْ إِفنِّينْ س صِّيفثْ ن ڒخْيَاڒْ ن بْنَاذمْ إِفنَّانْ، س صِّيفثْ ن إِجْضَاضْ ؤُ ن إِمُودَّارنْ س أَربْعَا ن إِضَارنْ ؤُڒَا ن إِمُودَّارنْ نِّي إِتّْپُوعنْ خْ ثمُّورْثْ.     

‏24 س ؤُينِّي إِسلّمْ إِ-ثنْ أَربِّي غَارْ نّشْوَاثْ إِخمْجنْ ن وُوڒَاونْ نْسنْ حِيمَا أَذْ سّْفضْحنْ أَرِّيمَاثْ نْسنْ جَارْ أَسنْ. ‏25 أَقَا نِيثْنِي بدّْڒنْ ثِيذتّْ ن أَربِّي س ؤُخَارِّيقْ، عبْذنْ ؤُ سخَّارنْ إِ مِينْ د-إِتّْوَاخڒْقنْ سنّجْ إِ ونِّي د-إِخڒْقنْ كُوڒْشِي ونِّي ؤُمِي غَارْ ثدْجْ أَعُودْجِي ذ لْبَارَاكَا إِ ڒبْذَا ن ڒبْذَاثْ. أَمِينْ. ‏26 س ؤُينِّي إِسلّمْ إِ-ثنْ أَربِّي غَارْ شّهْوَاثْ إِنْفضْحنْ، مِينْزِي ؤُڒَا ذ ثِيمْغَارِينْ نْسنْ بدّْڒنْثْ أَبْرِيذْ ن طّْبِيعثْ س مِينْ وَارْ إِدْجِينْ ذ طّْبِيعثْ.    ‏27 أَمنِّي إِرْيَازنْ عَاوذْ جِّينْ ثَامُونْثْ عْلَاحْسَابْ طّْبِيعثْ أَكْ-ذ ثمْغَارِينْ، ذعْقنْ س نّشْوَاثْ أَكْ-ذ وَايَاوْيَا، إِرْيَازنْ إِ ث إِتّڭّنْ أَكْ-ذ يرْيَازنْ أَمْ وَارْ غَارْسنْ شَا ڒحْيَا، ؤُشَا قبّْڒنْ ذڭْ إِخفْ نْسنْ ڒْمُونثْ إِ إِسْذَاهدْجنْ إِ ؤُودَّارْ نْسنْ.

‏28 مِينْزِي وَارْ خْسنْ أَذْ كّْسنْ أَوَاڒْ مَاحنْذْ أَذْ سّْننْ أَربِّي، إِسلّمْ إِ-ثنْ أَربِّي غَارْ ڒعْقڒْ وَارْ إِسكّْوِينْ حِيمَا أَذْ ڭّنْ مِينْ وَارْ إِعدّْڒنْ. ‏29 نِيثْنِي عمَّارنْ س عْڒَامْ كُوڒْ ڒْمُوعْصِييّثْ، س فَارْقْ-شّْغڒْ ذ ثَارْزُوڭِي ذ طّْمعْ ذ ثُوعفّْنَا، شُّورنْ س ڒحْسذْ ذ ونْغَايْ ذ ؤُمنْغِي ذ ثحْرَايْمشْثْ ذ إِنْوَاينْ إِعفّْننْ. ‏30 نِيثْنِي سَّاوَاڒنْ س ڒْغَارْ، تّْشقَّافنْ، شَارّْهنْ أَربِّي، نِيثْنِي ذ إِمغْصَابنْ ذ إِمْعفَّارنْ ذ أَيْثْ ن بُو-ؤُقمُّومْ ذ إِمسُوفّْغنْ ن ثُوعفّْنَا، نِيثْنِي وَارْ طِّيعنْ إِ لْوَالِيذِينْ نْسنْ. ‏31 وَارْ ذَايْسنْ ؤُڒْ إِمْثنْ، وَارْ ذَايْسنْ ثَايْرِي ذ وصْڒَاحْ ؤُڒَا ذ أَرّحْمثْ، ‏32 وَاخَّا نِيثْنِي سّْننْ ڒْحُوكْمْ ن أَربِّي، - أَقَا إِنِّي إِتّڭّنْ أَيَا سْذَاهدْجنْ ڒْموْثْ - ، وَاخَّا أَمنِّي نِيثْنِي وَارْ تّڭّنْ مَارَّا مَانْ أَيَا وَاهَا، مَاشَا أَرطَّانْ عَاوذْ خْ ينِّي إِتّڭّنْ أَمنِّي.